ধেমাজি জিলাৰ  ডি এছ পি ডঃ ৰশ্মি ৰেখা শৰ্মালৈ কেন্দ্ৰীয় গৃহ মন্ত্ৰণালয়ৰ বঁটা

অসম আৰক্ষী সেৱাৰ ২০১৩ বৰ্ষৰ  সুদক্ষ  আৰক্ষী বিষয়া  সম্প্ৰতি ধেমাজি জিলাৰ  উপ আৰক্ষী অধীক্ষক (মুখ্য কাৰ্যালয়) হিচাপে কৰ্মৰত ডঃ ৰশ্মি ৰেখা শৰ্মাই নিজৰ কৰ্মদক্ষতা আৰু  কৰ্মপটুতাৰ বাবে কেন্দ্ৰীয় চৰকাৰৰ গৃহ মন্ত্ৰণালয়ৰ দ্বাৰা উচ্চ প্ৰসংশিত হোৱাৰ লগতে  “এক্সিলেন্স ইন ইনভেষ্টিগেছন “বঁটা ২০২১  লাভ কৰিবলৈ সক্ষম হৈছে।  অসম আৰক্ষীৰ এই গৰাকী নিষ্ঠৱান  সুদক্ষ  বিষয়াই শোণিতপুৰ জিলা আৰক্ষী বিভাগত  উপ আৰক্ষী অধীক্ষক হিচাবে কৰ্মৰত অৱস্থাত  জিলাখনত সংঘটিত হৈছিল এক লোমহৰ্ষক হত্যাকাণ্ড। জিলাখনত সদৰ থানাৰ অন্তৰ্গত  কছাৰী গাঁওৰ  এংল’ ইণ্ডিয়ান বৃদ্ধ দম্পত্তিক  নিজা গৃহত অতি নৃশংস ভাবে হত্যা কৰিছিল অজ্ঞাত ঘাটকে।  মহিলা বৃদ্ধা গৰাকীৰ ডিঙি পৰ্যন্ত কাটি  দ্বৈত হত্যাকাণ্ড কৰা বৰ্বৰ ঘটনা সন্দৰ্ভত  তেজপুৰ সদৰ  থানাত পঞ্জীভূত এটা  গোচৰৰ ভিত্তিত ক্ষীপ্ৰতাৰে তদন্ত চলাইছিল তেতিয়া জিলাখনত কৰ্মৰত  উপ আৰক্ষী অধীক্ষক (মুখ্য কাৰ্যালয়) ডঃ শৰ্মাই। ২০২০ বৰ্ষত সংঘটিত এই লোমহৰ্ষক হত্যাকাণ্ড সন্দৰ্ভত নিখুঁত আৰু তাৎক্ষণিক তদন্ত চলাই এই বৰ্বৰ হত্যাকাণ্ডৰ সতে জড়িত দুটা হত্যাকাৰীক গ্ৰেপ্তাৰ কৰিবলৈ সক্ষম হৈছিল। 
শোণিতপুৰ জিলা আৰক্ষী বিভাগটোত কৰ্মৰত অৱস্থাত প্ৰদৰ্শন কৰা  উক্ত গোচৰৰ তদন্তৰ উৎকৃষ্ট পাৰদৰ্শিতাৰ বাবেই  কেন্দ্ৰীয় গৃহ মন্ত্ৰণালয়ে  বৰ্তমান ধেমাজি জিলাৰ উপ- আৰক্ষী অধীক্ষক (মুখ্য কাৰ্যালয়)  হিচাপে কৰ্মৰত ড° ৰশ্মিৰেখা শৰ্মাক ২০২১ বৰ্ষৰ এক্সচিলেঞ্জ ইন ইনভেষ্টিগেশ্বন (Excellence in Investigation ) বঁটাৰ বাবে নিৰ্বাচিত কৰিছে ।  যোৱা বৃহস্পতিবাৰে কেন্দ্ৰীয় গৃহ মন্ত্ৰণালয়ে এই সন্দৰ্ভত অৱগত কৰিছে ডঃ শৰ্মাক।  অসম আৰক্ষীৰ এগৰাকী সুদক্ষ তদন্তকাৰী বিষয়া হিচাপে  কেন্দ্ৰীয় গৃহ বিভাগে প্ৰদান কৰা বিৰল স্বীকৃতিয়ে  উৎসাহিত কৰি তুলিছে ডঃ শৰ্মাৰ লগতে  শৰ্মাৰ আত্মীয় স্বজনক। উল্লেখ্য যে ডঃ ৰশ্মি ৰেখা শৰ্মাই ২০১০ চনত পোন প্ৰথম বাৰৰ বাবে অসম লোক সেৱা আয়োগৰ পৰীক্ষাত উত্তীৰ্ণ হৈ আৱকাৰী বিভাগৰ উচ্চ পদত নিযুক্তি লাভ কৰিছিল ৷ বাস্তৱিকতে অসম আৰক্ষীৰ এগৰাকী নিষ্ঠাবান বিষয়া হোৱাৰ প্ৰচণ্ড হেঁপাহ মনত পুহি ৰখা ডঃ শৰ্মাই  দ্বিতীয় বাৰৰ বাবে ২০১৩ চনত অসম লোকসেৱা আয়োগৰ পৰীক্ষাত অবত্তীৰ্ণ হৈ  ইস্পিত উপ আৰক্ষী অধীক্ষক পদত  নিযুক্তি পাবলৈ সক্ষম হয় ন। ডঃ শৰ্মাই পৰৱৰ্তী সময়ত দৰং জিলাৰ উপ আৰক্ষী অধীক্ষক হিচাপে কৰ্ম জীৱনৰ পাতনি মেলি   ২০১৫ চনত মাকুমস্থিত  দ্বিতীয় অসম আৰক্ষী বেটেলিয়ানৰ সহকাৰী অধিনায়ক হিচাপে,  ২০১৬ চনত উত্তৰ লখিমপুৰ জিলা উপ আৰক্ষী অধীক্ষক ( মুখ্য কাৰ্যালয়)  হিচাপে ,  ২০১৯ চনত শোণিতপুৰ জিলাৰ উপ আৰক্ষী অধীক্ষক (মুখ্য কাৰ্যালয়) হিচাপে আৰু ২০২১ চনৰ ৬ জুনত ধেমাজি জিলাত উপ আৰক্ষী অধীক্ষক( মুখ্য কাৰ্যালয়) হিচাপে যোগদান কৰি জন দায়বদ্ধ সেৱা আগবঢ়াই আহিছে।
গহপুৰ মহকুমাৰ  ধেনুধৰা গাঁৱৰ প্ৰবীণ শিক্ষাবিদ   দম্পত্তি  ফনীন্দ্ৰ শৰ্মা আৰু   বীনা দেৱী শৰ্মাৰ জ্যেষ্ঠ কন্যা  ডঃ ৰশ্মি ৰেখা শৰ্মাৰ স্বামী ৰাজীৱ শৰ্মা ওদালগুৰি জিলাৰ এগৰাকী সুপৰিচিত ,দক্ষ জ্যেষ্ঠ অধিবক্তা ।  বৈবাহিক সূত্ৰে ওদালগুৰি জিলাৰ বাসিন্দা  আৰক্ষী বিষয়া ডঃ শৰ্মাই লাভ কৰা এনে  কেন্দ্ৰীয় পৰ্যায়ৰ স্বীকৃতিয়ে ডঃ শৰ্মাৰ জন্মভূমি গহপুৰৰ লগতে ওদালগুৰি জিলাৰ আত্মীয় স্বজন আৰু শুভাকাংক্ষী সকলকো আনন্দিত কৰি তুলিছে।  সদা হাস্যমুখী , কৰ্মতৎপৰ ,সৎ  আৰু নিষ্ঠাবান  আৰক্ষী বিষয়া ডঃ শৰ্মালৈ এন ই ফ`কাচৰ তৰফৰ পৰাও জনালো  অলেখ শুভ কামনা।
বাতৰি যুগুতালে ঢকুৱাখনাৰ পৰা অমৃত পৱন বৰাই।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

ডঃ ৰঞ্জন কুমাৰ কাকতিক অসম চৰকাৰৰ সম্বৰ্ধনা

ৰাষ্ট্ৰীয় এনএছএছ বঁটা বিজয়ী গুৱাহাটী বিশ্ববিদ্যালয়ৰ ছাত্ৰ কল্যান সঞ্চালক তথা ৰাষ্ট্ৰীয় সেৱা আঁচনিৰ কাৰ্য্যসূচী সমন্বয়ক ডঃ ৰঞ্জন কুমাৰ কাকতিক অসম চৰকাৰৰ ফালৰ পৰা সম্বৰ্ধনা জনোৱা হয় । ক্রীড়া আৰু যুব কল্যাণ আৰু শক্তি তথা পৰ্যটন বিভাগৰ মন্ত্ৰী বিমল বৰাই ৰুদ্ৰ সিংহ স্পোর্ট কমপ্লেক্স, নেহেৰু ষ্টেডিয়ামত ১২ জানুৱাৰীত এক গাম্ভীৰ্যপূৰ্ণ অনুষ্ঠানত তেওঁক সম্বৰ্ধনা জনায়। উল্লেখযোগ্য যে ডঃ কাকতিয়ে ভাৰতৰ মাননীয় ৰাষ্ট্রপতি ৰাম নাথ কোবিন্দৰ পৰা ২৪ ছেপ্টেম্বৰ ২০২১ত এন এছ এছ ৰাষ্ট্ৰীয় বঁটা গ্ৰহণ কৰে যিয়ে সমগ্র উত্তৰ-পূৱ আৰু অসমৰ এই মর্যাদাপূর্ণ পুৰষ্কাৰ প্রাপ্ত প্রথম ব্যক্তি। সম্বৰ্ধনা অনুষ্ঠানত অসম চৰকাৰৰ অতিৰিক্ত মুখ্য সচিব মনিন্দৰ সিং আই এ এছ ,সদস্য সচিব, ৰাজ্য স্তৰৰ যুৱ কল্যাণ কমিটিৰ উপদেষ্টা পবিত্ৰ মাৰ্ঘেৰিটা, অসম ক্ৰীড়া কৰ্তৃপক্ষৰ উপ সভাপতি লক্ষ্য কোঁৱৰ , ক্ৰীড়া আৰু যুৱ কল্যাণ বিভাগৰ সঞ্চালক নিবেদন দাস পাটোৱাৰী আৰু অলিম্পিক ব্রঞ্জ পদক বিজয়ী খেলৰত্ন পুৰস্কাৰপ্রাপ্ত লাভলীনা বৰগোঁহাই ,সাহিত্য একাডেমি যুৱ পুৰস্কাৰ প্ৰাপ্ত দ্বিজেন চন্দ্ৰ দাস আৰু বহুতো গণ্য মান্য ব্যক্তি এই অনুষ্ঠানত উপস্থিত আছিল।

ৰাণীত বিশেষ গাঁওসভাত ৰমেন্দ্ৰ নাৰায়ণ কলিতা-কৃষিৰেহে অৰ্থনৈতিক উন্নতি সম্ভৱ

অসমৰ দৰে ৰাজ্যৰ অৰ্থনৈতিক উন্নয়নৰ বাবে কৃষি ক্ষেত্ৰৰ যথাযথ উন্নয়ন হ’ব লাগিব। কৃষি আৰু কৃষকৰ উন্নয়ন হোৱাৰ লগে লগে ৰাজ্যখনৰ অৰ্থনৈতিক উন্নয়নত যথেষ্ট অৰিহণা যোগাব বুলি মন্তব্য কৰি বিধায়ক কলিতাই সংশ্লিষ্ট সকলো পক্ষকে দায়িত্ব পালন কৰিবলৈ আহ্বান জনায়।
আজি ৰাণী উন্নয়ন খণ্ড এলেকাৰ ৰাণী গাঁও পঞ্চায়তৰ সভাগৃহত অনুস্থিত শস্য ক্ৰয় আৰু কৃষক পঞ্জীয়ন প্ৰক্ৰিয়া সচেতনতাৰ সন্দৰ্ভত আয়োজিত বিশেষ গাঁও সভাত অংশগ্ৰহণ কৰি বিধায়ক কলিতাই ৭০ শতাংশই কৃষিজীৱী লোক থকা অসমৰ দৰে ৰাজ্যত কৃষকে প্ৰকৃত মূল্যৰ পৰা বঞ্চিত হৈ থকাৰ কথা উল্লেখ কৰি এতিয়াৰ পৰা মধ্যভোগীৰ হাতোৰাৰ পৰা মুক্ত হৈ কৃষকে ফচলৰ উচিত মূল্য পোৱাৰ বাট সুচল হ’ব বুলি কয়। তেওঁ ভাষণ প্ৰসংগত কৃষি প্ৰধান ৰাণী অঞ্চলত অচিৰেই এটি শস্য মজুত ভঁৰাল স্থাপনৰ ক্ষেত্ৰত মুখ্য মন্ত্ৰীৰ লগত ভাৰ্চুৱেল আলোচনা কৰাৰ কথাও উল্লেখ কৰে। সভাত ৰাণী উন্নয়ন খণ্ড বিষয়া লালৰেমছিয়ামী গামলাই, ৰাণী আঞ্চলিক পঞ্চায়ত সভাপতি পৰমেশ্বৰ বৰ্মণ, ৰাণীৰ কৃষি বিষয়া বৰ্ণালী মেধী, পঞ্চায়ত আৰু গ্ৰামোন্নয়নৰ নিৰীক্ষণ আৰু তদাৰকী সমিতিৰ সদস্য সুভাষ শৰ্মায়ো অংশগ্ৰহণ কৰে। বিধায়ক গৰাকীয়ে কাঁহিকুছি গাঁও পঞ্চায়ততো এনে এক বিশেষ গাঁও সভাত অংশগ্ৰহণ কৰে। উক্ত সভাত আজাৰা ৰাজহ চক্ৰ বিষয়া প্ৰিয়াংসু ভৰদ্বাজ, কাঁহিকুছি গাঁও পঞ্চায়তৰ সভাপতি জগন্নাথ ঠাকুৰীয়াকে আদিকৰি কেবাগৰাকী বিশিষ্ট লোক উপস্থিত থাকে।
বাতৰি যুগুতালে জিতুমণি দাসে

দিকৰাই চাহ বাগিচাত টুচু উৎসৱ উদযাপন

ভোগালী বিহুৰ উৎসাহ উদ্দীপনাৰ মাজতে চাহ জনগোষ্ঠীৰ অন্যতম কৃষি ভিত্তি উৎসৱ টুচু দুদিনীয়া কাৰ্যসূচীৰে পালন হয়। প্ৰতি বছৰৰ দৰে এইবাৰো ভোগালী বিহুৰ লগতে চাহ জনগোষ্ঠীৰ টুচু উৎসৱ দিকৰাই বাগিছাত অনুষ্ঠিত হৈ যায় । এই পবিত্ৰ উৎসৱৰ বহু পৰম্পৰাৰ আছে!কৃষিজীৱি চাহ শ্ৰমিক ৰাইজে বছৰটোৰ বাবে আৰ্জিত ধান-মাহ আঘোন মাহত চপাই , পুহ মাহটো মহিলা সকলে নিজৰ আৰাধ্য দেৱতাক উপাসনা কৰি মাঘ মাহত পুনৰ উদ্যমেৰে নিজৰ কৰ্মজীৱন আৰম্ভ কৰাৰ লগতে চাহ জনগোষ্ঠীৰ নাৰী কেন্দ্ৰিক এক পৰম্পৰাগত উৎসৱ হিচাপেও টুচু উৎসৱ পালন কৰা হয় । গাঁওখনৰ যুৱক-যুৱতীয়ে ৰাইজৰ সহযোগত আটক ধূনীয়াকৈ সজাই তোলা মণ্ডপত ‘টুচু’ দেবীক গধুলি বেলাতে প্ৰতিষ্ঠা কৰে আৰু ওৰে নিশা টুচুক কেন্দ্ৰ কৰি ৰচিত বিভিন্ন গীত-মাতেৰে মুখৰিত কৰে। পিচদিনা অৰ্থাৎ টুচু পুজাৰ অন্তিম দিনা গাৱৰ ৰাইজ একেলগে নাচ গান কৰি বিয়লি টুচু দেৱীক নৈত বিসৰ্জন দিয়া হয় । বাগিচাখত আয়োজিত ‘টুচু পুজাৰ লগত সংগতি ৰাখি আদৰণি সমিতিয়ে অঞ্চলৰ বিশিষ্ট লোকক সম্বৰ্দ্ধনা জনোৱা হয়। উক্ত সম্বৰ্দ্ধনা অনুষ্ঠানত নদুৱাৰ শাখা আটছাৰ ভাৰ প্ৰাপ্ত সভাপতি ৰাধেশ্যাম তাঁ‌তি,বিশ্বনাথ জিলা আটছাৰ শিক্ষাও সাহিত্য সম্পাদক অবিনাশ ৰাজৱাৰ আৰু চতিয়া আঞ্চলিক পঞ্চায়ত সভাপতি লক্ষীকান্ত বৰা, উত্তৰ নদুৱাৰ উড়িয়া যুৱ পৰিষদৰ সম্পাদক আনন্দ তচা, উত্তৰ নাগশংকৰ গাঁও পঞ্চায়ত সভানেত্ৰী দীপা তাঁ‌তী,দক্ষিণ মূঢ়াদল গাওঁ পঞ্চায়ত সভানেত্ৰী পাৰ্ৱতী শৰ্মা,বিশিষ্ট সাংবাদিক দূৰ্গা পৌড়েলসহ বহু কেইগৰাকী বিশিষ্ট ব্যক্তি উপস্থিত থাকে।
বাতৰি যুগুতালে জামুগুৰিহাটৰ পৰা ৰাতুল হাজৰিকাই

হৰিনামৰ ধ্বনিৰে মুখৰিত বিধৌত শ্ৰী শ্ৰী বাসুদেৱ থান নৰোৱা সত্ৰ

উত্তৰ অসমৰ অন্যতম প্ৰধান বৈষ্ণৱ পীঠ ঢকুৱাখনা মহকুমাৰ  মৰনৈ অঞ্চলৰ শ্ৰী শ্ৰী বাসুদেৱ থান নৰোৱা সত্ৰৰ বাৰ্ষিক মহা পালনাম দেওবাৰৰ  পৰা কোভিড নীতি নিৰ্দেশনা মানি দুদিনীয়া কাৰ্যসূচীৰে আৰম্ভ হৈছে। ৰাজ্যখনৰ ভিন্ন প্ৰান্তৰৰ ভক্ত বৈষ্ণৱৰ উপস্থিতিত শ্ৰী শ্ৰী বাসুদেৱ থান নৰোৱা সত্ৰ প্ৰাংগণত বিগত  ৬৫ বছৰীয়া পৰম্পৰা অব্যাহত ৰাখি উদযাপন কৰি অহা  এই পালনাম , দেওবাৰে পুৱা শুভাৰম্ভনি অনুষ্ঠান আৰম্ভ হয়  বৈষ্ণৱ বীৰেন্দ্ৰ দেৱ গোস্বামী আৰু অতুল দেৱ গোস্বামীৰ প্ৰাতঃ প্ৰসংগৰে । সত্ৰ পৰিয়ালৰ উপস্থিতিত ইয়াৰ পাছতে  ধৰ্মপ্ৰাণ আই মাতৃ ৰেণু গোস্বামী আৰু মনোৰমা গোস্বামীৰ নেতৃত্বত আই মাতৃ সকলৰ আই নাম প্ৰসংগৰে সত্ৰৰ বৰ নামঘৰৰ মজিয়া বিধৌত হৈ পৰে। দুপৰীয়া সত্ৰাধিকাৰ ভূপেন্দ্ৰ দেৱ গোস্বামীয়ে শুভাৰম্ভ কৰা সমূহীয়া নাম প্ৰসংগ আৰু পালনামৰ নামাচাৰ্য হিচাবে নগাঁও বালি সত্ৰৰ সত্ৰীয়া ৰাজু দেৱ গোস্বামী , দোহাচাৰ্য হিচাবে কলিয়াবৰ চামগুৰি সত্ৰৰ  ডেকা সত্ৰীয়া কমল গোস্বামী  আৰু পাঠাচাৰ্য হিচাপে নগাঁও আইভেটিৰ বুবুল মহন্ত  , মাজুলীৰ প্ৰাচীন চামগুৰি সত্ৰৰ ভৰত মহন্তই অংশগ্ৰহণ কৰে।  ঐতিহাসিক সত্ৰখনৰ এই মহা পালনাম উপলক্ষে সমাগম হোৱা সমীপৱৰ্তী  গৰিষ্ঠ সংখ্যক ভক্ত বৈষ্ণৱৰ হৰি নামৰ ধ্বনিত মুখৰিত সত্ৰ প্ৰাঙ্গনত সন্ধিয়ালৈ বন্তি প্ৰজ্বলন কৰি অৱধাৰিত ভাবে অখণ্ড পালনাম অব্যাহত ৰখা হয়। সোমবাৰে বিয়লি এই মহা পালনামৰ পৰিসমাপ্তি ঘটিব।
বাতৰি যুগুতালে অমৃত পৱন বৰাই।

বায়ু সেনাৰ ফ্লায়িং অফিচাৰ পদত যোগদান কৰিলে এন চি চি ইউনিটৰ এইজন কেডেটে

ৰাষ্ট্রীয় শিক্ষাৰ্থী বাহিনীৰ বায়ু শাখাৰ গুৱাহাটী বিশ্ববিদ্যালয়স্থিত ৫০ আসাম এয়াৰ স্কোৱাদ্ৰোণ এন চি চি ইউনিটৰ কেডেট আৰু কটন বিশ্ববিদ্যালয়ৰ পৰা বিগত বৰ্ষত ভূগোল বিজ্ঞান বিষয়ত মেজৰসহ সুখ্যাতিৰে স্নাতক ডিগ্ৰী উত্তীৰ্ণ হোৱা ছাত্ৰ নেপো মৈৰাংথেম ছাৰ্ভিছ ছিলেকচন বৰ্ডৰ দ্বাৰা আয়োজিত পৰীক্ষাত উত্তীৰ্ণ হৈ যোৱা ছেপ্টেম্বৰ মাহতে ভাৰতীয় বায়ু সেনাৰ সন্মানীয় ফ্লায়িং অফিচাৰ পদৰ বাবে নিৰ্বাচিত হৈছিল। তাৰ প্ৰায় চাৰিমাহ পাছত আজি তেওঁ ভাৰতীয় বায়ু সেনাৰ চেকেন্দ্ৰাবাদৰ দুন্দীগালত থকা ইণ্ডিয়ান এয়াৰ ফৰ্চ একাডেমীত ফ্লায়িং অফিচাৰ পদত যোগদান কৰে। আনহাতে তেওঁ ফ্লায়িং অফিচাৰ পদত যোগদান কৰি ইউনিটলৈ গৌৰৱ কঢ়িয়াই অনা বাবে কমাণ্ডিং অফিচাৰ গ্রুপ কেপ্তেইন ৰবীন বিষ্ণয়কে ধৰি ইউনিটৰ সকলোৱে নেপোক শুভেচ্ছা জ্ঞাপন কৰিছে। উল্লেখযোগ্য যে বৰ্তমান গুৱাহাটীৰ উজানবজাৰ নিবাসী নেপোৰ প্ৰকৃত ঘৰ হল মণিপুৰৰ পূব ইম্ফল জিলাৰ এখন ভিতৰুৱা অঞ্চলত। মণিপুৰ সৈনিক স্কুলৰ পৰা দ্বাদশ শ্ৰেণী উত্তীৰ্ণ হোৱাৰ পাছত তেওঁ ২০১৮ চনত কটন বিশ্ববিদ্যালয়ত স্নাতক পাঠ্যক্ৰমত নাম ভৰ্ত্তি কৰাৰ সমান্তৰালভাৱে ৫০ আসাম এয়াৰ স্কোৱাদ্ৰোণ এন চি চি ইউনিটত কেডেট হিচাপে নাম ভৰ্ত্তি কৰিছিল। ইয়াৰ মাজতে তেওঁ সৰ্বভাৰতীয় বায়ু সৈনিক শিবিৰত উত্তৰ পূব মণ্ডলক প্ৰতিনিধিত্ব কৰি শ্ৰেষ্ঠ এৰোমডেলাৰৰ সন্মান আৰু বায়ু সেনাৰ শ্বিলংস্থিত ইষ্টাৰ্ণ কমাণ্ডৰ উদ্যোগত এ এল জিত আয়োজিত এয়াৰ ফেষ্টিফেলত এৰো মডেলিঙত ভাগ লৈ ইউনিটলৈ গৌৰৱ কঢ়িয়াই আনিছিল। মণিপুৰৰ এখন চৰকাৰী চিকিৎসালয়ৰ চতুৰ্থ শ্ৰেণীৰ কৰ্মচাৰী এম নৰিন্দৰ সিং আৰু এম ইন্দুবালা সিঙৰ পুত্ৰ নেপোৱে সন্মানীয় ফ্লায়িং অফিচাৰ পদৰ বাবে নিৰ্বাচিত হৈ বাহিনীটোলৈ গৌৰৱ কঢ়িয়াই অনা বাবে এন চি চিৰ উত্তৰ পূব মণ্ডলৰ অতিৰিক্ত সঞ্চালক প্ৰধান মেজৰ জেনেৰেল ভাস্কৰ কলিতা আৰু গুৱাহাটী গ্রুপৰ গ্রুপ কমাণ্ডাৰ ব্ৰিগেদিয়াৰ যোগেশ চন্দ্ৰ তালুকদাৰে তেওঁক শুভেচ্ছা জ্ঞাপন কৰি তেওঁৰ উজ্জ্বল ভৱিষ্যত কামনা কৰিছে।

তুলসীবাৰী শংকৰদেৱ শিশু নিকেতনৰ ৰূপালী জয়ন্তী মহোৎসৱৰ শুভাৰম্ভনী অনুষ্ঠান সম্পন্ন

ভোগালী বিহুৰ আনন্দ উলাহৰ মাজতে  তুলসীবাৰীত আজি জাক জমকতাৰে অনুষ্ঠিত কৰা হয় ৰূপালী জয়ন্তী মহোৎসৱৰ শুভাৰম্ভণী অনুষ্ঠান।  দিনযোৰাকৈ আয়োজন কৰা শুভাৰম্ভ অনুষ্ঠানৰ কাৰ্যসূচীৰ অংশ হিচাপে পুৱা বন্তি প্ৰজ্বলন,পতাকা উত্তোলন, ৰাজহুৱা শ্ৰদ্ধাঞ্জলিৰ লগতে গছপুলি ৰোপণ কৰা হয় ।ইয়াৰ পাছতে উদযাপন সমিতিৰ সভাপতি অচ্যুত কেওটৰ সঞ্চালনাত অনুষ্ঠিত কৰা মুকলি সভাত বিজেপি দলৰ ৰাজ্যিক সভাপতি তথা স্থানীয় বিধায়ক ভবেশ কলিতা উপস্থিত থাকি শুভেচ্ছামূলক ভাষণ ৰাখে ।ভাষণ প্ৰসংগত কলিতাই কয় যে যি সকল শিক্ষানুৰাগী লোকৰ প্ৰচেষ্টাত এই মহান অনুষ্ঠানটি গঢ় লৈ উঠিছিল আজি তেখেত সকলৰ প্ৰয়াস পূৰ্ণতা পালে।ভূমি ,আৰ্থিক অনুদান তথা নিকেতনত ছাত্র-ছাত্ৰী সকলক জ্ঞান অৰ্জনৰ বাবে প্ৰেৰণ কৰা।অভিভাৱক সকলকো শ্ৰদ্ধা নিবেদন কৰে কলিতাই।আনহাতে উক্ত সভাতে ৰাষ্ট্ৰীয় স্বয়ং সেৱক সংঘৰ সহক্ষেত্ৰ কাৰ্যবাহক বশিষ্ঠ বুজৰবৰুৱাই অংশগ্ৰহণ কৰি ছাত্র-ছাত্ৰী সকলক উদ্দেশ্যি বক্তব্য ৰাখে । ভাষণ প্ৰসংগত বুজবৰুৱাই দেশমাতৃৰ প্ৰতি শ্ৰদ্ধাশীল হবলৈ আহ্বান জনায় ।আনহাতে স্বদেশ -স্বজাতিৰ ভাষা-সংস্কৃতিৰ প্ৰতি দায়বদ্ধ থাকিবলৈও ছাত্র-ছাত্ৰী সকলক ভাষণ প্ৰসংগত আহ্বান জনায় ।নিকেতনৰ প্ৰধান আচাৰ্য সোমদত্ত কলিতাই আঁত ধৰা সভাখনত অঞ্চলটোৰ কেবাগৰাকী শিক্ষানুৰাগী তথা সমাজ-সাহিত্য-সংবাদ সেৱাৰ লগত জড়িত ব্যাক্তিক সম্বৰ্দ্ধনা  জ্ঞাপন কৰা হয় ।পৰৱৰ্তী কাৰ্যসূচী হিচাবে বিয়লি প্ৰাক্তন ছাত্ৰ-ছাত্ৰীৰ প্ৰীতি সন্মিলন তথা সন্ধিয়া বন্তি প্ৰজ্বলন কাৰ্যসূচী ৰূপায়ণ কৰা হয় । ভোগালী বিহুৰ শুভক্ষণত গৰিমা বিজড়িত নিকেতনখনৰ ৰূপালী জয়ন্তী প্ৰস্তুতি বৰ্ষৰ প্ৰাৰম্ভিক কাৰ্যসূচীয়ে স্বাভাৱিকতে বিদ্যালয়খনৰ ছাত্ৰ-ছাত্ৰীৰ লগতে শিক্ষানুৰাগী ৰাইজক উৎফুল্লিত কৰি তোলা পৰিলক্ষিত হয়।

বাতৰি যুগুতালে ৰঙিয়াৰ পৰা দীনেশ আগৰৱালাই