গুৱাহাটীৰ পৰা অৰুণাচল প্ৰদেশৰ তেজুলৈ পোনপটীয়া বিমান সেৱা আৰম্ভ

ভাৰত চৰকাৰে দেশৰ আন প্ৰান্তৰ দৰে অসমসহ উত্তৰ পূৰ্বাঞ্চলৰ ৰাজ্য সমূহৰ মাজত আঞ্চলিক যোগাযোগ আঁচনি চমুকৈ আৰ চি এছৰ অধীনত পোনপটীয়া যাত্ৰীবাহী বিমান সেৱা আৰম্ভ কৰিছে । ইয়াৰ অংশহিচাপে ফ্লাইবিগ নামৰ বিমান পৰিবহণ সংস্থাটোৱে আজিৰে পৰা গুৱাহাটীৰ বৰঝাৰস্থিত লোকপ্ৰিয় গোপীনাথ বৰদলৈ আন্তৰ্জাতিক বিমানবন্দৰৰ পৰা অৰুণাচল প্ৰদেশৰ লোহিত জিলাৰ তেজুলৈ পোনপটীয়া বিমান সেৱা আৰম্ভ কৰিছে । অৰুণাচল প্ৰদেশৰ ৰাজধানী ইটানগৰৰ পৰা ভি ডি অ কনফাৰেনসিং ব্যৱস্থাৰে তেজু বিমান বন্দৰত ফ্লাইবিগ নামৰ বিমান সেৱা প্ৰতিষ্ঠানটোৰ অধীনত চলাচল আৰম্ভ হোৱা গুৱাহাটী – তেজু – গুৱাহাটী বিমান সেৱা শুভাৰম্ভ কৰে ৰাজ্যখনৰ মুখ্যমন্ত্ৰী পেমা খান্দুৱে । আনহাতে এই উপলক্ষে তেজু বিমান বন্দৰত আয়োজিত চমু অনুষ্ঠানত অৰুণাচল প্ৰদেশ চৰকাৰৰ বিমান পৰিবহণ আৰু পৰ্যটন মন্ত্রী নাকাপ নালো , ৰাজ্যখনৰ লোকসভাৰ সাংসদ এছ তাপীৰকে ধৰি লোহিত জিলা প্রশাসনৰ কেবাজনো উচ্চপদস্থ বিষয়া , ভাৰতীয় বিমান বন্দৰ প্ৰাধিকৰণৰ বৰঝাৰস্থিত উত্তৰ পূব মণ্ডলৰ ক্ষেত্ৰীয় কাৰ্যবাহী সঞ্চালক ৰবি কান্তকে ধৰি প্ৰাধিকৰণৰ কেবাজনো বিষয়া উপস্থিত থাকে । আনহাতে এই সন্দৰ্ভত ৰবি কান্তে জানিবলৈ দিয়া মতে প্ৰথম পৰ্যায়ত ১৯ আগষ্টৰ পৰা ৩০ অক্টোবৰলৈ প্ৰতি সপ্তাহত চাৰিদিনকৈ গুৱাহাটীৰ পৰা তেজুলৈ আৰু তেজুৰ পৰা গুৱাহাটীলৈ পোনপটীয়াকৈ বিমান চলাচল কৰিব । সেই অনুসৰি সপ্তাহৰ মঙলবাৰ , বৃহস্পতিবাৰ , শনিবাৰ আৰু দেওবাৰে “এ টি আৰ – ৭২ শ্ৰেণীৰ ৭২ আসনযুক্ত বিমানখন বৰঝাৰ বিমান বন্দৰৰ পৰা পুৱা ৮.২৫ বজাত যাত্ৰা আৰম্ভ কৰিব আৰু ১ ঘন্টা ১০ মিনিট উৰণৰ অন্তত ৯.৩৫ বজাত গৈ তেজু বিমান বন্দৰত অৱতৰণ কৰিব । তেনেদৰে পুনৰ বিমানখন পুৱা ৯.৫৫ বজাত তেজু বিমান বন্দৰৰ পৰা যাত্ৰা আৰম্ভ কৰিব আৰু এঘন্টা ২০ মিনিট উৰণৰ অন্তত ১১.১৫ বজাত আহি বৰঝাৰ বিমান বন্দৰ পাব । ইতিমধ্যে আজি যাত্ৰাৰ প্ৰথম দিনটোতে যাত্ৰীৰ ইতিবাচক সঁহাৰি পোৱা গৈছে । ভাৰতীয় বিমান বন্দৰ প্ৰাধিকৰণৰ অধীনত অৰুণাচল প্ৰদেশৰ একমাত্ৰ কাৰ্যক্ষম হৈ থকা তেজু বিমানলৈ বিমান চলাচল আৰম্ভ হোৱাৰ পাছত লোহিত জিলাকে ধৰি পৰ্যটনৰ আকৰ্ষণীয় থলী হিচাপে পৰিচিত বৃহত্তৰ অঞ্চলটোত ইতিবাচক প্ৰভাৱ পৰিব বুলি ৰবি কান্তে আশা প্ৰকাশ কৰিছে । উল্লেখযোগ্য যে হিন্দু ধৰ্মাৱলম্বী লোক সকলৰ অন্যতম তীৰ্থস্থান স্বৰূপ পৰশুৰাম কুণ্ডলৈ যোৱা তীৰ্থযাত্ৰী সকল তেজুলৈ পোনপটীয়া বিমান চলাচল আৰম্ভ হোৱাৰ পাছত বাৰুকৈয়ে উপকৃত হব । কিয়নো তেজুৰ পৰা পৰশুৰাম কুণ্ডলৈ পথৰে গলে সৰ্বাধিক ডেৰ ঘণ্টা লাগে । আনকি তেজুলৈ বিমান চলাচল আৰম্ভ হোৱাৰ পাছত এতিয়া ভাৰত – চীন আৰু ভাৰত – ম্যানমাৰ সীমান্তৱৰ্তী অঞ্চললৈ গুৱাহাটীকে ধৰি দেশৰ আন প্ৰান্তৰ পৰা যাতায়ত ব্যৱস্থা অতি সুচল হৈ পৰিব । ইতিমধ্যে ভাৰত চৰকাৰৰ প্ৰতিৰক্ষা মন্ত্ৰণালয়ৰ সীমান্ত পথ সংগঠনৰ ( Border Roads Organization ) তিনিচুকীয়াৰ ডুমডুমাস্থিত “উদয়ক প্ৰকল্প”ৰ অধীনত ধলা – শদিয়া সংযোগী ডঃ ভূপেন হাজৰিকা সেঁতুৰ পৰা ৰয়িং , তেজু , মায়োডিয়া , পৰশুৰাম কুণ্ডহৈ চীন আৰু ম্যানমাৰ সংযোগী পথ সমূহ দুই লেনযুক্তকৈ নিৰ্মাণ কৰিছে ।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

মণিপুৰী আইৰন মেনে ছ’চিয়েল মিডিয়াত সৃষ্টি কৰিছে খলকনিৰ

পেলনীয়া সামগ্ৰীৰে হলিউডৰ ছুপাৰ হিৰ’ আইৰন মেন তৈয়াৰ কৰি মণিপুৰৰ এগৰাকী যুৱকে সামাজিক মাধ্যমত খলকনিৰ সৃষ্টি কৰিবলৈ সক্ষম হৈছে।মণিপুৰৰ থৌবাল জিলাৰ ২১ বছৰীয়া নিংগোমবাম প্ৰেম নামৰ যুৱকজনে কাৰ্ডব’ৰ্ড আৰু পেলনীয়া ইলেক্ট্ৰনিক সামগ্ৰীৰে ঘৰতে এটা আইৰন মেনৰ ৰবট সাঁজি সামাজিক মাধ্যমত চৰ্চিত হৈ পৰিছে।ইউটিউবৰ জৰিয়তে তেওঁ শ্বেয়াৰ কৰা ভিডিঅ’ই ব্যাপক সমাদৰ লাভ কৰিছে।তেওঁৰ ভিডিঅ’টো Brut নামৰ সংবাদ গোষ্ঠীটোৱে শ্বেয়াৰ কৰাৰ লগতে উদ্যোগপতি আনন্দ মহিন্দ্ৰাই টুইটাৰত শ্বেয়াৰ কৰে। ইয়াৰ পিছতে ভিডিঅ’টোৱে ব্যাপক জনপ্ৰিয়তা লাভ কৰে।আনন্দ মহিন্দ্ৰাই টুইটাৰ যোগে যুৱকজনক শিক্ষাগ্ৰহণৰ ক্ষেত্ৰত সহায় কৰিবলৈ আগ্ৰহ প্ৰকাশ কৰিছে।আজৰি সময়ত নিজৰ মাক দেউতাকক পথৰ কাষত দিয়া খাদ্যৰ দোকানত সহায় কৰি দিয়া এই তৰুণ যুৱকজনে বৰ্তমান ইম্ফল আৰ্ট কলেজত চাৰুকলাৰ অধ্যয়ন কৰি আছে।

কেন্দ্ৰীয় মন্ত্ৰী সৰ্বানন্দ সোণোৱালে ভাৰ্চুৱেলী আইজলত অনুষ্ঠিত বাণিজ্য উৎসৱত অংশগ্ৰহণ কৰে

কেন্দ্ৰীয় বন্দৰ ,জাহাজ পৰিবহন আৰু জলপথ আৰু কেন্দ্ৰীয় আয়ুষ মন্ত্ৰী সৰ্বানন্দ সোণোৱালে ভিডিঅ’ কনফাৰেন্সৰ জৰিয়তে মিজোৰামৰ আইজলত অনুষ্ঠিত বাণিজ্য উৎসৱ,ভাৰতক উদীয়মান অৰ্থনৈতিক শক্তি হিচাপে প্ৰদৰ্শন অনুষ্ঠানত অংশগ্ৰহণ কৰে।ভাৰতৰ স্বাধীনতা ৭৫ বছৰ উদযাপনৰ সৈতে সংগতি ৰাখি আজাদী কা অমৃত মহোৎসৱ উদযাপনৰ অংশ হিচাপে এই বাণিজ্য উৎসৱ অনুষ্ঠিত কৰা হৈছে।কেন্দ্ৰীয় মন্ত্ৰী গৰাকীয়ে উদ্বোধনী অনুষ্ঠানত সম্বোধন কৰি সীমান্ত ৰাজ্য খনৰ অপৰিসীম অৰ্থনৈতিক সম্ভাৱনাৰ ওপৰত আলোকপাত কৰে।কেন্দ্ৰীয় মন্ত্ৰীগৰাকীয়ে কয় যে মিজোৰামৰ বিশাল প্ৰাকৃতিক সম্পদ, মনোৰম সৌন্দৰ্য আৰু কৌশলগত অৱস্থানে বিকাশৰ গতিক ত্বৰাম্বিত কৰাৰ থল আছে আৰু প্ৰধানমন্ত্ৰী নৰেন্দ্ৰ মোদী বলিষ্ঠ নেতৃত্বত ৰাজ্য খনে নিশ্চিতভাৱে প্ৰগতি আৰু পৰিবৰ্তনৰ নতুন শিখৰত উপনীত হ’ব।বাণিজ্য উৎসৱ এই উদ্বোধনী অনুষ্ঠানত মিজোৰামৰ উদ্যোগ আৰু বাণিজ্য মন্ত্ৰী ড° আৰ লালথানগ্লিয়ানা,ভাৰত চৰকাৰৰ বাণিজ্য বিভাগৰ প্ৰতিনিধি আৰু মিজোৰামৰ জ্যেষ্ঠ চৰকাৰী বিষয়া সকল উপস্থিত আছিল।

টীয়কত সামাজিক সংস্থা একাঁজলি সহায়ৰ মানৱ দৰদী কাৰ্যসূচী

এজন অসমীয়া যুৱক।নাম তেওঁৰ দিগন্ত বৰা।টীয়কৰ কাকজান কমাৰ খাতোৱাল গাঁৱৰ এই যুৱকজন ছেগ্ৰিকালচাৰ ফাৰ্মত চিকিউৰিটি গাৰ্ডৰ চাকৰিত নিয়োজিত আছিল।কিন্তু বিধিৰ লিখন খণ্ডাব কোনে ? বাক্যশাৰী যেন সঁচা প্ৰমাণিত হ’ল দিগন্ত বৰাৰ ক্ষেত্ৰত।১০ বছৰমানৰ আগতে দুৰ্ঘটনাত আঘাতপ্ৰাপ্ত হোৱাৰ ফলত তেওঁৰ এটা ভৰি প্ৰায় বিকল হোৱাৰ দৰে হ’ল। যুৱকজনৰ জীৱিকাৰ প্ৰধান সম্বল হিচাপে থকা চাকৰিটোও হেৰুৱাব লগা হয়। অনাকাংক্ষিত ঘটনাটোৰ বাবে দিগন্ত বৰাৰ আশাবোৰ যেন ধূলিস্যাৎ হৈ গ’ল। কিন্তু দিগন্ত বৰা ভাগৰি নপৰি জীৱন-জীৱিকাৰ তাড়নাত সংগ্ৰাম কৰিবলৈ আৰম্ভ কৰিলে।তেতিয়াৰে পৰা যুৱকজনে যোৱা দহ বছৰ ধৰি নাপিতৰ কাম কৰি স্বাৱলম্বী হোৱাৰ প্ৰচেষ্টা অব্যাহত ৰাখিছে।

তেওঁ নিজৰ লগতে নিজৰ ঘৰখনৰো ভৰণ-পোষণৰ দায়িত্ব হাতত লৈছে। সোমবাৰে সামাজিক সংস্থা ‘একাঁজলি সহায়ে’ দিগন্ত বৰাক অনুপ্ৰেৰণা যোগোৱাৰ উদ্দশ্যে এটা অত্যাধুনিক চুলি কটাৰ মেচিন প্ৰদান কৰে।দিগন্ত বৰাই নাপিতৰ কাম কৰি আত্মনিৰ্ভৰশীল হোৱাৰ যি স্বপ্ন দেখিছে তেওঁৰ এই যাত্ৰা সঁচাকৈ প্ৰশংসনীয়।দিগন্ত বৰাৰ দৰে অসমৰ যুৱসমাজ আগবাঢ়ি আহিলেহে অসমত কৰ্ম-আন্দোলন গঢ় লৈ উঠিব।নতুন অসমৰ স্বপ্নটোৱেও তেতিয়াহে সাকাৰ ৰূপ পাব।কৰ্মৰ জড়িয়তে তেওঁ নিজৰ সপোন পূৰণ কৰিবলৈ যত্ন কৰিছে।এতিয়া কেৱল তেওঁক প্ৰয়োজন আপোনাৰ-মোৰ অলপমান আশীৰ্বাদ আৰু আৰ্থিক সহায়ৰ।দিগন্ত বৰালৈ থাকিল আমাৰ অলেখ অযুত শুভকামনা ।

আজি মনোনয়ন পত্ৰ দাখিল কৰিলে সর্বানন্দ সোণোৱালে

প্রাক্তন মুখ্যমন্ত্রী তথা বর্তমানৰ কেন্দ্রীয় মন্ত্রী সর্বানন্দ সোণোৱালে আজি ৰাজ্যসভা নির্বাচনৰ বাবে মনোনয়ন–পত্র দাখিল কৰে৷ অসম বিধানসভাৰ সচিব ৰাজ্যসভা নির্বাচনৰ ৰিটানিং বিষয়াৰ ওচৰত মনোনয়ন দাখিলৰ সময়ত সোণোৱালৰ সৈতে মুখ্যমন্ত্রী ড০ হিমন্ত বিশ্ব শর্মা, বিজেপিৰ ৰাজ্যিক সভাপতি ভৱেশ কলিতা, অগপৰ সভাপতি অতুল বৰা, ইউ পি পি এলৰ সভাপতি প্রমোদ বড়োৰ লগতে বিজেপি মিত্রজোঁটৰ নেতৃবৃন্দ উপস্থিত থাকে৷উল্লেখ্য যে অহা ৪ অক্টোবৰত অসমৰ এখন আসনৰ বাবে হ’বলগীয়া ৰাজ্যসভাৰ নির্বাচনত বিজেপিয়ে সোণোৱালক প্রার্থিত্ব দিছে৷ বিৰোধী দল কংগ্রেছে এখন আসনৰ বাবে হ’বলগীয়া এই নির্বাচনত তেওঁলোক জয়ী হোৱাৰ কোনো সম্ভাৱনা নাই আৰু প্রতিদ্বন্দ্বিতা কৰাৰ পৰা বিৰত থকাৰ সিদ্ধান্ত লৈছে৷ ইয়াৰ ফলত সোণোৱাল বিনাপ্রতিদ্বন্দ্বিতাৰে নির্বাচিত হোৱাটো নিশ্চিত হৈছে৷

বিশিষ্ট চাহ উদ্যোগপতি কমল জালান নৰ্থ ইষ্টাৰ্ণ টি এচ’চিয়েছনৰ অধ্যক্ষ নিৰ্বাচিত

বিশিষ্ট চাহ উদ্যোগপতি তথা সমাজকৰ্মী কমল জালান নৰ্থ ইষ্টাৰ্ণ টি এচ’চিয়েছন চমুকৈ নেটাৰ ২০২১ – ২৩ বৰ্ষৰ কাৰ্যকালৰ অধ্যক্ষ হিচাপে নিৰ্বাচিত হৈছে। আজি নৰ্থ ইষ্টাৰ্ণ টি এচ’চিয়েছনৰ গোলাঘাটস্থিত মুখ্য কাৰ্যালয়ত অনুষ্ঠিত হোৱা এক সভাৰ অন্তত কমল জালানক অধ্যক্ষ আৰু অজয় ধান্দাৰিয়াক উপাধ্যক্ষ হিচাপে নিৰ্বাচিত কৰা হয়। উল্লেখ্য যে যোৰহাটস্থিত চাহ উদ্যোগপতি কমল জালান শ্যাম টি প্ৰডাক্টছ,শ্যাম উদ্যোগ আৰু গড়াজান চাহ বাগিচাৰ অন্যতম সহযোগী। চাহ উদ্যোগৰ সৈতে জড়িত হোৱাৰ উপৰিও কমল জালান বিভিন্ন সামাজিক অনুষ্ঠান প্ৰতিষ্ঠানৰ সৈতে জড়িত আৰু তেখেতে বহু সংখ্যক বিনামূলীয়া চেনিটেৰী পেড বিতৰণ কৰাৰ বাবে তেখেতক অসমৰ পেডমেন বুলিও কোৱা হয়।তেখেতে মঘাই ওজা আৰু হীৰেণ ভট্টাচাৰ্যৰ প্ৰতিমূৰ্ত্তি দান কৰি নিজৰ সাংস্কৃতিক মনৰ পৰিচয় দাঙি ধৰিবলৈ সক্ষম হৈছে আৰু ভৱিষ্যতে তেখেতে কলাগুৰু বিষ্ণু প্ৰসাদ ৰাভা আৰু মণিৰাম দেৱানৰ প্ৰতিমূৰ্ত্তি স্থাপন কৰাৰ চিন্তা কৰিছে। আনহাতে আজিৰ সভাত নেটাৰ উপাধ্যক্ষ হিচাপে নিৰ্বাচিত হোৱা অজয় ধান্দাৰিয়া গোলাঘাটৰ বাসিন্দা আৰু কাৰ্বি আংলং স্থিত পৰমেশ্বৰী চাহ কোম্পানীৰ স্বত্বাধিকাৰী। অধ্যক্ষ কমল জালানৰ দৰে উপাধ্যক্ষ অজয় ধান্দাৰিয়াও বিভিন্ন সামাজিক কামকাজৰ সৈতে জড়িত। স্মৰ্তব্য যে ১৯৮১ চনতে চাহ উৎপাদনকাৰী সকলৰ এক সংস্থা হিচাপে জন্ম লাভ কৰা নৰ্থ ইষ্টাৰ্ণ টি এচ’চিয়েছন চমুকৈ নেটাৰ সম্প্ৰতি পৰিসৰ বৃদ্ধি পাই অসম, অৰুণাচল প্ৰদেশ আৰু নাগালেণ্ডৰ মুঠ ১৬৩ চাহ বাগিচা আৰু বটলীফ ফেক্টৰী সদস্য হিচাপে আছে আৰু সকলোৰে মিলি বাৰ্ষিক ১০২ মিলিয়ন কিল’গ্ৰাম চাহ উৎপাদন হয়।

নলবাৰীত মুছলমান মহিলাৰ সৱলীকৰণ সভা অনুষ্ঠিত

খিলঞ্জীয়া মুছলমান সকলৰ আৰ্থিক সামাজিক উন্নয়নৰ বাবে ৰাজ্য চৰকাৰে বিশেষ পদক্ষেপ গ্ৰহণ কৰিছে ৷ মুখ্যমন্ত্ৰীৰ আহ্বান মৰ্মে যোৱা চাৰি জুলাইত অসমৰ খিলঞ্জীয়া মুছলমান সকলৰ সৈতে আলোচনাত মিলিত হৈছিল৷ সেই আলোচনাৰ অন্তত খিলঞ্জীয়া মুছলমান সকলৰ আৰ্থ সামাজিক উন্নয়নৰ বাবে সাতখন উপ সমিতি গঠন কৰি তিনি মাহৰ ভিতৰত তেওঁলোকক প্ৰতিবেদন দাখিলৰ নিৰ্দেশ দিছিল৷

সেই সাত সমিতিৰ ভিতৰৰে মহিলা সৱলীকৰণ সমিতিখনৰ এটা প্ৰতিনিধি দলে সোমাবাৰে নলবাৰীত উপস্থিত হৈ জিলাখনৰ খিলঞ্জীয়া মুছলমানৰ বিভিন্ন সমস্যা সন্দৰ্ভত বিস্তৃতভাবে আলোচনা কৰা হয়৷

জানিব পৰা মতে মহিলা সৱলীকৰণ সমিতিৰ অধ্যক্ষা ডঃ নাজবানা আহমেদ, সদস্যা ডাঃ জিছান আহমেদ,সদস্য সচিব ফৰিদা চামচুল আদি উপস্থিত হৈ জিলাখনৰ বিশেষকৈ মহিলা সৱলীকৰণ সন্দৰ্ভত আলোচনা কৰে৷ যুৱ সমাজকৰ্মী তথা সদৌ অসম পৌৰ নিকায় কৰ্মচাৰী সন্থাৰ সাধাৰণ সম্পাদক গিয়াছ আলীয়ে সম্বৰ্ধনা অনুষ্ঠানটো পৰিচালনা কৰাৰ লগতে বিষয় সন্দৰ্ভত বক্তব্য প্ৰদান কৰে৷আলোচনা কালত নলবাৰীৰ উপায়ুক্ত গীতিমণি ফুকন, অতিৰিক্ত উপায়ুক্ত ফিৰদোছ আলম, অতিৰিক্ত উপায়ুক্ত চয়ানিকা ঠাকুৰীয়া,অংশুলিশা দত্ত পাঠক আদি উপস্থিত থাকে৷