অসম প্ৰশাসনীয় পদাধিকাৰী মহাবিদ্যালয়ত আয়োজিত সন্মিলনত অংশগ্ৰহণ মুখ্যমন্ত্ৰী

মুখ্যমন্ত্ৰী ড° হিমন্ত বিশ্ব শৰ্মাই আজি কেন্দ্ৰীয় বন্দৰ,জাহাৰ পৰিবহন আৰু জলমাৰ্গ দপ্তৰৰ মন্ত্ৰী সৰ্বানন্দ সোণোৱালৰ সৈতে অসম প্ৰশাসনীয় পদাধিকাৰী মহাবিদ্যালয়ত আয়োজিত উত্তৰ-পূৰ্বাঞ্চলৰ ৰাজ্য সমূহৰ বাবে বিকাশৰ চালিকশক্তি হিচাপে জলপথ শীৰ্ষক অংশীদাৰী সন্মিলনত অংশগ্ৰহণ কৰে।এই সন্মিলনত উত্তৰ পূৰ্বাঞ্চলৰ ৰাজ্য কেইখনৰ জলপথ সমূহৰ উপযুক্ত ব্যৱহাৰৰ লগতে অঞ্চলটোত এই খণ্ডৰ সম্ভাৱনীয়তাৰ বিভিন্ন দিশ আলোচনা কৰা হয়।

সন্মিলনত ভাষণ প্ৰদান কৰি মুখ্যমন্ত্ৰীয়ে কয় যে স্বধীনতাৰ পৰৱৰ্তী সময়ত দীৰ্ঘকাল ধৰি আমি অসমৰ জলপথ সমূহৰ সম্ভাৱনীয়তা উপযুক্ত মূল্যায়ন কৰিবলৈ সমৰ্থ হোৱা নাছিল। কিন্ত প্ৰধানমন্ত্ৰী নৰেন্দ্ৰ মোদীৰ বলিষ্ঠ নেতৃত্বত এই খণ্ডটোৱে এতিয়া এক নতুন গতি লাভ কৰিবলৈ সক্ষম হৈছে। এক্ট-ইষ্ট কৰিড’ৰ আদি বিভিন্ন পদক্ষেপৰ জৰিয়তে যদিও স্থলপথৰ মাধ্যমেৰে এই অঞ্চলটোৰ সৈতে বহি:বিশ্বৰ বাণিজ্যিক সম্পৰ্ক স্থাপন ক্ষেত্ৰত বহুখিনি অগ্ৰগতি লাভ কৰা হৈছে,পথ পৰিবহন বৰ্দ্ধিত ব্যয়ে বহু সময়ত এই দিশত বাধাৰো সৃষ্টি কৰি আহিছে।জলপথৰ উপযুক্ত ব্যৱহাৰে এই ক্ষেত্ৰত ৰাজ্য খনৰ বহুদূৰ আগুৱাই লৈ যাবলৈ সক্ষম হ’ব বুলি তেওঁ আশা প্ৰকাশ কৰে।

জলপথক পৰিবহনৰ আটাইতকৈ মিতব্যয়ী আৰু পৰিৱেশ অনুকূল মাধ্যম বুলি অভিহিত কৰি ৰপ্তানিকাৰী আৰু ব্যৱসায়ী সম্প্ৰদায়ক জলপথৰ মাধ্যমেৰে ব্যৱসায়ৰ সুযোগ গ্ৰহণ কৰিবৰ বাবে আগবাঢ়ি আহিবলৈ মুখ্যমন্ত্ৰীয়ে আহ্বান জনায়।উত্তৰ পূৱৰ ৰাজ্যসমূহৰ বিকাশৰ বাবে অঞ্চলটোৰ জলপথসমূহৰ পুনৰুজ্জীৱিকৰণৰ দিশত গ্ৰহণ কৰা পদক্ষেপৰ বাবে মুখ্যমন্ত্ৰীয়ে কেন্দ্ৰীয় বন্দৰ,জাহাজ পৰিবহন আৰু জলমাৰ্গ দপ্তৰ মন্ত্ৰী সৰ্বানন্দ সোণোৱালক ধন্যবাদ জ্ঞাপন কৰে।তেওঁ লগতে কয় যে যিহেতু দেশৰ ৯৫ শতাংশ আন্তঃদেশীয় বাণিজ্যই জলপথৰ মাধ্যমেৰে হয় সেয়েহে এই খণ্ডটোক নতুন প্ৰজন্মই কেৰিয়াৰ হিচাপে গ্ৰহণ কৰাৰ বহুখিনি সম্ভাৱনীয়তা লুকাই আছে।

নিজৰ ভাষণত মুখ্যমন্ত্ৰীয়ে অসমৰ নৈপৰীয়া অঞ্চলৰ ৰাইজলৈ উন্নত চিকিৎসা সেৱা আগবঢ়োৱাৰ বাবে উন্নত মানৰ নৌকা এম্বুলেঞ্চ প্ৰস্তুতৰ বাবে আগবাঢ়ি আহিবলৈ কোচিন শ্বিপয়াৰ্ড লিমিটেডৰ প্ৰতি আহ্বান জনায়। সন্মিলনত ভাষণ প্ৰদান কৰি কেন্দ্ৰীয় বন্দৰ,জাহাজ পৰিবহন আৰু জলমাৰ্গ দপ্তৰৰ মন্ত্ৰী সৰ্বানন্দ সোণোৱালে অসমকে ধৰি উত্তৰ পূৰ্বাঞ্চলৰ ভগৱানপ্ৰদত্ত বিশাল জলপথ হিচাপে উপযুক্ত ৰূপত ব্যৱহাৰ কৰিব পাৰিলে অঞ্চলটোৰ বিশ্বজয়ৰো সামৰ্থ্য আছে বুলি কয়।বৃটিছ আমোলত অঞ্চলটোৰ জলপথৰ উপযুক্ত ব্যৱহাৰৰ বাবে এই অঞ্চলৰ জনমূৰি আয় সৰ্বভাৰতীয় গড়তকৈ যথেষ্ট উন্নত আছিল বুলি উল্লেখ কৰি এই খণ্ডটোৰ সম্ভাৱনীয়তাৰ পুনৰ আৱিষ্কাৰৰ বাবে একেলগে মিলি কাম কৰিবলৈ তেওঁ উত্তৰ পূৱৰ ৰাজ্য সমূহৰ প্ৰতি আহ্বান জনায়। মুখ্যমন্ত্ৰী ড° হিমন্ত বিশ্ব শৰ্মাৰ আহ্বান প্ৰতি সঁহাৰি জনায় তেওঁৰ মন্ত্ৰালয়ে অসমত এখন সমুদ্ৰ বিজ্ঞানৰ প্ৰশিক্ষণ প্ৰতিষ্ঠান স্থাপন কৰিব বুলিও কেন্দ্ৰীয় মন্ত্ৰী গৰাকীয়ে ঘোষণা কৰে।

ভাষণ প্ৰসংগত তেওঁ জলপথৰ মাধ্যমেৰে সামগ্ৰী ৰপ্তানি কাম আৰম্ভ কৰিবলৈ স্থানীয় ৰপ্তানিকাৰী সকলৰ প্ৰতি আহ্বান জনোৱাৰ লগতে উত্তৰ পূৱৰ ৰাজ্য সমূহক সংশ্লিষ্ট ৰাজ্যৰ বৰ্তমানে থকা জলপথ সমূহৰ উন্নয়ন বাবে প্ৰকল্পৰ প্ৰস্তাৱ যুগুত কৰিবলৈ তেওঁ আহ্বান জনায়।সন্মিলনত উদ্যোগ আৰু বাণিজ্য তথা পৰিবহন বিভাগৰ মন্ত্ৰী চন্দ্ৰ মোহন পাটোৱাৰী আৰু কেন্দ্ৰীয় বন্দৰ,জাহাৰ পৰিবহন আৰু জলমাৰ্গ দপ্তৰৰ ৰাজ্যিক মন্ত্ৰী শান্তনু ঠাকুৰেও ভাষণ প্ৰদান কৰে। অনুষ্ঠানত জলসম্পদ মন্ত্ৰী পীয়ুষ হাজৰিকা লগতে উত্তৰ পূৱ ৰাজ্য সমূহৰ কেইবাগৰাকীও মন্ত্ৰী উপস্থিত থাকে।অংশদাৰী সন্মিলন খনত ভাৰতীয় আভ্যন্তৰীণ জলপথ প্ৰাধিকৰণৰ উপাধ্যক্ষ তথা ভাৰপ্ৰাপ্ত অধ্যক্ষ জয়ন্ত সিং,জলমাৰ্গ মন্ত্ৰালয়ৰ সচিব সঞ্জীৱ ৰঞ্জন,জাহাজ পৰিবহন সঞ্চালকপ্ৰধান অমিতাভ কুমাৰ,শ্যামাপ্ৰসাদ মুখাৰ্জী প’ৰ্ট ট্ৰাষ্টৰ অধ্যক্ষ বিনীত কুমাৰ,কোচিন শ্বিপয়াৰ্ড লিমিটেড লৰ অধ্যক্ষ মধু এছ নায়াৰ,বিভিন্ন বাণিজ্যিক সন্থা,উদ্যোগপতি,ৰপ্তানিকাৰী সংস্থাৰ প্ৰতিনিধিবৰ্গৰ লগতে কেন্দ্ৰীয় আৰু ৰাজ্য চৰকাৰৰ বহুসংখ্যক শীৰ্ষ বিষয়াববীয়াই অংশগ্ৰহণ কৰে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

ৰাজ্যসভাৰ প্ৰাৰ্থী হিচাপে সৰ্বানন্দ সোণোৱালৰ নাম ঘোষণা বিজেপিৰ

ৰাজ্যসভাৰ উপ-নিৰ্বাচনৰ প্ৰাৰ্থী হিচাপে সৰ্বানন্দ সোণোৱালক নাম প্ৰক্ষেপ বিজেপিৰ।অসমকে ধৰি আন পাঁচখন ৰাজ্যত অহা ৪ অক্টোবৰত অনুষ্ঠিত হ’ব ৰাজ্যসভাৰ উপ-নিৰ্বাচন।উপ-নিৰ্বাচনৰ বাবে ভাৰতীয় জনতা পাৰ্টীৰ কেন্দ্ৰীয় নিৰ্বাচন সমিতিয়ে অসম আৰু মধ্যপ্ৰদেশৰ বাবে নিজৰ প্ৰাৰ্থীৰ নাম ঘোষণা কৰিছে।বিজেপিৰ কেন্দ্ৰীয় সমিতিয়ে অসমৰ একমাত্ৰ আসনখনৰ বাবে প্ৰাক্তন মুখ্যমন্ত্ৰী তথা বৰ্তমানৰ কেন্দ্ৰীয় মন্ত্ৰী সৰ্বানন্দ সোণোৱালক প্ৰাৰ্থী হিচাপে প্ৰক্ষেপ কৰিছে।

উল্লেখ্য যে বিশ্বজিত দৈমাৰীয়ে পদত্যাগ কৰাৰ পিছৰে পৰা ৰাজ্যসভাৰ আসনখন খালী হৈ আছিল।৪ অক্টোবৰত অনুষ্ঠিত হ’বলগীয়া এই নিৰ্বাচনৰ মনোনয়ন পত্ৰ দাখিলৰ অন্তিম তাৰিখ ২২ ছেপ্তেম্বৰ।ইফালে বিজেপিয়ে মধ্য প্ৰদেশৰ আসনখনৰ বাবে ডাঃ এল মুৰুগানক প্ৰাৰ্থী হিচাপে নিৰ্বাচিত কৰিছে।

এন আৰ এলৰ বাৰ্ষিক সাধাৰণ সভা অনুষ্ঠিত

নুমলীগড় ৰিফাইনেৰী লিমিটেডৰ ২৮ তম বাৰ্ষিক সাধাৰণ সভাখন ১৮ ছেপ্টেম্বৰ শনিবাৰে কোম্পানীটোৰ গুৱাহাটীস্থিত কৰ্পোৰেট কাৰ্যালয়ত অনুষ্ঠিত হয়।এন আৰ এলৰ অধ্যক্ষ আৰু অইল ইণ্ডিয়া লিমিটেডৰ চি এম ডি এছ চি মিশ্ৰই সভাপতিত্ব কৰা সাধাৰণ সভাখনত এন আৰ এলৰ এম ডি এছ কে বৰুৱা আৰু এন আৰ এল বোৰ্ডৰ অন্য সদস্য সকল তথা কোম্পানীটোৰ শ্বেয়াৰহল্ডাৰ সকলে অংশগ্ৰহণ কৰে।কোম্পানীটোৰ বিত্তীয় বৰ্ষ ২০২০-২১ ৰ সময়ছোৱাত ৩৫৭ শতাংশৰ সৰ্বাধিক লাভাংশ(প্ৰতি ১০ টকাৰ ৩৭.৫ প্ৰতি পূৰ্ণ ইকুইট শ্বেয়াৰ) ঘোষণা কৰে।বৰ্তমানলৈ কোম্পানীটোৰ সৰ্বাধিক ৰূপে পৰিগণিত এই লাভাংশ ২০২০-২১ বিত্তীয় বৰ্ষটোত মধ্যৱৰ্তী লাভাংশ ৰূপে ইতিমধ্যে প্ৰদান কৰা হৈছে।২০২০-২১ বিত্তীয় বৰ্ষটো বিভিন্ন প্ৰতিকূল নেওচি আভ্যন্তৰীণ শক্তি ,অভিযোজন ক্ষমতা আৰু শক্তিশালী ইনকিল্ট চিমেণ্ট আৰু প্ৰক্ৰিয়াৰ বলত যোগাত্মক ফলাফলেৰে সমাপ্ত হয়।

২০২০-২১ বিত্তীয় বৰ্ষৰ মুখ্য তাৎপৰ্যপূৰ্ণ দিশ আছিল ২৫ মাৰ্চত স্বাক্ষৰিত শ্বেয়াৰ ক্ৰয় চুক্তিৰ মাধ্যমেৰে মেজৰিটি ইকুইটি শ্বেয়াৰহল্ডিঙৰ জৰিয়তে অইলে হল্ডিঙ কোম্পানীৰ ৰূপে এন আৰ এলৰ মালিকিস্বত্ব গ্ৰহণ কৰা।এই ঐতিহাসিক উন্নয়ন বিষয়ে এন আৰ এল আৰু অইলৰ মাজত হোৱা অংশীদাৰিত্বই সুন্দৰ সময়ৰে আগবাঢ়িব আৰু ৰাষ্ট্ৰৰ শক্তি সুৰক্ষা নিশ্চিত কৰা তথা পেট্ৰলিয়াম আৰু প্ৰাকৃতিক গেছ মন্ত্ৰালয়ৰ দ্বাৰা নিৰ্ধাৰিত লক্ষ্যত উপনীত হোৱাৰ ক্ষেত্ৰত অৱদান আগবঢ়াব।এক হিতাধিকাৰী ৰূপে ই আই এলৰ উপস্থিতি কোম্পানীটোৰ কাৰিকৰী বিশেষজ্ঞতাক অধিক আগুৱাই লৈ যোৱাত অৰিহণা যোগাব।

২০২০-২১ বিত্তীয় বৰ্ষৰ সময়ছোৱাত ৰিফাইনেৰীটোৱে ২,৭০৭ টি এম টি খাৰুৱা তেলৰ শোষণ কৰে, যি বিগত বিত্তীয় বৰ্ষৰ তুলনাত ১৪ শতাংশ অধিক।কোম্পানীটোৱে ৪২ টি এম টি খাৰুৱা তেলৰ আমদানি কৰে যি ৰিফাইনেৰী টোত শোধন কৰা হয়।বিগত বৰ্ষ তুলনাত এইচ এছ ডিৰ ক্ষেত্ৰত ১২ শতাংশ অধিক তৈয়াৰ কৰি ১.৮০৯ টি এম টি আৰু ৩৬ শতাংশ বৃদ্ধিৰে এম এছত ৬৩৬ টি এম টি উৎপাদন কৰা হয়।ৰিফাইনেৰীটোৱে বৰ্তমান লৈকে সৰ্বাধিক ৪৭ টি এম টি ম’ম উৎপাদন কৰে।যি বিগত বৰ্ষৰ তুলনাত ১৭ শতাংশ অধিক।একেদৰে ৩৩ শতাংশ বৃদ্ধিৰে ৫৭ টি এম টি এল পি জি বটলিং কৰে যি বৰ্তমান লৈকে সৰ্বাধিক ৰূপে পৰিগণিত হৈছে।

২০২০-২১ বিত্তীয় বৰ্ষৰ সময়ছোৱাত বিক্ৰীৰ পৰিমাণ ২,৯২৪ টি এম টি হয়।এই পৰিমাণ বিগত বিত্তীয় বৰ্ষত ২,৩৬১ টি এম টি আছিল বিক্ৰীৰ পৰিমাণ বিগত বিত্তীয় তুলনাত ২৩.৯ শতাংশ বৃদ্ধি হয়।এইচ এছ ডিৰ বিক্ৰী বিগত বৰ্ষৰ ১,৫৪১ টি এম টিৰ পৰা বৃদ্ধি হৈ ১,৮৩৫ টি এম টি হয়।একেদৰে বিগত বিত্তীয় বৰ্ষত ৪৫৮ টি এম টি এম এছৰ বিক্ৰী হৈছিল,যি বিত্তীয় বৰ্ষ ২০২০-২১ত বুদ্ধি হৈ সৰ্বাধিক ৬৪৭ টি এম টি হয়।আনহাতে ম’মৰ বিক্ৰী ক্ষেত্ৰত সৰ্বাধিক ৪৭ টি এম টি বিক্ৰীৰ অভিলেখ সৃষ্টি হয়।

২০২৯-২১ বিত্তীয় বৰ্ষত কোম্পানীৰ পৰিচালনা পৰা ১৮,৫৪৪ কোটি টকা ৰাজহ অর্জন কৰা হয় যি বিগত বিত্তীয় বৰ্ষৰ ১৪,০৭৩ কোটি টকাৰ তুলনাত ৩১.৭৭শতাংশ অধিক হয়।অধিক খাৰুৱা তেল শোধন আৰু অভাৱ অল মাৰ্জিন বৃদ্ধিৰ ফলত এন আৰ এলৰ লাভ ৩,০৩৬ কোটি টকা হয় যি যোৱা বিত্তীয় বৰ্ষৰ তুলনাত ১২০ শতাংশ বৃদ্ধি পায় তথা বৰ্তমালৈ সৰ্বোচ্চ বুলি পৰিগণিত হয়।কোম্পানীৰ নেটমূল্য বিগত বিত্তীয় বৰ্ষৰ ৫,৩০৪ কোটি টকাৰ পৰা বৃদ্ধি হৈ ৩১ মাৰ্চ ত ৫,৫৯৬ কোটি টকা হয়।উৎকৃষ্ট বিত্তীয় প্ৰদৰ্শন বাবে ৰাজকোষত ৬,৪৬৮ কোটি টকাৰ অনুদান প্ৰদান কৰা হয় যি বৰ্তমানলৈকে সৰ্বাধিক।
পুঁজিগত বিনিয়োগ আৰু প্ৰকল্প:-
কোম্পানীটোৱে নুমলীগড় ৰিফাইনেৰী বিস্তাৰ প্ৰকল্প ২ জি ইথেন’ল প্ৰকল্প আৰু ভাৰত বাংলাদেশ মৈত্ৰী পাইপলাইন নামৰ মুখ্য প্ৰকল্প সমূহৰ ৰূপায়ন কাম অব্যাহত ৰাখিছে আৰু যুদ্ধকালীন ক্ষীপ্ৰতাৰে কাম সমূহ অগ্ৰগতিৰ লাভ কৰিছে।প্ৰায় ২৮,০০০ কোটি টকা আনুমানিক ব্যয় সাপেক্ষে নুমলীগড় ৰিফাইনেৰী সম্প্ৰসাৰণ প্ৰকল্প জৰিয়তে ৰিফাইনেৰীটোৰ ক্ষমতা ৩,০ এম এম টি পি এৰ পৰা বৃদ্ধি কৰি ৯.০ এম এম টি পি এ কৰা ওড়িশাৰ পাৰাদ্বীপ বন্দৰত খাৰুৱা তেলৰ আমদানি টাৰ্মিনেলৰ নিৰ্মাণ আৰু পাৰাদ্বীপ বন্দৰৰ পৰা ১,৬৩৫ কিলোমিটাৰ দীঘল ক্ৰ’ছ কাণ্টি ক্ৰুড অইল পাইপলাইন বহোৱাৰ প্ৰকল্প গ্ৰহণ কৰা হৈছে এই প্ৰকল্প সমূহৰ লগতে গ্ৰহণ কৰা অন্য প্ৰকল্প সমূহ জৰিয়তে এন আৰ এলে এতিয়ালৈকে সৰ্বাধিক ৯২৪ কোটি টকাৰ পুঁজি বিনিয়োগ কৰিছে।

তথ্য প্ৰযুক্তিৰ ক্ষেত্ৰখনত শেহতীয়া আৰু সৰ্বোত্তম প্ৰথা প্ৰণালী সমূহ অৱলম্বন কৰা এন আৰ এল যথেষ্ট আগৰণুৱা।২০২৯-২১ বিত্তীয় বৰ্ষত কেইবাটাও ডিজিটেল পদক্ষেপ গ্ৰহণ কৰে।ইয়াৰ ভিতৰত উল্লেখযোগ্য ২০২০ চনৰ আগষ্ট মাহত শুভাৰম্ভ কৰা পেপাৰলেছ অ’ফিছ ছলুশ্বন আৰোহণ,যাৰ ফলশ্ৰুতিত ক্ৰয় চক্ৰত সমগ্ৰ ডিজিটেল পৰিবৰ্তন এছ এ পিৰ জৰিয়তে সাধন কৰা হয়।ভৱিষ্যতে এইছ আৰ ,লাভ প্ৰবন্ধৰ আৰু অন্যান্য আভ্যন্তৰীণ আৰু বাহ্যিক প্ৰক্ৰিয়া সম্বন্ধিতে সকলো ব্যৱসায়িক প্ৰক্ৰিয়া ক্ষেত্ৰত ইয়াৰ প্ৰয়োগ কৰা হ’ব S/4 HANA(High performance Analytcal Appliance) নামৰ মাইগ্ৰেছন প্ৰকল্প ২০২০ চনৰ ডিচেম্বৰ মাহত আৰম্ভ কৰি আন এটা গুৰুত্বপূৰ্ণ বিকাশ সাধন কৰা হয়।এই প্ৰণালীৰ জৰিয়তে এম্বেডেড বিশ্লেষণাত্মক ক্ষমতা লগত ডাটা ক্ষীপ্ৰতাৰ প্ৰ’ছেচ কৰাৰ ক্ষমতাৰ কাৰণে কাৰ্য্য নিষ্পাদনৰ ক্ষেত্ৰত সহায়ক হ’ব।অন্য পদক্ষেপ সমূহৰ ভিতৰত ক্লাউড হোষ্টেল ডিজিটেল কেপিটেল প্ৰ’জেক্ট মেনেজমেণ্ট টুলছ ইমচিভ ভি আৰ ট্রেনিং ফ’ৰ চেফটি এণ্ড মাৰ্কেটিং অ’পৰেছন ইত্যাদি সন্নিবিষ্ট।

যি সময়ত ক’ভিড মহামাৰী বিৰুদ্ধে যুদ্ধ অব্যাহত ৰাখিছে, এন আৰ এলে পৰিস্থিতি লগত মুকাবিলা কৰিবৰ বাবে সুবিধা আৰু ব্যৱস্থাৱলী বৃদ্ধি কৰি সকলো ফালৰ পৰা সমৰ্থন দিয়াৰ বাবে আগবাঢ়ি আহিছে।এন আৰ এলে চি এচ আৰৰ জৰিয়তে ক’ভিডৰ লগত যুজঁ দিবলৈ ৩৬ কোটি টকা নিৰ্ধাৰণ কৰে।এই ধনৰাশি আই চি ইউ সুবিধা যুক্ত ১২০ খন বিচনা ক’ভিড কেয়াৰ চেণ্টাৰ এটা ,কেইবাটাও অক্সিজেন প্লাণ্ট স্থাপন,কেইবাটাও ক’ভিড চেণ্টাৰ তথা কেইবাটাও বিনামূলীয়া ভেকচিন প্ৰদান কেন্দ্ৰ আদি স্থাপন কৰি সেৱা আগবঢ়ায়।

লাভলীনাই প্ৰধানমন্ত্ৰী নৰেন্দ্ৰ মোদীক দিয়া উপহাৰ নিলাম

★লাভলীনাই প্ৰধানমন্ত্ৰী নৰেন্দ্ৰ মোদীক দিয়া উপহাৰ নিলাম।
★১.৯ কোটি টকালৈকে উঠিছে লাভলীনাৰ হেণ্ড গ্লু’ভছৰ মূল্য।
★নিলামত দ্বিতীয় সৰ্বাধিক মূল্য নিৰ্ধাৰণ হয় নীৰজ চোপ্ৰাৰ জেভলীন।

★প্ৰধানমন্ত্ৰী নৰেন্দ্ৰ মোদীয়ে শুক্ৰবাৰে ৭১ বছৰীয়া জন্মদিন পালন কৰিলে।

★প্ৰধানমন্ত্ৰীগৰাকীয়ে নিজৰ ৭১ সংখ্যক জন্ম দিনাৰ দিনা উপহাৰসমূহৰ নিলাম আৰম্ভ কৰিছিল।

★দেশৰ সংস্কৃতি মন্ত্ৰালয়ে প্ৰধানমন্ত্ৰীয়ে লাভ কৰা উপহাৰ আৰু স্মৰণিকাসমূহৰ ই-নিলামৰ আয়োজন কৰিছে।

★ই-নিলামত টকিঅ’ অলিম্পিক আৰু পেৰালিম্পিক খেলুৱৈসকলৰ হাতমোজা, ৰেকেট আৰু অন্যান্য সামগ্ৰীও সামৰি লোৱা হৈছে।

★নিলামৰ এই প্ৰথম দিনাই আকাশলংঘী মূল্য লাভ কৰে দুই অলিম্পিক বিজয়ীৰ ক্ৰীড়া সঁজুলীয়ে।

★নিলামৰ প্ৰথম দিনাই ১.৯ কোটি টকা ধাৰ্য হয় লাভলীনাৰ হেণ্ড গ্লু’ভছৰ।

★প্ৰথম দিনটোতে ১.৯ কোটি টকালৈকে উঠিছে খেলুৱৈগৰাকীৰ হেণ্ড গ্লু’ভছৰ মূল্য।

★গ্লুভছযোৰৰ BASE PRICE আছিল ৮০ লাখ।

★অলিম্পিকত পদক অৰ্জন কৰাৰ পিছত লাভলীনাই প্ৰধানমন্ত্ৰী নৰেন্দ্ৰ মোদীক উপহাৰ হিচাপে দিছিল হেণ্ড গ্লু’ভছযোৰ।

★নিলামত দ্বিতীয় সৰ্বাধিক মূল্য নিৰ্ধাৰণ হয় নীৰজ চোপ্ৰাৰ সোণৰ পদক আজোৰা জেভলীন।ইয়াৰ মূল্য নিৰ্ধাৰণ হয় ১.৫৫ কোটি টকা।

★নিলামত উঠা খেলুৱৈসকলৰ সঁজুলি ক্ৰয় কৰিবলৈ বহু লোক আগ্ৰহী হৈছে।

★নিলামত প্ৰাপ্ত ধনসমূহ নমামি গংগা প্ৰকল্পত ব্যৱহাৰ কৰা হ’ব।১৭ ছেপ্টেম্বৰত আৰম্ভ হোৱা এই ই-নিলাম ৭ অক্টোবৰলৈকে অব্যাহত থাকিব।

২০সংখ্যাক জুনিয়ৰ ৰাষ্ট্ৰীয় উশ্বু প্ৰতিযোগিতালৈ বিশ্বনাথ জিলাৰ পৰা ৯গৰাকী খেলুৱৈ নিৰ্বাচিত

সমৰ কলাৰ এক অন্যতম ভাগ হৈছে উশ্বু । বিশ্বনাথ জিলাখনত চতিয়াৰ যুৱক পদ্ম জাইৰোয়ে উশ্বু একাডেমীৰ জৰিয়তে প্ৰশিক্ষণ প্ৰদান কৰি ৰাজ্যিক আৰু ৰাষ্ট্ৰীয় পৰ্যায়ৰ প্ৰতিযোগিতা সমূহত বহু কেইটা পদক বুটলিবলৈ সক্ষম হোৱাৰ লগতে তেওঁৰ নেতৃত্বতে ২০অক্টোবৰৰ পৰা ২৫অক্টোবৰলৈ পঞ্জাৱত অনুষ্ঠিত হ`বগা 20th National Wushu championshipত অংশগ্ৰহণ কৰিবলৈ অসম ৰাজ্যিক উশ্বু সমিতিয়ে বিশ্বনাথ জিলাৰ ৯গৰাকী খেলুৱৈক নিৰ্বাচিত কৰিছে।খেলুৱৈ কেইগৰাকী ক্ৰমে হ`ল প্ৰতিক্ষা বৰা,স্নেহা বৰা,দিক্ষা তিৱাৰী,প্ৰতিভা টাই,ৰিকি খৰ্কা,নিহাৰ বৰুৱা, ৰাহুল ঘৰচানি,অনুভৱ বৰা,মনোজ বিশ্বকৰ্মা ।উল্লেখযোগ্য যে এই তালিকাত থকা বহু কেইগৰাকীয়ে ইতিমধ্যে ৰাজ্যিক আৰু ৰাষ্ট্ৰীয় পৰ্যায়ত পদক বুটলিবলৈ সক্ষম হৈছিল।
ৰাষ্ট্ৰীয় পৰ্যায়ৰ প্ৰতিযোগিতাত অংশগ্ৰহণ কৰিবলৈ সাজু হোৱা এই দলটোক বিশ্বনাথৰ ক্ৰীড়াপ্ৰেমী ৰাইজে অভিনন্দন জনাইছে।
বাতৰি যুগুতালে ৰাতুল হাজৰিকাই..

নগাঁৱৰ জাজৰি অঞ্চলৰ নতুন প্ৰজন্মৰ প্ৰয়াস – পবিত্র ভাদ মাহত মাহযোৰা গুৰুজনাৰ কৃষ্টি সংস্কৃতি অনুশীলন

অসমৰ জাতীয় জীৱনত ভাদ মাহক পবিত্র বুলি গণ্য কৰা হয়। এই পবিত্র ভাদ মাহতে জগতগুৰু শ্ৰীমন্ত শংকৰদেৱ, মহাপুৰুষ শ্ৰীমাধৱদেৱৰ তিৰোভাৱ তিথি আৰু ভগৱান শ্ৰীকৃষ্ণৰ জন্ম তিথি উদযাপিত হৈ আহিছে। যুগ যুগ ধৰি পবিত্র ভাদ মাহটো অসমৰ অসমীয়া সমাজে পৰম্পৰাগত ভাৱে আৰু ভক্তিভাৱে সমগ্ৰ অসমৰ সত্র, নামঘৰসমূহত ভিন্ন ধৰ্মীয় কাৰ্যসূচীৰে পালন হৈ আহিছে। বিশেষকৈ পুৱাৰে পৰা সন্ধ্যালৈকে অসমৰ অসমীয়া গাঁওসমূহত ভকত বৈষ্ণৱ সকলে গুৰুজনাৰ ভক্তি ধৰ্মৰ চৰ্চা নামপ্ৰসংগ, ভাগৱত পাঠ, বিয়লি আইসকলৰ নাম আৰু সন্ধ্যা গাঁৱৰ প্ৰত্যকঘৰ গৃহস্থীৰে একোজন হলেও সমূহীয়া নামঘৰলৈ গৈ সন্ধ্যা প্ৰসংগত যোগদান কৰি গাঁৱৰ, পৰিয়ালৰ লগতে দেশৰ মংগল কামনা কৰাটো পৰম্পৰাগত নিয়ম হৈ আহিছে। সেয়ে এক কথাত অসমীয়া গাঁও সমূহ পবিত্র ভাদ মাহটো ভকতিৰ অমীয়া ৰসত যেন বুৰ গৈ থাকে। তাৰ সমান্তৰালকৈ নগাঁও জিলাৰ পশ্চিম প্ৰান্তৰ দক্ষিন জাজৰি অঞ্চলত নতুন প্ৰজন্মৰ প্ৰতিভাবান যুৱক সকলকো এই ক্ষেত্রত দেখা গল অনন্য ৰূপত। প্ৰায় ৫০ বছৰ অতিক্ৰম কৰা দক্ষিন জাজৰি সাৰ্বজনীন শ্ৰীমন্ত শংকৰ মন্দিৰ প্ৰাংগনত অঞ্চলটোৰ নতুন প্ৰজন্মৰ যুৱক সকলে পবিত্র ভাদ মাহৰ আৰম্ভণি সংক্ৰান্তৰ পৰা শুক্ৰবাৰে শেষৰটো সংক্ৰান্তিলৈকে সম্পূৰ্ন মাহটো মহাপুৰুষ গুৰুজনাৰ অপূৰ্ব অবদান নাম কীৰ্তন, ঘোষা, বৰগীত, ভাগৱত পাঠ, তাল, খোল, নেগেৰা আদি চৰ্চ্চা কৰি এক প্ৰশংসনীয় প্ৰদক্ষেপ গ্ৰহণ কৰা দেখা গৈছে। এই ক্ষেত্রত অঞ্চলবাসী সচেতন ৰাইজে নতুন যুৱ প্ৰজন্মৰ এনে আধ্যাত্মিক চিন্তা চৰ্চাক আদৰণি জনাইছে। এই মাহযোৰা কাৰ্যসূচীত আৰম্ভণি আৰু সামৰণি সংক্ৰান্তী, মহাপুৰুষ গুৰুদুজনাৰ তিৰোভাৱ তিথি, শ্ৰীকৃষ্ণ জন্মাষ্টমী উদযাপন আৰু প্ৰতিদিনে সন্ধ্যা প্ৰসংগ অনুশীলন কৰে। এই ক্ষেত্রত উদ্যোগ গ্ৰহণ কৰে দক্ষিন জাজৰি শ্ৰীমন্ত শংকৰ মন্দিৰ পৰিচালনা সমিতিয়ে।

বাতৰি যুগুতালে নগাঁৱৰ পৰা ৰাহুল দেৱ বৰদলৈয়ে

শ্ৰী শ্ৰী বাসুদেৱ থান নৰোৱা সত্ৰত ভদিয়া নামৰ সামৰণি

জগতগুৰু শ্ৰীমন্ত শংকৰদেৱৰ মাৰ্গ দৰ্শনেৰে পৰিপুষ্ট আৰু গুৰুজনাৰ  অমূল্য সৃষ্টিৰাজীৰ শ্ৰৱণ কীৰ্তনেৰে বিগত এটা মাহ বিধৌত হৈ থকা ঢকুৱাখনা মহকুমাৰ ঐতিহ্যমণ্ডিত শ্ৰী শ্ৰী বাসুদেৱ থান নৰোৱা সত্ৰৰ  এমহীয়া নাম প্ৰসংগৰ শুক্ৰবাৰে বৰ্ণিল পৰিসমাপ্তি ঘটিল। পবিত্ৰ ভাদ মাহৰ পহিলা দিনটোৰ পৰাই  ভক্তপ্ৰাণ  বাপ আৰু আই সমস্তই  নিৰবিছিন্ন ভাবে সত্ৰৰ  পৰম্পৰা মানি বৰ নামঘৰত অনুষ্ঠিত কৰি আহিছিল ভদিয়া নামৰ । ৰাজ্যখনৰ  বিভিন্ন প্ৰান্তৰৰ ভক্ত বৈষ্ণবে অংশ গ্ৰহণ কৰি  প্ৰাণোচ্ছল কৰি তোলা এই বছেৰেকীয়া  ভদিয়া নামৰ শুক্ৰবাৰে সফল সামৰণি মৰা হয়।  পৰম্পৰাগত ভাবে সত্ৰ প্ৰাংগণত অনুষ্ঠিত হৈ অহা এই ভদিয়া নামৰ অন্তিম দিনা পুৱা ৪ বজাৰ পৰা পুৱা নাম ,  ৯ বজাৰ পৰা আই মাতৃ সকলৰ নাম , দুপৰীয়া ১১ বজাৰ পৰা ভকত বৈষ্ণৱৰ নামৰ পাছত বিয়লি ৪ বজাৰ পৰা  অনুষ্ঠিত হয়  সমূহীয়া নাম প্ৰসংগ । নিশা ১১-৩০ পৰ্যন্ত চলিব লগা এই নাম প্ৰসংগৰ  সামৰণিৰ লগে লগেই বিগত এমাহ জোৰা  পবিত্ৰ ভাদ মাহৰ নাম প্ৰসংগৰ বৰ্ণিল পৰিসমাপ্তি ঘটিব বুলি সত্ৰ পৰিয়ালে জানিবলৈ দিয়ে।  গুৰুবাদ্য শংখ ,ডবা , কাঁহ , খোল , ভোৰতাল আৰু ভকত বৈষ্ণবৰ মুখৰ হৰিনামৰ  অপূৰ্ব ধ্বনিয়ে  সমগ্ৰ সত্ৰ প্ৰাংগণ  বিগত এটা মাহ ধৰি বিধৌত কৰি অহাৰ পাছত শুক্ৰবাৰে  সত্ৰ পৰিয়ালৰ সকলো সদস্যৰ লগতে অন্তিম দিনা সমীপৱৰ্তী ভক্তপ্ৰাণ ৰাইজৰ অভূতপূৰ্ব উপস্থিতিয়ে  নতুন মাত্ৰা প্ৰদান কৰে ইতিহাস প্ৰসিদ্ধ শ্ৰী শ্ৰী বাসুদেৱ থান নৰোৱা সত্ৰৰ বৰ নামঘৰ প্ৰাঙ্গন।
বাতৰি যুগুতালে ঢকুৱাখনাৰ অমৃত পৱন বৰাই।