নাৰী দিৱসৰ প্ৰাকক্ষণত চৰ্চালৈ আহিছে এগৰাকী বিশেষ নাৰীৰ প্ৰচেষ্টা-গাঁৱৰ মহিলাক স্বাৱলম্বী কৰি তুলিছে

এগৰাকী যুৱতীৰ প্ৰচেষ্টাই উজ্বলাইছে এখন গাঁৱৰ মহিলাৰ জীৱন। বয়ন শিল্পৰ যোগেদি দৰিদ্ৰ পৰিয়ালৰ মহিলাক স্বাৱলম্বীতাৰ ন বাট দেখুৱাবলৈ সক্ষম হৈছে মৰিয়নীৰ নকছাৰী চিনাতলী গাঁৱৰ বাসিন্দা তথা প্ৰাক্তন শিক্ষক খগেন চন্দ সন্দিকৈ আৰু বন্তি সন্দিকৈৰ জীয়ৰী বৰ্ণালী সন্দিকৈয়ে। এই যুৱতী গৰাকীৰ এক প্ৰচেষ্টাই মৰিয়নী সমষ্টিৰ নকছাৰী ভেলউগুৰি অফলামুখ গাঁওৰ দৰিদ্ৰ পৰিয়ালৰ মহিলা সকলৰ জীৱনলৈ কঢ়িয়াইছে নতুন পোহৰৰ ৰেঙনি। গাঁওখনত বৰ্তমান বয়ন শিল্পৰ এক নৱ বিপ্লৱৰ সূচনা হৈছে বুলি ক’ব পাৰি। গাঁও খনৰ শিপিনী সকলৰ দ্ধাৰা উৎপাদিত গামোচা, ৰুমাল, চেলেং , চাদৰ, মেখেলাকে ধৰি বিভিন্ন বস্ত্ৰ এতিয়া উপলব্ধ হৈছে গুৱাহাটী, মঙ্গলদৈ, ডিব্ৰুগড়কে ধৰি অসমৰ কেইবাখনো জিলাৰ বজাৰত। পূৰ্বে গাঁওখনৰ শিপিনীসকলে উৎপাদিত বস্ত্ৰ বিক্ৰীৰ বাবে এখন বজাৰ নোপোৱা বাবে হতাশ হৈ অহাৰ সময়তে গাঁৱৰ শিপিনী সকলৰ মাজত বৰ্ণালীয়ে পোহৰ ফাউণ্ডেচনৰ যোগেদি নতুন আশাৰ সঞ্চাৰ কৰিবলৈ সক্ষম হৈছে। এতিয়া গাঁওখনৰ শিপিনী সকলে উৎপাদিত বস্ত্ৰৰ উচিত মূল্য লাভ কৰা লগতে দৰিদ্ৰতাই পিষ্ট কৰা পৰিয়াল সমুহে আৰ্থিক সকাহ লাভ কৰিবলৈ সক্ষম হৈছে। “বৰ্ণালী বাইদেউৰ বাবে আমি গাঁওখনৰ মহিলা সকলে এক নতুন সপোন দেখিছো। আমি আৰ্থিক সকাহ লাভ কৰিছো। আমি লৰা ছোৱালী স্কুলত পঢ়াব আৰু  টিউচন দিব পাৰিছো” এনেদৰে এই প্ৰতিবেদকৰ আগত ব্যক্ত কৰে গাঁও খনৰ জোনমনি দাস নামৰ বিধৱা মহিলা গৰাকীয়ে। গাঁওখনৰ আন এগৰাকী মহিলা মনু দাসে কয় ” আগতে আমি বোৱা কাপোৰ বোৰ বাকচত ভৰাই থও। কিনা মানুহ নাই। কিনিলেও উচিত মূল্য নাপাও। এতিয়া আমি পোহৰ ফাউণ্ডেচৰ যোগেদি উচিত মূল্য পাইছো। বৰ্ণালী বাইদেউ থাকিলে আমি বহুত আগুৱাই যাৱ পাৰিম” । পোহৰ ফাউণ্ডেচনৰ যোগেদি গাঁওখনৰ মহিলা শিপিনী সকলক বিনামূলীয়াকৈ সূতাৰ যোগান ধৰা লগতে বিভিন্ন পৰামৰ্শ আৰু প্ৰশিক্ষণৰ  ব্যৱস্থা গ্ৰহণ কৰিছে। আনহাতে গাঁওখনৰ মহিলা সকলৰ দ্ধাৰা উৎপাদিত গামোচা, চেলেং চাদৰ স্থানীয় বিয়া সবাহকে ধৰি অসমৰ বিভিন্ন প্ৰান্তত চাহিদা অনুসৰি যোগান দিয়াৰ ব্যৱস্থা গ্ৰহণ কৰিছে পোহৰ ফাউণ্ডেচনে। বৰ্তমান গাঁওখনৰ ২০ গৰাকী মহিলা প্ৰত্যক্ষ ভাৱে এই কৰ্মত জড়িত হৈ তাঁত শালত বস্ত্ৰ উৎপাদন কৰি আছে। পুৱাৰ পৰা গধুলিকৈ গাঁওখনত শুনিবলৈ পোৱা যায় মাকোৰ খিটখিটনি। ঠিক সেইদৰে প্ৰতি গৰাকী মহিলা ব্যস্ত হৈ থাকে নিজৰ নিজৰ তাঁত শালখনত। এই সকল মহিলাই নিজৰ নিজৰ ঘৰত থকা মাটী শাল আৰু পাটি শালত বৈ উলিওৱা গামোচা, ৰূমাল,চেলেং, মেখেলা চাদৰ আদি পোহৰ ফাউণ্ডেচনৰ যোগেদি বিক্ৰী কৰি খুবেই সুখী। আনহাতে মহিলা সকলে এই উপাৰ্জনেৰে নিজৰ পৰিয়ালক আৰ্থিক সকাহ দিবলৈও সক্ষম হৈছে।  উল্লেখ্য যে অফলামুখ গাঁওৰ মহিলা সকলৰ জীৱনৰ দিশ সলনি কৰা বৰ্ণালীয়ে গুৱাহাটী বিশ্ববিদ্যালয়ৰ পৰা ৰাজনীতি বিজ্ঞানত স্নাতকোত্তৰ ডিগ্ৰীৰ সন্মান লাভ কৰা লগতে মাষ্টাৰ অফ ছ’চিয়েল ৱেলফাৰ শিক্ষা সাং কৰা পাছত আন দহ গৰাকী যুৱতীৰ দৰে চাকৰি পাছত ন দৌৰি সমাজৰ বাবে বিশেষকৈ  মহিলা সকলৰ বাবে কিবা এটা কৰাৰ মানসেৰে ২০১৮ চনৰ ছেপ্তেম্বৰত অষ্টিয়াৰ ডি কে এ নামৰ এটা আন্তঃৰাষ্ট্ৰীয় সংস্থাৰ পৰা দুবছৰ বাবে লাভ কৰা য়ুথ ইনভলমেণ্ট ফেলশ্বিপৰ যোগেদি লাভ কৰা ধনেৰে পোহৰ ফাউণ্ডেচন নামৰ এটা স্বেচ্ছাসেৱী সংস্থা গঠন কৰে। এই  সংস্থাটোৰ যোগেদি বৰ্ণালীয়ে মাজুলীৰ গৰাখহনীয়াৰ কবলত পৰি নকছাৰী ভেলউগুৰিত চৰকাৰে সংস্থাপন কৰা অফলামুখ নামৰ পিছ পৰা গাঁওখনত মহিলা শিপিনী সকলক লৈ অৰ্থনৈতিক দিশত সচেতন কৰি তোলাই নহয় প্ৰতি গৰাকী শিপিনীক নিজৰ কৰ্মৰ উচিত মূল্য লাভ কৰাৰ ব্যৱস্থা গ্ৰহণ কৰা লগতে স্বাৱলম্বীতাৰ এক নতুন বাট দেখুৱাবলৈ সক্ষম হয়। বৰ্ণালীয়ে এই প্ৰতিবেদকৰ আগত কয় যে ” গাঁওখনৰ প্ৰতি গৰাকী মহিলাই একোগৰাকী নিপুন শিপিনী।তেওঁলোকৰ মাজত প্ৰতিভাৰ অভাৱ নাই। মই মাত্ৰ তেওঁলোকৰ কৰ্মই এক উচিত মূল্য লাভ কৰাত সহায় কৰিছো। সমাজত অৱহেলিত, স্বামীহাৰা তথা নিবনুৱা মহিলা সকলক স্বাৱলম্বী কৰি তোলাটোৱে আমাৰ পোহৰ ফাউণ্ডেচনৰ মূল লক্ষ্য। পুৰুষ প্ৰধান সমাজখনত নাৰীয়ে সমমৰ্য্যদা পাবলৈ হ’লে উপাৰ্জনক্ষম হ’ব লাগিব”। গাঁওখনৰ মহিলা সকলে আগবঢ়োৱা সহযোগিতাৰ ফলত বৰ্ণালীৰ পোহৰ ফাউণ্ডেচনে খুব কম সময়তে সফলতা লাভ কৰা বুলি ব্যক্ত কৰা লগতে গাঁওখনৰ শিপিনী সকলে উৎপাদন কৰা বস্ত্ৰ গ্ৰাহকৰ মাজত সমাদৰ লাভ কৰিবলৈও সক্ষম হৈছে বুলি জানিবলৈ দিয়ে। এতিয়া গাঁওখনৰ মহিলাসকলে বৰ্নালীৰ পোহৰ ফাউণ্ডেচনৰ যোগেদি বহু দূৰ আগুৱাই যোৱাৰ সপোন দেখিছে। বৰ্ণালী সুখী গাঁওখনৰ মহিলাসকলে বয়ন শিল্পৰ যোগেদি অৰ্থনৈতিক স্বাৱলম্বীতা লাভ কৰিবলৈ সক্ষম হোৱাত। ভৱিষ্যতে মুগা কাপোৰ আৰু পাট মুগা কাপোৰ উৎপাদনৰ লক্ষ্য আগত ৰাখি গাঁওখন শুৱালকুছিৰ দৰে বস্ত্ৰ নগৰী ৰূপে গঢ়ি তোলাৰ সপোন আছে বুলি বৰ্ণালীয়ে জানিবলৈ দিয়ে। চৰকাৰৰ উচিত সহায় সহযোগিতা লাভ কৰিলে বৰ্ণালীয়ে আৰম্ভ কৰা এই সৰু প্ৰচেষ্টাৰ যোগেদি অসমৰ গ্ৰামাঞ্চলৰ মহিলা সকলে এক অৰ্থনৈতিক বিপ্লৱ গঢ়ি তুলিব বুলি আশা কৰিব পাৰি। খবৰ যুগুতালে মৰিয়নীৰ পৰা জ্যোতি প্ৰসাদ গগৈয়ে.. 

Share on whatsapp
WhatsApp
Share on facebook
Facebook
Share on twitter
Twitter
Share on email
Email

২০২০ বৰ্ষৰ কাব্য কানন বঁটা ঘোষণা- নিৰ্বাচিত হৈছে ৫গৰাকী কবি

অসমীয়া কবিতাৰ প্ৰচাৰ আৰু প্ৰয়াসৰ বাবে স্থাপন হোৱা অসম কাব্য কাননৰ ২০২০ বৰ্ষ কাব্য কানন বঁটা পাঁচগৰাকী কবিলৈ আগবঢ়োৱা হৈছে।অসম কাব্য কাননৰ সম্পাদক নৱ ৰাজনে জানিবলৈ দিয়া মতে এই বৰ্ষৰ কাব্য কানন বঁটাৰ বাবে ৰণজিৎ গগৈ,ৰাতুল কুমাৰ লাহন ,নীলাভ সৌৰভ,খঞ্জনা শৰ্মা,আৰু মিণ্টুল হাজৰিকা নিৰ্বাচিত হৈছে।

 

 

 

উল্লেখযোগ্য যে কাব্য কানন বাবে নিৰ্বাচিত এই কবি পাঁচজনৰ পাঁচখন কাব্য সংকলনে এই বঁটা নিৰ্বাচনত গুৰুত্বপূৰ্ণ ভূমিকা পালন কৰিছে। সেইসমূহ কাব্য সংকলন হ’ল বুকুৰ কোণৰ চৌফলীয়া ৰ’দ এজাক,পানীগছা,উত্তৰ আধুনিক ঘাঁ,পানীৰ দুৱাৰ আৰু ৰ’দৰ গান।

 

 

অহা ২৭ ডিচেম্বৰত গুৱাহাটীত অনুষ্ঠিত হ’ব লগীয়া অসম কাব্য কানন তৃতীয় বাৰ্ষিক অধিবেশনৰ মুকলি সভাত এই বঁটা সমূহ আনুষ্ঠানিক ভাৱে প্ৰদান কৰ আকাশবাণী গুৱাহাটী কেন্দ্ৰৰ সঞ্চালক ৰাজীৱ বৰুৱাই। আনহাতে এই অধিবেশনত বিশিষ্ট কবি সমালোচক ড° মৃদুল শৰ্মা,জেষ্ঠ কবি উদয় কুমাৰ শৰ্মা, শিশু সাহিত্যিক যুগললোচন দাস বিশিষ্ট অতিথি হিচাপে উপস্থিত থাকিব।

বৰঝাৰ বিমানবন্দৰত জগদীশ বৈশ্যৰ গীত উন্মোচন

ভাৰতীয় বিমানবন্দৰ প্ৰাধিকৰণৰ বৰঝাৰস্থিত উত্তৰ পূব মণ্ডল কাৰ্যালয়ৰ উপ মহাপ্ৰবন্ধক আৰু সাংস্কৃতিক কৰ্মী জগদীশ বৈশ্যই আগন্তুক শাৰদীয় বতৰ উপলক্ষে ৰচনা কৰা ‘শৰতৰ পদূলি ‘ শীৰ্ষক গীতটো ২০ অক্টোবৰত ইউটিউৱ আৰু ফেচবুকত মুকলি কৰা হয়। উত্তৰ পূৱ মণ্ডল কাৰ্যালয়ৰ প্ৰেক্ষাগৃহত আয়োজিত এক চমু অনুষ্ঠানত গীতটো মুকলি কৰে উত্তৰ পূৱ মণ্ডলৰ ক্ষেত্ৰীয় কাৰ্যবাহী সঞ্চালন এম সুৰেশে।

 

 

অনুষ্ঠানত প্ৰাধিকৰণৰ কেবাগৰাকী বিষয়া উপস্থিত থাকে। অনুষ্ঠানত জগদীশ বৈশ্যই গীতটো সন্দৰ্ভত নিজৰ অনুভৱ আৰু ইয়াৰ আঁৰৰ কথা ব্যক্ত কৰে। উল্লেখযোগ্য যে কাঁহিকুছিস্থিত শ্ৰীমন্ত শংকৰদেৱ কৃষ্টি বিকাশ সমিতিৰ সাংস্কৃতিক বিভাগৰ আহ্বায়ক জগদীশ বৈশ্যক পাঁচ মিনিট দৈৰ্ঘ্যৰ গীতটিত সুৰ আৰু সংগীতত পল্লৱে সহযোগ কৰিছে । গীতটো ইংৰাজীলৈ অনুবাদ কৰিছে অংকিত বৈশ্যই। গীটাৰত মাইনাই, বাঁহীত সংগত কৰিছে চিত্তৰঞ্জন সোনোৱালে। আগন্তুক শাৰদীয় দুৰ্গা পূজা আৰু চলি থকা নৱৰাত্ৰিত গীতটোৱে জনপ্ৰিয়তা লাভ কৰিব বুলি আশা কৰা হৈছে।

খবৰ যুগুতালে জীতুমণী দাসে..

ইণ্টাৰনেচনেল আগৰ উদ চেণ্টাৰৰ আধাৰশিলা স্থাপন কৰিলে মুখ্যমন্ত্ৰীয়ে

বুধবাৰে খুমটাই সমষ্টিৰ ডাবিডুবিত আধাৰশিলা স্থাপন হ’ল ইন্টাৰনেচনেল আগৰ উদ চেন্টাৰৰ। মুখ্যমন্ত্ৰী সৰ্বানন্দ সোনোৱালে এই কেন্দ্ৰটোৰ আধাৰশিলা স্থাপন কৰাৰ পাছতেই এতিয়া সাঁচি ব্যৱসায়ৰ লগত জড়িত লোকসকলৰ সমান্তৰালকৈ অঞ্চলবাসীও উৎফুল্লিত হৈ পৰিছে ।উল্লেখযোগ্য যে খুমটাই সমষ্টিৰ বিভিন্ন প্ৰান্তত বিশেষকৈ নাহৰনি,বাতিপৰীয়া,মেলামৰা আদি বিভিন্ন অঞ্চলত সাঁচি উদ্যোগে বহু দিনৰ আগৰে পৰাই জীৱিকাৰ মূল উৎস হিচাপে পৰিসৰ লাভ কৰি আহিছে।

 

এতিয়া ইন্টাৰনেচনেল আগৰ উদ চেন্টাৰৰ উপস্থিতিয়ে সাঁচি উদ্যোগৰ লগত জড়িত লোকসকলক সাঁচিৰ ব্যৱসায়ত অধিক লাভৱান কৰিব বুলি আশাবাদী হৈ পৰিছে।বৰ্তমান বন্ধ হৈ পৰা কুশল কোঁৱৰ সুতা কলৰ স্থানতেই ইন্টাৰনেচনেল আগৰ উদ চেন্টাৰ প্ৰতিষ্ঠাৰ ব্যৱস্থা কৰাতো এক ইতিবাচক পদক্ষেপ হিচাপে পৰিগণিত হৈছে।আজিৰ এই অনুষ্ঠানত মুখ্যমন্ত্ৰীৰ লগতে উপস্থিত থাকে মন্ত্ৰী চন্দ্ৰমোহন পাটোৱাৰী,অতুল বৰা আৰু খুমটাই সমষ্টিৰ বিধায়ক মৃনাল শইকীয়া।

চলা সংৰক্ষিত বনাঞ্চল সংৰক্ষণৰ বাবে বিশেষ পদক্ষেপ সচেতন ৰাইজৰ

চৰাইদেউ জিলাৰ বনাঞ্চল সমূহৰ ভিতৰত অন্যতম এখন হ’ল চলা সংৰক্ষিত বনাঞ্চল। এই বনাঞ্চল খনৰ বন ধ্বংস কাৰ্য ৰোধ কৰিবলৈ কাষৰীয়া অঞ্চলৰ ৰাইজে কিছু বছৰৰ পৰা ব্যতিক্ৰমী পদক্ষেপ গ্ৰহণ কৰি আহিছে।

 

সংৰক্ষিত বনাঞ্চল খনক চলা গ্ৰাম্য অভয়াৰণ্য হিচাপে ঘোষণা কৰি গাওঁবাসীয়ে ইয়াত গছপুলি ৰোপণ আৰু প্ৰতিপালন কৰাৰ লগতে বিভিন্ন সজাগতামূলক কাৰ্যসূচী ৰূপায়ন কৰি অহাৰ খবৰ বিভিন্ন সংবাদ মাধ্যমত প্ৰচাৰ হৈছিল।

 

চলা ভিলেজ চেনছুৱেৰী কনজাৰভেছন চ’ছাইটি নামেৰে এখন সমিতি গঠন কৰি বনাঞ্চলখনক সুৰক্ষাৰ বাবে স্থানীয় লোকসকল ওলাই অহা কাৰ্য ইতিমধ্যে প্ৰশংসিত হৈছে। কেৱল সেয়াই নহয় শেহতীয়াকৈ সোণাৰিৰ নাফুকস্থিত বনাঞ্চলিক বিষয়াৰ অনুমোদন সাপেক্ষে চলা সংৰক্ষিত বনাঞ্চলখনত নিশা পহৰা দিয়াৰো স্থানীয় লোকে ব্যৱস্থা কৰিছে। স্থানীয় যুৱকসকলক লৈ একোটা দল গঠন কৰি চলা ভিলেজ চেনছুৱেৰী কনজাৰভেছন চ’ছাইটিৰ সহযোগত ইতিমধ্যে পহৰা দিয়া আৰম্ভ কৰা হৈছে যাতে বনাঞ্চল খনৰ পৰা নিশা কোনো দুষ্কৃতিকাৰীয়ে কাঠৰ সৰবৰাহ কৰিব নোৱাৰে। চলা সংৰক্ষিত বনাঞ্চল সংৰক্ষণৰ বাবে চলা ভিলেজ চেনছুৱেৰী কনজাৰভেছন চ’ছাইটিয়ে গ্ৰহণ কৰা এই পদক্ষেপ এতিয়া জিলাখনত প্ৰশংসা লাভ কৰিছে।

 

ইফালে চলা ভিলেজ চেনছুৱেৰী কনজাৰভেছন চ’ছাইটিয়ে আজি দ্বিতীয় প্ৰতিষ্ঠা দিৱস উপলক্ষে সজাগতামূলক চাইক্লিং, জাংগল ট্ৰেকিং অনুষ্ঠিত কৰা লগতে এখন সজাগতা সভা অনুষ্ঠিত হয়। প্ৰতিষ্ঠা দিৱসৰ কাৰ্যসূচীত বহুকেইজন প্ৰকৃতিপ্ৰেমীৰ লগতে প্ৰাকৃতিক পৰ্যটনৰ লগত জড়িত কাজিৰঙাৰ বিতুপন কলঙো উপস্থিত থাকে।

খবৰ যুগুতালে সোণাৰিৰপৰা অভিজিৎ ভূঞাই..