তথ্য আৰু জনসংযোগ বিভাগৰ গুৰুত্বপূৰ্ণ পদক্ষেপ

মুখ্যমন্ত্ৰী সৰ্বানন্দ সোনোৱালে আজি তথ্য আৰু জনসংযোগ সঞ্চালকালয়ৰ উদ্যোগত শ্ৰীমন্ত শংকৰদেৱ কলাক্ষেত্ৰত শ্ৰীশ্ৰী মাধৱদেৱ আন্তৰ্জাতিক পেক্ষাগৃহত আয়োজিত এক অনুষ্ঠানত ২০২০-২০২১ বৰ্ষৰ মিডিয়া ফেল’শ্বিপ সাংবাদিকৰ এককালীন অনুদান প্ৰদান কৰে।জনসংযোগ বিষয়াৰ নিযুক্তিপত্ৰ আৰু পাৰদৰ্শিতা প্ৰদৰ্শন কৰা বিভাগটোৰ জিলা আৰু মহকুমা পৰ্যায়ৰ কাৰ্যালয়ক পুৰস্কাৰ প্ৰদান কৰে।

এই উপলক্ষে আয়োজিত অনুষ্ঠানত ভাষণ প্ৰদান কৰি মুখ্যমন্ত্ৰীয়ে কয় যে সমাজত মৰ্য্যদা আৰু সন্মান সহকাৰে নিজৰ অৱস্থান শক্তিশালী ৰূপত তুলি ধৰিব লাগিলে চৰকাৰী বিষয়া কৰ্মচাৰী সকলে অধিক নিষ্ঠা আৰু দায়বদ্ধতাৰে কাম কৰিব লাগিব।চৰকাৰৰ জনকল্যাণ মূলক আঁচনিসমূহ জনসাধাৰণৰ মাজলৈ যোৱাৰ ক্ষেত্ৰত জনসংযোগ বিভাগৰ বিষয়া সকলৰ গধুৰ দায়িত্ব আছে বুলি উল্লেখ কৰি মুখ্যমন্ত্ৰীয়ে কয় যে বিভাগটোৰ বিষয়া সকলে জনসাধাৰণৰ আৱেগ অনুভূতি উপলব্ধি কৰাৰ লগতে তেওঁলোকৰ সুখ-দুখ,আশা-আকাংক্ষাৰ বুজ ল’ব লাগিব।

জনসাধাৰণৰ আৰ্থ-সামাজিক উত্তৰণৰ বাবে চৰকাৰে গ্ৰহণ কৰা পদক্ষেপ সমূহৰ ক্ষেত্ৰত জনসাধাৰণৰ মতামত গ্ৰহণ কৰিব লাগিব।ক্ষেত্ৰ পৰ্যায়ৰ জনসংযোগ বিষয়া সকলে নিজৰ জিলাখন তথা মহকুমা টোৰ ভূগোল,বুৰঞ্জী,পৰম্পৰা, লোক বিশ্বাস, সমাজ-ব্যৱস্থা ইত্যাদি বিষয় সমূহ ভালদৰে অধ্যয়ন কৰিব লাগিব বুলিও কয়।জনসংযোগ বিভাগটোক ৰাইজৰ আস্থা আৰু বিশ্বাসৰ বিভাগ হিচাপে গঢ়ি তোলাৰ স্বাৰ্থত ইয়াৰ প্ৰতিগৰাকী বিষয়া কৰ্মচাৰীকে দিনটো প্ৰতি মুহূৰ্ততে সক্ৰিয় হৈ থাকিবৰ বাবে মুখ্যমন্ত্ৰীয়ে আহ্বান জনায়।

মুখ্যমন্ত্ৰীয়ে জনসংযোগ বিভাগক ৰাজ্য চৰকাৰ আটাইতকৈ ফ’কাছৰ বিভাগ বুলি উল্লেখ কৰি বিভাগটোৱে ইয়াৰ প্ৰতিচ্ছবি আৰু অধিক উজ্জ্বল কৰাৰ দিশত বিষয়া কৰ্মচাৰী সকলক প্ৰয়াস চলাবলৈ আহ্বান জনায়।ভাষণ প্ৰসংগত মুখ্যমন্ত্ৰীয়ে কয় যে সাংবাদিক সকলক উৎসাহ উদ্দীপনা যোগাবলৈ ৰাজ্য চৰকাৰে বহু সংখ্যক কাৰ্যসূচী ৰূপায়ন কৰিছে।ৰাজ্য খনত কৰ্ম সংস্কৃতিৰ যাতে এক উপযুক্ত পৰিবেশ সৃষ্টি হয় সেই পৰিবেশ নিৰ্মানত সাংবাদিক সকলক দায়বদ্ধতাৰে পদক্ষেপ লবলৈ আহ্বান জনায়।আনহাতে অনুষ্ঠানত ভাষণ প্ৰদান কৰি মুখ্যমন্ত্ৰী মিডিয়া উপদেষ্টা হৃষীকেশ গোস্বামীয়ে কয় যে তথ্যই হৈছে শক্তি।জনসংযোগ স্থাপন কৰাই হৈছে আটাতকৈ ডাঙৰ কাম।জন অৰণ্যৰ মাজত সংযোগ স্থাপন কৰাৰ বাবে জনসংযোগৰ বিষয়া সকলে নিষ্ঠা আৰু সততাৰে কাম কৰিব লাগিব।সাংবাদিক সকলক ফেল’শ্বিপ প্ৰদানৰ বিষয়টো উল্লেখ কৰি তেওঁ কয় যে আমাৰ ঐতিহ্যৰ অজান দিশবোৰ পোহৰলৈ অনা লগতে একো একোটা নিৰ্দিষ্ট বিষয়ৰ পুংখানুপুংখ অধ্যয়নৰ বাবে এই ফেল’শ্বিপ প্ৰদানৰ ব্যৱস্থা কৰা হৈছে যাতে নতুন প্ৰজন্মই এই বিষয় সমূহৰ সন্দৰ্ভত উপযুক্ত জ্ঞান লাভ কৰিব পাৰে।

উক্ত অনুষ্ঠানত জনসংযোগ বিভাগৰ আয়ুক্ত সচিব প্ৰীতম শইকীয়া,বিভাগৰ সচিব নীৰা গগৈ সোনোৱাল,সঞ্চালক অনুপম চৌধুৰী,সাদিন কাকতৰ সঞ্চালক অনুৰাধা শৰ্মা পূজাৰী,পূৰ্বোদয় কাকতৰ সম্পাদক ৰবি শংকৰ ৰবি,আমাৰ অসম কাকতৰ উপ সম্পাদক গৌতম শৰ্মা,দৈনিক অসমৰ সহকাৰী সম্পাদক বিতোপন বৰবৰা,জ্যেষ্ঠ সাংবাদিক বৈকুণ্ঠ নাথ গোস্বামী,ৰাইজৰ বাতৰিৰ সম্পাদক ভূপেন্দ্ৰ নাথ ভট্টাচাৰ্য প্ৰমুখ্যে বিশিষ্ট সাংবাদিক আৰু অন্যান্য গণ্য মান্য ব্যক্তি সকল উপস্থিত থাকে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

শিৱসাগৰত উপস্থিত হ`ল নিৰ্বাচনী ব্যয় পৰ্যবেক্ষক

শিৱসাগৰ নিৰ্বাচনী জিলাৰ অধীনস্থ ১০৩ আমগুৰি, ১০৭ থাওৰা আৰু ১০৮ নং শিৱসাগৰ বিধানসভাৰ বাবে নিয়োজিত নিৰ্বাচন ব্যয় পৰ্যবেক্ষক ২০০৯ বর্ষৰ ভাৰতীয় ৰাজহ সেৱাৰ বিষয়া মেহফুজুৰ ৰহমান আজি শিৱসাগৰ জিলাত উপস্থিত হয়।

নিৰ্বাচন ব্যয় পৰ্যবেক্ষক গৰাকীয়ে জিলাখনত উপস্থিত হৈ জিলা নির্বাচন বিষয়া বিষ্ণু কমল বৰাকে প্ৰমুখ্য কৰি আগন্তুক বিধানসভা নিৰ্বাচনৰ কাম-কাজ সুচাৰুভাৱে সম্পন্ন কৰাৰ বাবে ইতিমধ্যে গঠন কৰা নির্বাচনী কোষ সমূহৰ বিষয়-ববীয়াৰ সৈতে এক বৈঠকত মিলিত হয়। তেওঁ বৈঠকত নিৰ্বাচনী কোষসমূহৰ কাম-কাজৰ বিষয়ে বুজ লোৱাৰ লগতে বিভিন্ন পৰামৰ্শ আগবঢ়ায়।

আগন্তুক বিধান সভা নিৰ্বাচন সন্দৰ্ভত নিৰ্বাচনী ব্যয় বা নিৰ্বাচনী আচৰণ বিধি সম্পৰ্কীয় কিবা ওজৰ-আপত্তি বা কিবা জানিবলৈ থাকিলে ৰাইজে নিৰ্বাচন ব্যয় পৰ্যবেক্ষক গৰাকীক আজিৰ পৰা ৪ মাৰ্চ তাৰিখলৈ স্থানীয় আৱৰ্ত ভৱনৰ ৪ নং কক্ষত দিনৰ ১০:০০ বজাৰ পৰা বিয়লি ৪:০০ বজাৰ ভিতৰত যোগাযোগ কৰিব পাৰিব। ইয়াৰ উপৰিও নিৰ্বাচন ব্যয় পৰ্যবেক্ষক গৰাকীক মোবাইল নম্বৰ ৯৩৯৪১২৫৮৯৮ -ত যোগাযোগ কৰিব পাৰিব। অধিক তথ্যৰ বাবে জিলা পৰ্যটক তথ্য বিষয়া তথা নিৰ্বাচন ব্যয় পৰ্যবেক্ষক গৰাকীৰ প্ৰট’কল বিষয়া মাধৱ দাসৰ লগত মোবাইল নম্বৰ ৮১৩৩০৮৯৯৯৩ -ত যোগাযোগ কৰিব পাৰিব।

শ্ৰমিকৰ সৈতে মত বিনিময় কৰিলে কংগ্ৰেছ নেত্ৰী প্ৰিয়ংকা গান্ধীয়ে

অসমলৈ আহিছে কংগ্ৰেছ নেত্ৰী প্ৰিয়ংকা গান্ধী। যোৱা নিশা বিশ্বনাথৰ পাৱাৰ গ্ৰীডৰ অতিথিশালাত কটোৱাৰ পিছত পুৱা বিশ্বনাথৰ প্ৰতাপগড় চাহ বাগিচাত বুঢ়া মাধব দেৱালয় দৰ্শন কৰে।তাৰ পিছতে তেওঁ মহিলা শ্ৰমিক সকলৰ লগত মত বিনিময় কৰি চাহ গছৰ পাত তোলে।উল্লেখযোগ্য যে তেখেতে অমৃত তচাৰ ঘৰত ৰঙা চাহৰ জুতি লয়।

সাংবাদিকৰ সৈতে হোৱা মুখা মুখি মন্তব্যত তেখেতে জানিব দিয়ে যে চাহ শ্ৰমিক সকলৰ মজুৰি যি হাৰত বৃদ্ধি পাব লাগিছিল সেয়া আখৰে আখৰে পালন হ’ব।গেছ চিলিণ্ডাৰৰ,পেট্ৰল,ডিজেল প্ৰতিটো অত্যাৱশ্যকীয় সামগ্ৰীৰ মূল্য বৃদ্ধি হৈছে।এতিয়া সময় আহি পৰিছে এনে এখন চৰকাৰ গঠন হওক,যি চৰকাৰে জনসাধাৰণৰ কথা শুনে ,বুজে আৰু সেই সমস্যাবোৰ সমাধান কৰাৰ চেষ্টা চলায়।উল্লেখযোগ্য যে নেত্রী গৰাকী শ্ৰমিক সকলৰ মাজত মত বিনিময় কৰা সময়ত বহুত উৎফুল্লিত হোৱা দেখা গৈছিল।

অসম বুক অৱ ৰেকৰ্ডচৰ কনিষ্ঠতম গল্প পুথি লিখোতা হিচাপে স্বীকৃতি লাভ কৰিলে ধৃতিদীপাই

ধেমাজিৰ মাটিখোলা গাঁৱৰ নিবাসী তথা সমাজ সেৱক নৱজ্যোতি দত্ত আৰু চিলাপথাৰ মহাবিদ্যালয়ৰ সহযোগী অধ্যাপক তুলতুল ফকনৰ কন্যা , ধেমাজি মাৰ্দাচ প্ৰাইদ স্কুলৰ পঞ্চম শ্ৰেনীৰ ছাত্ৰী, ধেমাজি অংকুৰ মইনা পাৰিজাতৰ মইনা ধৃতিদীপা দত্তই সদ্য প্ৰকাশিত স্ব-লিখিত গল্প সংকলন ‘গছ কটা মানুহজন” ৰ বাবে Assam Book of Recordsয়ে কনিষ্ঠ তম গল্প পুথি লিখোতা হিচাপে স্বীকৃতি লাভ কৰিছে।

কিশোৰী ধৃতিদীপা দত্তক অহা ১ মাৰ্চত গুৱাহাটীৰ বৰঝাৰস্থিত সূৰ্যলক্ষ্মী গ্যেষ্ট হাউচত বিভিন্ন ক্ষেত্ৰত দক্ষতা প্ৰদৰ্শন কৰা ৬ গৰাকী শিশু আৰু কিশোৰী সৈতে অসম বুক অৱ ৰেকৰ্ডচৰ তৰফৰ পৰা সম্বৰ্ধনা জনাব ৷ জানিব পৰা মতে ধৃতিদীপাই ৭ বছৰ বয়সৰ পৰাই লিখা কবিতা-গল্প আদি বিভিন্ন কাকত আলোচনীত প্ৰকাশ পাই আহিছে।

ইতিহাস প্ৰসিদ্ধ কাজলী চকীত গ্ৰাম্য পৰ্যটনৰ সভা অনুষ্ঠিত

এন ই ফ’কাচ ডট কমৰ উদ্যোগত ভাৰত পৰ্যটনৰ সহযোগত আজি চন্দ্ৰপুৰৰ সমীপৱৰ্তী কাজলী চকীত গ্ৰাম্য পৰ্যটন সম্পৰ্কীয় জনসজাগতামূলক সভা অনুষ্ঠিত হয়।

কাজলী চকী এম ই স্কুলৰ প্ৰাংগনত অনুষ্ঠিত হোৱা সভাত উপস্থিত থাকি লেখক,দৈনিক অসম কাকতৰ উপ সম্পাদক পুলিন কলিতাই গ্ৰাম্য পৰ্যটন প্ৰসাৰৰ বিভিন্ন দিশৰ সম্পৰ্কত বক্তব্য ৰাখে।এই অনুষ্ঠানত উপস্থিত থাকি পৰিৱেশ কৰ্মী মবিনা আখতাৰে থলুৱা খাদ্য,সাজপাৰ, সংস্কৃতিয়ে কিদৰে পৰ্যটকৰ আকৰ্ষণ কৰিব পাৰে সেই সম্পৰ্কে মন্তব্য কৰে।

উল্লেখ্য যে ইতিহাস প্ৰসিদ্ধ কাজলী চকীয়ে শৰাইঘাট যুদ্ধৰ স্বাক্ষৰ বহন কৰে।এতিয়া কাজলী চকী শৰাইঘাট যুদ্ধৰ গুলি বাৰুদ মজুত আছে।সভাত কাজলী চকী উন্নয়ন সমিতিৰ সমূহ বিষৰববীয়া উপস্থিত থাকে।অনুষ্ঠানৰ লগত সংগতি ৰাখি বিহু আধুনিক নৃত্য,নাগাৰা বিহু নামৰ এক সাংস্কৃতিক অনুষ্ঠান অনুষ্ঠিত হয়।

উল্লেখ্য যে ভাৰত পৰ্যটনে উত্তৰ পূবৰ বিভিন্ন ঠাইসমূহত এনেধৰণৰ কাৰ্যসূচী গ্ৰহণ কৰি আহিছে।আনহাতে এন ই ফ’কাচ ডট কমেও ২০১৬ চনৰ পৰা পৰ্যটনৰ বিভিন্ন ক্ষেত্ৰ সমূহ বিষয়ে পদক্ষেপ গ্ৰহণ কৰি আহিছে।অনুষ্ঠানত গ্ৰাম্য পৰ্যটনৰ প্ৰবক্তা সুৰভী নেওগ,লেখক পুলিন কলিতা, পৰিৱেশ কৰ্মী মবিনা আখতাৰ ,এন ই ফ’কাচ ডট কমৰ সম্পাদক সংগীতা শইকীয়া,চন্দন দুৱাৰা,ঘোষিকা দর্শনা বৰুৱাৰ লগতে কাজলী চকী উন্নয়ন সমিতিৰ বিষয় ববীয়া উপস্থিত থাকে।

বিধানসভা নিৰ্বাচনৰ প্ৰস্তুতিৰ সন্দৰ্ভত শিৱসাগৰত জিলা নিৰ্বাচনী বিষয়াৰ সংবাদমেল সম্বোধন

শিৱসাগৰ জিলাৰ উপায়ুক্ত তথা শিৱসাগৰ নিৰ্বাচনী জিলাৰ জিলা নিৰ্বাচন বিষয়া বিষ্ণু কমল বৰাই আজি নিৰ্বাচনী জিলাখনত আগন্তুক অসম বিধানসভা নিৰ্বাচনৰ প্ৰস্তুতি সন্দৰ্ভত এখন সংবাদমেল সম্বোধন কৰে।

উপায়ুক্ত কাৰ্য্যালয়ৰ চুকাফা সভাকক্ষত অনুষ্ঠিত এই সংবাদমেলত জিলা নিৰ্বাচন বিষয়া গৰাকীয়ে কয় যে, যোৱা ২৬ ফেব্ৰুৱাৰী তাৰিখে বিয়লি ৪:৩০ বজাত অনুষ্ঠিত এক সংবাদমেল ভাৰতৰ নিৰ্বাচন আয়োগে অসমৰ লগতে আন চাৰিখন ৰাজ্যত আগন্তুক বিধানসভা নিৰ্বাচনৰ দিন ঘোষণা কৰে। সেই অনুসৰি অসমত তিনিটা পৰ্য্যায়ত বিধানসভা নিৰ্বাচন অনুষ্ঠিত কৰা হ’ব বুলি উল্লেখ কৰি তেওঁ কয় যে, শিৱসাগৰ নিৰ্বাচনী জিলাত বিধানসভা নিৰ্বাচন প্ৰথম পৰ্য্যায়ত অনুষ্ঠিত হ’ব। তেওঁ লগতে উল্লেখ কৰে যে, নিৰ্বাচন আয়োগে প্ৰদান কৰা তালিকা অনুসৰি নিৰ্বাচনী জিলাখনৰ তিনিটা বিধানসভা সমষ্টিৰ বাবে অহা ২ মাৰ্চত অধিসূচনা জাৰি কৰা হ’ব, মনোনয়ন পত্ৰ দাখিল কৰাৰ অন্তিম দিন হ’ল ৯ মাৰ্চ, ১০ মাৰ্চত মনোনয়ন পত্ৰ সমূহ পৰীক্ষা কৰা হ’ব, মনোনয়ন পত্ৰ প্ৰত্যাহাৰৰ অন্তিম তাৰিখ হ’ল ১২ মাৰ্চ। শিৱসাগৰ নিৰ্বাচনী জিলাৰ বাবে অহা ২৭ মাৰ্চত ভোটগ্ৰহণ কৰা হ’ব বুলি অৱগত কৰাৰ লগতে তেওঁ কয় যে, অহা ২ মে’ত ভোটগণনা কৰা হ’ব।

জিলা নিৰ্বাচন বিষয়া গৰাকীয়ে উল্লেখ কৰে যে, যোৱা ২৬ ফেব্ৰুৱাৰী তাৰিখে বিয়লি ৪:৩০ বজাত অনুষ্ঠিত এক সংবাদমেলযোগে ভাৰতৰ নিৰ্বাচন আয়োগে নিৰ্বাচনৰ দিন ঘোষণা কৰাৰ পৰা তথা নিৰ্বাচন প্ৰক্ৰিয়া শেষ হোৱালৈ নিৰ্বাচনী আচৰণ বিধি বলবৎ থাকিব। তেওঁ লগতে নিৰ্বাচনী আচৰণ বিধি বলবৎ হোৱাৰ লগে লগে চৰকাৰী আঁচনি সম্পৰ্কীয় বা ৰাজনৈতিক বেনাৰ, পোষ্টাৰ, হোৰ্ডিং ইত্যাদি আঁতৰোৱাৰ ব্যৱস্থা কৰা হৈছে বুলি জনায়।

জিলা নিৰ্বাচন বিষয়া গৰাকীয়ে অৱগত কৰে যে, বৰ্তমানলৈকে নিৰ্বাচনী জিলাখনৰ মুঠ ভোটাৰৰ সংখ্যা হ’ল ৩,৯০,৩৩২ গৰাকী আৰু ইয়াৰে ১,৯৫,৪৫৬ গৰাকী পুৰুষ আৰু ১,৯৪,৮৭৩ গৰাকী মহিলা ভোটাৰ।

উল্লেখযোগ্য যে, ১০৩ নং আমগুৰি বিধানসভা সমষ্টিৰ অন্তৰ্গত মুঠ ভোটাৰৰ সংখ্যা হ’ল ১,২৩,৭৬৮ গৰাকী আৰু ইয়াৰে ৬১,৮৪৯ গৰাকী পুৰুষ, ৬১,৯১৭ গৰাকী মহিলা আৰু দুগৰাকী তৃতীয় লিংগৰ ভোটাৰ।

১০৭ নং থাওৰা বিধানসভা সমষ্টিৰ অন্তৰ্গত মুঠ ভোটাৰৰ সংখ্যা হ’ল ১,১৫,০৫২ গৰাকী আৰু ইয়াৰে ৫৮,২৩৪ গৰাকী পুৰুষ, ৫৬,৮১৭ গৰাকী মহিলা আৰু আৰু এগৰাকী তৃতীয় লিংগৰ ভোটাৰ।

১০৮ নং শিৱসাগৰ বিধানসভা সমষ্টিৰ অন্তৰ্গত মুঠ ভোটাৰৰ সংখ্যা হ’ল ১,৫১,৫১২ গৰাকী আৰু ইয়াৰে ৭৫,৩৭৩ গৰাকী পুৰুষ আৰু ৭৬,১৩৯ গৰাকী মহিলা ভোটাৰ।

জিলা নিৰ্বাচন বিষয়া গৰাকীয়ে উল্লেখ কৰে যে, ভাৰতৰ নিৰ্বাচন আয়োগৰ নিৰ্দেশনা মৰ্মে ৮০ বছৰ বয়সৰ উৰ্ধৰ আৰু দিব্যাঙ্গ ভোটাৰৰ বাবে পোষ্টেল বেলট যোগে ভোটদান কৰাৰ ব্যৱস্থা কৰা হৈছে বুলি উল্লেখ কৰি কয় যে, সেনাবাহিনীত কৰ্মৰত জিলাখনৰ ভোটাৰসকল (Service Voter) -ৰ বাবেও পোষ্টেল বেলট প্ৰেৰণ আৰু সংগ্ৰহ কৰাৰ ব্যৱস্থা কৰা হ’ব।

সংবাদমেল খনিত জিলা নিৰ্বাচন বিষয়া গৰাকীয়ে অৱগত কৰে যে, নিৰ্বাচনী জিলাখনৰ তিনিওটা বিধানসভা সমষ্টিত দুটাকৈ সম্পূৰ্ণ মহিলাৰ দ্বাৰা পৰিচালিত ভোটগ্ৰহণ কেন্দ্ৰ (All Women Polling Station) স্থাপন কৰা হৈছে আৰু মুঠ ৬ টা আদর্শ ভোটগ্ৰহণ কেন্দ্ৰ (Model Polling Station) স্থাপন কৰা হৈছে।

উল্লেখযোগ্য যে, আগন্তুক বিধানসভা নিৰ্বাচন ক’ভিড-১৯ সম্পৰ্কীয় সম্পূৰ্ণ নীতি নিৰ্দেশনা মানি সম্পন্ন কৰা হ’ব।
সংবাদমেল খনিত জিলা নিৰ্বাচন বিষয়া গৰাকীয়ে ভোটগ্ৰহণ কেন্দ্ৰত মজুত ৰখা মৌলিক প্ৰয়োজনীয় ব্যৱস্থা সমূহ যেনে, পানী, বিদ্যুৎ, ৰেম্প, হুইল চিয়াৰ, শৌচাগাৰ আদিৰ বিষয়ে সবিস্তাৰে জনায়।

তেওঁ উল্লেখ কৰে যে, শিৱসাগৰ নির্বাচনী জিলাত মুঠ ৫৭৪ টা ভোটগ্ৰহণ কেন্দ্ৰ স্থাপন কৰা হৈছে আৰু ইয়াৰে মূল ভোটগ্ৰহণ কেন্দ্ৰৰ সংখ্যা ৫১২ আৰু সহযোগী ভোটগ্ৰহণ কেন্দ্ৰ (Auxillary Polling Station) -ৰ সংখ্যা হ’ল ৬২ টা।

সংবাদমেল খনত অংশগ্ৰহণ কৰি আৰক্ষী অধীক্ষক অমিতাভ সিনহাই কয় যে, নিৰ্বাচনী জিলাখনৰ আইন- শৃংখলাৰ পৰিস্থিতি বৰ্তমানে শান্তিপূৰ্ণ তথা স্বাভাৱিক। আগন্তুক নিৰ্বাচনৰ বাবে আৰক্ষী বিভাগৰ তৰফৰ পৰা তিনি তৰপীয়া প্ৰস্তুতি গ্ৰহণ কৰা বুলি উল্লেখ কৰি তেওঁ কয় যে, আৰক্ষী জিলাৰ অধীনত ১১ টা মণ্ডল, ৭৬ টা ছেক্টৰ, ৭৮২ টা ভোটগ্ৰহণ কেন্দ্ৰ আৰু ৫১০ টা ভোটগ্ৰহণ ভৱন (polling building) চিনাক্ত কৰা হৈছে। তেওঁ লগতে উল্লেখ কৰে যে আগন্তুক বিধানসভা নিৰ্বাচন শান্তিপূৰ্ণ আৰু সুশৃংখলিত ভাৱে অনুষ্ঠিত কৰাৰ বাবে গ্ৰহণ কৰা ব্যৱস্থাৱলীৰ লগতে সীমান্তবৰ্তী ভোটগ্ৰহণ কেন্দ্ৰ সমূহতো যাতে শান্তিপূৰ্ণ নিৰ্বাচন সম্পন্ন কৰা হয়, তাৰ বাবে ইতিমধ্যে সীমান্তবৰ্তী নাগালেণ্ডৰ তিনিখন জিলাৰ উচ্চস্তৰীয় প্ৰশাসনিক আৰু আৰক্ষী বিষয়াৰ সৈতে যোৱা ৫ ফেব্ৰুৱাৰীত সৌহাৰ্দ্যপূৰ্ণ বৈঠক অনুষ্ঠিত হয়। এই বৈঠকত তিনিওখন জিলাৰ প্ৰতিনিধি সকলে এই ক্ষেত্ৰত সম্পূৰ্ণ সহযোগ আগবঢ়াব বুলি আশ্বাস প্ৰদান কৰে বুলিও তেওঁ উল্লেখ কৰে।

সংবাদমেল খনিত অংশগ্ৰহণ কৰি নিৰ্বাচন বিষয়া কোকিলা গগৈয়ে নিৰ্বাচন সম্পৰ্কীয় ওজৰ-আপত্তি ফোনযোগে দাখিল কৰিব পাৰিব বুলি উল্লেখ কৰে। এই ফোন নম্বৰ দুটা হ’ল: ০৩৭৭২-২২৩৩৯৭ আৰু ৮৪৭১৮-৬৪৩৫৫। তেওঁ লগতে ট্ৰল ফ্ৰী ভোটাৰ হেল্প লাইন নম্বৰ ১৯৫০ -ৰ বিষয়েও অৱগত কৰে।

বালিপৰা শাখা সাহিত্য সভাৰ নতুন সমিতি গঠন

শোণিতপুৰৰ বালিপৰাৰ স্থায়ী দুৰ্গা মন্দিৰৰ সভাগৃহত আজি অনুষ্ঠিত এক সভাত বালিপৰা শাখা সাহিত্য সভাৰ নতুন সমিতিখন গঠন কৰা হয় । শোণিতপুৰ জিলা সাহিত্য সভাৰ তত্বাৱধানত তথা সাহিত্যিক নকুল কুৰ্মীৰ সভাপতিত্বত অনুষ্ঠিত সভাখনত উদ্দেশ্যে ব্যাখ্যা কৰে সাহিত্য সভাৰ জিলা সম্পাদক দুলাল নাথে । উদ্দেশ্যে ব্যাখ্যা নাথে অসমৰ সাহিত্য-সমাজ ব্যৱস্থাত অসম সাহিত্য সভাৰ ভূমিকা, শাখা সাহিত্য সভাৰ দায়িত্ব আৰু কৰ্তব্য , সভাই সাহিত্যৰ বিকাশৰ হেতুকে গ্ৰহণ কৰা বিভিন্ন পদক্ষেপসমূহৰ বিষয়ে অবলোকন কৰে । জিলা কাৰ্যনিৰ্বাহক সদস্য ধ্ৰুৱজ্যোতি নাথে আঁত ধৰা অনুষ্ঠানটোত বিশিষ্ট অতিথি হিচাপে উপস্থিত থকা জিলা সমিতিৰ কোষাধ্যক্ষ কিৰণ চন্দ্ৰ বৰাই ভাষণ প্ৰসংগত কয় যে অসমৰ জাতীয় জীৱনত অসম সাহিত্য সভাৰ যুগান্তকাৰী ভূমিকা আছে । সাহিত্য সভাই জন্মলগ্নৰেপৰা সাহিত্য-সংস্কৃতিৰ বিকাশৰ বাবে অহোপুৰুষাৰ্থ কৰি আহিছে । ” সভাখনত সৰ্বসন্মতিমৰ্মে বালিপৰাৰ বিশিষ্ট সাহিত্যিক,শিক্ষক নকুল কুৰ্মীক সভাপতি, যুৱ লেখক প্ৰাঞ্জল প্ৰতিম বৰাক সাধাৰণ সম্পাদক , সাংবাদিক নিৰলা ডেকাক সহকাৰী সম্পাদিকা, উপসনা বৰাক পত্ৰিকা সম্পাদিকা হিচাপে লৈ এখন ১৫ জনীয়া বালিপৰা শাখা সাহিত্য সভাৰ শক্তিশালী নতুন সমিতি গঠন কৰা হয় । সভাখনত জিলা প্ৰচাৰ উপ-সমিতিৰ তথা সাংবাদিক দিলীপ সৰকাৰ, বালিপৰা ব্যৱসায়ী সন্থাৰ সভাপতি ভূপেন হাজৰিকা, সমাজকৰ্মী মৃণাল শইকীয়া, জিলা সাহিত্য সভাৰ সহকাৰী সম্পাদক কামিনী বৰুৱা, কাৰ্যনিৰ্বাহক সদস্য চাহিন আহমেদ , বালিপৰা শাখা সাহিত্য সভাৰ সদ্য প্ৰাক্তন সম্পাদক প্ৰভাত চন্দ্ৰ বৰা, অজিৎ কুমাৰ দে, জোনাৰাম শইকীয়াৰ লগতে ভালেমান বিশিষ্ট ব্যক্তি উপস্থিত থাকে।সভাৰ লগত সংগতি ৰাখি সংগীত পৰিৱেশন কৰে শিল্লী সন্ধ্যাশ্ৰী দাসে।