দক্ষিণ কামৰূপৰ ঢুলীয়া ভাওনা এক প্ৰচলিত জাতীয় কৃষ্টি। গ্ৰাম্যঞ্চলত প্ৰচলিত এই জাতীয় কৃষ্টিটো সম্প্ৰতি আধুনিকতাই নি:শেষ কৰিবলৈ ওলাইছে। তাৰ মাজতে হেৰাই যাবলৈ ওলোৱা জাতীয় কৃষ্টিটোক জীয়াই ৰখাৰ স্বাৰ্থত দক্ষিণ কামৰূপৰ দুই এজন শিল্পীয়ে প্ৰচেষ্টা অব্যাহত ৰাখিছে। তেনে এজন ঢুলীয়া ভাওনাৰ শিল্পী হ’ল পৰমা কলিতা। নিজৰ কৃষ্টিটো জীয়াই ৰাখিবলৈ গৈ পৰমা কলিতাই অনেক ঘাট-প্ৰতিঘাটৰ সন্মুখীন হ’বলগীয়া হয়। এইগাৰকী ঢুলীয়া ভাওনাৰ শিল্পী পৰমা কলিতাক কেন্দ্ৰ কৰি মিৰ্জাৰ বিশ্বজিৎ কলিতাই চিত্ৰনাট্য, পৰিচালনা আৰু সংগীতৰে নিৰ্মাণ কৰি উলিয়াইছে অসমীয়া কথাছবি “ভাৱৰীয়া”। ৪ জানুৱাৰীত ৰাজ্যৰ প্ৰতিটো ছবি গৃহত মুক্তি লাভ কৰিব। এছ.এন.জি.ৰ প্ৰডাকচনৰ বেনাৰত পংকজ কুমাৰ জৈন প্ৰযোজিত “ভাৱৰীয়া”ৰ নাম ভুমিকাত অভিনয় কৰিছে বিষ্ঞু খাৰঘৰীয়াই। ব্যয়বহুল ভাৱে প্ৰযোজনাৰে নিৰ্মিত কথাছবি “ভাৱৰীয়া”ৰ কাহিনী, চিত্ৰনাট্য, পৰিচালক বিশ্বজিৎ কলিতাৰ। অভিনয়ত আছে নিপন গোস্বামী, অতুল পাচনি, হিৰণ্য দাস, প্ৰণামী, দেৱযানী, বিশ্বজিৎ কলিতা, দিৱস দৰ্শন, বলেন চৌধুৰী, ৰোহিনী মহন্ত, ভিডিও গীতৰ জনপ্ৰিয় অভিনেতা কিশোৰ দাস, নৱাগত পুবালি আৰু বহুতো নৱীন প্ৰবীন শিল্পীয়ে। ছবিখনত বিশেষ ভূমিকা অভিনয় কৰিছে ৰাষ্ট্ৰীয় বঁটা প্ৰাপ্ত বীৰুবালা ৰাভা। কথাছবি “ভাৱৰীয়া”ৰ গীত কেইটিত কণ্ঠ নিগৰাইছে জুবিন গাৰ্গ, তৰালী শৰ্মা, কুমাৰ ভৱেশ, ৰীতা গোস্বামী আৰু দীপ দৰ্শনে। মুম্বাইৰ প্ৰখ্যাত ফিল্ম লেৱত পোহৰ আৰু সম্পাদনা কৰা “ভাৱৰীয়া” কথাছবিখনৰ ইতিমধ্যে গুৱাহাটী চিনে ক্লাৱৰ দ্বাৰা আয়োজিত ১১ তম গুৱাহাটী কথাছবি মহোৎসৱত প্ৰদৰ্শিত হৈ দৰ্শক ৰাইজৰ দৃষ্টি আকৰ্ষণ কৰিবলৈ সক্ষম হৈছে। উল্লেখ্য যে পৰিচালক, অভিনেতা বিশ্বজিৎ কলিতাই নাটকৰ সতে জড়িত থাকি প্ৰথমখন অসমীয়া কথাছবি “ভাৱৰীয়া”। কথাছবিখনৰ সহ পৰিচালক দিলিপ দত্ত, প্ৰযোজনা নিয়ন্ত্ৰক দিৱস দৰ্শন, কেমেৰা পাপু আৰু বিশ্বজিৎ কলিতাৰ ৰূপজজ্জা কৰিছে। “ভাৱৰীয়া” কথাছবিখন অসমৰ ৰাইজে আকোৱালি ল’ব বুলি খুবেই আশাবাদী পৰিচালক বিশ্বজিৎ কলিতা।খবৰ যুগুতালে মিৰ্জাৰ পৰা জিতুমণি দাসে।
জ্যেষ্ঠ সাংবাদিক নৱ ঠাকুৰীয়ালৈ বিশেষ সন্মান
জ্যেষ্ঠ সাংবাদিক নৱ ঠাকুৰীয়াক প্ৰেছ এমব্লেম কেম্পেইন নামৰ আন্তৰ্জাতিক সংস্থাৰ ভাৰতৰ প্ৰতিনিধি হিচাপে বাছনি কৰা হৈছে। উল্লেখযোগ্য যে চুইজাৰলেণ্ডৰ জেনেভাস্থিত সংস্থাটোৱে সমগ্ৰ পৃথিৱীতে ঘটি থকা সাংবাদিক হত্যা, সংবাদকৰ্মীৰ ওপৰত হোৱা নিগ্ৰহ আৰু শেহতীয়াকৈ ক’ভিডত মৃত্যু হোৱা সাংবাদিকৰ তালিকা প্ৰস্তুত কৰি আহিছে।
কেইবাখনো দেশৰ জ্যেষ্ঠ সাংবাদিকৰ উদ্যোগত ২০০৪ চনত জন্ম লাভ কৰা সংস্থাটোৰ সম্পাদক-প্ৰধান ব্লেইজ লেম্পেনে ঠাকুৰীয়াক এই দায়িত্ব অৰ্পনৰ বিষয়ে অৱগত কৰায়।লগতে সংস্থাটোৱে জাৰ্নেলিষ্ট ফ’ৰাম অসম সভাপতি ৰূপম বৰুৱাক ইয়াৰ সহযোগী সংগঠন হিচাপে মান্যতা প্ৰদান কৰিছে।
২০১০ চনৰ পৰা ৰাষ্ট্ৰসংঘত নিজৰ বক্তব্য উপস্থাপন কৰি অহা সংস্থাটোৱে ভাৰতবৰ্ষৰ বিভিন্ন প্ৰান্তৰ কৰ্মৰত সাংবাদিক আৰ্থিক অৱস্থা সম্পৰ্কটো অধ্যয়ন কৰিব।আজিৰ পৰা তিনিদশক পূৰ্বে অসম অভিযান্ত্ৰিক মহাবিদ্যালয়ৰ পৰা স্নাতক ডিগ্ৰী লাভ কৰা ঠাকুৰীয়াই অসমীয়া কাকতৰ জৰিয়তে সাংবাদিকতা জীৱন আৰম্ভ কৰে।
সম্প্ৰতি তেওঁ বহুকেইখন ৰাষ্ট্ৰীয় আৰু আন্ত:ৰাষ্ট্ৰীয় পৰ্যায়ৰ কাকতত সাংবাদিকতা আৰু সাংবাদিকৰ বিভিন্ন সমস্যা ওপৰত প্ৰবন্ধ লিখি আহিছে।
ভিউৱাছৰ মতামত