কৃষি প্ৰযুক্তি তথ্য কেন্দ্ৰ উদ্বোধন

অসম কৃষি বিশ্ববিদ্যালয় যোৰহাটৰ অন্তৰ্গত উদ্যান বিজ্ঞান মহাবিদ্যালয়ৰ ছয় গৰাকী স্নাতক চূড়ান্ত বৰ্ষৰ ছাত্ৰীৰ উদ্যোগত কামৰূপ জিলাৰ কুলহাটি গাওঁত মঙলবাৰে এটা  কৃষি প্ৰযুক্তি তথ্য কেন্দ্ৰ  মুকলি হয় ৷ কেন্দ্ৰটো মুকলি কৰি শুৱালকুছি চক্ৰৰ কৃষি উন্নয়ন বিষয়া মানবেন্দ্ৰ শৰ্মাই ছাত্ৰী সকলৰ এই অভিনৱ প্ৰচেষ্টাৰ শলাগ লৈ কয় যে কেন্দ্ৰটোৱে অঞ্চলটোৰ এটা বহুদিনীয়া অভাৱ পূৰণ কৰিব৷

 

 

উল্লেখযোগ্য যে পাঁচ গৰাকী অসমৰ ছাত্ৰী ক্ৰমে নীলাক্ষি বৰদলৈ , দীক্ষিতা পল্লৱী দাস , বৰ্ষা নাথ , অমৃষা বুঢ়াগোহাঁই ,জাহ্নৱী বৰুৱা তথা মিজোৰামৰ ছাত্ৰী লালৰিণফেলি ৰ প্ৰচেষ্টাত স্থাপন হোৱা তথ্য কেন্দ্ৰটোৰ কুলহাটি গাঁৱৰ কৃষক সকলৰ মাজত আধুনিক কৃষি পদ্ধতিৰ বিষয়ে সজাগতা সৃষ্টি কৰাৰ উপৰিও বিজ্ঞানসন্মত কৃষি কাৰ্য্যৰ বাবে প্ৰয়োজনীয় তথ্য যোগান ধৰে৷

 

 

ইয়াৰ উপৰিও  কৃষক সকলে সন্মুখীন হোৱা কৃষিভিত্তিক সমস্যা সমূহৰ বাস্তৱসন্মত সামাধান কেন্দ্ৰটোৰ যোগেদি আগবঢ়োৱাৰ প্ৰয়াস কৰা হয় বুলি জানিব পৰা গৈছে৷

 

আকৰ্ষণীয় দৃশ্যমান সজুলি ,কৃষি কৃষিভিত্তিক আৰ্হি , নমুনা , পোষ্টাৰ , উন্নত জাতৰ শস্যৰ বীজ তথা ৰোপন সামগ্ৰী আদিৰে সমৃদ্ধ তথা কেন্দ্ৰটো ছয়টা প্ৰযুক্তিগত শাখাৰ জৰিয়তে বিভিন্ন আধুনিক কৃষি প্ৰযুক্তি উপস্থাপন কৰা হৈছে৷

 

কৃষি বিশ্ববিদ্যালয়ৰ গ্ৰাম্য কৃষি কৰ্ম অভিজ্ঞতা আঁচনিৰ অধীনত এই ছয় গৰাকী ছাত্ৰীয়ে পাঁচ মাহ  কুলহিটি গাঁৱত থাকি গাঁওখনৰ সৰ্বাংগীন উন্নয়নৰ বাবে এখন কাৰ্য্য আঁচনি ৰূপায়ণ কৰাৰ পৰিকল্পনা কৰিছে ৷ ইয়াৰ অন্তৰ্গত প্ৰয়োজন ভিত্তিক প্ৰশিক্ষণ কৃষি কৰ্ম কৌশল প্ৰদৰ্শন , প্ৰযুক্তি হস্তান্তৰ আদি কাৰ্য্যপন্থা সামৰি ল’ব ৷ কৃষি ছাত্ৰীৰ এই গোটটোৰ পৰামৰ্শদাতা হিচাপে অসম কৃষি বিশ্ববিদ্যালয়ৰ অধীনস্থ উদ্যান শস্য গৱেষণা কেন্দ্ৰ কাঁহিকুছিৰ বিজ্ঞানীদ্বয় ক্ৰমে ড° জয়ন্ত কুমাৰ শৰ্মা আৰু শিৱানী দাসে সেৱা আগবঢ়ায় ৷

কুলহাটি দুৰ্গা মন্দিৰ প্ৰাংগনত অনুষ্ঠিত তথা কেন্দ্ৰটোৰ উদ্বোধনী সভাখনত মুখ্য অতিথি মানবেন্দ্ৰ শৰ্মাৰ উপৰিও কুলহাটি গাঁও উন্নয়ন সমিটিৰ সভাপতি মনমোহন দাস , গাঁও পঞ্চায়তৰ সভানেত্ৰী পদুমী দাস তথা উদ্যান শস্যৰ গৱেষণা কেন্দ্ৰ কাঁহিকুছি বিজ্ঞানী ড° সমীৰণ পাঠকে বক্তব্য আগবঢ়ায়৷অনুষ্ঠানত বহু কেইগৰাকী বিজ্ঞানী উপস্থিত থাকে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

২১ জানুৱাৰীৰ পৰা বোকাখাতত তিনিদিনীয়াকৈ অনুষ্ঠিত হ’ব কৃষি আৰু উদ্যান শস্যৰ ৰাষ্ট্ৰীয় মেলা

বোকাখাতত প্ৰথমবাৰৰ বাবে অনুষ্ঠিত হ’ব আন্তঃৰাষ্ট্ৰীয় (ভাৰ্চুৱেল) অংশ গ্ৰহণেৰে ৰাষ্ট্ৰীয় কৃষি আৰু উদ্যান শস্য মেলা ২০২১ ৷ তাৰ বাবে বোকাখাত ৰাজহুৱা খেল পথাৰত চলিছে যুদ্ধকালীন প্ৰস্তুতি ৷ ৰাজ্যৰ কৃষি বিভাগৰ উদ্যোগত অনুষ্ঠিত হ’ব লগা এই মেলা অহা ২১,২২ আৰু ২৩ জানুৱাৰীত অনুষ্ঠিত হ’ব ৷ মেলাত দেশৰ বিভিন্ন প্ৰান্তৰ বিপনীয়ে অংশ ল’ব ৷ শনিবাৰে বিয়লি স্থানীয় বিধায়ক তথা ৰাজ্যৰ কৃষিমন্ত্ৰী অতুল বৰাই অগ্ৰগতিৰ বুজ লয় ৷ কৃষি আৰু উদ্যান শস্যৰ সঞ্চালক মঃ জেলিলৰ লগতে কৃষি বিভাগৰ মুখ্য সচিব ৰাজেশ প্ৰসাদৰ উপৰিও জিলা আৰু মহকুমা প্ৰশাসনৰ বিষয়া বৰ্গ উপস্থিত থাকে ৷ এই মেলাত এইবাৰ ক`ভিডৰ বাবে বহিঃৰাষ্ট্ৰৰ বিপনীয়ে অংশ নল’ব যদিও আন্তঃৰাষ্ট্ৰীয় (ভাৰ্চুৱেল) অংশ গ্ৰহণ অনুষ্ঠিত হ’ব ৷ লগতে দিল্লীস্থিত বহিঃৰাষ্ট্ৰৰ ৰাষ্ট্ৰদূত সকলৰ লগতে কেন্দ্ৰীয় কৃষিমন্ত্ৰীগৰাকীক আমন্ত্ৰণ জনোৱাৰ ব্যৱস্থা কৰিছে যদিও এতিয়াও তেওঁলোকৰ নিমন্ত্ৰণ নিশ্চিত হোৱা নাই বুলি মন্ত্ৰীগৰাকীয়ে জনাইছে ৷ মেলাত বহিঃ ৰাজ্যৰ পৰা অহিব লগা অত্যাধুনিক কৃষি সামগ্ৰী প্ৰদৰ্শনৰ লগতে ৰাজ্যৰ কৃষকে প্ৰশিক্ষণ লাভ কৰিব পাৰিব বুলি সদৰি কৰে কৃষিমন্ত্ৰীগৰাকীয়ে ৷ তাৰোপৰি ৰাজ্যৰ কৃষকসকল উপকৃত হ’ব পৰাকৈ কেইখনো আলোচনাচক্ৰ অনুষ্ঠিত হ’ব ৷ অহা ২১ জানুৱাৰীত মুখ্যমন্ত্ৰী সৰ্বানন্দ সোনোৱালে মেলাখন আনুষ্ঠানিকভাৱে মুকলি কৰিব বুলি জনালে কৃষিমন্ত্ৰী অতুল বৰাই ৷ বোকাখাত ৰাজহুৱা খেলপথাৰত অনুষ্ঠিত মেলাত প্ৰতিদিনে স্থানীয় আৰু আমন্ত্ৰিত কন্ঠশিল্পীসকলৰ দ্বাৰা সাংস্কৃতিক কাৰ্যসূচীও অনুষ্ঠিত হ’ব ৷ ইয়াৰ পূৰ্বে এই মেলা গুৱাহাটী আৰু ডিব্ৰুগড়ত অনুষ্ঠিত কৰিছিল যদিও ২০২০ বৰ্ষটিত ক’ৰণা সৃষ্ট পৰিৱেশৰ বাবে অনুষ্ঠিত কৰিব পৰা নাছিল ৷

খবৰ যুগুতালে বোকাখাতৰ পৰা দিব্যজ্যোতি হাজৰিকাই ৷

কাজিৰঙাৰ এনিমেল কৰিডৰ চাফা কৰিলে মহাবিদ্যালয়ৰ ছাত্ৰ-ছাত্ৰীয়ে

কাজিৰঙা ৰাষ্ট্ৰীয় উদ্যানৰ অতি গুৰুত্বপুৰ্ণ পানবাৰীৰ এনিমেল কৰিডৰ৷ এই এনিমেল কৰিডৰে পানবাৰী সংৰক্ষিত বনাঞ্চলক কাজিৰঙা ৰাষ্ট্ৰীয় উদ্যানৰ সৈতে সংযোজিত কৰিছে ৷ এই কৰিডৰৰ মাজেৰে গৈছে ৩৭ নং ৰাষ্ট্ৰীয় ঘাইপথ ৷ এই পথেৰে অহা যোৱা কৰা যানবাহনে আৱৰ্জনা পেলাই প্ৰদূষিত কৰে এনিমেল কৰিডৰটো ৷ আজি বোকাখাতৰ জে ডি এছ জি মহাবিদ্যালয়ৰ ৰাষ্ট্ৰীয় সেৱা আঁচনিৰ ছাত্ৰ ছাত্ৰী সকলে এক অভিযানেৰে আৱৰ্জনা বুটলি প্ৰদূষণ মুক্ত কৰে এনিমেল কৰিডৰটো ৷ আজি পানবাৰীত পূৱ অসম বন্যপ্ৰাণী সংমণ্ডলৰ ডি এফ অ’ ৰমেশ কুমাৰ গগৈয়ে এই অভিযানৰ আৰম্ভণি কৰে ৷ এই উপলক্ষে পানবাৰী খণ্ড বন কাৰ্যালয় প্ৰাংগনত আয়োজিত এক অনুষ্ঠানত ডি এফ অ’ ৰমেশ কুমাৰ গগৈৰ উপৰিও কেন্দ্ৰীয় চৰকাৰৰ হিচাব পৰীক্ষণ বিভাগৰ ডেপুটি একাউন্টেট জেনেৰেল আব্ৰাহম জুদাহ চেপাহ এ, সহকাৰী বন সংৰক্ষক ঋতুপৱন বৰা, অনাৰেৰী ৱাইল্ড লাইফ ৱাৰ্ডেন উত্তম শইকীয়া, বোকাখাত বনাঞ্চলৰ বনাঞ্চলিক বিষয়া ডা৹ ইন্দ্ৰাণী বৰগোহাঁই, খণ্ড বন বিষয়া তৰুণ গগৈ, জে ডি এছ জি মহাবিদ্যালয়ৰ জ্যেষ্ঠ প্ৰৱক্তা প্ৰশান্ত ফুকন আৰু মতিৰাম দাসৰ লগতে বনকৰ্মী আৰু মহাবিদ্যালয় খনৰ ছাত্ৰ ছাত্ৰীও উপস্থিত থাকে ৷ অনুষ্ঠানত এনিমেল কৰিডৰৰ আৱৰ্জনা পৰিস্কাৰ কৰিবৰ বাবে জে ডি এছ জি মহাবিদ্যালয়ৰ ৰাষ্ট্ৰীয় সেৱা আঁচনিৰ ছাত্ৰ ছাত্ৰী সকল আগবাঢ়ি অহাৰ বাবে ভুয়সী প্ৰসংসা কৰে ডি এফ অ’ ৰমেশ কুমাৰ গগৈয়ে ৷ ছাত্ৰ-ছাত্ৰী সকলে হাতমোজা পৰিধান কৰি এনিমেল কৰিডৰটোৰ দুয়োকাষে পথৰ দাঁতিত পৰি ৰোৱা পুতি গন্ধময় আৱৰ্জনা বুটলি কৰিডৰটো পৰিস্কাৰ কৰে ৷ কাজিৰঙা ৰাষ্ট্ৰীয় উদ্যানৰ গুৰুত্বপূৰ্ণ পানবাৰী কৰিডৰটো লেতেৰা আৱৰ্জনা পেলাই প্ৰদূষণ নকৰিবৰ বাবে মহাবিদ্যালয়খনৰ ছাত্ৰ-ছাত্ৰীয়ে আহ্বান জনাইছে ৷

খবৰ যুগুতালে বোকাখাতৰ পৰা দিব্যজ্যোতি হাজৰিকাই ৷

ব্ৰহ্মপুত্ৰ ব’ৰ্ডৰ উদ্যোগত অনুষ্ঠিত প্ৰতিযোগিতাত পশ্চিম গুৱাহাটী মহাবিদ্যালয়ৰ সাফল্য

ভাৰত চৰকাৰৰ জলশক্তি মন্ত্ৰালয়ৰ অধীনৰ “ব্ৰহ্মপুত্ৰ আমন্ত্ৰণ অভিযান” কাৰ্যসূচীৰ লগত সংগতি ৰাখি ব্ৰহ্মপুত্ৰ ব’ৰ্ডৰ উদ্যোগত আৰু পশ্চিম গুৱাহাটী মহাবিদ্যালয়ৰ সম্প্ৰসাৰণ শৈক্ষিক কোষৰ সহযোগত বিগত ৯ জানুৱাৰীৰ দিনা পশ্চিম গুৱাহাটী মহাবিদ্যালয় প্ৰাঙ্গনত অনুষ্ঠিত হয় সদৌ আন্তঃমহাবিদ্যালয় ভিত্তিত এখনি ৰচনা আৰু তৰ্ক প্ৰতিযোগিতা। পশ্চিম গুৱাহাটী মহাবিদ্যালয়ৰ সম্প্ৰসাৰণ শৈক্ষিক কোষৰ সমন্বয়ক ডঃ মধুলিমা চলিহা তথা ব্ৰহ্মপুত্ৰ ব’ৰ্ডৰ কাৰ্যকৰ্তা ক্ৰমে গুণেশ্বৰ দাস আৰু পার্থপ্ৰতীম দাসৰ বিশেষ উদ্যোগত অনুষ্ঠিত প্ৰতিযোগিতাৰ আৰম্ভণিতে বন্তি প্ৰজ্বলন কৰে পশ্চিম গুৱাহাটী মহাবিদ্যালয়ৰ অধ্যক্ষ ডঃ ৰাণা শৰ্মাই।

আন্তঃমহাবিদ্যালয় ৰচনা প্ৰতিযোগিতাত পশ্চিম গুৱাহাটী মহাবিদ্যালয়ৰ পঞ্চম ষাণ্মাসিকৰ ছাত্ৰী নিবেদিতা বৰাই প্ৰথম স্থান অধিকাৰ কৰাৰ লগতে মহাবিদ্যালয়খনৰ উচ্চতৰ মাধ্যমিক কলা শাখাৰ প্ৰথম বাৰ্ষিকৰ ছাত্ৰী জিলমিল ৰূপালী জোনাকে দ্বিতীয় স্থান আৰু একেখন মহাবিদ্যালয়ৰে উচ্চতৰ মাধ্যমিক প্ৰথম বাৰ্ষিকৰ ছাত্ৰী নিতাম্বিনী দাসে তৃতীয় স্থান দখল কৰিবলৈ সক্ষম হয় । আনহাতে আন্তঃমহাবিদ্যালয় তৰ্ক প্ৰতিযোগিতাত মিৰ্জাৰ দক্ষিণ কামৰূপ মহাবিদ্যালয়ৰ ছাত্র চিৰঞ্জীৱ দাসে প্ৰথম , পশ্চিম গুৱাহাটী মহাবিদ্যালয়ৰ ছাত্র মানসজ্যোতি ৰাভাই দ্বিতীয় আৰু শিলচৰৰ “নীট “ৰ ছাত্ৰ ভৃগুৰাজ বড়োই তৃতীয় স্থান অধিকাৰ কৰে । উল্লেখযোগ্য যে ১৪ জানুৱাৰীৰ বিয়লি গুৱাহাটীৰ মাছখোৱাস্থিত প্ৰাগজ্যোতি সাংস্কৃতিক প্ৰকল্পত অনুষ্ঠিত এক গাম্ভীৰ্যপূৰ্ণ অনুষ্ঠানত কেন্দ্ৰীয় জলশক্তি দপ্তৰৰ মন্ত্ৰী গজেন্দ্ৰ সিং শেখাৱত , ৰাজ্য চৰকাৰৰ পৰিবহন , উদ্যোগ আৰু বাণিজ্য বিভাগৰ মন্ত্ৰী চন্দ্ৰমোহন পাটোৱাৰী , এনডিআৰএফৰ সঞ্চালক প্ৰধান এছ এন প্ৰধান , উপ মহাপৰিদৰ্শক মনোজ কুমাৰ যাদৱ আৰু ৰাফটিং বিশেষজ্ঞ সুহাসিণী শেখাৱাতে প্ৰতিযোগিতাৰ বিজয়ী প্ৰতিযোগী সকলক বঁটা সমূহ আনুষ্ঠানিক ভাৱে প্ৰদান কৰে । অনুষ্ঠানটোত ব্ৰহ্মপুত্ৰ ব’ৰ্ডৰ অধ্যক্ষ ৰাজীৱ যাদৱ , এনডিআৰএফৰ কমাণ্ডেণ্ট ৰনবীৰ সিং গীল , আইআইটি গুৱাহাটীৰ অধ্যাপক ডঃ চন্দন মহন্তকে ধৰি কেবাগৰাকী বিশিষ্ট ব্যক্তি উপস্থিত থাকে ।

নগাঁৱৰ বটদ্ৰৱাত ৰামমন্দিৰ নিধি সমৰ্পন কাৰ্য্যসূচী শুভাৰম্ভ

ভাৰতীয় মহাজীৱনৰ আদৰ্শ পুৰুষ সনাতনী দৰ্শন সংস্কৃতিৰ পথদ্ৰষ্ট্ৰা তথা মৰ্য্যদা পুৰুষোত্তম শ্ৰীৰামৰ জন্মভূমিত নিৰ্মাণ হ’বলগীয়া ৰাম মন্দিৰৰ নিৰ্মাণৰ বাবে নিধি সমৰ্পণ অভিযানৰ অংশ হিচাপে গুৰুজনাৰ জন্মস্থান নগাঁৱৰ বটদ্ৰৱা থানত তপোবনৰ সুষমাৰে সুশোভিত হৈ থকা আকাশীগঙ্গাৰ তীৰৰ পৰা পূঁজি সংগ্ৰহ কাৰ্যসূচী কালিৰে পৰা আৰম্ভ কৰা হৈছে । অযোধ্যাত স্থাপন হোৱা নিৰ্মীয়মান শ্ৰীৰাম মন্দিৰৰ বাবে ৰাইজৰ সহযোগিতা বিচাৰি শ্ৰীৰাম মন্দিৰ নিৰ্মাণ সমৰ্পণ সমিতিৰ অন্যতম কৰ্মকৰ্তা ৰাজু বৰুৱাই এই উদ্দেশ্যে ৰাইজক সম্বোধন কৰি অভিযান সন্দৰ্ভত বিস্তৃত বাখ্যা আগবঢ়াই “ ঐতিহ্যমণ্ডিত বটদ্ৰৱা ধামত গুৰু শঙ্কৰৰ আশীৰ্বাদ শিৰত লৈ বটদ্ৰৱা- ৰামমন্দিৰলৈ এই কাৰ্যসূচী লোৱা হৈছে বুলি উল্লেখ কৰে।

শ্ৰীৰাম মন্দিৰ নিৰ্মাণ কাৰ্যত গাঁৱৰ দুখীয়া লোকজনেও যাতে অনুদান আগবঢ়াই কৃতিত্বৰ অধিকাৰী হ’ব পাৰে সেই উদ্দেশ্যে গাঁৱৰ প্ৰতিঘৰ মানুহৰ ওচৰলৈ যাব এই অভিযানকাৰী দলটোৱে । নিম্নতম দহ টকা অনুদান আগবঢ়াব পাৰিব বুলিও উল্লেখ কৰে । এই কাৰ্যসূচীৰ জৰিয়তে জনসম্পৰ্কও ৰক্ষা হ’ব বুলি জানিবলৈ দিয়ে মন্দিৰ নিৰ্মাণ নিধি সমৰ্পণ সমিতিৰ কাৰ্য্যকৰ্তা দিলীপ কুমাৰ নাথে। শ্ৰীশ্ৰী বটদ্ৰৱা থান পৰিচালনা সমিতিৰ সভাপতি দেৱানন্দ দেৱ গোস্বামী আৰু সাধাৰণ সম্পাদক ইন্দ্ৰমোহন বৰুৱাই আনুষ্ঠানিকভাৱে অনুদান আগবঢ়ায় ।
শ্ৰীৰাম মন্দিৰ নিৰ্মাণৰ বাবে অনলাইন যোগেও অনুদান আগবঢ়াব পাৰিব বুলিও জানিবলৈ দিয়ে । এইক্ষেত্ৰত ৰাইজৰ সহায় আৰু সহযোগিতা কামনা কৰে তেওঁলোকে। এই অভিযানত উপস্থিত থাকে শ্ৰীৰাম মন্দিৰ নিৰ্মাণ নিধি সমৰ্পণ সমিতিৰ উত্তৰ অসম প্ৰান্তৰ সহ কাৰ্যবাহী কবীন বৰা, ৰাম জন্মভূমি নিধি সমৰ্পণ সমিতিৰ নগাঁও জিলাৰ প্ৰমূখ মানস শইকীয়া, খণ্ড নিৰিক্ষক মানিক নাথ, সমাজকৰ্মী জোনাৰাম বৰুৱা, তপন গোস্বামী, গৌতম গিৰি গোস্বামী, বটদ্ৰৱা শংকৰদেৱ বিদ্যা নিকেতনৰ প্ৰধান আচাৰ্য সোনামনি কলিতা, বটদ্ৰৱা সত্ৰ গাওঁ পঞ্চায়তৰ সভানেত্ৰী নমিতা হাজৰিকা বৰা, গোপাল কলিতা , দিব্যজ্যোতি বৰুৱা, কন্দৰ্প কুমাৰ কলিতা ,অমৰজ্যোতি কলিতা , অমৃত বৰুৱা, চন্দ্ৰামিকা কলিতা, সুস্মিতা বৰুৱা প্ৰমুখ্যে শতাধিক ৰাইজে ।
খবৰ যুগুতালে নগাঁৱৰ পৰা ৰাহুল দেৱ বৰদলৈয়ে..

আজি ক’ভিডৰ ভেকচিন প্ৰদান কৰিব

সমগ্ৰ দেশৰ লগতে অসমতো আজি ক’ভিড ভেকচিন প্ৰদানৰ প্ৰক্ৰিয়া আৰম্ভ হ’ব। আজি ৰাজ্যৰ ১২ গৰাকী জ্যেষ্ঠ চিকিৎসকে ক’ভিডৰ ভেকচিন গ্ৰহণ কৰিব।স্বাস্থ্য মন্ত্ৰী গৰাকীয়ে প্ৰকাশ কৰা অনুসৰি প্ৰথম ভেকচিন গ্ৰহণ কৰিবলগীয়া জ্যেষ্ঠ চিকিৎসক সকলৰ ভিতৰত আছে শ্ৰীমন্ত শংকৰদেৱ বিশ্ববিদ্যালয়ৰ প্ৰাক্তন উপাচাৰ্য ডাঃ উমেশ চন্দ্ৰ শৰ্মা, বৰপেটা চিকিৎসা মহাবিদ্যালয়ৰ প্ৰাক্তন অধ্যক্ষ ডাঃ ধ্ৰুৱজ্যোতি বৰা।

অসমত আজি ৰাজ্য খনৰ জনসংখ্যাৰ মুঠ ৩ শতাংশ লোকক ক’ভিড ভেকচিন প্রদান কৰা হ’ব বুলি স্বাস্থ্য মন্ত্ৰী গৰাকীয়ে সদৰি কৰে।ক’ৰণা যোদ্ধা আৰু ৰুগীয় লোকক ভেকচিন প্ৰদানৰ ক্ষেত্ৰত অগ্ৰাধিকাৰ দিয়া হ’ব বুলি তেওঁ কয়।প্ৰথম পৰ্যায়ৰ ভেকচিন প্ৰদান কাৰ্যসূচীত প্ৰায় ১ লাখ আৰক্ষী আৰু অৰ্ধ-সামৰিক বাহিনীৰ লোকক সামৰি লোৱা হ’ব।ইয়াৰোপৰি এম্বুলেন্সৰ চালক,প্ৰায় ১ লাখ ৯০ হাজাৰ চিকিৎসক,নাৰ্চ আদিকো প্ৰথম পৰ্যায়ত ভেকচিন প্ৰদান কৰা হ’ব।ইতিমধ্যে ভেকচিন প্ৰদান কৰিবলৈ ৮৬৫১ গৰাকী লোকক প্ৰশিক্ষিত কৰি তোলা হৈছে।ৰাজ্যৰ ৬৫ টা কেন্দ্ৰত আজি ভেকচিন প্ৰদান কৰা হ’ব।অসমতে এতিয়ালৈকে কোভিশ্বিল্ডৰ ২০১,৫০০ টা আৰু কোভিস্কিনৰ ২০,০০০ টা ডোজ লাভ লাভ কৰিবলৈ সক্ষম হৈছে।

চুক্তিত স্বাক্ষৰিত হ’ল গুৱাহাটীৰ আই আই টি আৰু উত্তৰ পূব কৰ্কট চিকিৎসালয় আৰু গৱেষণা প্ৰতিষ্ঠান

গুৱাহাটী আই আই টি আৰু যোৰহাটস্থিত উত্তৰ পূব কৰ্কট চিকিৎসালয় আৰু গৱেষণা প্ৰতিষ্ঠানৰ মাজত যোৱা ১৩ জানুৱাৰীত এক চুক্তি স্বাক্ষৰ কৰা হয়।উল্লেখ্য যে ২০১৪ চনৰ পৰাই এই চুক্তিৰ প্ৰাৰম্ভিক কাম-কাজ আৰম্ভ হৈছিল।

উত্তৰ-পূৰ্বৰ কৰ্কট ৰোগৰ সম্ভাৱনা থকা জনসংখ্যা চিনাক্ত কৰাৰ বাবে গৱেষণা পদ্ধতি উন্নত কৰাৰ প্ৰচেষ্টাত ইণ্ডিয়ান ইনষ্টিটিউট অফ টেকন’লজী,গুৱাহাটী (আই আই টি জি )আৰু উত্তৰ পূব কৰ্কট চিকিৎসালয় আৰু গৱেষণা প্ৰতিষ্ঠানৰ মাজত এই চুক্তি সম্পন্ন হৈছে।

লক্ষণীয়ভাৱে দুয়োটা প্ৰতিষ্ঠানে কৰ্কট ৰোগ নিৰ্ণয়,চিকিৎসা আৰু পুনৰাবৃত্তিৰ বাবে উপন্যাস বায়োমাৰ্কাৰ চিনাক্ত কৰাৰ প্ৰচেষ্টাত নিয়োজিত হৈ আছে।ইয়াৰ উপৰিও তেওঁলোকে সমগ্র পূৰ্বৰ কৰ্কট ৰোগীসকলক সহায় কৰাৰ বাবে চিকিৎসা পদ্ধতি বিকশিত কৰাত ব্যস্ত আছে।