ভাষা, সাহিত্য ,সংস্কৃতি বিষয়ক আন্তঃ ৰাষ্ট্ৰীয় সন্মিলন অনুষ্ঠিত

নেপালৰ ত্রিভূৱন বিশ্ববিদ্যালয়ৰ বৌদ্ধ অধ্যয়ন বিভাগৰ উদ্যোগত, অসম সাহিত্য সভাৰ অসম তত্ত্ব গৱেষণা সংস্থান আৰু নেপালী সাহিত্য সভাৰ সৌজন্যত কাঠমাণ্ডুত আজিৰে পৰা দুদিনীয়াকৈ ভাষা, সাহিত্য আৰু সংস্কৃতি বিষয়ক আন্তঃৰাষ্ট্ৰীয় সন্মিলন আৰু চৰ্যাপদ বিষয়ক আলোচনা চক্ৰ  হৈছে । অসমীয়া ভাষাৰ প্ৰথম লিখিত নিদৰ্শন বুলি বিভিন্ন লেখক সমালোচকে দাবী কৰা চৰ্যাপদৰ মূল নিৰ্ধাৰণ আৰু ইয়াক জনপ্ৰিয় কৰাৰ উদ্দেশ্য কাঠমাণ্ডুৰ ত্ৰিভূৱন বিশ্ববিদ্যালয়ত আয়োজন কৰা আলোচনা চক্ৰখন শুভ উদ্বোধন কৰে ত্ৰিভুৱন বিশ্ববিদ্যালয়ৰ উপাচাৰ্য, ৰেক্টৰ, অধ্যাপক ডঃ শিৱলাল ভূশালে ৷

মাজুলীৰ নতুন কমলাবাৰী সত্ৰৰ সত্ৰাধিকাৰ জনাৰ্দন দেৱগোস্বামী, অসম সাহিত্য সভাৰ বিদায়ী সভাপতি ড°পৰমানন্দ ৰাজবংশী , প্ৰধান সম্পাদক পদুম ৰাজখোৱা, অসম নেপালী সাহিত্য সভাৰ সম্পাদক ৰুদ্ৰ বৰাল আদিৰ উপস্থিতিত সন্মিলন আৰু আলোচনা সত্ৰখন উদ্বোধন কৰি তেওঁ কয় যে সহজানপন্থী সিদ্ধাচাৰ্যসকলে নিজৰ ধৰ্মমত প্ৰচাৰৰ উদ্দেশ্যে ৰচনা কৰা গীতসমূহক চৰ্যাপদ বুলি কোৱা হৈছে ৷ চৰ্যাপদ বিলাকত আমি অষ্টম শতিকাৰ পৰা দ্বাদশ শতিকাৰ ভিতৰৰ প্ৰাচ্য ভাৰত তথা প্ৰাচীন কামৰূপৰ সমাজৰ ছবি দেখিবলৈ পাও। চৰ্যাপদবোৰৰ মাজেৰে দৃষ্টিগোচৰ হয় যে সহজানপন্থীসকলৰ সমাজখনৰ কেন্দ্ৰবিন্দু হ’ল সাধন তত্ত্ব আৰু নিৰ্বান প্ৰাপ্তিৰ অভিলাষ ৷ সেয়ে ইয়াক অধ্যয়নৰ প্ৰয়োজনীয়তা আহি পৰিছে ৷ এনেদৰে বক্তব্য দাঙি ধৰি উপাচাৰ্যজনে আলোচনা চক্ৰ  খনৰ জৰিয়তে অসমীয়া, নেপালী আৰু হিন্দীকে ধৰি বিভিন্ন ভাষা-ভাষীৰ মাজত সমন্বয়ৰ সৃষ্টি কৰিব বুলিও মন্তব্য দিয়ে ।

আলোচনা চক্ৰখনৰ উদ্বোধনী অনুষ্ঠানত অতিথি আৰু বিভিন্ন দেশৰ গৱেষক, অধ্যাপকসকলক আদৰণি জনায় ডঃ পৰমানন্দ ৰাজবংশীয়ে কয় যে চৰ্যাপদৰ আলোচনাই প্ৰাচীন কালৰে পৰা প্ৰাচীন কামৰূপ আৰু নেপালৰ মাজত থকা সাংস্কৃতিক সমন্বয়ৰ ইতিহাস উন্মোচন কৰিব বুলি আশা ব্যক্ত কৰে ৷ লগতে এই কাৰ্যই আধুনিক অসম আৰু নেপালৰ মাজত সমাজ জীৱন আৰু সাংস্কৃতিক ক্ষেত্ৰখনত বিশেষ প্ৰভাৱ পেলাব বুলিও তেওঁ মন্তব্য দিয়ে ৷

গাম্ভীৰ্যপূৰ্ণ পৰিৱেশত অনুষ্ঠিত আলোচনা সত্ৰখনিত নেপালৰ লুম্বিনী বিশ্ববিদ্যালয়ৰ উপাচাৰ্য ড° হৃদয়ৰত্ন ব্ৰজচাৰ্য , লুম্বিনী বিশ্ববিদ্যালয়ৰ প্ৰাক্তন উপাচাৰ্য, অধ্যাপক ড° ত্ৰিৰত্ন মানধাৰ ,
ত্ৰিভুৱন বিশ্ববিদ্যালয়ৰ পঞ্জীয়ক অধ্যাপক ড° পেশল ডাহাল, ইউনিভাৰচিটি অফ চায়েঞ্চ এণ্ড টেকন’লজি, মেঘালয়ৰ শিক্ষা সঞ্চালক ড° বলেন্দ্ৰকুমাৰ দাস,অসম সাহিত্য সভাৰ নৱ নিৰ্বাচিত প্ৰধান সম্পাদক যাদৱচন্দ্ৰ শৰ্মা, প্ৰাচ্যবিদ্যাৰ্ণৱ ড° মহেশ্বৰ নেওগ অসম তত্ত্ব গৱেষণা সংস্থানৰ পঞ্জীয়ক ডঃ কুটুবুদ্দিন আহমেদ, অসম সাহিত্য সভাৰ গুৱাহাটী প্ৰশাসনীয় কাৰ্যালয়ৰ সম্পাদক ডঃ সঞ্জীৱকুমাৰ শৰ্মা আৰু বিশিষ্ট সমালোচক ড° দিলীপ কলিতাই বক্তব্য প্ৰদান কৰে ৷

 

উদ্বোধনী অনুষ্ঠানৰ পিছতে ইংৰাজী আৰু অসমীয়া উভয় ভাষাত আলোচনা চক্ৰ খনৰ প্ৰথম অধিৱেশন আৰম্ভ হয় ৷ অধিৱেশনৰ আৰম্ভণিতে কাঠমাণ্ডুৰ এদল শিশু আৰু পুৰুষ-মহিলা কেইবাটিও দলৰ বিভিন্ন শিল্পীয়ে পৰিৱেশ্য কলা ৰূপে চৰ্যাপদ পৰিবেশন কৰে । “চৰ্যা” বিষয়ক প্ৰথম অধিৱেশনত অধ্যাপক ড° উপেন্দ্ৰজিৎ শৰ্মাই “চৰ্যাপদৰ শব্দ সম্ভাৰত প্ৰাচীন কামৰূপী শব্দৰ ব্যৱহাৰ : এটি যুক্তিনিষ্ঠ আলোচনা” , ড° অলকা শৰ্মাই “চৰ্যাপদত অসমৰ সমাজজীৱনৰ ছবিৰ বিশ্লেষণাত্মক অধ্যয়ন”,মনোজকুমাৰ বৰুৱাই “চৰ্যাপদৰ ভাষাৰ লগত অসমীয়া ভাষাৰ সম্পৰ্ক”, ৰিতুপৰ্ণ বৰুৱাই “চৰ্যাপদ , অসমীয়া চৰ্যাকাৰ, তদানীন্তন অসমীয়া সমাজ আৰু সংস্কৃতি” আৰু তৃষ্ণা কলিতাই “চৰ্যাপদ আৰু সমসাময়িক সমাজ”, মল্লিকা ৰহমান হাজৰিকাই “চৰ্যাপদ পুৰণি অসমৰ ঐতিহ্যবাহী সম্পদ” শীৰ্ষক গৱেষণা পত্ৰ পাঠ কৰে ।

চৰ্যা বিষয়ক দ্বিতীয় অধিৱেশনত শেৱালি গগৈয়ে চৰ্যাপদ আৰু বৰগীত : এক তুলনামূলক অধ্যয়ন”, নৱমল্লিকা ডেকাই “মহিলাৰ আত্মজীৱনী: অসমীয়া আৰু নেপালী ভাষাৰ চাৰিখন মহিলা আত্মজীৱনীৰ তুলনামূলক অধ্যয়ন”, বিভূতিমোহন শৰ্মাই “charyapada and its spelling: a textual study”, মায়াশ্ৰী গোস্বামী আৰু জ্ঞানশ্ৰী গোস্বামীয়ে “চৰ্যাপদ আৰু অসমীয়া ভাষাৰ ৰূপতাত্ত্বিক আলোচনা” শীৰ্ষক গৱেষণা পত্ৰ পাঠ কৰে ।
“চৰ্যা আৰু ৰামকথা” বিষয়ক তৃতীয় অধিৱেশনত খেমৰাজ নেপালে “চৰ্যাপদ আৰু নেপালী ভাষা”, সুধা শৰ্মাই “চৰ্যাপদত নাৰী”, ড° সঞ্জীৱকুমাৰ শৰ্মাই “Ramkotha tradition in Assam and among the tribal communities of the region”,আৰু গায়ত্ৰী নেৱাৰে “মাধৱ কন্দলি আৰু ভানুভক্ত আচাৰ্যৰ ৰামায়ণৰ সমাজ ছবিৰ এক অধ্যয়ন” শীৰ্ষক গৱেষণা পত্ৰ পাঠ কৰে ।

 

চৰ্যাপদ বিষয়ত বুৎপত্তি থকা নেপাল আৰু ভাৰতৰ কেইবাগৰাকী গৱেষকৰ লগতে অসম, উত্তৰ প্ৰদেশ, বিহাৰ আৰু কাঠমাণ্ডুৰ দুই শতাধিক গৱেষক শিক্ষক, ছাত্ৰ ছাত্ৰী আৰু শিল্পী সাহিত্যকে অংশগ্ৰহণ কৰে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

দৰঙৰ গ্ৰামাঞ্চলৰ প্ৰতিভাধৰে নীটত আজুৰিলে খ্যাতি

ক’ভিড-১৯ ৰ দুৰ্যোগৰ সময়তে অহা শাৰদীয় দুৰ্গোৎসৱৰ প্ৰাক ক্ষণত দৰং জিলাৰ অতি দুৰ্গম অঞ্চলৰ আৰু দুখীয়া পৰিয়ালৰ এটি সন্তানৰ সাফল্যৰ আনন্দৰ বতৰা কঢিয়াই আনিছে৷ জিলাখনৰ ছিপাঝাৰ বিধানসভা সমষ্টিৰ অন্তৰ্গত কুৰুৱা অঞ্চলৰ এক নম্বৰ শুক্তাগুৰি গাঁৱৰ সন্তান অমন প্ৰধানে দাৰিদ্ৰকো প্ৰতিহত কৰি সৰ্বভাৰতীয় পৰ্যায়ৰ অলপতে ঘোষিত ” নীট” পৰীক্ষাত ৪৬২ নম্বৰ সহ উজ্বলি উঠিছে৷

 

গুৱাহাটীৰ এখন ব্যক্তিগত খণ্ডৰ শিক্ষানুষ্ঠানৰ কৰ্মচাৰী জগত প্ৰধানৰ সন্তান অমনে উচ্চতৰ মাধ্যমিকত ৮৫.৫০ শতাংশ নম্বৰেৰে বাইহাটা চাৰিআলিৰ এখন শিক্ষানুষ্ঠানৰ পৰা উত্তীৰ্ণ হৈছিল ৷ ইয়াৰ মাজতে ২০১৮ ত মাতৃহাৰা হৈছিল আমন ৷
প্ৰতিভাধৰ গৰাকীৰ এই সফলতাৰ বতৰা পোৱাৰ লগে লগে দৰঙৰ উপায়ুক্ত দিলীপ কুমাৰ বৰা আৰু আৰক্ষী অধীক্ষক অমৃত ভূঞাই আজি মঙলদৈত আৰ্থিক অনুদান, ফুলাম গামোছাসহ পুত্ৰ-পিতাক উষ্ম অভিনন্দন জ্ঞাপন কৰে৷

 

উপায়ুক্ত আৰু আৰক্ষী অধীক্ষক দুয়োগৰাকীয়ে অমনৰ পৰৱৰ্তী চিকিৎসা বিজ্ঞানৰ শিক্ষা গ্ৰহণত পাৰ্যমানে সহযোগ কৰিব বুলি উৎসাহ প্ৰদান কৰে ৷ এই অভিনন্দন অনুষ্ঠানত যুৱনেতা ভাৰ্গৱ কুমাৰ দাস, হেমন্ত কুমাৰ বৰুৱাইয়ো অমনৰ সহযাত্ৰীৰূপে অংশগ্ৰহণ কৰে ৷

 

আনুষ্ঠানিকভাৱে মুকলি হ’ল আৰ জি বৰুৱা পথ সংযোগী উৰণীয়া সেঁতু

মুখ্যমন্ত্ৰী সৰ্বানন্দ সোনোৱালে আজি গণেশগুৰি চাৰিআলি আৰ জি বৰুৱা পথৰ পৰা বিষ্ণু ৰাভা উৰণীয়া সেঁতু সংযোগী নতুনকৈ নিৰ্মাণ কৰি উলিওৱা উৰণীয়া সেঁতুখন আজি আনুষ্ঠানিক ভাৱে শুভ উদ্বোধন কৰে। ৪২৫.৫০ মিটাৰ দৈর্ঘৰ এই উৰণীয়া সেঁতুখন ২০১৮-১৯ বৰ্ষৰ ৰাজ্য চৰকাৰৰ স্ব-অগ্ৰাধিকাৰ উন্নয়ন পুঁজিৰ ৫৮.৭৪ কোটি টকা ব্যয়ৰে লোকনিৰ্মাণ বিভাগে নিৰ্মাণ কৰিছে।

 

 

এই উৰণীয়া সেঁতুখন আধাশিলা ২০১৯ চনৰ ৬ মাৰ্চত মুখ্যমন্ত্ৰী সৰ্বানন্দ সোনোৱালে স্থাপন কৰিছিল।এই সেঁতুখন নিৰ্মাণৰ লক্ষ্য ৩০ মাহ ধার্য কৰা হৈছিল যদিও মাত্ৰ ১৯ মাহৰ ভিতৰতে মেচাৰ্ছ গৌতম কনণ্ট্ৰাকচনৰ দ্বাৰা সম্পূৰ্ণ কৰা হৈছে।

 

উৰণীয়া সেঁতুখন উদ্বোধন কৰি এই উপলক্ষে আয়োজিত অনুষ্ঠানত ভাষণ প্ৰদান কৰি লক্ষ্য নিৰ্দ্ধাৰিত সময়ৰ বহু পূৰ্বে এই সেঁতুখনৰ নিৰ্মাণ কাৰ্য সম্পূৰ্ন কৰা দিশটোৱে ৰাজ্য চৰকাৰৰ সু-শাসনৰ এক উজ্জ্বল পৰিচায়ক বুলি মুখ্যমন্ত্ৰীয়ে কয়।লোক নিৰ্মাণ বিভাগৰ মন্ত্ৰী ড° হিমন্ত বিশ্ব শৰ্মা নেতৃত্বত বিভাগে এই প্ৰকল্পটো যথেষ্ট দ্ৰুততাৰে সম্পন্ন কৰা বাবে মুখ্যমন্ত্ৰীয়ে বিভাগৰ মন্ত্ৰী হিমন্ত বিশ্ব শৰ্মাক শলাগ লয়।বৰ্তমান ৰাজ্য চৰকাৰখনে শাসনভাৰ লোৱাৰ পৰা ৰাজ্য চৰকাৰখনে প্ৰকল্প সমূহ মানসম্পন্ন তথা সময় নিৰ্ধাৰিত ভাৱে সম্পূৰ্ণ কৰা দিশত যথোচিত গুৰুত্ব আৰোপেৰে সু প্ৰশাসন প্ৰতিষ্ঠা দিশত নিৰৱছিন্নভাৱে কৰ্মত ব্ৰতী হৈ আছে বুলি মুখ্যমন্ত্ৰীয়ে উল্লেখ কৰে।

 

 

গুৱাহাটীক ৰাজ্য খনৰ আত্মা বুলি উল্লেখ কৰি তেখেতে কয় যে বিশ্ব প্ৰেক্ষাপটত গুৱাহাটীক দাঙি ধৰা বাবে ৰাজ্য চৰকাৰে বহু সংখ্যাক আন্তঃগাঁথনিমূলক প্ৰকল্প ৰূপায়ণৰ লগতে উদ্ভাৱনীমূলক পদক্ষেপ গ্ৰহণ কৰি আহিছে।মহানগৰীখন আঢ়ৈ কথা মাটিৰ পৰ্যন্ত দ্বিতীয় মহলালৈকে গৃহ নিৰ্মাণ দিশত জি এম ডি এ আৰু জি এম ডি চি এ অনলাইন জৰিয়তে থিতাতে অনুমোদন জনোৱা বাবে অলপতে মুখ্যমন্ত্ৰী সহজ গৃহ নিৰ্মাণ আঁচনি শুভাৰম্ভ কৰিছে বুলি উল্লেখ কৰি মুখ্যমন্ত্ৰীয়ে মহানগৰী গৃহ সমূহৰ বাবে এক সুকীয়া ৰং ব্যৱহাৰ ওপৰত গুৰুত্ব আৰোপ কৰে যাতে ইয়ে এক সুকীয়া পৰিচয় বহন কৰিব পাৰে।মুখ্যমন্ত্ৰীয়ে এই দিশত এক আলাপ আলোচনা আৰম্ভ কৰা বাবে লোক নিৰ্মাণ বিভাগৰ মন্ত্ৰী হিমন্ত বিশ্ব শৰ্মা আৰু গুৱাহাটীৰ মহানগৰ উন্নয়ন মন্ত্ৰী সিদ্ধাৰ্থ ভট্টাচাৰ্যক আহ্বান জনায় যাতে এই বিষয়ত এক সহমতত উপনীত হ’ব পৰা যায়।

অনুষ্ঠানত ভাষণ প্ৰদান কৰি মন্ত্ৰী হিমন্ত বিশ্ব শৰ্মাই কয় যে মহানগৰীত চুপাৰ মাৰ্কেট আৰু মালিগাঁৱত অলপতে নিৰ্মাণ কাৰ্য আৰম্ভ কৰা উৰণীয়া সেঁতুসহ ৰাজ্যখনৰ বিভিন্ন প্ৰান্তত সৰ্বমুঠ ১৬ খন উৰণীয়া সেঁতু কাম চলি আছে। মহানগৰী ৰিহাবাৰীৰ সৈতে আৰ্য বিদ্যাপীঠ মহাবিদ্যালয়ত সংযোগ কৰি এখন নতুন উৰণীয়া সেঁতু নিৰ্মাণৰ বাবে প্ৰস্তাৱ লোৱা হৈছে বুলিও তেওঁ কয়।মহানগৰী ৰিহাবাৰী পৰা পানবজালৈ এক্সপেজ ক’ৰিডৰ তথা চান্দমাৰি পৰা নুমমাটিলৈ ইলেভেটেট উৰণীয়া সেঁতু নিৰ্মাণৰ দৰে আন্তঃগাঁথনিমূলক প্ৰকল্প ৰূপায়ণৰ বাবে চৰকাৰে পৰিকল্পনা কৰি আছে বুলিও মন্ত্ৰী গৰাকীয়ে কয়।

অনুষ্ঠানত মুখ্যমন্ত্ৰীয়ে প্ৰকল্প ৰূপায়ণৰ সৈতে জড়িত নির্মান কোম্পানীৰ প্ৰতিনিধি তথা লোক নিৰ্মাণ বিভাগৰ অভিযন্তা সকলকো সম্বৰ্ধনা জ্ঞাপন কৰে। লোক নিৰ্মাণ আয়ুক্ত সচিব ৰাজেশ কেম্পাই ,চাহ জনজাতি কল্যান বিভাগৰ ৰাজ্যিক মন্ত্ৰী সঞ্জয় কিষাণ, বিধায়ক ৰূপক শৰ্মা,লোক নিৰ্মাণ বিভাগৰ আয়ুক্ত সচিব ৰাজ চক্ৰৱৰ্তী,মুখ্য অভিযন্তা দিলীপ কুমাৰ হাজৰিকা,দুৰ্যোগ ব্যৱস্থাপনা বিভাগৰ ৰাজ্যিক মন্ত্ৰী যোগেন মহনৰ লগতে বহু গণ্য মান্য ব্যক্তিসকল উপস্থিত থাকে।

চানডুবিকে ধৰি অঞ্চলটোৰ কেবাটাও জলপ্ৰপাত উন্নীতকৰণৰ তৎপৰতা শ্ৰীশ্ৰী সত্য সাই সেৱা সমিতি আৰু ৰংমন ট্যুৰিজিম ছ’চাইটিৰ

গুৱাহাটী মহানগৰীৰ পৰা মাত্ৰ ৬০ কিঃমিঃ নিলগৰ অসম মেঘালয় সীমান্তত অৱস্থিত চানডুবি বিল আৰু ইয়াৰ কাষৰীয়া অঞ্চলৰ নান্দনিক প্ৰাকৃতিক সৌন্দৰ্যই যিকোনো লোককে বাৰুকৈয়ে আকৰ্ষণ কৰি আহিছে। ইফালে বিগত তিনি, চাৰি বছৰত অসম চৰকাৰৰ বিশেষ তৎপৰতাত চানডুবিৰ কাষৰীয়া অঞ্চলৰ মেঘালয় সীমান্ত সংযোগী বাট পথ সমূহ উন্নত হোৱাত যাতায়ত ব্যৱস্থা সুচল হৈ পৰিছে।

 

 

 

ফলত পৰ্যটকৰ লগতে আন লোকৰো আগমন হৈছে । অসম চৰকাৰৰ পৰ্যটন বিভাগ আৰু অসম পৰ্যটন উন্নয়ন নিগমৰ ফালৰ পৰাও শেহতীয়াভাৱে চানডুবিকে ধৰি কাষৰীয়া অঞ্চলক পৰ্যটকৰ আকৰ্ষণৰ কেন্দ্ৰবিন্দুলৈ উন্নীত কৰণৰ বাবে তৎপৰতা অব্যাহত ৰখা পৰিলক্ষিত হৈছে।

 

 

আনকি কিছুদিন পূৰ্বে চানডুবিত অনুষ্ঠিত হোৱা বিশ্ব পৰ্যটন দিৱসৰ কাৰ্যসূচীত ভাগ লৈ অসমৰ পৰ্যটন মন্ত্ৰী চন্দন ব্ৰহ্ম আৰু এ টি ডি চি ৰ অধ্যক্ষ জয়ন্তমল্ল বৰুৱাই ‘ ভোকেল ফৰ লোকেল’ আঁচনিৰ আধাৰত স্থানীয় পৰ্যটকক চানডুবিলৈ আহিবলৈ আহ্বান জনাইছে। ইতিমধ্যে নিখিল ৰাভা ছাত্ৰ সন্থাৰ বৰদুৱাৰ,ভোলাগাঁও সমিতিয়েও পৰ্যটকক মুকলি মনৰে চানডুবিকে ধৰি কাষৰীয়া অঞ্চল ভ্ৰমণ কৰিবলৈ আহ্বান জনাইছে। তেনেদৰে চানডুবিৰ পৰ্যটনৰ ক্ষেত্ৰখনৰ উন্নয়নৰ হকে কাম কৰি অহা ‘ৰংমন ট্যুৰিজিম ছ’চাইটি’য়েও এই ক্ষেত্ৰত সহযোগিতাৰ হাত আগবঢ়াইছে। আনকি কিছুমান পূৰ্বে চ’চাইটিৰ আহ্বান মৰ্মে চানডুবি আৰু কাষৰীয়া অঞ্চল ভ্ৰমণ কৰিছিল শ্ৰীশ্ৰী সত্য সাই সেৱা সমিতি নামৰ এটা স্বেচ্ছাসেৱী সংগঠনে। সংগঠনটোৰ সভাপতি অধিবক্তা সত্যেন শৰ্ম্মাৰ নেতৃত্বত এটা দলে কিছুদিন পূৰ্বে ৰংমন ট্যুৰিজিম ছচাইটিৰ কৰ্মকর্তা প্ৰমোদ কলিতা, কল্যাণ ৰাভা, চাৰ্জন ৰাভা, উৎপল ৰাভা, প্ৰাণেশ্বৰ ৰাভাৰ সৈতে চানডুবি অঞ্চলটো ভ্ৰমণ কৰিছিল। ভ্ৰমণ কালত দলটোৱে চানডুবিত নৌকাবিহাৰ কৰি অঞ্চলটোৰ বাসিন্দা সকলৰ সৈতে মত বিনিময় কৰে।

 

তেনেদৰে দলটোৱে মেঘালয় সীমান্তৰ ৰাণীখামাৰ আৰু কাফানডবাৰ পৰা দক্ষিণ কামৰূপৰ, ছয়গাঁও আৰু কুকুৰমাৰৰ মাজেৰে বৈ যোৱা কলহী নদীৰ উৎপত্তিস্থল, উকিযাম নদীৰ উৎপত্তিস্থল দ্ৰোণ, শ্ৰী আৰু ঘনা পৰিদৰ্শন কৰে। ইয়াৰ উপৰি দলটোৱে বাৰেগাঁও, ৰাণীখামাৰ আদিত থকা কেবাটাও জলপ্ৰপাত চাই তাৰ নান্দনিক দৌন্দৰ্যত অভিভূত হৈ পৰে। যাৰবাবে শ্ৰী শ্ৰী সত্য সাই সেৱা সমিতিয়ে পৰ্যটন বিভাগ আৰু এ.টি.ডি.চিক চানডুবিকে ধৰি কাষৰীয়া অঞ্চলটোক এক টুৰিষ্ট হাবলৈ ৰূপান্তৰিত কৰিবলৈ দাবী জনাইছে। উল্লেখযোগ্য যে ইতিমধ্যে পৰ্যটনৰ লগত জড়িত কেবাটাও সংগঠনে তাত ‘হোম ষ্টে হোম’ অৰ্থাৎ ঘৰুৱা পৰিবেশত পৰ্যটকক আতিথ্য দি ৰখাৰ ব্যৱস্থা কৰিছে । ইয়াৰ উপৰিও পৰ্যটন বিভাগে চানডুবিত নিজা অতিথিশালা নিৰ্মাণ কৰিছে।

 

 

২০২০ বৰ্ষৰ কাব্য কানন বঁটা ঘোষণা- নিৰ্বাচিত হৈছে ৫গৰাকী কবি

অসমীয়া কবিতাৰ প্ৰচাৰ আৰু প্ৰয়াসৰ বাবে স্থাপন হোৱা অসম কাব্য কাননৰ ২০২০ বৰ্ষ কাব্য কানন বঁটা পাঁচগৰাকী কবিলৈ আগবঢ়োৱা হৈছে।অসম কাব্য কাননৰ সম্পাদক নৱ ৰাজনে জানিবলৈ দিয়া মতে এই বৰ্ষৰ কাব্য কানন বঁটাৰ বাবে ৰণজিৎ গগৈ,ৰাতুল কুমাৰ লাহন ,নীলাভ সৌৰভ,খঞ্জনা শৰ্মা,আৰু মিণ্টুল হাজৰিকা নিৰ্বাচিত হৈছে।

 

 

 

উল্লেখযোগ্য যে কাব্য কানন বাবে নিৰ্বাচিত এই কবি পাঁচজনৰ পাঁচখন কাব্য সংকলনে এই বঁটা নিৰ্বাচনত গুৰুত্বপূৰ্ণ ভূমিকা পালন কৰিছে। সেইসমূহ কাব্য সংকলন হ’ল বুকুৰ কোণৰ চৌফলীয়া ৰ’দ এজাক,পানীগছা,উত্তৰ আধুনিক ঘাঁ,পানীৰ দুৱাৰ আৰু ৰ’দৰ গান।

 

 

অহা ২৭ ডিচেম্বৰত গুৱাহাটীত অনুষ্ঠিত হ’ব লগীয়া অসম কাব্য কানন তৃতীয় বাৰ্ষিক অধিবেশনৰ মুকলি সভাত এই বঁটা সমূহ আনুষ্ঠানিক ভাৱে প্ৰদান কৰ আকাশবাণী গুৱাহাটী কেন্দ্ৰৰ সঞ্চালক ৰাজীৱ বৰুৱাই। আনহাতে এই অধিবেশনত বিশিষ্ট কবি সমালোচক ড° মৃদুল শৰ্মা,জেষ্ঠ কবি উদয় কুমাৰ শৰ্মা, শিশু সাহিত্যিক যুগললোচন দাস বিশিষ্ট অতিথি হিচাপে উপস্থিত থাকিব।