উচ্চতৰ মাধ্যমিকৰ চূড়ান্ত পৰীক্ষাত স্থান লাভ কৰা ছাত্ৰ ছাত্ৰীক সম্বৰ্দ্ধনা চৰাইদেউ উপায়ুক্তৰ

সদ্যঘোষিত উচ্চতৰ মাধ্যমিকৰ চূড়ান্ত পৰীক্ষাত বিজ্ঞান আৰু বাণিজ্য শাখাত অসমৰ ভিতৰত স্থান দখল কৰি চৰাইদেউ জিলালৈ গৌৰৱ কঢ়িয়াই অনা কৃৰ্তি ছাত্ৰ-ছাত্ৰী সকলক আজি চৰাইদেউ জিলাৰ উপায়ুক্ত পলাশ ৰঞ্জন ঘৰফলীয়াই আনুষ্ঠানিকভাৱে সম্বৰ্দ্ধনা জ্ঞাপন কৰে।

 

 

চৰাইদেউ জিলা প্ৰশাসনৰ উদ্যোগত সম্পন্ন হোৱা এই সম্বৰ্দ্ধনা অনুষ্ঠান চৰাইদেউ জিলা উপায়ুক্তৰ কাৰ্যালয়ৰ সভাকক্ষত অনুষ্ঠিত কৰা হয়। উল্লেখযোগ্য যে চৰাইদেউ জিলাৰ পৰা বাণিজ্য শাখাত সোণাৰি জুনিয়ৰ কলেজৰ ছাত্ৰী হৰপ্ৰীত কৌৰে ৯৩.৬% নম্বৰেৰে অসমৰ ভিতৰতে দ্বিতীয় স্থান অধিকাৰ কৰিছিল।

 

 

অন্যহাতে বিজ্ঞান শাখাত নগাঁৱৰ ৰামানুজন জুনিয়ৰ কলেজৰ পৰা সাগৰ গোৱালাই ৯৫.৮% নম্বৰেৰে অসমৰ ভিতৰতে চতুৰ্থ স্থান দখল কৰাৰ বিপৰীতে ডিব্ৰুগড়ৰ ছল্ট ব্ৰুক একাডেমীৰ পৰা অৰ্জুন বুঢ়াগোহাঁইয়ে বিজ্ঞান শাখাত ৯৫.৪% নম্বৰেৰে ষষ্ঠ স্থান অধিকাৰ কৰিছিল।

 

আজি উপায়ুক্ত পলাশ ৰঞ্জন ঘৰফলীয়াই হৰপ্ৰীত কৌৰ আৰু সাগৰ গোৱালাক এখনি ফুলাম গামোচা, শৰাই আৰু সম্বৰ্দ্ধনা পত্ৰৰে সম্বৰ্দ্ধনা জ্ঞাপন কৰে।

 

 

আজিৰ সভাত সভাপতিৰ আসন গ্ৰহণ কৰা উপায়ুক্ত পলাশ ৰঞ্জন ঘৰফলীয়াই ছাত্ৰ-ছাত্ৰী দুজনক দেশৰ হিতৰ হকে কাম কৰি যোৱাৰ বাবে আহ্বান জনোৱাৰ লগতে নিজৰ চিন্তা শক্তিক উচিত ভাৱে প্ৰয়োগ কৰিবলৈ কয়।

 

 

সময়ৰ বালিত খোজ কাঢ়ি নিজৰ পৰিচয় মানৱ সমাজত যুগমীয়া কৰাৰ বাবে উপায়ুক্ত গৰাকীয়ে দুয়োজন ছাত্ৰ-ছাত্ৰীক কষ্ট কৰি ফল আয়ত্ত্ব কৰিবলৈ অনুপ্ৰেৰণা জনায়।উল্লেখযোগ্য যে বিশেষ কাৰণ বশতঃ অৰ্জুন বুঢ়াগোহাঁই এই অনুষ্ঠানত উপস্থিত থাকিব নোৱাৰিলে।তেখেতে পৰৱৰ্তী সময়ত উপায়ুক্ত কাৰ্যালয়ৰ পৰা সম্বৰ্দ্ধনা গ্ৰহণ কৰিব ।

আজিৰ এই সম্বৰ্দ্ধনা অনুষ্ঠানত স্থান লাভ কৰা ছাত্ৰ-ছাত্ৰী দুজনৰ পিতৃ-মাতৃ কুলদ্বীপ কৌৰ আৰু মহানন্দ গোৱালাকো উপায়ুক্ত গৰাকীয়ে সম্বৰ্দ্ধনা জনায়।ইয়াৰ উপৰিও আজিৰ অনুষ্ঠানত চৰাইদেউ জিলাৰ পৰা ১০০% উত্তীৰ্ণ ফলাফল প্ৰদৰ্শন কৰা জিলাখনৰ মুঠ ৬ খন শিক্ষানুষ্ঠানক সম্বৰ্দ্ধনা জ্ঞাপন কৰা হয়।

 

শিক্ষানুষ্ঠান কেইখন হৈছে চেপন কলেজ (জুনিয়ৰ), চুকাফা জুনিয়ৰ কলেজ, সোণাৰি জুনিয়ৰ কলেজ, হাজি আচিমুদ্দিন মিশ্যন একাডেমী, দিব্যলতা আইডল একাডেমী আৰু চাইনৰ একাডেমী।

আজিৰ সম্বৰ্দ্ধনা অনুষ্ঠানত চাইনৰ একাডেমীৰ হৈ অধ্যক্ষা বিজয়লক্ষ্মী গগৈ, হাজি আচিমুদ্দিন মিশ্যন একাডেমীৰ হৈ অধ্যক্ষ পল্লৱ বৰপাত্ৰগোঁহাই, সোণাৰি জুনিয়ৰ কলেজৰ হৈ অধ্যক্ষা ৰশ্মিৰেখা মহন, চুকাফা জুনিয়ৰ কলেজৰ হৈ অধ্যক্ষ প্ৰিয়বৰ কোঁৱৰ, দিব্যলতা আইডল একাডেমীৰ হৈ অধ্যক্ষ দেৱজিত বৰুৱা আৰু চেপন কলেজ (জুনিয়ৰ) হৈ অধ্যক্ষ ড° বিকুমণি চুতীয়াই বক্তব্য ৰাখে।

 

স্থান লাভ কৰা ছাত্ৰ-ছাত্ৰী হৰপ্ৰীত কৌৰ আৰু সাগৰ গোৱালাৰ লগতে সাগৰ গোৱালাৰ পিতৃ মহানন্দ গোৱালা আৰু হৰপ্ৰীত কৌৰৰ ককাকেও অনুষ্ঠানত বক্তব্য আগবঢ়ায়।আজিৰ সম্বৰ্দ্ধনা অনুষ্ঠানৰ উদ্দেশ্যে বাখ্যা কৰে অতিৰিক্ত উপায়ুক্ত দীপক কুমাৰ ভূঁঞায়ে, সম্বৰ্ধনা অনুষ্ঠান পৰিচালনা কৰে তথ্য আৰু জনসংযোগ বিষয়া জয়ন্ত মাউতে।

 

উপায়ুক্তৰ গৰাকীৰ উপৰিও আজিৰ অনুষ্ঠানত অতিৰিক্ত উপায়ুক্তদ্বয় জিতু কুমাৰ দাস আৰু প্ৰণৱ কুমাৰ বড়া, সহকাৰী আয়ুক্তত্ৰয় ফিলিছ ৰাংছাল, জাহ্নৱী গোস্বামী আৰু সমুজ্জল বড়া উপস্থিত থাকে।

খবৰ যুগুতালে সোণাৰিৰ পৰা অভিজিত ভূঞাই..

Share on whatsapp
WhatsApp
Share on facebook
Facebook
Share on twitter
Twitter
Share on email
Email

নাজিৰা মহকুমাত মন্ত্ৰী-সাংসদৰ দুগ্ধ আৰু গাহৰি প্ৰকল্প পৰিদর্শন

অসম চৰকাৰৰ কৃষি, উদ্যান শস্য, পশুপালন আৰু পশু চিকিৎসা, সীমান্ত সুৰক্ষা আৰু উন্নয়ন, অসম চুক্তি ৰূপায়ণ আৰু সমবায় বিভাগৰ মন্ত্ৰী অতুল বৰাই নাজিৰাৰ চানবছাস্থিত “দুগ্ধ সংশাধন প্ৰকল্প” পৰিদর্শন কৰে। তেখেতে সোন্দৰপুখুৰী দুগ্ধ উৎপাদক সমবায় সমিতিৰ অধীনস্থ দুগ্ধ প্ৰকল্পটো পৰিদর্শন কৰি ইয়াক পুনৰ কাৰ্যক্ষম কৰি তোলাৰ বাবে প্রয়োজনীয় পদক্ষেপ গ্রহণ কৰিব বুলি জনায়। তদুপৰি ইয়াক সুচাৰুৰূপে চলাই থকাৰ বাবে প্রয়োজনীয় গাখীৰৰ উৎপাদন বৃদ্ধিৰ ওপৰতো গুৰুত্ব প্রদান কৰে।

দুগ্ধ প্ৰকল্পটো পৰিদর্শনৰ পিচতে মন্ত্ৰী গৰাকীয়ে সমীপবৰ্তী “গাহৰি মাংস সংশাধন প্ৰকল্প”ত উপস্থিত হয়।” অসম পশুধন আৰু হাঁহ কুকুৰা নিগম”ৰ অধীনস্থ আধুনিক প্ৰকল্পটো পৰিদর্শন কৰি মন্ত্রীগৰাকীয়ে ইয়াৰ জৰিয়তে নিবনুৱাসকলৰ বাবে আত্মসংস্থাপনৰ সুবিধা মুকলি হ’ব বুলি আশা প্ৰকাশ কৰে। দৈনিক ৪০০ টাকৈ গাহৰি সংশাধন ক্ষমতাৰ প্ৰকল্পটোৰ বাবে প্রয়োজনীয় গাহৰি নিয়মীয়াকৈ যোগানৰ বাবে দাঁতি-কাষৰীয়া জিলাসমুহত গাহৰি পালনৰ প্ৰচুৰ সম্ভাৱনা কঢ়িয়াই আনিব বুলি আশা প্ৰকাশ কৰে মন্ত্ৰী গৰাকীয়ে। তেখেতে চৰকাৰৰ তৰফৰপৰা ইয়াৰবাবে প্ৰয়োজনীয় পদক্ষেপ গ্রহণ কৰিব বুলি প্ৰকাশ কৰে। মন্ত্ৰী গৰাকীয়ে উপস্থিত ৰাইজক গোপালন, গাহৰি পালনৰ উপৰিও পশুপালন তথা কৃষি ক্ষেত্রত ব্ৰতী হৈ স্বাৱলম্বী হোৱাৰ লগতে ৰাজ্যখনক আৰ্থিক দিশত আগবঢ়াই নিবলৈ আহ্বান জনায়।

মন্ত্ৰী অতুল বৰাই লগতে কয় যে এই প্ৰকল্পটোৰ জৰিয়তে গাহৰি মাংস এ.এচ.ই.এ.এন দেশ সমূহত ৰপ্তানি সম্ভৱপৰ হৈ উঠিব। উল্লেখযোগ্য যে এই ভ্ৰমণকালত মন্ত্ৰী গৰাকীৰ লগতে যোৰহাট লোকসভা সমষ্টিৰ সাংসদ তপন গগৈয়েও অংশগ্রহণ কৰে। ৰাইজক উদ্দেশ্যি দিয়া ভাষণত সাংসদ গৰাকীয়ে এই দুগ্ধ আৰু গাহৰি সংশাধন প্ৰকল্প দুটিয়ে শিৱসাগৰৰ উপৰিও দাঁতি-কাষৰীয়া জিলাসমূহৰ কৃষক সকললৈ আশাৰ বতৰা কঢ়িয়াই অনাৰ লগতে নিবনুৱা যুৱক-যুৱতীক সংস্থাপনৰ ব্যৱস্থা দিব বুলি আশা প্ৰকাশ কৰে। ভ্ৰমণকালত উপস্থিত থাকি শিৱসাগৰ জিলাৰ উপায়ুক্ত বিষ্ণু কমল বৰাই প্ৰকল্প দুটি যথাসম্ভৱ সোনকালে সম্পূর্ণ কৰি তোলাৰ ওপৰত গুৰুত্ব আৰোপ কৰে। জিলাখনৰ পশুপালন খণ্ডৰ উন্নয়নৰ বাবে জিলা উন্নয়ন আয়ুক্তৰ অধ্যক্ষতাত এখন সমিতি গঠন কৰা হৈছে বুলি উপায়ুক্তই সদৰি কৰে। মন্ত্ৰী তথা সাংসদৰ পৰিদর্শন কালত বিশেষভাৱে আঁত ধৰে নাজিৰাৰ পশু চিকিৎসা বিষয়া ডাঃ জগদীশ বৰ্মনে। নিজৰ আদৰণি ভাষণত তেখেতে পশুপালন মন্ত্ৰী হিচাবে পুনৰবাৰ দায়িত্ব গ্রহণ কৰি নাজিৰালৈ আহি প্ৰকল্প দুটি পৰিদর্শন কৰা বিষয়টোৱে অঞ্চলটোৰ কৃষক ৰাইজৰ বাবে যঠেষ্ট আশাৰ বতৰা কঢ়িয়াই আনিব বুলি উল্লেখ কৰে।

তেখেতে গোপালন আৰু গাহৰি পালনত উৎসাহিত কৰাৰ বাবে বিশেষ আঁচনি গ্রহণৰ বাবে অনুৰোধ জনায়। সভাৰ শেষত শলাগৰ শৰাই আগবঢ়াই নাজিৰাৰ মহকুমাধিপতি সব্যসাচী কাশ্যপে কয় “দুগ্ধ আৰু গাহৰি প্ৰকল্প দুটা গতিশীল কৰাৰ বাবে চৰকাৰে এক অনুপ্ৰেৰণা আগবঢ়াইছে। গতিকে এই প্ৰকল্পৰ লগত জৰিত সকলো লোকে চৰকাৰে দিয়া সুবিধা সমূহ গ্ৰহণ কৰি সুপৰিকল্পিত ভাৱে আগবঢ়া উচিত।” উল্লেখযোগ্য যে আজিৰ এই ভ্ৰমণকালত মন্ত্রীজনৰ লগতে যোৰহাট লোকসভা সমষ্টিৰ সাংসদ তপন গগৈয়েও অংশগ্রহণ কৰে। তদুপৰি নাজিৰা মহকুমাৰ মহকুমাধিপতি সব্যসাচী কাশ্যপ, ৰাজহ চক্ৰ বিষয়া শান্তনু গগৈ, নিৰ্বাচনী বিষয়া সুজাতা গগৈ, সহকাৰী আয়ুক্ত ৰাজীৱ সোণোৱাল, তথ্য আৰু জনসংযোগ বিষয়া বৰ্ণালী দত্তৰ লগতে সমবায়খনৰ সভাপতি, সম্পাদক তথা বিষয়ববীয়া সকল, জিলা পশুপালন বিষয়াৰ উপৰিও অঞ্চলটোৰ কেইবাগৰাকী নেতৃস্থানীয় ব্যক্তিয়ে অংশগ্রহণ কৰে। মন্ত্ৰী তথা সাংসদৰ এই ভ্ৰমণে অঞ্চলটোৰ গোপালক সকলক যঠেষ্ট উৎসাহি কৰি তুলে। উক্ত সভাৰ অন্তত কৃষি মন্ত্ৰী অতুল বৰা দেৱে মেছাগড়ত শালি ধানৰ কঠিয়া সিচা কাৰ্যসূচীত অংশগ্ৰহণ কৰে।

চলিত বৰ্ষত পুলিৎজাৰ বঁটাৰে সন্মানীত হ`ল ভাৰতীয় মূলৰ সাংবাদিক

২০২১ বৰ্ষৰ পুলিৎজাৰ বঁটাৰে সন্মানিত হৈছে লণ্ডনৰ সাংবাদিক মেঘা ৰাজাগোপালনে।চীনৰ জিনজিযাং প্ৰদেশত চৰকাৰী বাহিনীয়ে কিদৰে ইছলামিক কলা-কৃষ্টি,ভাষা-সংস্কৃতিৰ ওপৰত আক্ৰমণৰ চলাইছে আৰু মুছলমান সকলক কিদৰে বন্দী কৰি ৰাখিছে সেই বিষয়ে অনুসন্ধান মূলক বাতৰি প্ৰস্তুত কৰিছিল।

যোৱা শুক্ৰবাৰে বঁটা ঘোষণা হৈছিল।এই বঁটা ঘোষণা কৰা পিছতে প্ৰতিক্ৰিয়া প্ৰকাশ কৰি সাংবাদিক গৰাকীয়ে কয় যে মই যিহেতু সন্মান পাম বুলি ভবা নাছিলো,সেয়ে পুলিৎজাৰ ঘোষণা অনুষ্ঠানটো টিভিত চোৱাও নাছিলো,পিছত মই উদ্যোক্তাসকলৰ পৰা এটা ফোনকল পাইছো।আনহাতে স্থানীয় বাতৰি শিতানত নীল বেদীয়েও বঁটা লাভ কৰে।

লখিমপুৰৰ জয়লক্ষীয়ে নিজস্ব সাধনাৰে জিনিলে “অসম বুক অৱ ৰেৰ্কডচ”ৰ স্বীকৃতি

দৃষ্টি থাকিলে লক্ষ্য নেহেৰায়” – এই আপ্ত বাক্য শাৰীৰ যথাৰ্থতা প্ৰমাণিত কৰি দেখুৱালে লখিমপুৰৰ এজন প্ৰত্যয়ী যুৱকে। আনুষ্ঠানিক প্ৰশিক্ষণ কিম্বা যোগ প্ৰশিক্ষকৰ সহায় নোলোৱাকৈ নিজস্র একাগ্ৰতা আৰু ঐকান্তিক সাধনাৰ বলত বৰবিল মিচিং গাঁৱৰ এজন দুৰ্দান্ত প্ৰতিভাধৰ যুৱকে প্ৰমাণিত কৰি আপ্ত বাক্যক সচা বুলি প্ৰমাণ কৰিলে। গাঁওখনৰ চহা তৰুণ পায়েং আৰু ৰীমা পাঞাংৰ পুত্ৰ জয়লক্ষী পায়েঙে সৰুৰে পৰা যোগ চৰ্চাৰ প্রতি ৰাপ আছিল । আৰ্থিক অনগ্ৰসৰতাৰ বাবে প্ৰশিক্ষকৰ সান্নিধ্য লাভ কৰিবলৈ সমৰ্থ নোহোৱা এইগৰাকী যুৱকে মনোবল বান্ধি প্ৰশিক্ষকবিহীন ভাবেই স্বগৃহত আৰম্ভ কৰিলে নিজা ববীয়া প্ৰচেষ্টাৰে যোগ চর্চাত। যোগ গ্ৰন্থ কিম্বা ইউটিউবৰ জৰিয়তে শাৰীৰিক নিৰ্দেশনা আৰু যোগ চৰ্চাৰ কলা কৌশলৰ অনানুষ্ঠানিক শিক্ষা আহৰণ কৰি জয়লক্ষীয়ে নিয়মীয়া ভাৱে আৰম্ভ কৰি দিলে নিজা ঘৰতে যোগভ্যাস কৰাৰ। যোৱা ৫ বছৰ ধৰি নিৰলস ভাবে কোনো ধৰণৰ যোগ গুৰুৰ নিৰ্দেশনা নোহোৱাকৈ একাগ্ৰ চিত্তে যোগ চৰ্চা অব্যাহত ৰাখি আহিছিল যুৱকজনে। পৰৱৰ্তী সময়ত যোগ শিক্ষাৰ কাৰিকৰী নিৰ্দেশনা আহৰণৰ বাবে যোৱা ২ টা বছৰ ইউটিউবৰ আশ্ৰয় লৈ নিজকে অভিজ্ঞ শিকাৰু হিচাপে গঢ়ি তুলিবলৈ সক্ষম হয় প্ৰচুৰ প্ৰত্যয়ী যুৱকজন। আৰ্থিক প্ৰতিবন্ধকতাকো নেওচি নিজকে এগৰাকী স্বয়ং সম্পূৰ্ণ যোগ শিক্ষাৰ্থী হিচাপে আত্ম প্ৰতিষ্ঠা অৱশেষত লাভ কৰিবলৈ সক্ষম হ`ল। লখিমপুৰৰ পানী গাঁও উচ্চতৰ মাধ্যমিক বিদ্যালয়ৰ উচ্চতৰ মাধ্যমিক চূড়ান্ত বৰ্ষৰ ছাত্ৰ জয়লক্ষীয়ে জনোৱা মতে সাম্প্ৰতিক ক`ভিড পৰিস্থিতিৰ বাবে অনলাইন যোগে চলিত বৰ্ষৰ ১৫ মে’ত অনুষ্ঠিত যোগ প্ৰদৰ্শনত অংশগ্ৰহণ কৰি “যোগা নিদ্ৰাসন” শিতানত “অসম বুক অব ৰেকৰ্ডছৰ শ্ৰেষ্ঠত্বৰ স্বীকৃতি আজুৰি আনিবলৈ সক্ষম হয়। এই “যোগা নিদ্ৰাসনত জয়লক্ষীয়ে ২৫ মিনিট সময় এই আসনতে থাকি শ্ৰেষ্ঠত্বৰ স্বীকৃতি অৰ্জন কৰিবলৈ সক্ষম হয়। যুৱকজনে ইয়াৰপূর্বে যোগাসনতে ২০২০ চনৰ ১৩ জুনত অনুষ্ঠিত আমেৰিকান হাই ৰেঞ্জ বুক অফ ৱৰ্ল্ড ৰেকৰ্ডছ,২০২০ আৰু ২০২১ চনত ইউ কে হাই ৰেঞ্জ বুক অফ ৱৰ্ল্ড ৰেকৰ্ডছকে ধৰি প্ৰায় ১৩ টা স্বীকৃতি পূৰ্ণ বঁটা লাভ কৰিবলৈ সক্ষম হৈছে। একবিংশ শতিকাৰ একলব্য হিচাপে আত্ম পৰিচয় দাঙি ধৰিবলৈ সক্ষম হোৱা জয়লক্ষীয়ে কোনো প্ৰশিক্ষকৰ
সান্নিধ্য অথবা নিৰ্দেশনা নোহোৱাকৈ নিজস্ব সাধনা আৰু একাগ্ৰতাৰ বাবে ৱৰ্ল্ড ৰেকৰ্ডছৰ বিৰল স্বীকৃতি অৰ্জন কৰিবলৈ সক্ষম হোৱাটোৱে ৰাজ্যখনৰ লগতে লখিমপুৰ জিলাবাসীক গৌৰান্বিত কৰি তুলিছে।
বাতৰি যুগুতালে ঢকুৱাখনাৰ পৰা অমৃত পৱন বৰাই।

ধুবুৰীত অভিভাৱক মন্ত্ৰী ৰঞ্জিত কুমাৰ দাসৰ বিভিন্ন বিভাগৰে পৰ্যালোচনা বৈঠক অনুষ্ঠিত

অসম চৰকাৰৰ পঞ্চায়ত আৰু গ্ৰামোন্নয়ণ, খাদ্য আৰু অসামৰিক যোগান, জনস্বাস্থ্য কাৰিকৰী বিভাগৰ মন্ত্ৰী তথা ধুবুৰী জিলাৰ অভিভাৱক মন্ত্ৰী ৰঞ্জিত কুমাৰ দাসে আজি ধুবুৰী জিলাৰ ক`ভিড পৰিস্থিতি আৰু বিভিন্ন বিভাগৰ কাম কাজৰ পৰ্যালোচনা কৰে ৷ পুৱা ১০.৩০ বজাৰ পৰা প্ৰায় ৬ঘন্টা ধৰি ধুবুৰী জিলাৰ উপায়ুক্ত কাৰ্যালয়ৰ সভাকক্ষত ধুবুৰীৰ উপায়ুক্ত অন্বামুথন এম পি সহ জিলা প্ৰশাসনৰ অন্যান্য শীৰ্ষ বিষয়াৰ উপস্থিতিত অনুষ্ঠিত বৈঠকত মন্ত্ৰীগৰাকীয়ে পৰ্যায়ক্ৰমে বিভিন্ন বিভাগৰ কাম কাজৰ পৰ্যালোচনা কৰে৷ ধুবুৰী জিলাত বেদখলকাৰীৰ কবলত থকা ৭২.৩৬ হেক্টৰ বনাঞ্চলৰ আৰু ২৩১ হেক্টৰ প্ৰস্তাৱিত বনাঞ্চলৰ ভূমিত উচ্ছেদ অভিযান চলাই শীঘ্ৰে বেদখলমুক্ত কৰিবলৈ মন্ত্ৰীগৰাকীয়ে ডি এফ অ’ক নিৰ্দেশ দিয়ে৷ জিলাখনত এম জি এনৰেগাৰ জৰিয়তে পঞ্চায়ত আৰু গ্ৰামোন্নয়ণ বিভাগে কৰা পাৰ্কুপাইন নিৰ্মাণৰ কমেও ১৫ খন আচনিত দুৰ্নীতি হোৱাৰ তথ্য লাভ কৰা বুলি সদৰি কৰি মন্ত্ৰীগৰাকীয়ে জিলা উপায়ুক্তক তদন্তৰ নিৰ্দেশ দিয়ে৷ পঞ্চায়ত আৰু গ্ৰামোন্নয়ন বিভাগৰ বিষয়াসকলক উদেশ্যি মন্ত্ৰীগৰাকীয়ে কয়- ‘বিভাগটোৰ কামৰ ধৰণ এতিয়া সলনি হ’ব৷ সকলোৱে এতিয়া পূৰ্বৰ মানসিকতাৰ পৰিৱৰ্তন কৰিব লাগিব ৷ আচনিৰ ৰূপায়ণ সঠিক হ’ব লাগিব৷ কোনোধৰণৰ দুৰ্নীতি সহ্য কৰা নহ’ব৷জনস্বাস্থ্য কাৰিকৰী বিভাগক ‘জল জীৱন অভিযান’ৰ নিৰ্মীয়মান আঁচনিবোৰৰৰ কাম খৰতকীয়া কৰিবলৈ নিৰ্দেশ দিয়াৰ লগতে এনে আচনিত আৰ্ছেনিক, ফ্ল’ৰাইডৰ উপস্থিতিৰ লগতে পানীৰ গুণাগুণ পৰীক্ষা কৰাৰ নিৰ্দেশ দিয়ে৷ বাৰ্ষিক আয় এক লাখ টকাৰ ওপৰত থকা পৰিয়ালক খাদ্য সুৰক্ষা আইনৰ অধীনত ৰেছন কাৰ্ড পৰিহাৰ কৰি প্ৰকৃতাৰ্থত দুখীয়া পৰিয়ালক কাৰ্ড লাভৰ সুযোগ দিবলৈ আহ্বান জনাই মন্ত্ৰীগৰাকীয়ে খাদ্য আৰু অসামৰিক যোগান বিভাগৰ বিষয়াসকলক প্ৰয়োজনত কঠোৰ পদক্ষেপ লবলৈ নিৰ্দেশ দিয়ে৷ তেওঁ ধুবুৰীত এনেধৰণৰ ত্ৰিশ সহস্ৰাধিক পৰিয়াল থকা বুলি উল্লেখ কৰি শীঘ্ৰে তেওঁলোকক বিচাৰি উলিওৱা হ’ব বুলি কয়৷ মন্ত্ৰীগৰাকীয়ে এইক্ষেত্ৰত ৰাইজৰ মাজত সজাগতা সৃষ্টিৰ বাবে যোগান বিভাগৰ ডিলাৰ, গাঁওবুঢ়া, গ্ৰামসেৱকসকলক জড়িত কৰিবলৈ পৰামৰ্শ দিয়ে৷
লোকনিৰ্মাণ বিভাগক মধুপুৰ সত্ৰৰ আন্ত:গাথনি নিৰ্মাণৰ কাম খৰতকীয়া কৰিবলৈ নিৰ্দেশ দিয়াৰ লগতে ধুবুৰী মডিকেল কলেজ, বিলাসীপাৰা আন্ত:ৰাজ্যিক বাছ আস্থানকে ধৰি আন আন আন্ত:গাথনি নিৰ্মাণৰ কামৰ অগ্ৰগতিৰ খতিয়ান লয় মন্ত্ৰীগৰাকীয়ে৷
স্বাস্থ্য বিভাগৰ ধুবুৰী জিলাৰ যুটীয়া সঞ্চালকে ধুবুৰী জিলাত কেৱল এজনহে এনাছথেটিষ্ট থকাৰ বাবে হোৱা সমস্যাৰ বিষয়ে অৱগত কৰাত মন্ত্ৰীগৰাকীয়ে বিষয়টো মুখ্যমন্ত্ৰী আৰু স্বাস্থ্যমন্ত্ৰীক অৱগত কৰি ব্যৱস্থা গ্ৰহণ কৰিব বুলি কয়৷ তেওঁ জিলাখনৰ ক`ভিড পৰিস্থিতিৰো বুজ লয়৷
অৱসৰ গ্ৰহণৰ পিছত পেন্সন লাভৰ ক্ষেত্ৰত শিক্ষকে যাতে কোনোধৰণৰ অসুবিধাৰ সন্মুখীন নহয় তাৰ প্ৰতি সতৰ্ক হ’বলৈ, শিক্ষকৰ বদলিকে ধৰি বিভিন্ন ধৰণৰ কামৰ বাবে জিলা শিক্ষা বিষয়াৰ কাৰ্যালয়, খণ্ড প্ৰাথমিক শিক্ষা বিষয়াৰ কাৰ্যালয়ত হোৱা দুৰ্নীতি বন্ধ কৰিবলৈ মন্ত্ৰীগৰাকীয়ে শিক্ষা বিভগৰ বিষয়াক নিৰ্দেশ দিয়ে৷ ঘৰত গৈ অংগনবাড়ী কেন্দ্ৰত নাম পঞ্জীয়নভুক্ত শিশুসকলক খাদ্য যোগান ধৰাৰ কাম কোনোধৰণৰ বিৰতি নোহোৱাকৈ চলাই যাবলৈ মন্ত্ৰীগৰাকীয়ে জিলা সমাজ কল্যাণ বিষয়াক নিৰ্দেশ দিয়ে৷
গ্ৰাম সেৱকসকল কৃষকৰ ওচৰলৈ নাযায় বুলি মন্তব্য কৰি মন্ত্ৰী ৰঞ্জিত কুমাৰ দাসে এতিয়াৰ পৰা গ্ৰাম সেৱকে লগ কৰা কৃষকৰ নাম আৰু ফোন নম্বৰ জিলা কৃষি বিষয়াক জমা দিবলৈ নিৰ্দেশ দিয়ে৷ জিলা কৃষি বিষয়াই এই তথ্য জিলা উপায়ুক্ত আৰু জিলা উন্নয়ণ আয়ুক্তক জমা দিব লাগিব ৷ ধানৰ নিম্নতম সমৰ্থন মূল্য যাতে ক্ষুদ্ৰ কৃষকে লাভ কৰে তাৰ প্ৰতি বিশেষ গুৰুত্ব দিবলৈও মন্ত্ৰী ৰঞ্জিত কুমাৰ দাসে নিৰ্দেশ দিয়ে৷ ধুবুৰী জিলাত থকা ১৬২ খন বিলৰ যিবোৰত বেদখল আছে সেয়া উচ্ছেদ কৰি পৰৱৰ্তী সময়ত তাত এম জি এনৰেগাৰ জৰিয়তে ৰাজহুৱা পুখুৰীৰ ব্যৱস্থা কৰিবলৈ জিলা উপায়ুক্তক মন্ত্ৰীগৰাকীয়ে নিৰ্দেশ দিয়ে৷ অসম শক্তি বিতৰণ নিগম লিমিটেডৰ বিষয়াক লোডশ্বেডিং নকৰিবলৈ কয় মন্ত্ৰীগৰাকীয়ে ৷ তেওঁ জলসম্পদ, জলসিঞ্চন, উদ্যোগ আৰু বাণিজ্য, পশুপালন আৰু পশু চিকিৎসা, পৰিবহণ, হস্ততাঁত আৰু বস্ত্ৰ শিল্প আদি বিভাগৰ কাম কাজৰো পৰ্যালোচনা কৰে৷ পৰ্যালোচনা বৈঠকৰ অন্তত অভিভাৱক মন্ত্ৰীগৰাকীয়ে এখন সংবাদমেল সম্বোধন কৰি কয় যে তেওঁ প্ৰতিমাহে জিলাখনৰ কিছুমান বিভাগৰ কামৰ পৰ্যালোচনা কৰিব আৰু প্ৰতি তিনিমাহৰ মূৰে মূৰে আন বিভাগবোৰৰ কামৰ পৰ্যালোচনা কৰিব৷ জিলাখনত বিভিন্ন বিভাগত খালী হৈ থকা পদবোৰ পূৰণৰ বাবে তেওঁ বিভাগীয মন্ত্ৰীসকলৰ সৈতে আলোচনা কৰিব বুলি কয়৷ মন্ত্ৰীগৰাকীয়ে জিলা উপায়ুক্ত অন্বামুথন এম পি কামৰ শলাগ লয়৷

গোলাঘাট জিলাৰ শিক্ষা বিভাগে গ্ৰহণ কৰিছে ব্যতিক্ৰমী পদক্ষেপ

গ্ৰীষ্মকালীন বন্ধৰ সময়টো স্থবিৰ হোৱা নাই গোলাঘাট জিলাৰ প্ৰাথমিক শিক্ষা ব্যৱস্থা। অনলাইন শিক্ষা পদ্ধতিৰ সুবিধা গ্ৰহণ কৰিব নোৱাৰা শিক্ষাৰ্থী সকলেও বিভিন্ন ধৰণৰ অফলাইন পদ্ধতিৰে গ্ৰহণ কৰি আহিছে সকলো বিষয়ৰ পাঠদান। অতিমাৰীকালীন জৰুৰী অৱস্থাৰ পৰিপ্ৰেক্ষিতত বিদ্যালয়সমূহ বিগত বছৰৰ দৰে এইবছৰো এপ্ৰিল ২০২১ৰ পৰা বন্ধ ৰাখিবলগীয়া হোৱাত গোলাঘাট জিলা শিক্ষা বিভাগে কিছু ব্যতিক্ৰমী পদক্ষেপেৰে ছাত্ৰ-ছাত্ৰীসকলৰ শৈক্ষিক দিশত হোৱা ক্ষতি পাৰ্যমানে হ্ৰাস কৰাৰ চেষ্টা কৰি আহিছে। বিশেষকৈ গোলাঘাট জিলাৰ প্ৰাথমিক শিক্ষা বিষয়া আৰু বিদ্যালয়সমূহৰ পৰিদৰ্শক ড০ সমীৰণ বৰাৰ নিৰ্দেশত বিগত ২০২০ চনৰ এপ্ৰিল মাহৰ পৰা বিভিন্ন অনলাইন মাধ্যমৰ জৰিয়তে সমগ্ৰ জিলাখনৰ শিক্ষক-শিক্ষয়িত্ৰীসকলে পাঠদান কৰি একাংশ ছাত্ৰ-ছাত্ৰীক উপকৃত কৰিছে।লগতে অনলাইন ব্যৱস্থাই ঢুকি নোপোৱা ছাত্ৰ-ছাত্ৰীসকলক শিক্ষক- শিক্ষয়িত্ৰীসকলে ঘৰে-ঘৰে গৈ সম্পূৰ্ণ কোভিড বিধি পালন কৰি পাঠদান কৰি আহিছে । তদুপৰি বিদ্যালয়ে-বিদ্যালয়ে তথা গাঁও আৰু চহৰ অঞ্চলৰ চুকে-কোণে দ্ৰপ বাকচৰ সহায়ত গৃহ কাৰ্যৰ জৰিয়তে ছাত্ৰ-ছাত্ৰী সকলৰ অবিৰত মূল্যায়নৰ লগতে শৈক্ষিক সমল আদান-প্ৰদানৰ সু-ব্যৱস্থা জিলাখনৰ প্ৰাথমিক, উচ্চ মাধ্যমিক আৰু উচ্চতৰ মাধ্যমিক বিদ্যালয়সমূহত কৰা হয়।এই প্ৰক্ৰিয়া গোলাঘাট পূব শিক্ষাখণ্ডত আৰম্ভ কৰি ক্ৰমাৎ সমগ্ৰ জিলাখনলৈ বিয়পাই দিয়া হৈছিল। এই ব্যৱস্থাত শেহতীয়াকৈ সংযোজিত কৰা হ’ল এক ‘ছেমি-অনলাইন প্ৰক্ৰিয়া’। ২০২১ চনৰ ১০ মে’ তাৰিখৰ পৰা গোলাঘাট পূব শিক্ষাখণ্ডৰ ভাৰপ্ৰাপ্ত খণ্ড প্ৰাথমিক শিক্ষা বিষয়া মনোজ কুমাৰ বৰুৱাৰ দ্বাৰা নিজৰ খণ্ডত পৰীক্ষা মূলকভাবে এই প্ৰক্ৰিয়া আৰম্ভ কৰি এতিয়া সমগ্ৰ জিলাখনলৈ সফলতাৰে আগবঢ়াই নিয়া হৈছে। এই প্ৰক্ৰিয়াত বিভিন্ন মণ্ডলৰ অধীনত মাতৃগোটৰ শিক্ষিতা সদস্যাসকল, শিশু সকলৰ চুবুৰীৰ শিক্ষিত যুৱক- যুৱতী, বিভিন্ন সংগঠনৰ প্ৰতিনিধি, বিদ্যালয় পৰিচালনা সমিতিৰ সদস্য-সদস্যাই স্বেচ্ছাই শিক্ষাবাহক, শিক্ষা সেৱক, এঞ্জেল এডুকেটৰ নাম লৈ যথেষ্ট উৎসাহেৰে বিদ্যালয় সমূহৰ শিক্ষক-শিক্ষয়িত্ৰীৰ লগত অনলাইন মাধ্যমেৰে একোটিকৈ পাঠৰ পাঠদান প্ৰক্ৰিয়াৰ লগত পৰিচিত হৈ অফলাইন মাধ্যমত ওচৰৰ ছাত্ৰ-ছাত্ৰী সকলক পাঠদান কৰি আহিছে। ইতিমধ্যে সমগ্ৰ জিলাখনত অনলাইন আৰু এই ব্যৱস্থাৰ জৰিয়তে আশী শতাংশতকৈও অধিক ছাত্ৰ-ছাত্ৰীক সফলতাৰে সাঙুৰি লোৱা হৈছে। জিলা শিক্ষা বিভাগৰ আহ্বান ক্ৰমে বিভিন্ন দল সংগঠনৰ প্ৰতিনিধি সকলেও এই ক্ষেত্ৰত সক্ৰিয় সহযোগিতা আগবঢ়াই আহিছে। তদুপৰি নতুন নতুন উদ্ভাৱনীমূলক চিন্তা সমূহৰ আদান-প্ৰদানেৰে জিলা প্ৰাথমিক শিক্ষা বিষয়াগৰাকীৰ নেতৃত্বত প্ৰতি সপ্তাহত মণ্ডল ভিত্তিক, খণ্ড ভিত্তিক আৰু জিলা ভিত্তিক পৰ্যালোচনা সভা ক্ৰমে বুধ, বৃহস্পতি আৰু শুক্ৰবাৰে নিয়মিত ৰূপত গুগল মিটৰ জৰিয়তে অনুষ্ঠিত কৰি আহিছে ।

এই আলোচনাত ক্ষেত্ৰভিত্তিক সন্মুখীন হোৱা প্ৰত্যাহ্বান সমূহৰো সমাধানৰ প্ৰচেষ্টা চলোৱা হয়। ইয়াৰে প্ৰথমখন জিলা সভাত পূব শিক্ষাখণ্ডৰ বিষয়া গৰাকীয়ে নিজৰ শিক্ষকতা কৰাৰ দিনত প্ৰয়োগ কৰা ছাত্ৰ-ছাত্ৰীৰ স্ব-মূল্যায়নৰ ব্যৱস্থা এটিৰ বিষয়ে উল্লেখ কৰে, য’ত একোটা পাঠৰ শিক্ষকে বাছি দিয়া শিকণ অৰ্হতা অনুযায়ী কি, কিয় আৰু কেনেকৈ ব্যৱহাৰেৰে চাৰি-পাঁচটা প্ৰশ্ন শিক্ষাৰ্থীসকলক সাজি উত্তৰ লিখিবলৈ দিয়া হয় যাৰ দ্বাৰা শিক্ষাৰ্থী সকলৰ শিকণ ফলাফল মূল্যায়ন কৰা হয়। এতিয়া উক্ত পদ্ধতিৰে ষষ্ঠ শ্ৰেণীৰ পৰা আৰম্ভ কৰি শিক্ষাৰ্থীসকলৰ মূল্যায়নৰ ব্যৱস্থাও পূব শিক্ষাখণ্ডক কেন্দ্ৰ কৰি সমগ্ৰ জিলাখনতে আৰম্ভ কৰা হৈছে। ইয়াৰ লগতে জিলাখনৰ পূব শিক্ষাখণ্ডত প্ৰত্যেক বৰ্ষতে অনুষ্ঠিত হোৱা গ্ৰীষ্মকালীন শিবিৰৰ লগত সংগতি ৰাখি ছাত্ৰ-ছাত্ৰী, শিক্ষক-শিক্ষয়িত্ৰী আৰু অভিভাৱক সকলৰ মাজত মুঠ ১৪ টা শিতানত সুকীয়া-সুকীয়াকৈ খণ্ড ভিত্তিক সাহিত্য প্ৰতিযোগিতা ২৪ মে’ ২০২১ৰ পৰা ৬ জুন ২০২১ৰ ভিতৰত সফলতাৰে সম্পন্ন কৰা হয় আৰু ক্ৰমে সমগ্ৰ জিলাখনৰ প্ৰতি শিক্ষাখণ্ডলৈ প্ৰসাৰিত কৰাৰ সিদ্ধান্ত শেহতীয়া জিলা পৰ্যালোচনা সভাত লোৱা হয়।

ক’ভিডকালীন সময়ত চিকিৎসকৰ বাবে আশাব্যঞ্জক খবৰ- চৰ্চাত অসমৰ এজন চিকিৎসক

ৰবটৰ জৰিয়তে লাইভ অস্ত্ৰোপচাৰ কৰি চৰ্চালৈ আহিছে অসমৰ এজন চিকিৎসক। চিকিৎসক জনৰ নাম ডাঃ সুভাষ খান্না।চিকিৎসক জনে আমেৰিকা, ৰাছিয়া, স্পেইন, বাংলাদেশ আদি কৰি ৬০ খন দেশৰ চিকিৎসকৰ পৰা প্ৰশংসা বুটলিবলৈ সক্ষম হৈছে। উল্লেখযোগ্য যে যোৱা শুকুৰবাৰে এখন ৱেবিনাৰত তেওঁ লাইভ অস্ত্ৰোপচাৰ কৰে।ৱেবিনাৰখনত অংশগ্ৰহণ কৰা ২৫০ জন বিশেষজ্ঞ চিকিৎসকৰ বিভিন্ন প্ৰশ্নৰ উত্তৰো দিয়ে ।উল্লেখযোগ্য যে সুভাষ খান্না মহানগৰীৰ স্বাগত হাস্পিতালৰ লগত জড়িত। তেখেতে স্বাগত হাস্পতালত ‘ভাৰ্চিয়াছ ৰবটৰ’ জৰিয়তে এগৰাকী মহিলাৰোগী গোল্ড ব্লাডাৰৰ লাইভ অস্ত্ৰোপচাৰ কৰিছিল।

এই সম্পৰ্কত সুভাষ খান্নাই কয় যে ৰবটৰ জৰিয়তে তিনিৰ পৰা দহ মিটাৰ দূৰৰ পৰা অস্ত্ৰোপচাৰ কৰিব পৰাৰ সুবিধা আছে। সমগ্ৰ দেশত এনেকুৱা ১২ টা ৰবট আছে আৰু তাৰে প্ৰথমটো পুনে, দ্বিতীয়টো নাচিকৰ হাস্পতাল আৰু তৃতীয়টো গুৱাহাটীৰ স্বাগত হাস্পতালত আছে। কেম্বব্ৰীজ মেডিকেল ৰবটিস্ক, চাৰ্জিকেল ( চি এম আৰ ) কোম্পানীৰ পৰা এই ৰবটটো ভক্ৰয় কৰিছোঁ।যাৰ মূল্য হৈছে ২০ কোটি টকা।ক’ভিডৰ এই জটিল পৰিস্থিতিৰ সময়ত এই ধৰণৰ অস্ত্ৰোপচাৰৰ প্ৰয়োজনীয়তাই ৰোগীক সকাহ দিবলৈ সক্ষম হৈছে।