নগাঁও সদৰৰ পৰা প্ৰায় ২৫ কি. মি. দূৰত কোৱাইকটা এখন ঐতিহাসিক থান (সত্ৰ) ।এই সত্ৰখনৰ উন্নয়নৰ স্বাৰ্থতে সাম্প্ৰদায়িক ভেদা ভেদ পাহৰি আজি একেলগে সমবেত হ’ল হিন্দু – মুছলমান সম্প্ৰদায়ৰ তিনি শতাধিক লোক । জাতি – ধৰ্ম – বৰ্ণ নিৰ্বিশেষে বৃহৎ অসমীয়া জাতি গঠনৰ যি সপোন গুৰুজনাই দেখিছিল তাৰেই এক নিদৰ্শন দাঙি ধৰিলে কোবাইকটা বাসীয়ে । সতী ৰাধিকাৰ জন্মস্থান তথা স্মৃতি বিজৰিত ঐতিহ্যমণ্ডিত কিন্তু সু-পৰিচালনাৰ অভাৱত জৰাজীৰ্ণ হৈ পৰা থান খনৰ সুৰক্ষা আৰু উন্নয়নৰ উদ্দেশ্যেই আজিৰ ৰাজহুৱা সভাখন অনুষ্ঠিত হয়। অঞ্চলটোৰ জেষ্ঠ ভকত মুহিধৰ আতাই সভাপতিত্ব কৰা সভাখনত উপস্থিত থাকি বটদ্ৰৱা থান পৰিচালনা সমিতিৰ সভাপতি দেৱানন্দ দেৱগোস্বামীয়ে কোবাইকটা বাসীয়ে যি সমন্বয়ৰ সেঁতু গঢ়িলে সেয়া সমগ্ৰ বিশ্ব বাসীৰ বাবে এক নিদৰ্শন বুলি মন্তব্য কৰে । জাতি, ধৰ্ম, সম্প্ৰদায়ক লৈ ৰাজ্য খনত ভেদাভেদৰ ৰাজনীতিয়ে গা কৰি উঠাৰ এই সময়ত গুৰুজনাৰ আদৰ্শৰে সম্বন্বয়ৰ সেতু গঢ়িব লাগিব বুলিও তেওঁ মন্তব্য আগবঢ়ায়। সভাত বটদ্ৰৱা থান পৰিচালনা সমিতিৰ সাধাৰণ সম্পাদক ইন্দ্ৰ মোহন বৰুৱা, পশ্চিম নগাঁও জিলা সত্র মহাসভাৰ প্ৰতিনিধি থগিত মহন্ত আদিয়ে ঐতিহাসিক থান(সত্র) খনৰ উন্নয়ন আৰু পৰিচালনাৰ বাবে ৰাজ্য চৰকাৰ, নগাঁও জিলা প্ৰশাসন আৰু স্থানীয় বিধায়িকা আঙুৰলতা ডেকাৰ দৃষ্টিগোচৰ কৰাৰ আহ্বান জনায় আৰু অতি পুৰণি থানখনৰ পূৰ্বৰ পৰম্পৰা আৰু পদ্ধতিৰে চলাই নিয়াৰ বাবে পৰামৰ্শ আগবঢ়ায়। এই সভাতে থানৰ পৰিচালনা আৰু উন্নয়নৰ বাবে যামিনি দাসক সভাপতি আৰু অচ্যুত কুমাৰ দাসক সম্পাদক হিচাবে লৈ এখন সমিতি গঠন কৰা হয়। সভাত ডেকা সত্ৰীয়া অতুল মহন্ত, দিলীপ দেৱগোস্বামী, হাজী ইব্ৰাহীম আলী, হাজী আব্দুল ৰসিদ , গুলজাৰ হুছেইনৰ লগতে তিনিশতাধিক হিন্দু মুছলমানৰ ৰাইজ উপস্থিত থাকে।খবৰ যুগুতালে ৰাহুল দেৱ বৰদলৈয়ে..
জ্যেষ্ঠ সাংবাদিক নৱ ঠাকুৰীয়ালৈ বিশেষ সন্মান
জ্যেষ্ঠ সাংবাদিক নৱ ঠাকুৰীয়াক প্ৰেছ এমব্লেম কেম্পেইন নামৰ আন্তৰ্জাতিক সংস্থাৰ ভাৰতৰ প্ৰতিনিধি হিচাপে বাছনি কৰা হৈছে। উল্লেখযোগ্য যে চুইজাৰলেণ্ডৰ জেনেভাস্থিত সংস্থাটোৱে সমগ্ৰ পৃথিৱীতে ঘটি থকা সাংবাদিক হত্যা, সংবাদকৰ্মীৰ ওপৰত হোৱা নিগ্ৰহ আৰু শেহতীয়াকৈ ক’ভিডত মৃত্যু হোৱা সাংবাদিকৰ তালিকা প্ৰস্তুত কৰি আহিছে।
কেইবাখনো দেশৰ জ্যেষ্ঠ সাংবাদিকৰ উদ্যোগত ২০০৪ চনত জন্ম লাভ কৰা সংস্থাটোৰ সম্পাদক-প্ৰধান ব্লেইজ লেম্পেনে ঠাকুৰীয়াক এই দায়িত্ব অৰ্পনৰ বিষয়ে অৱগত কৰায়।লগতে সংস্থাটোৱে জাৰ্নেলিষ্ট ফ’ৰাম অসম সভাপতি ৰূপম বৰুৱাক ইয়াৰ সহযোগী সংগঠন হিচাপে মান্যতা প্ৰদান কৰিছে।
২০১০ চনৰ পৰা ৰাষ্ট্ৰসংঘত নিজৰ বক্তব্য উপস্থাপন কৰি অহা সংস্থাটোৱে ভাৰতবৰ্ষৰ বিভিন্ন প্ৰান্তৰ কৰ্মৰত সাংবাদিক আৰ্থিক অৱস্থা সম্পৰ্কটো অধ্যয়ন কৰিব।আজিৰ পৰা তিনিদশক পূৰ্বে অসম অভিযান্ত্ৰিক মহাবিদ্যালয়ৰ পৰা স্নাতক ডিগ্ৰী লাভ কৰা ঠাকুৰীয়াই অসমীয়া কাকতৰ জৰিয়তে সাংবাদিকতা জীৱন আৰম্ভ কৰে।
সম্প্ৰতি তেওঁ বহুকেইখন ৰাষ্ট্ৰীয় আৰু আন্ত:ৰাষ্ট্ৰীয় পৰ্যায়ৰ কাকতত সাংবাদিকতা আৰু সাংবাদিকৰ বিভিন্ন সমস্যা ওপৰত প্ৰবন্ধ লিখি আহিছে।
ভিউৱাছৰ মতামত