অসম অনুসূচিত জাতি পৰিষদৰ মাজুলী জিলা সমিতিৰ নৱম ত্ৰি-বাৰ্ষিক অধিৱেশনত অংশগ্ৰহণ কৰিলে মুখ্যমন্ত্ৰীয়ে

মাজুলীৰ উন্নয়নৰ বাবে কেন্দ্ৰীয় আৰু ৰাজ্য চৰকাৰে উল্লেখযোগ্য পদক্ষেপ গ্ৰহণ কৰিছে।মাজুলীলৈ পথ যোগাযোগৰ দিশত যুগান্তকাৰী পদক্ষেপ হিচাপে অহা ২০ ফেব্ৰুৱাৰীৰ ভিতৰত নিৰ্মাণকাৰ্য আৰম্ভ হ’ব মাজুলী যোৰহাট সংযোগী দলঙৰ।বুধবাৰে মাজুলীত অসম অনুসূচিত জাতি পৰিষদৰ মাজুলী জিলা সমিতিৰ নৱম ত্ৰি-বাৰ্ষিক অধিৱেশন উপলক্ষে আয়োজিত সভাৰ ভাষণ প্ৰদান কৰি মুখ্যমন্ত্ৰী সৰ্বানন্দ সোনোৱালে এইদৰে কয়।

বৃহত্তৰ অসমীয়া সমাজ গঠনত অনুসূচিত জাতিৰ লোকসকলৰ বৃহৎ অৱদান আছে।অনুসূচিত জাতিৰ লোকসকল স্ব মহিমাৰে মহিমামণ্ডিত।বিজেপি নেতৃত্বাধীন চৰকাৰে অনুসূচিত জাতি আৰু অন্যান্য পিছপৰা শ্ৰেণীৰ সকলো ব্যক্তিকে প্ৰধানমন্ত্ৰী নৰেন্দ্ৰ মোদীৰ সবকা সাথ,সবকা বিকাশ,সবকা বিশ্বাস নীতিৰ আধাৰত সম বিকাশৰ দিশে আগুৱাই লৈ গৈছে। প্ৰধানমন্ত্ৰী কৃষি সিঁচাই যোজনা, সৌভাগ্য যোজনাৰ দৰে কেন্দ্ৰীয় চৰকাৰৰ বিভিন্ন আঁচনি দ্বাৰা সমাজৰ অতিশয় দূৰ্বল লোকসকল উপকৃত হৈছে বুলি উল্লেখ কৰি মুখ্যমন্ত্ৰীয়ে কয় যে ৰাজ্য চৰকাৰে গ্ৰহণ কৰা বিভিন্ন আঁচনিৰ জৰিয়তে সকলো শ্ৰেণীৰ জনসাধাৰণ উপকৃত হোৱাৰ লগতে ৰাজ্য খনৰ বিকাশৰ গতিও ত্বৰাম্বিত হৈছে।

অনুসূচিত জাতি পৰিষদে অনুসূচিত জাতিৰ লোক সকলৰ উন্নয়নৰ ক্ষেত্ৰত পালন কৰি অহা ভূমিকাৰ বাবে মুখ্যমন্ত্ৰীয়ে ধন্যবাদ জ্ঞাপন কৰি কয় যে সতী ৰাধিকাৰ স্মৃতি নতুন প্ৰজন্মৰ মাজত তুলি ধৰাৰ বাবে ৰাজ্য চৰকাৰে সতী ৰাধিকা বঁটা প্ৰদান কৰিছে।সতী ৰাধিকাৰ আদৰ্শৰে যাতে নৱ প্ৰজন্মই আগুৱাই যাব পাৰে তাৰ বাবে ৰাজ্য চৰকাৰে মাজুলীত ১৫ বিঘা মাটি সামৰি সতী ৰাধিকা বহুমুখী প্ৰকল্প স্থাপন বাবে পদক্ষেপ গ্ৰহণ কৰিছে।এই প্ৰকল্পত সংগ্ৰহালয়,এম্পৰিয়াম, অতিথিশালা আৰু অধ্যয়ন কেন্দ্ৰ থাকিব বুলি মুখ্যমন্ত্ৰীয়ে কয়।বৰ্তমান যুগ প্ৰতিযোগিতাৰ যুগ।এই প্ৰতিযোগিতাত নিজৰ শ্ৰেষ্ঠতা প্ৰদৰ্শন কৰাৰ বাবে অনুসূচিত জাতিৰ নৱ প্ৰজন্মক অহোপুৰুষাৰ্থ কৰিবলৈ মুখ্যমন্ত্ৰীয়ে আহ্বান জনায়।

এই অনুষ্ঠান সাংসদ প্ৰদান বৰুৱা,অনুসূচিত জাতি পৰিষদৰ মাজুলীৰ জিলা সমিতিৰ সভাপতি দেৱজিৎ হাজৰিকা, সভানেত্ৰী পাপু হাজৰিকা দত্ত,আৰ্টফেডৰ উপাধ্যক্ষ ৰূপা কামাং,উপায়ুক্ত, আৰক্ষী অধীক্ষককে ধৰি গণ্য মান্য ব্যক্তি সকল উপস্থিত থাকে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

ঢকুৱাখনাত মিচিং সংগঠনৰ প্ৰতিনিধিত্বমূলক সভা অনুষ্ঠিত

মিচিং জনগোষ্ঠীৰ  সংগ্ৰামী সত্তা স্বৰূপ সদৌ  মিচিং ছাত্ৰ সন্থা,মিচিং সংগ্ৰাম সমিতি আৰু মিচিং মহিলা সমিতিৰ সাংগঠনিক ভেঁটি সুদৃঢ়কৰণ প্রক্রিয়াৰ অংশ হিচাপে এখন  যৌথ প্ৰতিনিধিত্বমূলক সভা বৃহস্পতি বাৰে অনুষ্ঠিত হয় ঢকুৱাখনাত । ঢকুৱাখনা জিলা সমিতিৰ অন্তৰ্গত  খেৰকটা আঞ্চলিকত  কেন্দ্ৰীয় সমিতি আৰু জিলা  সমিতিৰ নেতৃবৰ্গৰ  উপস্থিতিত অনুষ্ঠিত বিশেষ প্ৰতিনিধিত্বমূলক সভাত জাতীয় সংগঠন তিনিটাৰ বুনিয়াদ মজবুত কৰি  স্বজাতিৰ  সৰ্বাংগীন বিকাশৰ বাবে  আত্মনিয়োগ কৰাৰ আহ্বান জনোৱা হয়। স্থানীয় ছাত্ৰ নেতা লিজু দলেৰ সভাপতিত্বত খেৰকটা ৰংগমঞ্চত অনুষ্ঠিত প্ৰতিনিধি সভাত  উদ্দেশ্য বাব্খ্যা কৰে জিলা সমিতিৰ উপ সভাপতি পূৰ্ণ কান্ত দলেয়ে। 
সদৌ মিচিং ছাত্ৰ সন্থাৰ কেন্দ্ৰীয় সমিতিৰ সদস্য মিগাং ৰাজীৱ দলে ,মিচিং মহিলা সমিতিৰ সদস্য ৰেনু দলে ,জিলা সমিতিৰ  সভাপতি নিৰু লাগাছু , মিচিং সংগ্ৰাম সমিতিৰ জিলা সভাপতি দ্বীপেন দলে , জিলা সমিতিৰ সম্পাদক মোহন পেগু , ছাত্ৰ সন্থাৰ জিলা  ভাৰপ্ৰাপ্ত সম্পাদক নৱ কুমাৰ লয়িং,  নাথুৰাম পেগু আদি উপস্থিত থকা প্ৰতিনিধি সভাত  মোহন পেগু , ৰাজীৱ দলে , নাথুৰাম পেগু আদিয়ে বক্তৱ্য ৰাখে ।  নেতৃবৰ্গৰ উপস্থিতিত  সৰ্বসন্মতভাবে  জাতীয় সংগঠন তিনিটাৰ তিনিখন আঞ্চলিক সমিতি গঠন কৰা হয়।   সভাত ৰাজকুমাৰ দলেক সভাপতি , ৰাকেশ পেগুক সম্পাদক  হিচাপে লৈ ৩৩ জনীয়া  মিচিং ছাত্ৰ সন্থা , কল্পনা পেগুক সভাপতি  , ববিতা টায়েক সম্পাদক হিচাপেলৈ ৩৫ জনীয়া মিচিং মহিলা সমিতি আৰু শিশু কান্ত দলেক সভাপতি ,স্বৰণেস্বৰ দলেক সম্পাদক  হিচাপেলৈ মিচিং সংগ্ৰাম সমিতিৰ ৩২ জনীয়া খেৰকটা আঞ্চলিক সমিতি কেইখন গঠন কৰা হয়। নৱগঠিত আঞ্চলিক সমিতি কেইখনে অনাগত সময়ত  স্বজাতিৰ শৈক্ষিক,সামাজিক, সাংস্কৃতিক উন্নয়ন বিকাশৰ  লগতে  এখন প্ৰগতিশীল সমাজ গঢ়াৰ স্বাৰ্থত আত্মনিয়োগ কৰি যোৱাৰ সংকল্প গ্ৰহণ কৰে। 
বাতৰি যুগুতালে অমৃত পৱন বৰাই ।

এগৰাকী অসম সন্তানৰ চমক-সাজি উলিয়ালে ৪জনকৈ বহিব পৰা এখন বিশষ স্কুটাৰ

ধিঙৰ এজন যুৱকে সাজি উলিয়ালে ৪জনকৈ বহিব পৰা এখন বিশেষ স্কুটাৰ।ধিঙৰ অতুল দাস নামৰ এজন যুৱকজনে নিজ চেষ্টাৰ বলত সাজি উলিয়াইছে এই বিশেষ স্কুটাৰখন।বজাৰত সচৰাচৰ উপলব্ধ স্কুটাৰতকৈ ব্যতিক্ৰমী এই স্কুটাৰখন নিৰ্মাণ কৰি উলিওৱাৰ পিছতে এতিয়া চৰ্চা লাভ কৰিছে যুৱকজনে।জানিব পৰা মতে, অতুল দাস নামৰ যুৱকজন পেছাত এজন মটৰ চাইকেল মেকানিক।তেওঁ ধিং চাৰিআলিত এ,ডি অটোম`বাইলছ নামৰ এটি ক্ষুদ্ৰ গেৰেজৰ স্বত্বাধিকাৰী।যুৱক জনে সুদীৰ্ঘ তিনি বছৰৰ অন্তত ৩০ হেজাৰ ব্যয়েৰে এই বিশেষ স্কুটাৰ খন নিৰ্মাণ কৰি উলিয়াবলৈ সক্ষম হয়।সম্প্ৰতি যুৱক জনৰ এই উদ্ভাৱনে ৰাইজৰ দৃষ্টি আকৰ্ষণ কৰিবলৈ সক্ষম হৈছে।

২৮ অক্টোবৰৰ পৰা লখিমপুৰত অনুষ্ঠিত হ’ব ৰাষ্ট্ৰীয় নাট মহোৎসৱ

লখিমপুৰৰ অভিনৱ থিয়েটাৰ উদ্যোগত অনুষ্ঠিত হ’ব ৰাষ্ট্ৰীয় নাট মহোৎসৱ। বুধবাৰে বিয়লি লখিমপুৰ প্ৰেছ ক্লাবত অনুষ্ঠিত সংবাদমেলযোগে এয়া ঘোষণা কৰে উদ্যোক্তাসকলে ৷২৮অক্টোবৰৰ পৰা লখিমপুৰৰ ফুলবাৰীত আৰম্ভ হ’বলগীয়া অভিনৱ থিয়েটাৰৰ ৰাষ্ট্ৰীয় নাট মহোৎসৱত পশ্চিমবংগ, উত্তৰ প্ৰদেশ, বিহাৰ, ত্ৰিপুৰা আৰু অসমৰ নাট্যদলৰ নাট মঞ্চস্থ হ’ব ৷ উদ্যোক্তাসকলে জনোৱা মতে, ফুলবাৰীৰ ১ নং মাজগাঁৱৰ অভিনৱ থিয়েটাৰ প্ৰকল্প ২৮,২৯,৩০ আৰু ৩১ অক্টোবৰত অনুষ্ঠিত হ’ব এই নাট মহোৎসৱ ৷অভিনৱ থিয়েটাৰৰ সচিব দয়াল কৃষ্ণ নাথে জনায় যে, এই নাট মহোৎসৱত ভাৰতৰ পশ্চিমবংগ, উত্তৰ প্ৰদেশ, বিহাৰ, ত্ৰিপুৰা আৰু অসমৰ নাট্যদলে সচেতন ধাৰাৰ নাট মঞ্চস্থ কৰিব ৷ গাঁৱৰ পৰিৱেশত প্ৰছেনিয়াম মঞ্চত প্ৰতিদিনে সন্ধিয়া ৭ বজাৰ পৰা প্ৰদৰ্শন কৰা হ’ব দুখনকৈ নাট ৷এই ৰাষ্ট্ৰীয় নাট মহোৎসৱৰ ২৮ অক্টোবৰৰ সন্ধিয়া কলকাতাৰ দক্ষিণেশ্বৰ সংকেট নাট্যদলে প্ৰিয়াংকু ৰয়ৰ পৰিচালনাৰ বঙালী ভাষাৰ নাট ‘ৰুপাই চাজু কথা’ আৰু অভিনৱ থিয়েটাৰৰ দ্বাৰা দয়াল কৃষ্ণ নাথৰ পৰিচালনাত হিন্দী নাট ‘কৰৱা সচ্’ মঞ্চস্থ কৰা হ’ব ৷২৯ অক্টোবৰৰ সন্ধিয়া পশ্চিমবংগৰ শ্ৰীয়ামপুৰ তপস্য গোষ্ঠীয়ে লুম্বিনী কুণ্ডুৰ পৰিচালনাত বঙালী ভাষাৰ নাট ‘বিৰোহিনী’, উত্তৰ প্ৰদেশৰ অযোধ্যাৰ শান্তি কালচাৰেল ফাউণ্ডেশ্যনৰ দ্বাৰা জয় ভাৰতীৰ পৰিচালনাত হিন্দী নাট ‘চলিলকুইষ্ট’ ৷ তদুপৰি ধেমাজি জিলাৰ গোগামুখৰ দৌমৰ নাট্যগোষ্ঠীৰ দ্বাৰা প্ৰবীণ দলেৰ পৰিচালনাত মিচিং ভাষাৰ নাট ‘মৰৌ’ মঞ্চস্থ কৰা হ’ব ৷ইয়াৰ পাচত ৩০অক্টোবৰৰ সন্ধিয়া বিহপুৰীয়াৰ ৰুদ্ৰাক্ষ নাট্যগোষ্ঠীৰ দ্বাৰা দেৱব্ৰত কাকতিৰ পৰিচালনাত অসমীয়া ভাষাৰ নাট ‘ঈশ্বৰৰ সন্ধানত’ আৰু আগৰতলাৰ কলাভূমিৰ দ্বাৰা বিদ্যুত জিৎ চক্ৰৱতীৰ পৰিচালনাত বঙালী ভাষাৰ নাট ‘অন্তৰ্দহন’ মঞ্চস্থ কৰা হ’ব ৷৩১ অক্টোবৰৰ সন্ধিয়া পশ্চিমবংগৰ গোবৰদাংগা মৃদংগমৰ দ্বাৰা কুশল ডেকাৰ পৰিচালনাত বঙালী ভাষাৰ নাট ‘ছায়াকৃত’ আৰু বিহাৰৰ বেগুচৰাইৰ আর্শীবাদ ৰংমণ্ডলৰ দ্বাৰা অমৃত ৰৌচনৰ পৰিচালনাত হিন্দী নাটক ‘কথাকৰজ’ মঞ্চস্থ কৰা হ’ব ৷উক্ত সংবাদমেলত বিহাৰৰ বেগুচৰাইৰ নাট পৰিচালক তথা মধ্য প্ৰদেশ নাট্য বিদ্যালয়ৰ স্নাতক ৰবি বার্মা উপস্থিত থাকি এই নাট মহোৎসৱৰ সফলতাৰ বাবে ৰাইজৰ পৰা সহায়-সহযোগিতাৰ আশা প্ৰকাশ কৰে ৷ অসমৰ এই নাটৰ উপযোগী পৰিৱেশ দেখি তেওঁ আপ্লুত হোৱা বুলিও মনোভাৱ ব্যক্ত কৰে ।উল্লেখ্য যে, নাট উপভোগৰ বাবে প্ৰয়োজনীয় প্ৰৱেশ পত্ৰৰ বাবে 7002728394 নম্বৰত যোগাযোগ কৰিবলৈ ৰাইজক আহ্বান জনায় অভিনৱ থিয়েটাৰৰ সম্পাদক দয়াল কৃষ্ণ নাথে ৷

অসমৰ জলপৰী আস্থা চৌধুৰীৰ অভিলেখ

ৰাষ্ট্ৰীয় ছাব জুনিয়ৰ আৰু জুনিয়ৰ সাঁতোৰ চেনম্পিয়নশ্বিপত এগৰাকী অসম সন্তানে অভিলেখ ৰচনা কৰিছে ।শিৱসাগৰৰ আস্থা চৌধুৰীয়ে ১০০মিটাৰ বাটাৰফ্লাইট স্বৰ্ণপদক লাভ কৰিছে।বাংগালুৰুত ৫দিনীয়াকৈ অনুষ্ঠিত হোৱা ৩৭তম চাবজুনিয়ৰ আৰু ৪৭ তম জুনিয়ৰ ৰাষ্ট্ৰীয় সাঁতোৰ প্ৰতিযোগিতাত এই পদক লাভ কৰিছে ।মনকৰিবলগীয়া যে আস্থাই বহুকেইটা ৰাষ্ট্ৰীয় আন্তৰাষ্ট্ৰীয় প্ৰতিযোগিতাত অংশলৈ সফলতা লাভ কৰিছিল।

ঘোঁৰামাৰীত ভূপেন্দ্ৰ সংগীতৰ দহদিনীয়া কৰ্মশালা আৰম্ভ

শোণিতপুৰৰ বালিপৰাৰ সমীপৱৰ্তী ঘোঁৰামাৰীত ঘোঁৰামাৰী আঞ্চলিক প্ৰেক্ষাগৃহ আৰু জ্যোতি-বিষ্ণু সাংস্কৃতিক ভৱন পৰিচালনা সমিতিৰ উদ্যোগত আজিৰে পৰা ভূপেন্দ্ৰ সংগীতৰ দহদিনীয়া কৰ্মশালা আৰম্ভ হৈছে । কৰ্মশালাখনিত ঘোঁৰামাৰী,বালিপৰা ,পাটগাঁও, ঢেঁকীদল, টুবুকীঝাৰ, বৈঠাভংগা আদি অঞ্চলৰ ভালে সংখ্যক কণ কণ শিশুৱে অংশগ্ৰহণ কৰিছে।অনুষ্ঠানত প্ৰশিক্ষক হিচাপে উপস্থিত থাকে মুৰুলী নাথ।কৰ্মশালাখনিত লগতে উপস্থিত থাকে সমাজসেৱক প্ৰশান্ত দাস, সংগীতশিল্পী বিনন বড়োৰ লগতে ভালেমান ৰাইজ, বিশিষ্ট ব্যক্তি।উল্লেখ্যে যে, কৰ্মশালাখনি অহা ৩০ অক্টোবৰত সামৰণি পৰিব।

নগাঁৱৰ ৰামানুজন কনিষ্ঠ মহাবিদ্যালয়ৰ ছাত্ৰীলৈ ভাৰত ভূষণ সন্মান

পুনৰ ৰাষ্ট্ৰীয় পৰ্যায়ত সন্মানিত কৰা হ’ল অসমৰ ছাত্ৰী সৃষ্টিৰাণী টাইডক । নগাঁৱৰ ৰামানুজন কনিষ্ঠ মহাবিদ্যালয়ৰ ছাত্ৰী সৃষ্টিৰাণীলৈ আগবঢ়োৱা হৈছে ভাৰত ভূষণ সন্মান । মধ্য অসমৰ উচ্চ শিক্ষাৰ অগ্ৰণী বেচৰকাৰী প্ৰতিষ্ঠান ৰামানুজন কনিষ্ঠ মহাবিদ্যালয়ৰ একাদশ শ্ৰেণীৰ ছাত্ৰী সৃষ্টিৰাণী টাইডক ভাৰত ভূষণ সন্মানেৰে সন্মানিত কৰা হয় । সৃষ্টিৰাণী একেধাৰে কবি, লেখিকা আৰু গীতিকাৰ ।তেওঁ ৰচনা কৰা কিতাপ আঠটা ভাৰতীয় ভাষাত প্ৰকাশিত হৈছে । এই সৃষ্টিৰাজিৰ বাবেই প্ৰতিভাসম্পন্ন ছাত্ৰীগৰাকীক ভাৰত ভূষণ সন্মানেৰে সন্মানিত কৰা হয় । মধ্য প্ৰদেশৰ ভূপালত ‘সামাজিক ন্যায় আৰু সবলীকৰণ মন্ত্ৰালয়’, ‘নীতি আয়োগ’, ‘আত্মনিৰ্ভৰ ভাৰত’, ‘ডিজিটেল ইণ্ডিয়া’ৰ সহযোগত আয়োজিত এক গাম্ভীৰ্যপূৰ্ণ অনুষ্ঠানত সন্মানিত কৰা হয় সৃষ্টিৰাণীক । NASF ৰ উপাচাৰ্য ড° দিকামৰাজা আৰু NASF ৰ মহানিৰ্দেশক ড° জে কে সুব্ৰমণিয়ামৰ পৰা এই বঁটা গ্ৰহণ কৰে ছাত্ৰীগৰাকীয়ে।

সৃষ্টিৰাণীক ভাৰত ভূষণ সন্মানেৰে সন্মানিত কৰাৰ পাচতে পিতৃ মণিন্দ্ৰ টাইড, মাতৃ মাকমি নৰহ টাইডৰ লগতে লখিমপুৰৰ ৰাইজ আনন্দিত হৈ পৰিছে । উল্লেখ্য যে, সৃষ্টিৰাণীয়ে অতি কম বয়সতে বিভিন্ন বঁটা আৰু সন্মান লাভ কৰিবলৈ সক্ষম হৈছে ছাত্ৰীগৰাকীয়ে । ইতিমধ্যে ৱৰ্ল্ড বুক অৱ টেলেণ্ট ৰেকৰ্ড, আছাম বুক অৱ ৰেকৰ্ডত নিজৰ নাম অন্তৰ্ভূক্ত কৰিছে সৃষ্টিৰাণীয়ে ।তদুপৰি ইণ্ডিয়া প্ৰাইম আইকন এৱাৰ্ড, ৰাষ্ট্ৰীয় সমাজ সেৱা ৰত্ন, জি টাউন এৱাৰ্ড, ডব্লিউ বি টি আৰ গ্ল’বেল এক্সেলেঞ্চ অনলাইন এৱাৰ্ডো লাভ কৰিছে ছাত্ৰীগৰাকীয়ে । লগতে ৰাষ্ট্ৰীয় মানৱ অধিকাৰ সংগঠনে তেওঁক ইণ্ডিয়ান আইকন এৱাৰ্ডৰ বাবেও নিৰ্বাচিত কৰিছে । সৃষ্টিৰাণীৰ সাফল্যত স্বাভাৱিকতে এক আনন্দমুখৰ পৰিৱেশে বিৰাজ কৰিছে নগাঁৱৰ ৰামানুজন কনিষ্ঠ মহাবিদ্যালয়ত৷