অসমীয়া ভাষা সাহিত্যৰ প্ৰতি গুৰুত্ব প্ৰদান কৰিছে এজন আৰক্ষী বিষয়াই

অসম আৰক্ষীৰ এগৰাকী উচ্চ পদস্থ বিষয়া হৈও কৰ্মব্যস্ততাৰ মাজতো নিৰন্তৰ অসমীয়া ভাষা সাহিত্য চৰ্চা কৰা আৰু মাতৃভাষা অসমীয়াক ৰাজ্যভাষা হিচাপে চৰকাৰী কাম কাজত ব্যৱহাৰত গুৰুত্ব দি অহাৰ বাবে ভাৰতীয় আৰক্ষী সেৱাৰ বিষয়া তথা কামৰূপ জিলাৰ আৰক্ষী অধীক্ষক পাৰ্থসাৰথি মহন্তক অসম সাহিত্য সভাৰ শুৱালকুছি অধিবেশনত আনন্দ চন্দ্র আগৰৱালা বঁটা প্ৰদান কৰা হয়।অধিবেশনৰ অতুল চন্দ্র বৰুৱা মঞ্চত অসম সাহিত্য সভাৰ নৱ নিৰ্বাচিত সভাপতি ড০ কুলধৰ শইকীয়াই পাৰ্থসাৰথি মহন্তক ফুলৰ থোপা,জাপিৰ লগতে দহ হাজাৰ টকাৰ চেক প্ৰদান কৰি সম্বৰ্দ্ধনা জনোৱাৰ লগতে সাহিত্য চৰ্চা কৰি অহাৰ বাবে ৰাজহুৱাভাৱে প্ৰশংসা কৰে।অৱশ্যে আৰক্ষী বিষয়া পাৰ্থসাৰথি মহন্তই পাছদিনা বঁটাৰ লগত লাভ কৰা দহ হাজাৰ টকাৰ চেকখন সভাপতি ড০ কুলধৰ শইকীয়াক ঘূৰাই দি সেই ধন সাহিত্য সভাৰ কামত ব্যৱহাৰ কৰিবলৈ অনুৰোধ জনায়।এই মহানুভৱতা প্ৰদৰ্শনৰ বাবে পাৰ্থসাৰথি মহন্তক সকলোৱে ধন্যবাদ জ্ঞাপন কৰে।উল্লেখ্য বৰ্তমান জনপ্রিয় অসমীয়া মাহেকীয়া আলোচনী ‘আইনা জীৱনৰ’ সম্পাদকৰ (অবৈতনিক) দায়িত্ব বহন কৰি অহা পাৰ্থসাৰথি মহন্তই কামাখ্যা,মাজুলী,ৰাইন’ এণ্ড শিৱা নামৰ তিনিখন গ্ৰন্থ ৰচনা কৰি বিদ্বৎ মহলৰ পৰা প্ৰশংসা লাভ কৰিছে।তেনেদৰে কামৰূপ জিলাৰ আৰক্ষী বিভাগত কৰ্মৰত সকলো আৰক্ষীৰ লোককে চৰকাৰী কাম কাজত অসমীয়া ভাষাৰ ব্যৱহাৰৰ লগতে ইউনিফৰ্মত থকা নেমপ্লেটতো নিজৰ নাম অসমীয়াতে লিখিবলৈ আহ্বান জনাইছে।আৰক্ষী অধীক্ষক গৰাকীৰ আহ্বানৰ প্ৰতি সঁহাৰি জনাই জিলাখনৰ কৰ্মৰত আৰক্ষীৰ লোকসকলে বিভাগীয় কাম কাজত অসমীয়া ভাষা ব্যৱহাৰ কৰি অহা পৰিলক্ষিত হৈছে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

পশ্চিম গুৱাহাটীৰ কটাহবাৰীত কংগ্ৰেছ নেতা-কর্মীসহ ৫ শতাধিক সংখ্যালঘু লোক অগপত যোগদান

পশ্চিম গুৱাহাটীৰ নগৰাঞ্চলৰ ৬ নং ৱাৰ্ডৰ সংখ্যালঘু বসতি প্ৰধান অঞ্চল আৰু কংগ্ৰেছ দলৰ ঘাটি হিচাপে পৰিচিত ২ নং কটাহবাৰীত ২৭ জানুৱাৰীৰ সন্ধিয়া আব্দুল আজিজ, মইনুল হক, আব্দুৰ ৰচিদ, মান্নান মিশ্রি, নীলিমা খাতুন, মাৰ্জিনা খাতুনৰ নেতৃত্বত পাঁচ শতাধিক কংগ্ৰেছ কর্মী-সমৰ্থকে অগপ দলৰ নীতি-আদৰ্শৰ প্ৰতি আকৰ্ষিত হৈ দলটোত যোগদান কৰে। আনহাতে এই উপলক্ষে মৌলানা কৰিব আব্দুছ চালাম কাচিমিৰ সভাপতিত্বত অনুষ্ঠিত যোগদান কাৰ্যসূচীত অগপ দলত যোগদান কৰা সকলক আদৰণি জনাই পশ্চিম গুৱাহাটীৰ বিধায়ক আৰু অগপৰ কেন্দ্ৰীয় সাধাৰণ সম্পাদক ৰমেন্দ্ৰ নাৰায়ণ কলিতাই। ভাষণ প্ৰসংগত বিধায়ক কলিতাই অগপ দলেহে ৰাজনীতিৰ উৰ্ধত ৰাজ্যৰ সংখ্যালঘু লোক সকলৰ কল্যাণৰ বাবে জন্মলগ্নৰে পৰা কাম কৰি অহা বুলি ব্যক্ত কৰি কংগ্ৰেছ আৰু এ আই ইউ ডি এফ দলে কেৱল সংখ্যালঘু লোকক ভোটবেংক হিচাপে ব্যৱহাৰ কৰি আহিছে বুলি আক্ষেপ প্ৰকাশ কৰে। অনুষ্ঠানত আচগৰ আলী, ফজল আলী, বৰষা নাথ কলিতা, অজয়া ৰাভা, নকুল কলিতা, বলেন দাসকে ধৰি কেবাজনো অগপ নেতা উপস্থিত থাকে। আনহাতে দলত যোগদান কৰা কেইবাজনেও আগন্তক দিনত অগপৰ সাংগঠনিক দিশ শক্তিশালী কৰি দলৰ প্ৰাৰ্থী হিচাপে ৰমেন্দ্ৰ নাৰায়ণ কলিতা যাতে মিত্ৰজোঁটৰ হৈ পুনৰ বিজয়ী হব পাৰে তাৰ বাবে হাতে কামে নামি পৰিব বুলি সদৰি কৰে।

গণৰাজ্য দিৱসৰ শ্ৰেষ্ঠ প্ৰতীকপটৰ সন্মান উত্তৰ প্ৰদেশলৈ

৭২সংখ্যক গণৰাজ্য দিৱসৰ পেৰেডৰ শ্ৰেষ্ঠ প্ৰতীকপটৰ সন্মান লাভ কৰিছে উত্তৰ প্ৰদেশে।বৃহস্পতিবাৰে এই ঘোষণা কৰিছে প্ৰতিৰক্ষা মন্ত্ৰী ৰাজনাথ সিঙে।নৱনিৰ্মিত ৰাম মন্দিৰৰ আৰ্হিত নিৰ্মাণ কৰা হৈছিল এই প্ৰতীকপট।উল্লেখ্য যে, এইবাৰ ১৭ ৰাজ্যৰ লগতে কেন্দ্ৰীয় শাসিত অঞ্চলবোৰেগণৰাজ্য দিৱসৰ এই কাৰ্যসূচীত অংশগ্ৰহণ কৰিছিল ।বিগত বৰ্ষত অসমৰ প্ৰতীকপটে আজুৰি আনিছিল শ্ৰেষ্ঠ প্ৰতীকপটৰ খিতাপ।

পথৰুঘাটৰ ৰণক সুঁৱৰি শ্বহীদ দিৱস পালন

আজি ২৮ জানুৱাৰী । ১৮৯৮ চনৰ আজি দিনটোতে ব্ৰিটিছৰ অন্যায়ৰ বিৰুদ্ধে প্ৰতিবাদ সাব্যস্ত কৰি ইংৰাজৰ গুলিত মৃত্যুবৰণ কৰিছিল ১১৪ গৰাকী শ্বহীদে।এই কৃষক শ্বহীদ সকলক সুঁৱৰি পথৰুঘাটত দুদিনীয়াকৈ আয়োজন কৰা হৈছে শ্বহীদ দিৱস। ২৭ তাৰিখৰ পৰা আয়োজন হোৱা এই শ্বহীদ দিৱসত আজি মুখ্য অতিথি হিচাপে অংশগ্ৰহণ কৰিব মুখ্যমন্ত্ৰী লগতে কৃষিমন্ত্ৰী অতুল বৰা,সাংসদ দিলীপ শইকীয়াকে ধৰি কেইবাগৰাকীও উচ্চপদস্থ বিষয়াই।

বুধবাৰে জিলা উপায়ুক্ত দিলীপ কুমাৰ বৰাই পতাকা উত্তোলনেৰে এই দুদিনীয়া অনুষ্ঠানৰ শুভাৰম্ভ কৰে।বিয়লি ৪ বজাৰ পৰা আৰম্ভ কৰা হয় কৃষি আৰু জীৱিকা সখী সকলে অনুষ্ঠিত কৰা প্ৰদৰ্শনী অনুষ্ঠানৰ। আনহাতে, বৃহস্পতি বাৰৰ দিনা পুৱা ৭ বজাত প্ৰভাত ফেৰীৰ পিছতে শ্বহীদ তৰ্পন ,সৰ্বধৰ্ম প্ৰাৰ্থনা আদি অনুষ্ঠিত কৰা হ’ব।ইয়াৰ পিছত পুৱা১১ বজাৰ পৰা আৰম্ভ হ’ব মুকলি সভা।উক্ত মুকলি সভাত কেইবাটাও আটক ধুনীয়া সাংস্কৃতিক কাৰ্যসূচী অনুষ্ঠিত কৰা ব্যৱস্থা কৰা হৈছে।ইয়াৰ উপৰিও সন্ধিয়া ৬ বজাৰ পৰা সাংস্কৃতিক সন্ধিয়া আয়োজন কৰা হৈছে।শ্বহীদ দিৱসত সমূহ কাৰ্যসূচীত ৰাইজৰ সহায়-সহযোগিতা দৰঙৰ জিলা প্ৰশাসনে কামনা কৰিছে।

প্ৰধানমন্ত্ৰীক দুখনকৈ গ্ৰন্থ উপহাৰ দলে অসম পাব্লিচিং কোম্পানীয়ে

সমগ্ৰ দেশতে অভিলেখৰ সৃষ্টি কৰি গুৱাহাটীৰ অসম পাব্লিচিং কোম্পানীয়ে প্ৰকাশ কৰা প্ৰধানমন্ত্ৰী নৰেন্দ্ৰ মোদীৰ দুখন কিতাপৰ অসমীয়া সংস্কৰণ কৰি প্ৰধানমন্ত্ৰী গৰাকীয়ে প্ৰকাশক সঞ্জয় কুমাৰ সান্যালৰ হাতৰ পৰা গ্ৰহণ কৰে। এখন কিতাপ হ’ল প্ৰধানমন্ত্ৰীৰ মন কী বাতৰ উদ্দীপনামূলক নিৰ্বাচিত অংশ বিশেষৰ সংকলন মোৰ প্ৰিয় দেশবাসী। কিতাপখনৰ সংকলন কৰিছে নম্ৰতা দত্তই।আনখন কিতাপ হ’ল নৰেন্দ্ৰ মোদীয়ে ৰাজনৈতিক জীৱন আৰম্ভ কৰাৰ আগৰ সময়ছোৱাত কৰা বিভিন্ন উপলদ্ধিৰ প্ৰকাশ আইলৈ চিঠি।

মূল গুজৰাটীৰ পৰা ভাৱনা চোমায়াই ইংৰাজীলৈ কৰা অনুবাদৰ পৰা আইলৈ চিঠিৰ অনুবাদক উৎপল দত্ত।দুয়োখন কিতাপৰ প্ৰচ্ছদ প্ৰসিদ্ধ চিত্ৰশিল্পী সৌৰীশ মিত্ৰৰ আৰু আইলৈ চিঠিৰ অন্তৰ্ভাগৰ অলংকৰণো শ্ৰীমিত্ৰৰেই ।শিৱসাগৰত অনুষ্ঠিত সভাত অংশগ্ৰহণ কৰিবলৈ আহোতে প্ৰধানমন্ত্ৰীৰ কাৰ্যালয়ৰ পৰা প্ৰকাশক শ্ৰীসান্যালক মাতি পঠোৱা হয় আৰু সেই আমন্ত্ৰণ মৰ্মে প্ৰকাশক গৰাকীক প্ৰধানমন্ত্ৰীয়ে নিজৰ কোঠালৈ মাতি নিয়ে তেওঁৰ হাতৰ পৰা কিতাপ দুখন গ্ৰহণ কৰে।

সেই সময়ত প্ৰধানমন্ত্ৰীৰ সতে উপস্থিত আছিল ৰাজ্যৰ মুখ্যমন্ত্ৰী সৰ্বানন্দ সোণোৱাল আৰু বিত্তমন্ত্ৰী হিমন্ত বিশ্ব শৰ্মা।প্ৰধানমন্ত্ৰী গৰাকীয়ে শ্ৰী সান্যালক তেওঁৰ কামৰ বাবে প্ৰশংসা কৰে,প্ৰতিষ্ঠানটিৰ মংগল কামনা কৰে। তেখেতে কয় যে বাধাৰ সন্মুখীন হ’লেও তুমি কাম কৰি যোৱা,কাম বন্ধ নকৰিবা।

প্ৰধানমন্ত্ৰী গৰাকীৰ কেইবাখনো কিতাপ ইতিমধ্যে বিভিন্ন ভাষাত প্ৰকাশ পাইছে যদিও একেলগে এটা ভাষাত দুখন কিতাপ প্ৰকাশ হোৱাটো এয়াই প্ৰথম।প্ৰকাশক শ্ৰী সান্যালে কয় আমাৰ প্ৰকাশনৰ স্বৰ্ণজয়ন্তী উপলক্ষে প্ৰকাশ কৰা কেইখনমান বিশেষ কিতাপৰ মাজৰ এই দুখন কিতাপৰ প্ৰকাশ অকল মোৰ বাবেই নহয় অসমৰ সকলো প্ৰকাশকৰ বাবেই গৌৰৱৰ বিষয়। মাননীয় প্ৰধানমন্ত্ৰী গৰাকীয়ে নিজ আগ্ৰহ প্ৰকাশ কৰি নিজ হাতে দুখন অসমীয়া কিতাপ গ্ৰহণ কৰাটো অসমীয়া গ্ৰন্থ প্ৰকাশন উদ্যোগৰ বাবে সন্মানজনক বুলি মই বিবেচনা কৰো।মই বিশ্বাস কৰো আমি অসমত নেচনেল লাইব্ৰেৰী দৰে বা তেনে জাতীয় বিশাল প্ৰতিষ্ঠান এটি বিচাৰিলে প্ৰধানমন্ত্ৰী গৰাকীয়ে নিশ্চয় সহাঁৰি জনাব।

শিৱসাগৰত নৱৰূপত স্বয়ম আঁচনিৰ শুভাৰম্ভ কৰিলে বিত্তমন্ত্ৰী ড০ হিমন্ত বিশ্ব শৰ্মাই

স্থানীয় উদ্যোগ আৰু গ্ৰাম্য অৰ্থনীতিক সৱলীকৰণৰ লক্ষ্যৰে ৰাজ্য চৰকাৰে হাতত লোৱা কৰা নৱ ৰূপত স্বয়ম যোজনাৰ আজি শিৱসাগৰ জিলাত শুভাৰম্ভ কৰা হয়৷ অসম চৰকাৰৰ বিত্ত, স্বাস্থ্য, শিক্ষা, লোকনিৰ্মাণ বিভাগৰ মন্ত্ৰী ড০ হিমন্ত বিশ্ব শৰ্মাই আজি শিৱসাগৰৰ ব’ৰ্ডিং খেল পথাৰত নৱ ৰূপত স্বয়ম- স্বামী বিবেকানন্দ অসম যুৱ সৱলীকৰণ যোজনাৰ হিতাধিকাৰীসকললৈ ধনাদেশ প্ৰদানেৰে শিৱসাগৰ জিলাত এই আঁচনিৰ শুভাৰম্ভ কৰে।

উল্লেখযোগ্য যে, শিৱসাগৰ জিলাত এই আঁচনিৰ জৰিয়তে মুঠ ৯৩২৪ গৰাকী হিতাধিকাৰীক সামৰি লোৱা হ’ব৷ স্বামী বিবেকানন্দৰ প্ৰতিচ্ছবিত পুস্পাঞ্জলী অৰ্পণ আৰু বন্তি প্ৰজ্বলন কৰি বিত্তমন্ত্ৰী গৰাকীয়ে নৱৰূপত স্বয়ম আঁচনিৰ দুগৰাকী হিতাধিকাৰীক আনুষ্ঠানিকভাৱে ৩০,০০০ টকাৰ ধনাদেশ প্ৰদান কৰে ।

আঁচনিখনৰ শুভাৰম্ভ কৰি বিত্ত মন্ত্ৰী গৰাকীয়ে হিতাধিকাৰী সকলক অভিনন্দন জ্ঞাপন কৰে।তেওঁ কয় যে, এই আঁচনিৰ অধীনত প্ৰথম পৰ্যায়ত ৩০,০০০ টকা হিতাধিকাৰী সকলৰ বেংক একাউণ্টত প্ৰদান কৰা হ’ব আৰু পৰৱৰ্ত্তী পৰ্যায়ত ২০,০০০ কৈ টকা প্ৰদান কৰা হ’ব । তেওঁ এই পুঁজিৰ সদ ব্যৱহাৰৰ দ্বাৰা নিজকে স্বাৱলম্বী কৰাৰ লগতে আন দহ জনকো উপাৰ্জনমুখী বৃত্তিত মনোনিবেশ কৰাবলৈ হিতাধিকাৰী সকলক আহ্বান জনায় । তেওঁ কয় যে, ভৱিষ্যতে নৱ ৰূপত স্বয়ম আঁচনিৰ হিতাধিকাৰী সকলক লোকনিৰ্মাণ বিভাগৰ অধীনত নিঃশুল্ক পঞ্জীয়নভূক্ত কৰি গ্ৰামাঞ্চলত চলি থকা বিভিন্ন বিভাগৰ কাম-কাজ সমূহত জড়িত হোৱাৰ সুবিধা প্ৰদান কৰা হ’ব । ভাষণ প্ৰসঙ্গত মন্ত্ৰী গৰাকীয়ে যুৱ সমাজক উৎপাদনমুখী হৈ নিজৰ লগতে সমাজৰ উন্নয়নত অংশীদাৰ হ’বলৈ উৎসাহিত কৰে । তেওঁ যুৱ শক্তিক স্বামী বিবেকানন্দৰ আদৰ্শ সৰোগত কৰি ৰাষ্ট্ৰ নিৰ্মাণৰ হকে আগুৱাই আহিবলৈ আহ্বান জনায় । শিৱসাগৰ নাট্য মন্দিৰৰ পুণৰ নিৰ্মাণৰ বাবে ইতিমধ্যে ঘোষণা কৰা এক কোটি টকাৰ অনুদান অতিশীঘ্ৰে অনুমোদন দিয়া হ’ব বুলি মন্ত্ৰী গৰাকীয়ে সদৰি কৰে । লগতে তেওঁ ঐতিহাসিক জেৰেঙা পথাৰত ১০০ বিঘা ভূমিত জয়মতী স্মৃতি প্ৰকল্প নিৰ্মাণৰ বাবে অসম চৰকাৰে গ্ৰহণ কৰা পদক্ষেপ বিষয়ে দোহাৰে ।
অসম চৰকাৰৰ কল্যাণকামী আঁচনি সমূহৰ বিষয়ে এক অৱলোকন দাঙি ধৰি মন্ত্ৰী গৰাকীয়ে ঘোষণা কৰে যে, শিৱসাগৰ নগৰত যান-জটৰ সমস্যা সমাধানৰ বাবে এটি বাইপাচ নিৰ্মাণ কৰা হ’ব । তেওঁ উল্লেখ কৰে যে, অহা ৭ ফেব্ৰুৱাৰী তাৰিখে প্ৰধানমন্ত্ৰী নৰেন্দ্ৰ মোডীয়ে অসম মালা আঁচনিৰ অধীনত শিৱসাগৰৰ পৰা সোণাৰীলৈ চাৰি লেন যুক্ত পথ নিৰ্মাণ কাৰ্যৰ উদ্বোধন কৰাৰ সম্ভৱনা আছে।

তেওঁ নিজ ভাষণত মন্ত্ৰীগৰাকীয়ে উল্লেখ কৰে যে,ৰাজ্যৰ প্ৰায় ৮০০০ অনিয়মীয়া নিযুক্তিপ্ৰাপ্ত শিক্ষকক নিয়মীয়াকৰণ কৰি অহা ৩০ জানুৱাৰীত খানাপাৰাত নিযুক্তিপত্ৰ প্ৰদান কৰা হ’ব।
৩৩৩.১০ লাখ টকা ব্যয় সাপেক্ষে SOPD (G) আঁচনিৰ অধীনত ৩৭ নং ৰাষ্ট্ৰীয় ঘাই পথৰ ৫২৫ তম কিলোমিটাৰৰ পৰা স্বৰ্গদেউ চ্যুকাফা মাল্টিস্পেচিয়েলিটি হস্পিটাললৈ যোৱা ২ কিলো মিটাৰ দৈৰ্ঘ্য পথৰ উন্নয়নৰ কাম চলি আছে বুলি বিত্ত মন্ত্ৰী গৰাকীয়ে অৱগত কৰে।

শিৱসাগৰৰ অসম টাই যাদুঘৰক আটকধুনীয়া আৰু নৱৰূপত নিৰ্মাণৰ বাবে অসম চৰকাৰে গ্ৰহণ কৰা পদক্ষেপৰ বিষয়ে উল্লেখ কৰি মন্ত্ৰী গৰাকীয়ে কয় যে, শিৱসাগৰক অসমৰ সাংস্কৃতিক প্ৰাণকেন্দ্ৰ ৰূপে গঢ়ি তুলিবলৈ অসম চৰকাৰে যৎপৰোনাস্তি প্ৰচেষ্টা অব্যাহত ৰাখিব ।

আজিৰ অনুষ্ঠানত শিৱসাগৰ জিলাৰ উপায়ুক্ত বিষ্ণুকমল বৰাই আদৰণী ভাষণ আগবঢ়ায়।নৱ ৰূপত স্বয়ম আঁচনিৰ শুভাৰম্ভণী অনুষ্ঠানত অসম চৰকাৰৰ ৰাজহ আৰু দুৰ্যোগ ব্যৱস্থাপনা বিভাগৰ মন্ত্ৰী যোগেন মহন, ৰাজ্যসভাৰ সাংসদ কামাখ্যা প্ৰসাদ তাছা, থাওৰা সমষ্টিৰ বিধায়ক কুশল দুৱৰী, সোণাৰি সমষ্টিৰ বিধায়িকা নৱনীতা সন্দিকৈ, শিৱসাগৰ জিলাৰ জিলা উন্নয়ন আয়ুক্ত নৱাব আল আজহাৰ আলীৰ উপৰিও ভালেসংখ্যক বিশিষ্ট ব্যক্তি আৰু জিলাখনৰ বিভিন্ন অঞ্চলৰ পৰা অহা ৰাইজ উপস্থিত থাকে ।

দিল্লীৰ কৃষক প্ৰতিবাদকাৰীক তিল পিঠা, পাচলি আগবঢ়ালে অসমৰ কৃষকে

ৰাজধানী দিল্লীত চলি থকা কৃষকৰ প্ৰতিবাদত অসমৰ পৰা অংশ ল’লে কৃষকৰ এদল প্ৰতিনিধিয়ে।অসমৰ পৰা যোৱা ১৩ জনীয়া প্ৰতিনিধি দলটোৱে প্ৰতিবাদত অংশগ্ৰহণ কৰে।এই প্ৰতিনিধিৰ দলটোৰ নেতৃত্ব লৈছিল সোণেশ্বৰ নৰহে।দলটোৱে ঢোল,কাহ,ডবা বজাই ৰাভা সংগীত গাই প্ৰতিবাদ সাব্যস্ত কৰে।অসমৰ পৰা যোৱা কৃষকৰ দলটোক আদৰণি জনায় যোগেন্দ্ৰ যাদৱে।অসমৰ পৰা লৈ যোৱা তিল পিঠা, শাক পাচলি প্ৰতিনিধি দলটোৱে প্ৰতিবাদী কৃষকক অৰ্পণ কৰে।