আজি দিনৰ ১ বজাত দিছপুৰ প্ৰেছ ক্লাৱৰ প্ৰেক্ষাগৃহত অনুষ্ঠিত হোৱা এখন গ্ৰন্থ উন্মোচনী সভাত কবি জানু নাথে জীৱনৰ বৰ্ণিল অনুভৱ-অভিজ্ঞতাৰ ভিত্তিত লিখা “নতুন পৰিচয়” শীৰ্ষক কাব্য সংকলনখন স্বনামধন্য লেখিকা, ঔপন্যাসিক,গল্পকাৰ জীমণি চৌধুৰীয়ে আনুষ্ঠানিকভাৱে শুভ উন্মোচন কৰে৷ উক্ত সভাত বিশিষ্ট অতিথি হিচাপে অসমৰ এগৰাকী জ্যেষ্ঠ সাংবাদিক,চিত্ৰ সমালোচক,লেখক,শিল্পী বিদ্যুৎ কুমাৰ ভূঞা,অসমীয়া খবৰ কাকতৰ জ্যেষ্ঠ সাংবাদিক,লেখক,কবি, অভিনেতা দিগন্ত কুমাৰ নাথ,কবি কমলজিৎ কলিতা উপস্থিত থকাৰ লগতে থকাৰ লগতে সন্মানীয় অতিথি হিচাপে “প্ৰিয় সখী” আলোচনীৰ কাৰ্যবাহী সম্পাদক গুঞ্জন ফুকন ,সমাজকৰ্মী,প্ৰযোজক ভৃগু কুমাৰ দত্ত উপস্থিত থাকে৷”নতুন পৰিচয়” কাব্যগ্ৰন্থখন প্ৰকাশ কৰিছে ৰেবকান্ত নাথে৷
সাংবাদিক,লেখিকা দৰ্শনা বৰুৱাই আঁত ধৰা তথা ভিন্ন ক্ষেত্ৰৰ কেইবাগৰাকীও গণ্য -মান্য ব্যক্তি উপস্থিত থকা গ্ৰন্থ উন্মোচনী অনুষ্ঠানটিত লেখিকা জানু নাথে নিজৰ মনৰ অনুভৱ ব্যক্ত কৰি কয় যে জীৱনৰ বাটত যুঁজি যুঁজি ভাগৰি পৰাৰ সময়তে মনৰ কিছু অনুভৱ কবিতাৰ ৰূপত প্ৰকাশ কৰি তেখেতে জীৱনটোক ইতিবাচক দৃষ্টিৰে চাবলৈ প্ৰয়াস কৰিছে৷উল্লেখ্য যে ২৭ টাকৈ কবিতা সন্নিৱিষ্ট কাব্য সংকলনখনৰ পাতনি লিখিছে অসম লেখিকা সংস্থাৰ প্ৰাক্তন সভানেত্ৰী যোগমায়া গগৈয়ে৷সভাখনত উপস্থিত থকা বিশিষ্ট ব্যক্তিসকলে তেখেতসকলৰ বক্তব্যত কবি জানু নাথৰ কাব্য চৰ্চাৰ প্ৰশংসা কৰাৰ লগতে সাম্প্ৰতিক সমাজ সাহিত্যৰ কিছুমান দিশৰ ক্ষেত্ৰতো আলোকপাত কৰে৷

নেতাজীৰ কিছু অপ্ৰকাশ্য কথাৰে…
দেশৰ স্বতন্ত্ৰ সেনানীৰ তালিকাত শীৰ্ষত থকা অন্যতম বীৰ যোদ্ধা হ’ল সুভাষ চন্দ্ৰ বসু। তেখেতে ১৮৯৭ চনৰ ২৩ জানুৱাৰীত উৰিষ্যাৰ কটকত জন্ম গ্ৰহণ কৰিছিল।সুভাষ চন্দ্ৰ বসু আছিল একেধাৰে বীৰ যোদ্ধা , সৈনিক আৰু দক্ষ ৰাজনীতিবিদ। তেতিয়াৰে দিনতে দেশৰ লগতে বিদেশতো তেখেতে বেচ সমাদৰ লাভ কৰিছিল।
আজাদ হিন্দ ফৌজ গঠন কৰি দেশবাসীক দেশৰ স্বাধীনতা বাবে উদ্বুদ্ধ কৰি তুলিছিল। সুভাষ চন্দ্ৰ বসুয়ে দেশবাসীক উদ্দেশ্যে কৈছিল মনত ৰাখিব সকলোতকৈ ডাঙৰ অপৰাধ হ’ল অন্যায় সহা আৰু ভুল বুলি জানিও সহমত প্ৰদান কৰা।
সৰুৱে পৰা নেতাজী আছিল অত্যন্ত মেধাসম্পন্ন। এবাৰ কলেজত এগৰাকী ইংৰাজ অধ্যাপকে ভাৰতীয় বিষয়ে আপত্তিজনক মন্তব্য কৰিছিল। তেতিয়া নেতাজীয়ে সেই মন্তব্যক বিৰোধিতা কৰাৰ বাবে শাস্তি ভুগিব লগা হৈছিল।নেতাজীয়ে মহামানৱক জাতিৰ পিতা বুলি সম্বোধন কৰিছিল।যদিও মহামানৱ মহাত্মা গান্ধী দৰ্শনৰ লগত সুভাষ চন্দ্ৰ বসুৰ দৰ্শন অমিল আছিল তথাপিও দুগৰাকীয়ে দেশৰ স্বাধীনতা আন্দোলনৰ বাবে আহোপুৰুষাৰ্থ কৰিছিল।ইংৰাজৰ দিনতে ভাৰতীয় প্ৰশাসনীয় সেৱাত উত্তীৰ্ণ হৈও এজন সমাজসেৱক অথবা ৰাজনীতিবিদৰ হিচাপেহে দেশৰ সেৱা আগবঢ়াইছিল।
তেখেতে কৈছিল কাম কৰি যোৱা ফলাফল দাতাই দিব।এইগৰাকী বীৰক সন্মান জনাই তেখেতৰ জন্মদিনটোৰ পৰাক্ৰম দিৱস হিচাপে পালন কৰা হয়।নেতাজীৰ মৃত্যু আজিও ৰহস্য হৈয়ে থাকিল। প্ৰাপ্ত তথ্য অনুসৰি ১৯৪৫ চনৰ ১৮ আগষ্টত এক প্লেন দুৰ্ঘটনাত মৃত্যু হয়।নেতাজী জীৱিত থকা হ’লে ভাৰতীয় ৰাজনীতিয়ে অন্য মাত্ৰা লাভ কৰিলে হেতেন!এইগৰাকী মহান মনিষীৰ শুভ জন্মদিনত শ্ৰদ্ধাৰে সুঁৱৰিছো।
ভিউৱাছৰ মতামত