আঘোন মাহ আৰু ন খোৱা উৎসৱৰ কিছু পৰম্পৰা

এই আঘোণ মাহ পৰাৰ লগে লগে প্ৰতিজন কৃষিজীৱি লোকৰ বাঢ়ে ব্যস্ততা। আহৰি নাথাকে কোনেও কাৰো মুখলৈ চোৱাৰ। শৰত ঋতুৱে মেলানি মগাৰ লগে লগে প্ৰকৃতিয়ে অতি মৰমেৰে আদৰি আনে হেমন্ত ঋতুক। হেমন্ত ঋতু মানেই আঘোণ-পুহ মাহ। এই আঘোণ মাহ কেৱল এটা মাহেই নহয়, য’ত আছে কৃষকৰ বাবে এক আমোঘ শক্তি, আশা-ভৰসাৰ দিন, এক পৰিতৃপ্তিৰ হাঁহি। কাৰণ আঘোণ মানেই সোণোৱালী শস্যৰ পথাৰ। এই সোণোৱালী শস্যৰ পথাৰখন চাই কৃষকসকলে অনাবিল আনন্দৰে নানা বৰণীয়া ভৱিষ্যতৰ সপোন ৰচে। নিয়ৰসিক্ত লাহী-শালি পকা ধানে হাত বাউলি মাতে কৃষকসকলক।গোটেই বছৰ হাড়ভগা পৰিশ্ৰম কৰা কৃষকসকলে পথাৰভৰা সোণোৱালী ধানে ৰিঙিয়াই মতা আহবানত সোণালী আই লখিমীক আদৰিবলৈ অতি হেঁপাহেৰে নামি পৰে পথাৰত। সোণোৱালী পথাৰখনৰ ধানে কৃষকসকলৰ লগতে আমন্ত্ৰণ জনাই চিনাকি-অচিনাকি নানা ধৰণৰ জাক-জাক পখীক। ধান কটাৰ আৰম্ভণিতে লখিমীক অতি শ্ৰদ্ধাৰে আদৰি অনা হয়। ইয়াক ‘আগ অনা’ বোলে। আই লখিমীক ঘৰলৈ আদৰিবৰ বাবে কৃষকসকলে পঞ্জীকাত এটি শুভ দিন চাই পৰম্পৰাগত নীতি-নিয়মৰ জৰিয়তে আগ আনে। এগছি বন্তি, এখন ফুলাম গামোচা, এখিলা আগলতি কলপাত আৰু এখন কাঁচি লৈ অহা আনোতা পথাৰলৈ যায়। শুচি শুদ্ধতাৰে আগবেলা পথাৰলৈ গৈ ভক্তিভাৱে প্ৰথমে বন্তি গছি জ্বলাই আই লখিমীক প্ৰণাম জনাই একে উশাহতে কাঁচিৰে এমুঠি ধান কাটি আগলতি কলপাতত থৈ গামোচাখনেৰে মেৰিয়াই সীহখিনি আগফালে মূৰত কঢ়িয়াই ঘৰলৈ আহে। লখিমীক আদৰি অনাজনে বাটত ক’লৈকো চাব নোৱৰাৰো এটা পৰম্পৰাগত নিয়ম আছে। ঘৰ পোৱাৰ পিছত গৃহিণীয়ে আনোতাজনক এখন বৰপীৰাত উঠাই ভৰি ধুৱাই দিয়ে।তাৰ পিছত লিপা-পোচা ঠাইত পিৰা এখন পাতি তাৰ ওপৰত আগমুঠি থৈ চাকি বন্তি জ্বলাই নৈবদ্য আগবঢ়ায়। সন্ধিয়া গৃহস্থই নৈবদ্য বিতৰণ কৰি ধানৰ আগমুঠি ভঁড়াল ঘৰৰ সন্মুখৰ খুঁটা এটাত বান্ধি থয়। সেইদিনাৰ পৰা আৰম্ভ কৰে কৃষকে ধান কটাৰ। ধান চপোৱা সময়খিনি কৃষকৰ বৰ আনন্দৰ সময়। নীলা আকাশখনৰ তলত টুনী, বালিমাহী চৰাই উৰি থকা পথাৰখনত কৃষক বনুৱাসকলে ধান কটাত ব্যস্ত হৈ পৰাৰ লগতে কণ কণ ল’ৰা-ছোৱালীহঁতেও নৰাৰ মাজে মাজে ধানৰ লেছেৰি বুটলি ফুৰা আৰু চেঙেলীয়া এচাম ল’ৰাই এন্দুৰৰ গাত খান্দি ধানৰ লেছেৰি বস্তাত ভৰোৱা আদি কামত নামি পৰা পৰিলক্ষিত হয়। মনৰ আনন্দত পথাৰত ঘূৰি ফুৰা ল’ৰা-ছোৱালীবোৰে ৰুদ্ৰ বৰুৱাই গোৱা গীতৰ ফাকি পকা ধানৰ মাজে মাজে সৰু সৰু আলি গোৱা শুনা যায়।দিনটো কৃষকসকলে ধান কাটি আবেলি কান্ধত মেটমৰা ধানৰ ভাৰ অনা আৰু গধূলি পৰত চোতালত মৰণা মৰা দৃশ্যই গঞা অঞ্চলত সঁচাকৈয়ে মনত আনন্দৰ জোৱাৰ তোলে। সুজলা-সুফলা, শস্য-শ্যামলা প্ৰকৃতিৰ অনুপম ৰম্যভূমি সোণগুটি গজা অসমৰ নৈসৰ্গিক প্ৰাকৃতিক সম্পদৰ প্ৰাচুৰ্যৰ বাবেই অসমীয়া গ্ৰাম্য সমাজত বিভিন্ন উৎসৱ পালন কৰা হয়। অসমৰ বিভিন্ন প্ৰান্তত বিভিন্ন সময়ত পালন কৰা উৎসৱ তথা লোকাচৰসমূহৰ ভিতৰত এটা হৈছে ন খোৱা আনন্দোৎসৱ। সৰ্বভাৰতীয় লোক-সংস্কৃতিৰ দৰে অসমীয়া লোক-সংস্কৃতিতো ন-খোৱা উৎসৱ অতীজৰে পৰা পালন কৰি অহা হৈছে। কৃষিজীৱিসকলৰ বাবে সুখৰ আগলি বতৰা কঢ়িয়াই অনা এই আঘোণ মাহতে কৃষকসকলে কিছু ধান চপোৱাৰ পিছতে মৰণা মাৰি উলিওৱা চাউলেৰে ‘ন-খোৱা’ উৎসৱ পাতে। ন-খোৱাৰ বাবে বিশেষ দিন ধাৰ্য কৰি লয়। এটা শুভ দিন চাই আঘোণৰ পথাৰত লহ্পহ্কৈ বাঢ়ি অহা বিভিন্ন শাক-পাচলি, পুখুৰীৰ মাছ, নিজ ঘৰৰ নতুবা বজাৰৰ মাংস আদিৰে নিশা পৰিয়ালটোৰ সকলো সদস্যৰ উপৰি বন্ধু-বান্ধৱ, আত্মীয়-কুটুম আৰু গাঁৱৰ দুই-চাৰিজন মুখীয়াল লোকক নিমন্ত্ৰণ কৰি আটায়ে মিলি ন ধানৰ চাউলেৰে এসাজ ভাত খাই কৃষিজীৱি লোকসকলে বছৰৰ প্ৰথম  ভাত মুঠি আনুষ্ঠানিকভাৱে খোৱাৰ ব্যৱস্থা কৰি তৃপ্তি লাভ কৰে। একেলগে খোৱা এই ভাত সাজে গৃহস্থৰ মনত অপাৰ আনন্দ প্ৰদান কৰে। ন-খোৱা উৎসৱৰ পৰম্পৰা বিভিন্ন জনগোষ্ঠীৰ মাজত বেলেগ বেলেগ যদিও প্ৰত্যেকৰে একেই উদ্দেশ্য আৰু একেই আনন্দ। ন-খোৱাৰ দিনা পুৱা অসমীয়া লোক-সংস্কৃতিৰ পৱিত্ৰতাৰ প্ৰতীক ভঁৰাল ঘৰ মচি-কাচি দুপৰীয়া চোতালৰ তুলসীৰ তলত ঘৰৰ গৃহিণীয়ে চাকি-বন্তি নৈবদ্যৰ সহিতে এটা কলৰ দোনাত ধান থৈ সেৱা জনায়। কোনো কোনো ঠাইত ন-খোৱাৰ দিনা মহিলাসকলে আই লখিমীক আদৰাৰ নাম গায় আৰু উৰুলি দিয়ে। কিছুমান ঠাইত মাঙ্গলিক চিন স্বৰূপ পদুলিমুখত কলপুলিও পোতা দেখা পোৱা যায়। ন-খোৱা উৎসৱ সাধাৰণতে ৰাতি পতা হয় যদিও কোনো কোনো কৃষকে দিনতে পতা দেখা যায়। ন-খোৱাৰ দিনা গো সেৱা এটি অতিকে প্ৰয়োজনীয় অনুষ্ঠান। ন-চাউলৰ ভাত ৰান্ধি এখন আগলতি কলপাতত গোহালিত নি তাত নিজ পথাৰৰ পৰা কেঁচা ধান এমুঠি দি এডোখৰ ঠাই পৰিস্কাৰ কৰি পানীৰে গোহালিৰ মুখ্য গৰুটোৰ ঠেং চাৰিখন ধোৱাই দি সকলো গৰুকে সেৱা কৰি ভাতখিনি খোৱাৰ পিছত সিহঁতক আদৰ সন্মানেৰে গোহালিত বান্ধি থোৱা হয়।সম্প্ৰতি ন-খোৱা উৎসৱ এচাম নৱ-প্ৰজন্মৰ বাবে হৈ পৰিছে অপৰিচিত। অভাৱ, অনাটন, যান্ত্ৰিকতা, আধুনিকতা আৰু সময়ৰ গতিত অসমীয়া কৃতিজীৱি লোকসকলে আড়ম্বৰপূৰ্ণভাৱে পালন কৰি অহা এই কৃষিভিত্তিক ন খোৱা উৎসৱ লোপ পাব ধৰা পৰিলক্ষিত হৈছে। অসমীয়া সমাজত পালিত হোৱা ন-খোৱাৰ লেখীয়া সৰু-বৰ লোকাচাৰসমূহে অসমীয়া সমাজখনলৈ কঢ়িয়াই আনে ঐক্য  আৰু প্ৰেমৰ আকুলতা। গতিকে এনে ধৰণৰ পৰম্পৰাগত লোকাচাৰসমূহক আমাৰ মাজৰ পৰা হেৰাই যাবলৈ দিয়াতো একেবাৰে অনুচিত। কিয়নো মানুহৰ দৈনন্দিন কাৰ্যৰ সৈতে জড়িত এই লোকাচাৰসমূহে অসমীয়া জনসাধাৰণৰ গভীৰ জীৱনবোধৰ পৰিচয় দিয়ে। আধুনিকতাৰ নামত গা কৰি উঠা পশ্চিমীয়া সভ্যতাত এই পৰম্পৰাগত ৰীতিক অমি কেতিয়াও লীন যাব দিব নোৱাৰো। এয়া শিৱসাগৰৰ দিলিস্তান খানৰ বিশেষ লেখা ।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

নাগশংকৰত ৰাষ্ট্ৰীয় শিক্ষাৰ্থী দিৱস উদযাপন

চতিয়াৰ নিকটৱৰ্তী নাগশংকৰ উচ্চ মাধ্যমিক বিদ্যালয়ত ৰাষ্ট্ৰীয় শিক্ষাৰ্থী বাহিনীৰ উদ্যোগত আজি দিনজোৰা কাৰ্যসূচীৰে ৭৩ তম স্থাপনা দিৱস উদযাপন কৰা হয়। পুৱা নাগশংকৰ উচ্চ মাধ্যমিক বিদ্যালয়ৰ প্ৰাক্তন ৰাষ্ট্ৰীয় শিক্ষাৰ্থী বাহিনীৰ বিষয়া বানেশ্বৰ বৰাই পতাকা উত্তোলন কৰি কাৰ্যসূচী মুকলি কৰে। ইয়াৰ পিছতে নাগশংকৰ আৰু দক্ষিণ নাগশংকৰ উচ্চ মাধ্যমিক বিদ্যালয়ৰ ছাত্ৰ-ছাত্ৰীসকলে কুচ-কাৱাজত অংশগ্ৰহণ কৰে।বিদ্যালয়ৰ প্ৰধান শিক্ষয়িত্ৰী লাৱণ্য দেৱীৰ অধ্যক্ষতাত অনুষ্ঠিত মুকলি সভাৰ আৰম্ভণিতে নয়ণজ্যোতি নাথে বৰগীত পৰিবেশন কৰে। নাগশংকৰ উচ্চ মাধ্যমিক বিদ্যালয়ৰ ৰাষ্ট্ৰীয় শিক্ষাৰ্থী বাহিনীৰ তত্বাৱধায়ক নয়ণজ্যোতি শইকীয়াই উদ্দেশ্য ব্যাখ্যা কৰা সভাত দক্ষিণ নাগশংকৰ উচ্চ মাধ্যমিক বিদ্যালয়ৰ ৰাষ্ট্ৰীয় শিক্ষাৰ্থী বাহিনীৰ তত্বাৱধায়ক শিক্ষক অঞ্জন বাচকোটাই ৰাষ্ট্ৰীয় শিক্ষাৰ্থী বাহিনীৰ বিষয়ে ছাত্ৰ-ছাত্ৰীৰ উপযোগী বক্তব্য প্ৰদান কৰে।অনুষ্ঠানত কুসুমতোলা আঞ্চলিক উচ্চতৰ মাধ্যমিক বিদ্যালয়ৰ ৰাষ্ট্ৰীয় শিক্ষাৰ্থী বাহিনীৰ তত্বাৱধায়ক শিক্ষক ‌ধনঞ্জয় সুত্ৰধৰ বিশিষ্ট অতিথি হিচাপে উপস্থিত থাকি ছাত্ৰ-ছাত্ৰীক উদ্দেশ্যি মননশীল ভাষণ প্ৰদান কৰে। অনুষ্ঠানৰ মাজতে শিক্ষাৰ্থী বাহিনীৰ ছাত্ৰ-ছাত্ৰী যথাক্ৰমে নিকিতা কালান্দী, লুনা শইকীয়া, সুনম দেৱী, পল্লৱী সৱৰ, নয়ণজ্যোতি নাথে বিভিন্ন কাৰ্যসূচী প্ৰদৰ্শন কৰে।নাগশংকৰ উচ্চ মাধ্যমিক বিদ্যালয়ৰ ৰাষ্ট্ৰীয় শিক্ষাৰ্থী বাহিনীৰ প্ৰাক্তন তত্বাৱধায়ক শিক্ষক বাণেশ্বৰ বৰাই ছাত্ৰ-ছাত্ৰীক উদ্দেশ্যি মনোজ্ঞ ভাষণ প্ৰদান কৰে। নাগশংকৰ উচ্চ মাধ্যমিক বিদ্যালয়ৰ ৰাষ্ট্ৰীয় শিক্ষাৰ্থী বাহিনীৰ ছাত্ৰ-ছাত্ৰীসকলে থলুৱা লোক-বাদ্য বাদন পৰিৱেশন কৰি পৰিৱেশ জীপাল কৰে। সভাত বিদ্যালয়ৰ শিক্ষক-শিক্ষয়িত্ৰী ভোলা শৰ্মা, ৰাণা বৰদলৈ, ঘন ওৰাঙৰ লগতে ৰাষ্ট্ৰীয় শিক্ষাৰ্থী বাহিনীৰ প্ৰাক্তন ছাত্ৰ-ছাত্ৰীসকল উপস্থিত আছিল। সভাৰ শেষত নাগশংকৰ উচ্চ মাধ্যমিক বিদ্যালয়ৰ ৰাষ্ট্ৰীয় শিক্ষাৰ্থী বাহিনীৰ তত্বাৱধায়ক শিক্ষক নয়ণমনি শইকীয়াই সকলোকে শলাগ জ্ঞাপন কৰে।
বাতৰি যুগুতালে ৰাতুল হাজৰিকাই

বালিপৰাত জনগোষ্ঠীয় সাংস্কৃতিক ঐক্যমঞ্চ,অসমৰ শোণিতপুৰ জিলা সমিতি গঠন

বালিপৰাত জনগোষ্ঠীয় সাংস্কৃতিক ঐক্যমঞ্চ,অসমৰ শোণিতপুৰ অসমৰ সকলো জাতি,জনগোষ্ঠীৰ মাজত সমন্বয়, ঐক্যভাৱ সৃষ্টি কৰাৰ ক্ষেত্ৰত গুৰুত্বপূৰ্ণ অৰিহণা আগবঢ়াই অহা সংগঠন জনগোষ্ঠীয় সাংস্কৃতিক ঐক্যমঞ্চ,অসমৰ কেন্দ্ৰীয় সমিতিৰ উদ্যোগত আজি শোণিতপুৰৰ বালিপৰাৰ খেলমাটি আদাবাৰী মধ্য ইংৰাজী বিদ্যালয়ত সাধাৰণ সভা আৰু জিলা সমিতি গঠন বিষয়ক এখন সভা অনুষ্ঠিত হয় । পুৱা ১০ বজাৰপৰা বিদ্যালয় সভাকক্ষত শোণিতপুৰ জিলা সাহিত্য সভাৰ প্ৰাক্তন সম্পাদক তথা বৰ্তমান অসম সাহিত্য সভাৰ তথ্যকোষৰ আহ্বায়ক মৃদুল চহৰীয়াই সভাপতিত্ব কৰা সভাখনত আঁত ধৰাৰ লগতে সভাৰ উদ্দেশ্য ব্যাখ্যা কৰে খেলমাটি আদাবাৰী মধ্য ইংৰাজী বিদ্যালয়ৰ সহকাৰী শিক্ষক, বিশিষ্ট সাহিত্যিক, অনুবাদক ছত্ৰমান চুব্বাই।অনুষ্ঠানত জনগোষ্ঠীয় সাংস্কৃতিক ঐক্যমঞ্চ,অসমৰ কেন্দ্ৰীয় সাধাৰণ সম্পাদক প্ৰহ্লাদ মিলিয়ে সংগঠনৰ কাৰ্যক্ৰমণিকা, আদৰ্শ, সমন্বয়মূলক কাম-কাজ, জনগোষ্ঠীৰ বিকাশৰ বাবে সংগঠনে গ্ৰহণ কৰি অহা বিভিন্ন পদক্ষেপ সমূহৰ লগতে শোণিতপুৰ জিলাত এখন সমিতি গঠন বিষয়তো অৱলোকন কৰে। অনুষ্ঠানটোত উপস্থিত আছা, আটছা, আক্ৰাছু, বেংগলী ফেডাৰেশ্যন, এবছু, সদৌ অসম কৰ্মচাৰী পৰিষদকে আদি কৰি বিভিন্ন দল-সংগঠনৰ সভাপতি-সম্পাদকসহ বিষয়ববীয়া, কেইবাখনো জনগোষ্ঠীয় সাহিত্য সভাৰ বিষয়ববীয়া, গাঁও পঞ্চায়তৰ প্ৰতিনিধি, ৰাইজৰ প্ৰতিনিধি, শিক্ষক প্ৰতিনিধি, লিম্বু মহাসভাৰ প্ৰতিনিধি, বিভিন্ন জাতি-জনগোষ্ঠীৰ প্ৰতিনিধি, বালিপৰা প্ৰেছ ক্লাবৰ প্ৰতিনিধি, জনগোষ্ঠীয় সাংস্কৃতিক ঐক্যমঞ্চ অসমৰ কেন্দ্ৰীয় প্ৰতিনিধিবৰ্গ, জীয়াভৰলী সাহিত্য গোষ্ঠীৰ বিষয়ববীয়া, অসম নেপালী সাহিত্য সভাৰ প্ৰতিনিধি, যুৱ মৰ্চাৰ প্ৰতিনিধি, খনামুখ শাখা সাহিত্য সভাৰ সভাপতি ৰঞ্জিৎ চহৰীয়াসহ বিষয়ববীয়াসকল, আছুৰ প্ৰতিনিধি, বিভিন্ন বিদ্যালয়ৰ শিক্ষকবৃন্দ, গাৰো সাহিত্য সভাৰ প্ৰতিনিধি, আগছুৰ জিলা সভাপতি দীপক চুব্বাসহ প্ৰতিনিধি, কুৰ্মী যুৱ পৰিষদৰ বিষয়ববীয়া, কেইবাজনো সংগীতশিল্পী, ৰাইজ উপস্থিত থাকে । অনুষ্ঠানতেই সৰ্বসন্মতিমৰ্মে ক্ৰমে বিশিষ্ট কবি ললিত বসুমতাৰীক সভাপতি , কবি, সমাজ সংগঠক ৰঞ্জিৎ চহৰীয়াক কাৰ্যকৰী সভাপতি আৰু
যুৱ নিৱন্ধকাৰ প্ৰাঞ্জল প্ৰতিম বৰাক সম্পাদক হিচাপে লৈ জনগোষ্ঠীয় সাংস্কৃতিক ঐক্যমঞ্চ অসমৰ শোণিতপুৰ জিলাৰ ৩১ জনীয়া সমিতিখন গঠন কৰা হয় ।সভাত উপস্থিত বিভিন্ন দল-সংগঠনৰ প্ৰতিনিধি, সমাজৰ বিভিন্ন পদবীৰ প্ৰতিনিধিসকলে অসমৰ সাতামপুৰুষীয়া ঐক্য,সম্প্ৰীতি অটুট ৰখাৰ ক্ষেত্ৰত সকলো জাতি-জনগোষ্ঠীৰ লোকসকল একগোট হোৱাৰ প্ৰয়োজনীয়তা, সমাজৰপৰা অপশক্তিসমূহক প্ৰতিহত কৰা, সমাজত কৰ্ম আৰু সজাগতামূলক অনুষ্ঠানৰ যোগেদি সমন্বয়মূলক ভাৱধাৰা বিকাশ সাধন কৰা ইত্যাদি বিভিন্ন বিষয়ত ভাষণ আগবঢ়াই নতুনকৈ গঠন হোৱা শোণিতপুৰ জিলা সমিতিক শুভেচ্ছা জনায় । উল্লেখ্যে যে , সভাৰ আৰম্ভণীতে সাংস্কৃতিক শিল্পী দক্ষিণা দেৱী গজুৰেলে বন্দনা পাঠ কৰে । লগতে অনুষ্ঠানৰ লগত সংগতি ৰাখি বড়োৰ লগতে বিভিন্ন জনগোষ্ঠীয় নৃত্য পৰিৱেশন, গীত-কবিতা পৰিৱেশন কৰা হয়।

মিৰ্জাত জ্ঞানপীঠ বটাঁ বিজয়িনী ড° মামণি ৰয়ছম গোস্বামীৰ দশম মৃত্যুবাৰ্ষিকী পালন

জ্ঞানপীঠ বঁটা বিজয়ী সাহিত্য সম্ৰাজ্ঞী তথা দক্ষিণ কামৰূপৰ সু-সন্তান ড° মামণি ৰয়চম গোস্বামীৰ আজি দশম সংখ্যক মৃত্যু বাৰ্ষিকী। সেই উপলক্ষে দক্ষিণ কামৰূপ ছাত্ৰ সন্থাৰ উদ্যোগত দিনজোৰা কাৰ্যসূচীৰে মিৰ্জাৰ মামণি ৰয়চম গোস্বামী চক’ত এক শ্ৰদ্ধাঞ্জলি অনুষ্ঠান অনুষ্ঠিত কৰা হয়। পুৱা ৬ বজাত এই শ্ৰদ্ধাঞ্জলি অনুষ্ঠানৰ লগত সংগতি ৰাখি মামণি ৰয়ছম গোস্বামী চ’কত এক সমূহীয়া চাফাই অভিযান ৰূপায়ণ কৰা হয়। দক্ষিণ কামৰূপ ছাত্ৰ সন্থাৰ সভাপতি পৃথিৱী দাসে সভাপতিত্বত অনুষ্ঠিত হোৱা সভাৰ আঁত ধৰে শিক্ষা সম্পাদক বেদব্ৰত দাসে। ইয়াৰ পিছত ক্ৰমে শ্ৰদ্ধাঞ্জলি অনুষ্ঠান, সৰ্ব ধৰ্মীয় প্ৰাৰ্থনা, নাম প্ৰসংগ আদি বিভিন্ন ধৰণৰ অনুষ্ঠানৰ আয়োজন কৰাৰ লগতে সন্ধিয়া ৫ বজাত ২০০০ গছি বন্তি প্ৰজ্জ্বলন কৰি তেওঁক শ্ৰদ্ধাঞ্জলি জ্ঞাপন কৰা হয়। উল্লেখ্য যে দিনজোৰা কাৰ্যসূচীৰে অনুষ্ঠিত কৰা উক্ত কাৰ্য্যসূচীত পলাশবাৰী সমষ্টিৰ বিধায়ক হেমাংগ ঠাকূৰীয়া, দক্ষিণ কামৰূপ মহাবিদ্যালয়ৰ অধ্যক্ষ ড° নৱজ্যোতি দাস, দক্ষিণ কামৰূপ ছোৱালী মহাবিদ্যালয়ৰ ভাৰপ্ৰাপ্ত অধ্যক্ষ ড° ৰঞ্জন ভূঞা, ৰামপুৰ আঞ্চলিক মহাবিদ্যালয়ৰ অধ্যক্ষ ড° দীনমণি কলিতা, অমৃত চন্দ্ৰ ঠাকুৰীয়া বাণিজ্য কনিষ্ঠ মহাবিদ্যালয়ৰ অধ্যক্ষ সমীৰণ শৰ্মা, পলাশবাৰী সাহিত্য সভাৰ সভাপতি যুগল চন্দ্ৰ বৈশ্য, সদৌ কামৰূপ জিলা ছাত্ৰ সন্থাৰ উপদেষ্টা নিৰোদ কুমাৰ দাস, বিত্ত সম্পাদক ঋতুমণি চৌধুৰী, দক্ষিণ কামৰূপ ছাত্ৰ সন্থাৰ সাধাৰণ সম্পাদক জিতুল কুমাৰ, দক্ষিণ কামৰূপ অঞ্চলৰ বহু কেইজন বিশিষ্ট ব্যক্তিৰ লগতে বিদ্যালয়-মহাবিদ্যালয়ৰ ছাত্ৰ-ছাত্ৰী সকলেও এই শ্ৰদ্ধাঞ্জলি অনুষ্ঠানত উপস্থিত থাকি মামণি ৰয়ছম গোস্বামীক একাঁজলী পুষ্পাঞ্জলীৰে শ্ৰদ্ধাঞ্জলি জ্ঞাপন কৰে । আনহাতে, বাইদেউৰ স্মৃতি যুগমীয়া কৰি ৰখাৰ বাবে দক্ষিণ কামৰূপ ছাত্র সন্থাই তেওঁৰ নামেৰে অহা বছৰৰ পৰা সাহিত্য বটা প্ৰদান কৰিব বুলি কামৰূপ জিলা ছাত্ৰ সন্থাৰ উপদেষ্টা নিৰোদ কুমাৰ দাসে জানিবলৈ দিয়ে।

ঢকুৱাখনা টাউন মিচিং ছাত্ৰ সন্থাৰ ৩০ সংখ্যক কাংকিন কেবাং

ৰাজ্যখনৰ  ভূমিপুত্ৰ মিচিং জনগোষ্ঠীৰ ভাষা তিব্বত চীনৰ ভাষিক পৰিয়ালৰে সম্পৃক্ত ভাষা আৰু জনগোষ্ঠীটোৰ স্বগোষ্ঠীয় ভাষাটো নিজস্ব স্বকীয় ধ্বনিতাত্তিক আৰু ৰূপতাত্তিক বৈশিষ্ট্যৰে সমৃদ্ধ । পূৰ্বৱৰ্তী সময়ত জনগোষ্ঠীয় ভাষাটোৰ নিজস্ব লিপি নাছিল কাৰণে কথিত ৰূপত আছিল । পৰিবৰ্তিত সময়ত দ্বিতীয় সৰ্ববৃহৎ ভৈয়াম জনগোষ্ঠীলৈ  উন্নীত হোৱা মিচিং জনগোষ্ঠীৰ লিখিত লিপি ভাষা উপলব্ধ হল। কিন্তু নিজস্ব ভাষাত  কাব্য সাহিত্যৰ চর্চাৰ ধাৰা অতি সীমিত হৈ ৰল । এয়া জনগোষ্ঠীটোৰ অস্তিত্বৰ বাবে এক বৌদ্ধিক  প্ৰত্যাহ্বান। যি জাতিৰ নিজস্ব  ভাষাৰে লিখিত ইতিহাস বা কাব্য সাহিত্যৰ বৰ্ণময় ৰূপ নাথাকে তেনে জাতিৰ ভৱিষ্যত অসুৰক্ষিত  আৰু দীৰ্ঘজীৱিও নহয়। 
ঢকুৱাখনা জনজাতি কৃষ্টি ভৱন প্ৰাংগনত  আজি দিনজোৰাকৈ অনুষ্ঠিত টাউন মিচিং ছাত্ৰ সন্থাৰ ৩০ সংখ্যক কাংকিন কেবাংৰ মুকলি সভাত কেবাং উপলক্ষত  প্ৰকাশ কৰি উলিওৱা স্মৃতিগ্ৰন্থ” কাংকিন” উন্মোচন কৰি এই মন্তব্য কৰে বিশিষ্ট সাংস্কৃতিক কৰ্মী, ধেমাজি জিলাৰ  জ্যেষ্ঠ কৃষি বিষয়া ভৱজিত দলেয়ে।  অৱনৰী জনজাতি উচ্চ মাধ্যমিক বিদ্যালয়ৰ অৱসৰী শিক্ষক মণি কান্ত মেদকৰ স্মৃতিত পুত্ৰ সোৱণশিৰী গাঁও পঞ্চায়তৰ সভাপতি খনিন্দ্ৰ মেদকে প্রকাশ কৰি উলিওৱা কেবাংৰ নৱম সংখ্যক প্ৰকাশ “কাংকিন”  উন্মোচনৰ পাছতে অনুষ্ঠিত হয় মুকলি সভা। টাকাম মিচিং ছাত্ৰ সন্থাৰ প্ৰাক্তন সাধাৰণ সম্পাদক ইন্দ্ৰ কুমাৰ চুংক্ৰাংয়ে  শুভ উদ্ধোধন কৰা মুকলি সভাত নগৰ সমিতিৰ সভাপতি অনিল দলেয়ে সভাপতিত্ব কৰে ।  সভাত মুখ্য অতিথিৰ ভাষণত এম এ চিৰ অধ্যক্ষ সুনীল পেগুৱে  স্বজাতিৰ নৱ প্ৰজন্মৰ হাততে জাতিটোৰ ভৱিষ্যত নিৰ্ভৰশীল বুলি কৈ বিভিন্ন মহাবিদ্যালয়ত শিক্ষা গ্ৰহণ কৰি অহা  শিক্ষাৰ্থী সকলক বিদ্যায়তনিক দিশত অধিক মনোনিবেশ কৰাৰ লগতে সাংস্কৃতিক , সামাজিক দায়বদ্ধতাৰে স্বগোষ্ঠীয় সমাজখনক  সৰ্বাংগীন দিশত গতিশীলতা প্ৰদানৰ আহ্বান জনায়। জনাকীৰ্ণ সভাখনত  ৱৰ্ল্ড বুক অফ টেলেণ্ট ৰেকৰ্ড ২০২০,  ইণ্ডিয়ান আইকণ এৱাৰ্ড২০২১ , ভাৰত ভূষণ ২০২১ কে ধৰি ৰাষ্ট্ৰীয় পৰ্যায়ৰ  মুঠ ১৩ টা প্ৰদক প্ৰাপক বগীনদীৰ সুসন্তান সৃষ্টি ৰাণী টাইডক বিশেষ ভাবে সম্বৰ্ধনা জনোৱা হয়।  সম্বৰ্ধনা গ্ৰহণ কৰি তত্ব গধুৰ বক্তব্যত প্ৰতিষ্ঠিত লেখিকা টাইদে  আধুনিকীকৰণ মানৱ সমাজৰ উত্তৰণৰ বাবে প্ৰয়োজনীয় যদিও এনে নব্য আধুনিকীকৰণ ধ্যান ধাৰণাৰ মাজেৰে নিজস্ব ভাষা লোক  কৃষ্টি সংস্কৃতিৰো চৰ্চাৰ ধাৰা অব্যাহত ৰাখিলেহে জাতিয় উত্তৰণৰ পথ প্ৰশস্ত হব বুলি কৈ নব প্ৰজন্মৰ হাতত এই গধুৰ জাতীয় দায়িত্ব অৰ্পিত বুলি কয়। সভাত  টি এম এম কেৰ কেন্দ্ৰীয় সম্পাদিকা বন্তি বালা পেগু, শিক্ষাবিদ নিৰঞ্জন পেগু , সদৰ থানাৰ অচি মণ্টু ৰাম বৰা , উত্তম কুমাৰ দলে আদিয়ে বক্তব্য আগবঢ়াই ।  নবাগত শিক্ষাৰ্থী সকলৰ পৰিচয় পৰ্ব আৰু বিভিন্ন সাংস্কৃতিক অনুষ্ঠানেৰে জীপাল হোৱা সভাত  মিচিং জাতিয় সংগঠনৰ কেন্দ্ৰীয় আৰু জিলাৰ নেতৃবৰ্গ উপস্থিত  থাকে।  সন্ধিয়া মিচিং পৰম্পৰাগত সৌন্দৰ্য প্ৰতিযোগিতা আৰু নিশালৈ বৰ্ণাঢ্য সাংস্কৃতিক কাৰ্যসূচীৰে কাংকিন কেবাংৰ সফল পৰিসমাপ্তি হয়। বাতৰি যুগুতালে অমৃত পৱন বৰাই।

বি এছ এফৰ গুৱাহাটী ফ্ৰণ্টিয়াৰৰ উদ্যোগত মহাবীৰ লাচিতঘাটত দেশপ্ৰেমমূলক সংগীতানুষ্ঠান অনুষ্ঠিত

ভাৰত – বাংলাদেশ আৰু ভাৰত – পাকিস্তানৰ আন্তৰ্জাতিক সীমান্তৰ নিৰাপত্তা আৰু পহৰা কাৰ্যৰ বাবে ১৯৬৫ চনৰ পহিলা ডিচেম্বৰত কেন্দ্ৰীয় গৃহ মন্ত্ৰণালয়ে গঠন কৰা সীমান্ত নিৰাপত্তা বাহিনী চমুকৈ বি এছ এফে পহিলা ডিচেম্বৰত ৫৬ সংখ্যক প্ৰতিষ্ঠা দিৱস উদযাপন কৰিব । আনহাতে প্ৰতিষ্ঠা দিৱসৰ লগত সংগতি ৰাখি বি এছ এফৰ আজাৰা পাটগাঁওস্থিত গুৱাহাটী ফ্ৰণ্টিয়াৰ মুখ্য কাৰ্যালয়ৰ উদ্যোগত কালি বিয়লি গুৱাহাটীৰ মাছখোৱাৰ ব্ৰহ্মপুত্ৰৰ পাৰত থকা মহাবীৰ লাচিত বৰফুকন ঘাটত এক দেশপ্ৰেমমূলক সংগীতানুষ্ঠান আৰু প্ৰশিক্ষিত কুকৰৰ এক প্ৰদৰ্শনী অনুষ্ঠিত হয় । অনুষ্ঠানটো উদ্ধোধন কৰে বি এছ এফৰ গুৱাহাটী ফ্ৰণ্টিয়াৰৰ মহাপৰিদর্শক সঞ্জয় সিং গেহলটে । এই উপলক্ষে অনুষ্ঠিত চমু অনুষ্ঠানত মহাপৰিদর্শক গেহলটে বি এছ এফৰ জোৱান সকলে ৰ`দ , বতাহ , বৰষুণ , গৰম , বৰফ , ধুমুহাকে ধৰি নানা প্ৰাকৃতিক প্ৰতিকূলতাক নেওচিও কিদৰে সীমান্তত অতীন্দ্ৰ প্ৰহৰী হিচাপে দায়িত্ব পালন কৰি আহিছে তাৰ আলোকপাত কৰে । অনুষ্ঠানত গুৱাহাটী ফ্ৰণ্টিয়াৰৰ মহিলা কল্যাণ সংস্থাৰ সভানেত্ৰী সীমা গেহলট , উপ মহাপৰিদর্শক আশুতোষ শৰ্মা , কমাণ্ডেণ্টদ্বয় ডাঃ বিনীত কুমাৰ আৰু সুৰেশ কুমাৰকে ধৰি বি এছ এফৰ কেবাজনো বিষয়া উপস্থিত থাকে । আনহাতে অনুষ্ঠানত বাহিনীটোৰ কেবাজনো জোৱানে দেশপ্ৰেমমূলক সংগীত পৰিবেশন কৰে । তেনেদৰে বাহিনীটোৰ এটা বেণ্ড শিল্পীৰ দলে যন্ত্ৰ সংগীতৰে সুৰৰ মায়াজাল সৃষ্টি কৰি উপস্থিত সকলোকে আপ্লুত কৰে । ইয়াৰ পূৰ্বে বাহিনীটোৰ উচ্চ প্ৰশিক্ষিত কেবাটাও কুকুৰে বিভিন্ন কলা কৌশল , সীমান্তত শত্ৰুৰ গতিবিধি নিৰীক্ষণ , মাদক দ্ৰব্য বা নিচাযুক্ত সামগ্ৰী চিনাক্তৰণ কৰা আদি প্ৰদৰ্শন কৰে।
বাতৰি যুগুতালে জিতুমণি দাসে

পলাশবাৰী উপৰহালী প্ৰাক্তন সৈনিক সমাৰোহ

পলাশবাৰী উপৰহালীস্থিত চিলাৰায় ভৱনত আজি দিনযোৰা কাৰ্যসূচীৰে মিৰ্জা আঞ্চলিক প্ৰাক্তন সৈনিক সমাৰোহ অনুষ্ঠিত হয়। মিৰ্জা আঞ্চলিক প্ৰাক্তন সৈনিক সকলৰ লগতে পৰিয়ালবৰ্গ আৰু বিধৱা বীৰ নাৰীসকলক একত্ৰিত কৰাৰ বাবে উক্ত প্ৰাক্তন সৈনিক সমাৰোহ অনুষ্ঠিত কৰিছে। এই উপলক্ষে পুৱা চাফাই অভিযান আৰু বৃক্ষ ৰোপন কৰে মিৰ্জা আঞ্চলিক প্ৰাক্তন সৈনিক সন্থাৰ উপদেষ্টা ৰাম প্ৰসাদ তালুকদাৰে। ৯ বজাত পতাকা উত্তোলন কৰে সৈনিক সন্থাৰ সভাপতি সুধন্ন কলিতাই। ১১ বজাত শ্বহীদ বেদীত বন্তি প্ৰজ্বলন কৰে সৈনিক সন্থাৰ উপদেষ্টা বীৰেন কলিতাই। ইয়াৰ পিছতে শ্ৰদ্ধাঞ্জলি অৰ্পন কৰে সৈনিক সন্থাৰ উপ-সভাপতি ভদ্ৰেশ্বৰ দাস আৰু সহ: সম্পাদক আনন্দদেৱ শৰ্মাই। ১১ বজাত সৈনিক সন্থাৰ সভাপতি সুধন্ন কলিতাৰ পৌৰোহিত্যত অনুষ্ঠিত হোৱা মুকলি সমাৰোহত পলাশবাৰী সমষ্টিৰ বিধায়ক হেমাংগ ঠাকুৰীয়াই উপস্থিত থাকি প্ৰাক্তন সৈনিক সন্থাৰ ভুমি আৱণ্টনৰ লগতে এটি গৃহ নিৰ্মাণ কৰি দিয়াৰ বাবে ভাষণ প্ৰসঙ্গত উল্লেখ কৰে। অনুষ্ঠানত বিশিষ্ট অতিথি হিচাপে গুৱাহাটী এয়াৰ ফোৰ্চ ষ্টেচনৰ এয়াৰ অফিচাৰ কামাণ্ডিং, অৱসৰপ্ৰাপ্ত ব্ৰিগেডিয়াৰ নাৰায়ণ দত্ত, বেংক অফ বৰোদাৰ পৰিচালক ব্ৰিগেডিয়াৰ ৰাৱাত উপস্থিত থকাৰ উপৰিও নিৰ্দিষ্ট বক্তা হিচাপে অৱসৰপ্ৰাপ্ত চুবেদাৰ তথা জিলা সৈনিক কল্যাণ বিষয়া বসন্ত বৰুৱাই উপস্থিত থাকি ভাষণ প্ৰদান কৰে। উক্ত সমাৰোহত বিশেষভাৱে সম্বৰ্ধনা জনোৱা হয় অসমৰ পৰা লাডাখলৈ পদযাত্ৰা কৰি অভিলেখ সৃষ্টি কৰা ক্ৰীড়াবিদ অঞ্জলি দাসক। অনুষ্ঠানত উপৰহালী ৰাইজ গয়ৰহৰ সভাপতি/সম্পাদক উপস্থিত থকাৰ লগতে অৱসৰপ্ৰাপ্ত সৈনিক সকল উপস্থিত থাকে।