প্লাষ্টিকে জনস্বাস্থ্যলৈ ভাবুকি কঢ়িয়াইছে

প্লাষ্টিক আধুনিক জীৱন যাত্ৰাৰ অন্যতম সমল।আমি সকলোৱে বজাৰ কৰোতে প্লাষ্টিকৰ বেগ ব্যৱহাৰ কৰো।কিন্তু দুখৰ বিষয় যে প্লাষ্টিকে আমি নজনাকৈয়ে ভয়াবহতা কঢ়িয়াই আনিছে ।যাৰ ফলত স্বাস্থ্য আৰু পৰিবেশ প্ৰদূষণ হৈছে।বতৰৰ সঘনে সলনি হোৱাটোও অন্যতম কাৰক হিচাপে বিবেচিত হৈছে ।প্লাষ্টিক ব্যৱহাৰ কৰি যেতিয়া মাটি পেলায় দিয়া হয়,ই মাটিৰ লগত মিলি নাযায়।বৰঞ্চ ই মাটিৰ উৰ্বৰা শক্তি হ্ৰাস কৰে।আনহাতে পানীত পেলালেও জলজ প্ৰাণীৰ জীৱনলৈ ভাবুকি কঢ়িয়াই আনে।যাৰ ফলত মাছ, কাছ আদিৰ জীৱন বিপন্ন হৈ পৰে।এক সমীক্ষা প্ৰকাশ পোৱা তথ্য অনুসৰি প্লাষ্টিক পৰিবেশ প্ৰদূষণৰ অন্যতম ধাৰক।প্লাষ্টিকৰ ভয়াবহতাৰ প্ৰতি লক্ষ্য ৰাখি ইতিমধ্যে বিভিন্ন দেশত প্লাষ্টিক নিষিদ্ধ কৰিছে।ইয়াৰ বিপৰীতে আমাৰ দেশত আংশিক প্ৰভাৱ পৰাহে পৰিলক্ষিত হৈছে ।অসমৰ চুবুৰীয়া ৰাজ্য মেঘালয়ৰ উলিয়াম নগৰত পলিথিন বেগ নিষিদ্ধ হৈছে।শেহতীয়াকৈ মণিপুৰৰ ইম্ফল চহৰত প্লাষ্টিক নিষিদ্ধকৰণৰ কৰাৰ বাবে তৎপৰ হৈ পৰা বুলি জানিব পৰা গৈছে ।এইক্ষেত্ৰত ৰাজ্যৰ বিভাগীয় কৰ্তৃপক্ষই বিষয়টো গুৰুত্ব সহকাৰে লয় নিশ্চয়কে দেশৰ ভিতৰতে অন্যতম ৰাজ্য হিচাপে পৰিগণিত হ’ব।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

বালিপৰাত জনগোষ্ঠীয় সাংস্কৃতিক ঐক্যমঞ্চ,অসমৰ শোণিতপুৰ জিলা সমিতি গঠন

বালিপৰাত জনগোষ্ঠীয় সাংস্কৃতিক ঐক্যমঞ্চ,অসমৰ শোণিতপুৰ অসমৰ সকলো জাতি,জনগোষ্ঠীৰ মাজত সমন্বয়, ঐক্যভাৱ সৃষ্টি কৰাৰ ক্ষেত্ৰত গুৰুত্বপূৰ্ণ অৰিহণা আগবঢ়াই অহা সংগঠন জনগোষ্ঠীয় সাংস্কৃতিক ঐক্যমঞ্চ,অসমৰ কেন্দ্ৰীয় সমিতিৰ উদ্যোগত আজি শোণিতপুৰৰ বালিপৰাৰ খেলমাটি আদাবাৰী মধ্য ইংৰাজী বিদ্যালয়ত সাধাৰণ সভা আৰু জিলা সমিতি গঠন বিষয়ক এখন সভা অনুষ্ঠিত হয় । পুৱা ১০ বজাৰপৰা বিদ্যালয় সভাকক্ষত শোণিতপুৰ জিলা সাহিত্য সভাৰ প্ৰাক্তন সম্পাদক তথা বৰ্তমান অসম সাহিত্য সভাৰ তথ্যকোষৰ আহ্বায়ক মৃদুল চহৰীয়াই সভাপতিত্ব কৰা সভাখনত আঁত ধৰাৰ লগতে সভাৰ উদ্দেশ্য ব্যাখ্যা কৰে খেলমাটি আদাবাৰী মধ্য ইংৰাজী বিদ্যালয়ৰ সহকাৰী শিক্ষক, বিশিষ্ট সাহিত্যিক, অনুবাদক ছত্ৰমান চুব্বাই।অনুষ্ঠানত জনগোষ্ঠীয় সাংস্কৃতিক ঐক্যমঞ্চ,অসমৰ কেন্দ্ৰীয় সাধাৰণ সম্পাদক প্ৰহ্লাদ মিলিয়ে সংগঠনৰ কাৰ্যক্ৰমণিকা, আদৰ্শ, সমন্বয়মূলক কাম-কাজ, জনগোষ্ঠীৰ বিকাশৰ বাবে সংগঠনে গ্ৰহণ কৰি অহা বিভিন্ন পদক্ষেপ সমূহৰ লগতে শোণিতপুৰ জিলাত এখন সমিতি গঠন বিষয়তো অৱলোকন কৰে। অনুষ্ঠানটোত উপস্থিত আছা, আটছা, আক্ৰাছু, বেংগলী ফেডাৰেশ্যন, এবছু, সদৌ অসম কৰ্মচাৰী পৰিষদকে আদি কৰি বিভিন্ন দল-সংগঠনৰ সভাপতি-সম্পাদকসহ বিষয়ববীয়া, কেইবাখনো জনগোষ্ঠীয় সাহিত্য সভাৰ বিষয়ববীয়া, গাঁও পঞ্চায়তৰ প্ৰতিনিধি, ৰাইজৰ প্ৰতিনিধি, শিক্ষক প্ৰতিনিধি, লিম্বু মহাসভাৰ প্ৰতিনিধি, বিভিন্ন জাতি-জনগোষ্ঠীৰ প্ৰতিনিধি, বালিপৰা প্ৰেছ ক্লাবৰ প্ৰতিনিধি, জনগোষ্ঠীয় সাংস্কৃতিক ঐক্যমঞ্চ অসমৰ কেন্দ্ৰীয় প্ৰতিনিধিবৰ্গ, জীয়াভৰলী সাহিত্য গোষ্ঠীৰ বিষয়ববীয়া, অসম নেপালী সাহিত্য সভাৰ প্ৰতিনিধি, যুৱ মৰ্চাৰ প্ৰতিনিধি, খনামুখ শাখা সাহিত্য সভাৰ সভাপতি ৰঞ্জিৎ চহৰীয়াসহ বিষয়ববীয়াসকল, আছুৰ প্ৰতিনিধি, বিভিন্ন বিদ্যালয়ৰ শিক্ষকবৃন্দ, গাৰো সাহিত্য সভাৰ প্ৰতিনিধি, আগছুৰ জিলা সভাপতি দীপক চুব্বাসহ প্ৰতিনিধি, কুৰ্মী যুৱ পৰিষদৰ বিষয়ববীয়া, কেইবাজনো সংগীতশিল্পী, ৰাইজ উপস্থিত থাকে । অনুষ্ঠানতেই সৰ্বসন্মতিমৰ্মে ক্ৰমে বিশিষ্ট কবি ললিত বসুমতাৰীক সভাপতি , কবি, সমাজ সংগঠক ৰঞ্জিৎ চহৰীয়াক কাৰ্যকৰী সভাপতি আৰু
যুৱ নিৱন্ধকাৰ প্ৰাঞ্জল প্ৰতিম বৰাক সম্পাদক হিচাপে লৈ জনগোষ্ঠীয় সাংস্কৃতিক ঐক্যমঞ্চ অসমৰ শোণিতপুৰ জিলাৰ ৩১ জনীয়া সমিতিখন গঠন কৰা হয় ।সভাত উপস্থিত বিভিন্ন দল-সংগঠনৰ প্ৰতিনিধি, সমাজৰ বিভিন্ন পদবীৰ প্ৰতিনিধিসকলে অসমৰ সাতামপুৰুষীয়া ঐক্য,সম্প্ৰীতি অটুট ৰখাৰ ক্ষেত্ৰত সকলো জাতি-জনগোষ্ঠীৰ লোকসকল একগোট হোৱাৰ প্ৰয়োজনীয়তা, সমাজৰপৰা অপশক্তিসমূহক প্ৰতিহত কৰা, সমাজত কৰ্ম আৰু সজাগতামূলক অনুষ্ঠানৰ যোগেদি সমন্বয়মূলক ভাৱধাৰা বিকাশ সাধন কৰা ইত্যাদি বিভিন্ন বিষয়ত ভাষণ আগবঢ়াই নতুনকৈ গঠন হোৱা শোণিতপুৰ জিলা সমিতিক শুভেচ্ছা জনায় । উল্লেখ্যে যে , সভাৰ আৰম্ভণীতে সাংস্কৃতিক শিল্পী দক্ষিণা দেৱী গজুৰেলে বন্দনা পাঠ কৰে । লগতে অনুষ্ঠানৰ লগত সংগতি ৰাখি বড়োৰ লগতে বিভিন্ন জনগোষ্ঠীয় নৃত্য পৰিৱেশন, গীত-কবিতা পৰিৱেশন কৰা হয়।

মিৰ্জাত জ্ঞানপীঠ বটাঁ বিজয়িনী ড° মামণি ৰয়ছম গোস্বামীৰ দশম মৃত্যুবাৰ্ষিকী পালন

জ্ঞানপীঠ বঁটা বিজয়ী সাহিত্য সম্ৰাজ্ঞী তথা দক্ষিণ কামৰূপৰ সু-সন্তান ড° মামণি ৰয়চম গোস্বামীৰ আজি দশম সংখ্যক মৃত্যু বাৰ্ষিকী। সেই উপলক্ষে দক্ষিণ কামৰূপ ছাত্ৰ সন্থাৰ উদ্যোগত দিনজোৰা কাৰ্যসূচীৰে মিৰ্জাৰ মামণি ৰয়চম গোস্বামী চক’ত এক শ্ৰদ্ধাঞ্জলি অনুষ্ঠান অনুষ্ঠিত কৰা হয়। পুৱা ৬ বজাত এই শ্ৰদ্ধাঞ্জলি অনুষ্ঠানৰ লগত সংগতি ৰাখি মামণি ৰয়ছম গোস্বামী চ’কত এক সমূহীয়া চাফাই অভিযান ৰূপায়ণ কৰা হয়। দক্ষিণ কামৰূপ ছাত্ৰ সন্থাৰ সভাপতি পৃথিৱী দাসে সভাপতিত্বত অনুষ্ঠিত হোৱা সভাৰ আঁত ধৰে শিক্ষা সম্পাদক বেদব্ৰত দাসে। ইয়াৰ পিছত ক্ৰমে শ্ৰদ্ধাঞ্জলি অনুষ্ঠান, সৰ্ব ধৰ্মীয় প্ৰাৰ্থনা, নাম প্ৰসংগ আদি বিভিন্ন ধৰণৰ অনুষ্ঠানৰ আয়োজন কৰাৰ লগতে সন্ধিয়া ৫ বজাত ২০০০ গছি বন্তি প্ৰজ্জ্বলন কৰি তেওঁক শ্ৰদ্ধাঞ্জলি জ্ঞাপন কৰা হয়। উল্লেখ্য যে দিনজোৰা কাৰ্যসূচীৰে অনুষ্ঠিত কৰা উক্ত কাৰ্য্যসূচীত পলাশবাৰী সমষ্টিৰ বিধায়ক হেমাংগ ঠাকূৰীয়া, দক্ষিণ কামৰূপ মহাবিদ্যালয়ৰ অধ্যক্ষ ড° নৱজ্যোতি দাস, দক্ষিণ কামৰূপ ছোৱালী মহাবিদ্যালয়ৰ ভাৰপ্ৰাপ্ত অধ্যক্ষ ড° ৰঞ্জন ভূঞা, ৰামপুৰ আঞ্চলিক মহাবিদ্যালয়ৰ অধ্যক্ষ ড° দীনমণি কলিতা, অমৃত চন্দ্ৰ ঠাকুৰীয়া বাণিজ্য কনিষ্ঠ মহাবিদ্যালয়ৰ অধ্যক্ষ সমীৰণ শৰ্মা, পলাশবাৰী সাহিত্য সভাৰ সভাপতি যুগল চন্দ্ৰ বৈশ্য, সদৌ কামৰূপ জিলা ছাত্ৰ সন্থাৰ উপদেষ্টা নিৰোদ কুমাৰ দাস, বিত্ত সম্পাদক ঋতুমণি চৌধুৰী, দক্ষিণ কামৰূপ ছাত্ৰ সন্থাৰ সাধাৰণ সম্পাদক জিতুল কুমাৰ, দক্ষিণ কামৰূপ অঞ্চলৰ বহু কেইজন বিশিষ্ট ব্যক্তিৰ লগতে বিদ্যালয়-মহাবিদ্যালয়ৰ ছাত্ৰ-ছাত্ৰী সকলেও এই শ্ৰদ্ধাঞ্জলি অনুষ্ঠানত উপস্থিত থাকি মামণি ৰয়ছম গোস্বামীক একাঁজলী পুষ্পাঞ্জলীৰে শ্ৰদ্ধাঞ্জলি জ্ঞাপন কৰে । আনহাতে, বাইদেউৰ স্মৃতি যুগমীয়া কৰি ৰখাৰ বাবে দক্ষিণ কামৰূপ ছাত্র সন্থাই তেওঁৰ নামেৰে অহা বছৰৰ পৰা সাহিত্য বটা প্ৰদান কৰিব বুলি কামৰূপ জিলা ছাত্ৰ সন্থাৰ উপদেষ্টা নিৰোদ কুমাৰ দাসে জানিবলৈ দিয়ে।

ঢকুৱাখনা টাউন মিচিং ছাত্ৰ সন্থাৰ ৩০ সংখ্যক কাংকিন কেবাং

ৰাজ্যখনৰ  ভূমিপুত্ৰ মিচিং জনগোষ্ঠীৰ ভাষা তিব্বত চীনৰ ভাষিক পৰিয়ালৰে সম্পৃক্ত ভাষা আৰু জনগোষ্ঠীটোৰ স্বগোষ্ঠীয় ভাষাটো নিজস্ব স্বকীয় ধ্বনিতাত্তিক আৰু ৰূপতাত্তিক বৈশিষ্ট্যৰে সমৃদ্ধ । পূৰ্বৱৰ্তী সময়ত জনগোষ্ঠীয় ভাষাটোৰ নিজস্ব লিপি নাছিল কাৰণে কথিত ৰূপত আছিল । পৰিবৰ্তিত সময়ত দ্বিতীয় সৰ্ববৃহৎ ভৈয়াম জনগোষ্ঠীলৈ  উন্নীত হোৱা মিচিং জনগোষ্ঠীৰ লিখিত লিপি ভাষা উপলব্ধ হল। কিন্তু নিজস্ব ভাষাত  কাব্য সাহিত্যৰ চর্চাৰ ধাৰা অতি সীমিত হৈ ৰল । এয়া জনগোষ্ঠীটোৰ অস্তিত্বৰ বাবে এক বৌদ্ধিক  প্ৰত্যাহ্বান। যি জাতিৰ নিজস্ব  ভাষাৰে লিখিত ইতিহাস বা কাব্য সাহিত্যৰ বৰ্ণময় ৰূপ নাথাকে তেনে জাতিৰ ভৱিষ্যত অসুৰক্ষিত  আৰু দীৰ্ঘজীৱিও নহয়। 
ঢকুৱাখনা জনজাতি কৃষ্টি ভৱন প্ৰাংগনত  আজি দিনজোৰাকৈ অনুষ্ঠিত টাউন মিচিং ছাত্ৰ সন্থাৰ ৩০ সংখ্যক কাংকিন কেবাংৰ মুকলি সভাত কেবাং উপলক্ষত  প্ৰকাশ কৰি উলিওৱা স্মৃতিগ্ৰন্থ” কাংকিন” উন্মোচন কৰি এই মন্তব্য কৰে বিশিষ্ট সাংস্কৃতিক কৰ্মী, ধেমাজি জিলাৰ  জ্যেষ্ঠ কৃষি বিষয়া ভৱজিত দলেয়ে।  অৱনৰী জনজাতি উচ্চ মাধ্যমিক বিদ্যালয়ৰ অৱসৰী শিক্ষক মণি কান্ত মেদকৰ স্মৃতিত পুত্ৰ সোৱণশিৰী গাঁও পঞ্চায়তৰ সভাপতি খনিন্দ্ৰ মেদকে প্রকাশ কৰি উলিওৱা কেবাংৰ নৱম সংখ্যক প্ৰকাশ “কাংকিন”  উন্মোচনৰ পাছতে অনুষ্ঠিত হয় মুকলি সভা। টাকাম মিচিং ছাত্ৰ সন্থাৰ প্ৰাক্তন সাধাৰণ সম্পাদক ইন্দ্ৰ কুমাৰ চুংক্ৰাংয়ে  শুভ উদ্ধোধন কৰা মুকলি সভাত নগৰ সমিতিৰ সভাপতি অনিল দলেয়ে সভাপতিত্ব কৰে ।  সভাত মুখ্য অতিথিৰ ভাষণত এম এ চিৰ অধ্যক্ষ সুনীল পেগুৱে  স্বজাতিৰ নৱ প্ৰজন্মৰ হাততে জাতিটোৰ ভৱিষ্যত নিৰ্ভৰশীল বুলি কৈ বিভিন্ন মহাবিদ্যালয়ত শিক্ষা গ্ৰহণ কৰি অহা  শিক্ষাৰ্থী সকলক বিদ্যায়তনিক দিশত অধিক মনোনিবেশ কৰাৰ লগতে সাংস্কৃতিক , সামাজিক দায়বদ্ধতাৰে স্বগোষ্ঠীয় সমাজখনক  সৰ্বাংগীন দিশত গতিশীলতা প্ৰদানৰ আহ্বান জনায়। জনাকীৰ্ণ সভাখনত  ৱৰ্ল্ড বুক অফ টেলেণ্ট ৰেকৰ্ড ২০২০,  ইণ্ডিয়ান আইকণ এৱাৰ্ড২০২১ , ভাৰত ভূষণ ২০২১ কে ধৰি ৰাষ্ট্ৰীয় পৰ্যায়ৰ  মুঠ ১৩ টা প্ৰদক প্ৰাপক বগীনদীৰ সুসন্তান সৃষ্টি ৰাণী টাইডক বিশেষ ভাবে সম্বৰ্ধনা জনোৱা হয়।  সম্বৰ্ধনা গ্ৰহণ কৰি তত্ব গধুৰ বক্তব্যত প্ৰতিষ্ঠিত লেখিকা টাইদে  আধুনিকীকৰণ মানৱ সমাজৰ উত্তৰণৰ বাবে প্ৰয়োজনীয় যদিও এনে নব্য আধুনিকীকৰণ ধ্যান ধাৰণাৰ মাজেৰে নিজস্ব ভাষা লোক  কৃষ্টি সংস্কৃতিৰো চৰ্চাৰ ধাৰা অব্যাহত ৰাখিলেহে জাতিয় উত্তৰণৰ পথ প্ৰশস্ত হব বুলি কৈ নব প্ৰজন্মৰ হাতত এই গধুৰ জাতীয় দায়িত্ব অৰ্পিত বুলি কয়। সভাত  টি এম এম কেৰ কেন্দ্ৰীয় সম্পাদিকা বন্তি বালা পেগু, শিক্ষাবিদ নিৰঞ্জন পেগু , সদৰ থানাৰ অচি মণ্টু ৰাম বৰা , উত্তম কুমাৰ দলে আদিয়ে বক্তব্য আগবঢ়াই ।  নবাগত শিক্ষাৰ্থী সকলৰ পৰিচয় পৰ্ব আৰু বিভিন্ন সাংস্কৃতিক অনুষ্ঠানেৰে জীপাল হোৱা সভাত  মিচিং জাতিয় সংগঠনৰ কেন্দ্ৰীয় আৰু জিলাৰ নেতৃবৰ্গ উপস্থিত  থাকে।  সন্ধিয়া মিচিং পৰম্পৰাগত সৌন্দৰ্য প্ৰতিযোগিতা আৰু নিশালৈ বৰ্ণাঢ্য সাংস্কৃতিক কাৰ্যসূচীৰে কাংকিন কেবাংৰ সফল পৰিসমাপ্তি হয়। বাতৰি যুগুতালে অমৃত পৱন বৰাই।

বি এছ এফৰ গুৱাহাটী ফ্ৰণ্টিয়াৰৰ উদ্যোগত মহাবীৰ লাচিতঘাটত দেশপ্ৰেমমূলক সংগীতানুষ্ঠান অনুষ্ঠিত

ভাৰত – বাংলাদেশ আৰু ভাৰত – পাকিস্তানৰ আন্তৰ্জাতিক সীমান্তৰ নিৰাপত্তা আৰু পহৰা কাৰ্যৰ বাবে ১৯৬৫ চনৰ পহিলা ডিচেম্বৰত কেন্দ্ৰীয় গৃহ মন্ত্ৰণালয়ে গঠন কৰা সীমান্ত নিৰাপত্তা বাহিনী চমুকৈ বি এছ এফে পহিলা ডিচেম্বৰত ৫৬ সংখ্যক প্ৰতিষ্ঠা দিৱস উদযাপন কৰিব । আনহাতে প্ৰতিষ্ঠা দিৱসৰ লগত সংগতি ৰাখি বি এছ এফৰ আজাৰা পাটগাঁওস্থিত গুৱাহাটী ফ্ৰণ্টিয়াৰ মুখ্য কাৰ্যালয়ৰ উদ্যোগত কালি বিয়লি গুৱাহাটীৰ মাছখোৱাৰ ব্ৰহ্মপুত্ৰৰ পাৰত থকা মহাবীৰ লাচিত বৰফুকন ঘাটত এক দেশপ্ৰেমমূলক সংগীতানুষ্ঠান আৰু প্ৰশিক্ষিত কুকৰৰ এক প্ৰদৰ্শনী অনুষ্ঠিত হয় । অনুষ্ঠানটো উদ্ধোধন কৰে বি এছ এফৰ গুৱাহাটী ফ্ৰণ্টিয়াৰৰ মহাপৰিদর্শক সঞ্জয় সিং গেহলটে । এই উপলক্ষে অনুষ্ঠিত চমু অনুষ্ঠানত মহাপৰিদর্শক গেহলটে বি এছ এফৰ জোৱান সকলে ৰ`দ , বতাহ , বৰষুণ , গৰম , বৰফ , ধুমুহাকে ধৰি নানা প্ৰাকৃতিক প্ৰতিকূলতাক নেওচিও কিদৰে সীমান্তত অতীন্দ্ৰ প্ৰহৰী হিচাপে দায়িত্ব পালন কৰি আহিছে তাৰ আলোকপাত কৰে । অনুষ্ঠানত গুৱাহাটী ফ্ৰণ্টিয়াৰৰ মহিলা কল্যাণ সংস্থাৰ সভানেত্ৰী সীমা গেহলট , উপ মহাপৰিদর্শক আশুতোষ শৰ্মা , কমাণ্ডেণ্টদ্বয় ডাঃ বিনীত কুমাৰ আৰু সুৰেশ কুমাৰকে ধৰি বি এছ এফৰ কেবাজনো বিষয়া উপস্থিত থাকে । আনহাতে অনুষ্ঠানত বাহিনীটোৰ কেবাজনো জোৱানে দেশপ্ৰেমমূলক সংগীত পৰিবেশন কৰে । তেনেদৰে বাহিনীটোৰ এটা বেণ্ড শিল্পীৰ দলে যন্ত্ৰ সংগীতৰে সুৰৰ মায়াজাল সৃষ্টি কৰি উপস্থিত সকলোকে আপ্লুত কৰে । ইয়াৰ পূৰ্বে বাহিনীটোৰ উচ্চ প্ৰশিক্ষিত কেবাটাও কুকুৰে বিভিন্ন কলা কৌশল , সীমান্তত শত্ৰুৰ গতিবিধি নিৰীক্ষণ , মাদক দ্ৰব্য বা নিচাযুক্ত সামগ্ৰী চিনাক্তৰণ কৰা আদি প্ৰদৰ্শন কৰে।
বাতৰি যুগুতালে জিতুমণি দাসে

পলাশবাৰী উপৰহালী প্ৰাক্তন সৈনিক সমাৰোহ

পলাশবাৰী উপৰহালীস্থিত চিলাৰায় ভৱনত আজি দিনযোৰা কাৰ্যসূচীৰে মিৰ্জা আঞ্চলিক প্ৰাক্তন সৈনিক সমাৰোহ অনুষ্ঠিত হয়। মিৰ্জা আঞ্চলিক প্ৰাক্তন সৈনিক সকলৰ লগতে পৰিয়ালবৰ্গ আৰু বিধৱা বীৰ নাৰীসকলক একত্ৰিত কৰাৰ বাবে উক্ত প্ৰাক্তন সৈনিক সমাৰোহ অনুষ্ঠিত কৰিছে। এই উপলক্ষে পুৱা চাফাই অভিযান আৰু বৃক্ষ ৰোপন কৰে মিৰ্জা আঞ্চলিক প্ৰাক্তন সৈনিক সন্থাৰ উপদেষ্টা ৰাম প্ৰসাদ তালুকদাৰে। ৯ বজাত পতাকা উত্তোলন কৰে সৈনিক সন্থাৰ সভাপতি সুধন্ন কলিতাই। ১১ বজাত শ্বহীদ বেদীত বন্তি প্ৰজ্বলন কৰে সৈনিক সন্থাৰ উপদেষ্টা বীৰেন কলিতাই। ইয়াৰ পিছতে শ্ৰদ্ধাঞ্জলি অৰ্পন কৰে সৈনিক সন্থাৰ উপ-সভাপতি ভদ্ৰেশ্বৰ দাস আৰু সহ: সম্পাদক আনন্দদেৱ শৰ্মাই। ১১ বজাত সৈনিক সন্থাৰ সভাপতি সুধন্ন কলিতাৰ পৌৰোহিত্যত অনুষ্ঠিত হোৱা মুকলি সমাৰোহত পলাশবাৰী সমষ্টিৰ বিধায়ক হেমাংগ ঠাকুৰীয়াই উপস্থিত থাকি প্ৰাক্তন সৈনিক সন্থাৰ ভুমি আৱণ্টনৰ লগতে এটি গৃহ নিৰ্মাণ কৰি দিয়াৰ বাবে ভাষণ প্ৰসঙ্গত উল্লেখ কৰে। অনুষ্ঠানত বিশিষ্ট অতিথি হিচাপে গুৱাহাটী এয়াৰ ফোৰ্চ ষ্টেচনৰ এয়াৰ অফিচাৰ কামাণ্ডিং, অৱসৰপ্ৰাপ্ত ব্ৰিগেডিয়াৰ নাৰায়ণ দত্ত, বেংক অফ বৰোদাৰ পৰিচালক ব্ৰিগেডিয়াৰ ৰাৱাত উপস্থিত থকাৰ উপৰিও নিৰ্দিষ্ট বক্তা হিচাপে অৱসৰপ্ৰাপ্ত চুবেদাৰ তথা জিলা সৈনিক কল্যাণ বিষয়া বসন্ত বৰুৱাই উপস্থিত থাকি ভাষণ প্ৰদান কৰে। উক্ত সমাৰোহত বিশেষভাৱে সম্বৰ্ধনা জনোৱা হয় অসমৰ পৰা লাডাখলৈ পদযাত্ৰা কৰি অভিলেখ সৃষ্টি কৰা ক্ৰীড়াবিদ অঞ্জলি দাসক। অনুষ্ঠানত উপৰহালী ৰাইজ গয়ৰহৰ সভাপতি/সম্পাদক উপস্থিত থকাৰ লগতে অৱসৰপ্ৰাপ্ত সৈনিক সকল উপস্থিত থাকে।

ঢকুৱাখনাত লখিমপুৰ আৰক্ষী অধীক্ষকৰ গাঁওৰক্ষী-গাঁওবুঢ়া সকলক লৈ  ক`ভিডৰ সজাগতামূলক  সভা অনুষ্ঠিত

ক`ৰণা অতিমাৰী সাম্প্ৰতিক সময়ৰ সমাজ সভ্যতাৰ বাবে এক  ভয়ানক আৰু মাৰাত্মক ভাবুকি । মানৱ সমাজৰ প্ৰগতি  আৰু উন্নয়ন স্তব্ধ কৰি জনজীৱনলৈ প্ৰচণ্ড ভাবুকি নমাই অনা এই মাৰাত্মক অতিমাৰী প্ৰতিৰোধৰ বাবে চৰকাৰে ব্যাপক  বিনামূলীয়া টিকাকৰণ অভিযান অব্যাহত ৰাখিছ। কিন্তু এনে জটিল সন্ধিক্ষণত পৰিলক্ষিত হৈছে যে লখিমপুৰ জিলাৰ  ঢকুৱাখনা সদৰ থানাৰ অন্তৰ্গত বিভিন্ন গাঁও অঞ্চলৰ ৪ সহস্ৰাধিক নাগৰিকে  চৰকাৰী ভাবে অব্যাহত ৰখা ক`ভিড নিৰ্মূল অভিযানৰ বিনামূলীয়া “ক`ভিড ভেকচিন গ্ৰহণ নকৰি নিজৰ লগতে অন্যান্য নাগৰিকৰ প্ৰতিও প্ৰচণ্ড ভাবুকি মাতি অনাত ব্ৰতী হৈছে। চৰকাৰী ভাবে স্বাস্থ্য বিভাগৰ জৰিয়তে নিৰন্তৰ হাৰত অব্যাহত ৰখা  বিনামূলীয়া ক`ভিড ভেকচিন ইচ্ছাকৃত ভাবে  গ্ৰহণ নকৰি চৰকাৰী অভিযান সফল নকৰা সকল সমাজৰ শুভ চিন্তক নহয়।ঢকুৱাখনা সদৰ থানাৰ অন্তৰ্গত সকলো চৰকাৰী গাঁও প্ৰধান ( গাঁওবুঢ়া) , সকলো গাঁওৰক্ষী বাহিনীৰ সভাপতি সম্পাদকৰ উপস্থিতিত দেওবাৰে  আয়োজিত এক  ক`ভিড ১৯ সজাগতা সভাত অংশ গ্ৰহণ কৰি এই মন্তব্য কৰে লখিমপুৰ জিলাৰ আৰক্ষী অধীক্ষক ডঃ বেদান্ত মাধৱ ৰাজখোৱাই।  ঢকুৱাখনা গাঁওৰক্ষী বাহিনীৰ সভাপতি কৃষ্ণ কমল বৰাৰ সভাপতিত্বত ঢকুৱাখনা নৰ্মাল স্কুল প্ৰাংগণত  অনুষ্ঠিত সভাত বক্তব্য ৰাখি আৰক্ষী অধীক্ষক ডঃ ৰাজখোৱাই
গাঁওৰক্ষী বাহিনীৰ কৰ্মকর্তা  সকল সমাজ  আৰু আৰক্ষী বিভাগৰ  সোঁহাত তথা চকু কান স্বৰূপ বুলি কয় । ভাষণ প্ৰসংগত ৰাজখোৱাই সংশ্লিষ্ট গাঁও এলেকা সমূহৰ প্ৰধান প্ৰহৰী স্বৰূপ গাঁওৰক্ষী বাহিনীৰ কৰ্মকর্তা  সকলে ক`ৰণা সৃষ্ট জটিল সময় চোৱাত বৰেণ্য সেৱা আগবঢ়ালে বুলি উল্লেখ কৰি  শেহতীয়া ভাবে ঢকুৱাখনা সদৰ থানাৰ অন্তৰ্গত গাঁওৰক্ষী বাহিনী সমূহৰ আৰু এক সামাজিক দায়িত্ব আহি পৰিছে বুলি কয়।  জিলাখনৰ ভিতৰত ঢকুৱাখনা সদৰ থানা এলেকাত ক`ভিড  ভেকছিন প্ৰদান  অভিযান সন্তোষজনক নহয় বুলি মন্তব্য কৰি প্ৰায় ৪ সহস্ৰাধিক  নাগৰিকে এই চৰকাৰী ভেকচিন গ্ৰহন নকৰাকৈ আছে। পৰিণতিত জিলাখন  ৰাজ্যখনৰ ১০০ শতাংশ  ভেকছিন গ্ৰহণৰ তালিকাত অন্তৰ্ভুক্ত হ`ব পৰা নাই ।  এতিয়া এসপ্তাহৰ ভিতৰত  এই ভেকচিন  গ্ৰহণ ১০০ শতাংশ কৰিবই লাগিব বুলি কৈ  এই ক্ষেত্ৰত গাঁওৰক্ষী বাহিনী সমূহে মুখ্য ভূমিকা লোৱাৰ  নিৰ্দেশ দিয়ে । স্বাস্থ্য বিভাগৰ নেতৃত্বত , সংশ্লিষ্ট গাঁও প্ৰধান সকলৰ  সহযোগিতাত  সোমবাৰেৰ পৰা   গাঁৱে গাঁৱে গৈ ঘৰে ঘৰে  সোমাই স্বাস্হ্য বিভাগে চিনাক্ত কৰা ভেকচিন গ্ৰহন নকৰা ব্যক্তি সকলক  আনি ভেকচিন প্ৰদান কৰা অভিযানত ব্ৰতী হব  লাগিব বুলিও নিৰ্দেশ দিয়ে ৰাজখোৱাই ।  আৰক্ষী অধীক্ষক গৰাকীয়ে  এই কোভিড নিৰ্মূল আঁচনিৰ  সন্দৰ্ভত  উৰাবাতৰি আৰু অপপ্ৰচাৰ  চলোৱা অপশক্তি বোৰক বিচাৰি উলিয়াই  দিবলৈ বাহিনীৰ নেতৃবৰ্গক নিৰ্দেশনা দি  এনে অশুভ চক্ৰৰ ওপৰত কঠোৰ আইনগত শাস্তি বিহা হব বুলি  সকীয়াই দিয়ে।  এই অভিযানৰ  সফলতাৰ ওপৰতে ঢকুৱাখনাৰ  সন্মান আৰু গাঁওৰক্ষী  বাহিনী সমূহৰ  সক্ৰিয়তা প্ৰকাশ পাব বুলি কৈ নিজৰ ,পৰিয়ালৰ লগতে সমাজক এই মাৰাত্মক ৰোগৰ সংক্ৰমণৰ  পৰা বচোৱাৰ বাবে ভেকচিন গ্ৰহনেই  এই ৰোগৰ পৰা পৰিত্ৰাণৰ একমাত্ৰ উপায় বুলি মন্তব্য কৰে।   ঢকুৱাখনা মহকুমা আৰক্ষী বিষয়া সৌমাৰ জ্যোতি ভূঞা , ঢকুৱাখনা স্বাস্থ্য খণ্ডৰ খণ্ড আঁচনি প্ৰবন্ধক সত্যম কুমাৰ চাহু , সদৰ থানাৰ প্ৰভাৰী মণ্টু ৰাম বৰা  , জ্যেষ্ঠ উপ পৰিদর্শক দীনেশ  মেধি   আদি উপস্থিত থকা  জনাকীৰ্ণ সভাত এই ভেকচিন গ্ৰহণ নকৰা ব্যক্তিয়ে  চৰকাৰী সুবিধা নাপাব আৰু বিভিন্ন  চৰকাৰী সুবিধা  কৰ্তন কৰাৰো সম্ভাৱনীয়তা প্ৰকাশ কৰি স্বাস্হ্য বিভাগ ,গাঁও প্ৰধান সকল একত্ৰিত হৈ সন্মিলিত ভাবে  এই ভেকচিন গ্ৰহণ আঁচনি সফল কৰিব লাগিব বুলি কৈ এয়া এক সামাজিক দায়িত্ব কৰ্তব্য বুলি ব্যক্ত কৰে। সভাত খণ্ড আঁচনি প্ৰবন্ধক সত্যম কুমাৰ চাহুৱে ৪ হাজাৰ ৩০০ নাগৰিকে অদ্যপি এই ভেকচিন  গ্ৰহণ নকৰা বুলি জৰীপত উপলব্ধ তথ্য সদৰী কৰি এই ক্ষেত্ৰত স্বাস্থ্য কৰ্মী সকল সন্মুখীন হৈ অহা  অনাহুত অবাঞ্চিত পৰিস্থিতিৰ সন্দৰ্ভত অৱগত কৰি সন্মিলিত ভাবে এই ৪ হাজাৰ ৩০০  ব্যক্তিক টিকাকৰণ কৰি  সাফল্যৰ লক্ষ্যত উপনীত হোৱাত সহযোগিতা আগবঢ়াবলৈ আহ্বান জনায়।  সভাত  মহকুমা আৰক্ষী বিষয়া সৌমাৰ জ্যোতি ভূঞা ,সদৰ থানাৰ প্ৰভাৰী নৱ কান্ত বৰায়ো বক্তব্য ৰাখি ক`ভিড নিৰ্মূল আঁচনিত সকলোৰে সহযোগিতা আন্তৰিকতাৰে কামনা কৰে।
বাতৰি যুগুতালে অমৃত পৱন বৰাই।