মাজুলীৰ সাংস্কৃতিক বিশ্ববিদ্যালয়ৰ ৱেবছাইটৰ আনুষ্ঠানিকভাৱে উন্মোচন কৰিলে মুখ্যমন্ত্ৰীয়ে

মুখ্যমন্ত্ৰী সৰ্বানন্দ সোনোৱালে আজি মাজুলীত মাজুলী সাংস্কৃতিক বিশ্ববিদ্যালয়ৰ ৱেবচাইটৰ এটা আনুষ্ঠানিক ভাৱে শুভ উন্মোচন কৰে।এই ৱেবচাইটতো হ’ল www.muoc.ac.in.এই ৱেবচাইটৰ জৰিয়তে দেশ বিদেশৰ ছাত্ৰ ছাত্ৰী,অভিভাৱকৰ লগতে পৰ্যটক সকলে বিশ্ববিদ্যালয়ৰ খনৰ বিভিন্ন তথ্য জানিব পাৰিব।

 

 

এই উপলক্ষে মাজুলী জিলাৰ উপায়ুক্ত কাৰ্যালয়ৰ সভাকক্ষত অনুষ্ঠিত সভাত ভাষণ প্ৰদান কৰি মুখ্যমন্ত্ৰীয়ে কয় যে ভৱিষ্যতৰ দিনত এই সাংস্কৃতিক বিশ্ববিদ্যালয়খনে অসমৰ বৃহত্তৰ সমাজক সাংস্কৃতিক দিশত ঐক্যবদ্ধ কৰি ৰখাত প্ৰমুখ্য ভূমিকা ল’ব লাগিব।বিশ্ববিদ্যালয়খনে সমন্বয়ক অধিক সমৃদ্ধ কৰাৰ লগতে অসমৰ সাংস্কৃতিক ভেটিটোক ভৱিষ্যতলৈ টনকিয়াল কৰি ৰখাৰ ক্ষেত্ৰত দিকনিৰ্ণায়ক ভূমিকা গ্ৰহণ কৰিব লাগিব।

 

এই বিশ্ববিদ্যালয়খন অন্যান্য বিশ্ববিদ্যালয়তকৈ পৃথক বুলি উল্লেখ কৰি মুখ্যমন্ত্ৰীয়ে কয় যে আমাৰ মাজত থকা সাংস্কৃতিক উপাদান সমূহ সৌন্দৰ্য প্ৰসাৰ আৰু প্ৰচাৰত সহায়ক হোৱাকৈ বিশ্ববিদ্যালয়খনে শিক্ষা প্ৰদান কৰিব লাগিব যাতে এই বিশ্ববিদ্যালয়ৰ পৰা শিক্ষা লোৱা ছাত্ৰ-ছাত্ৰী সকলে পেছাদাৰী শিক্ষা লাভ কৰি আমাৰ সাংস্কৃতিক জীৱন ধাৰাৰ লগতে সমাজক সাংস্কৃতিক মানসিকতাৰে আগুৱাই যোৱাৰ বাবে এক অনুকূল পৰিৱেশ সৃষ্টি কৰিব পাৰে।তেওঁ কয় যে বিশ্ববিদ্যালয়খনক অসমৰ সংস্কৃতিৰ এক উদ্যোগ হিচাপে গঢ়ি তুলিব লাগিব যাতে ছাত্ৰ-ছাত্ৰী সকলে ইয়াৰ পৰা সাংস্কৃতিক অনুষ্ঠান পৰিচালনাৰ বিষয়ে সঠিক জ্ঞান লাভ কৰিব পাৰে।

 

মুখ্যমন্ত্ৰীয়ে কয় যে অসমৰ খিলঞ্জীয়া জনগোষ্ঠীৰ সমূহৰ পৰম্পৰাগত লোকাচাৰ,জীৱনশৈলী ৰ বিষয়ে গৱেষণা কৰি পাঠ্যক্ৰম যুগুতোৱাত বিশ্ববিদ্যালয়খনে অধিক ভূমিকা গ্ৰহণ কৰিব লাগিব।সাংস্কৃতিক সমন্বয় ক্ষেত্ৰত এই বিশ্ববিদ্যালয়খনে বিশ্বৰ আন দেশৰ বাবে যাতে এক আদৰ্শ বিশ্ববিদ্যালয় হিচাপে আৰ্হি দাঙি ধৰিব পাৰে তাৰ বাবে সৰ্বাত্মক প্ৰয়াস চলাব লাগিব।তেওঁ লগতে কয় যে জৈৱ-বৈচিত্ৰতা আৰু সাংস্কৃতিক তথা আধ্যত্মিক উপাদানেৰে চহকী মাজুলী প্ৰেক্ষাপটত এই বিশ্ববিদ্যালয় খন উপযোগী হ’ব ।মুখ্যমন্ত্ৰীয়ে কয় যে বিশ্ববিদ্যালয়খন সুচাৰুৰূপে চলাই নিয়াৰ বাবে শিক্ষকৰ পদবী সমূহ শীঘ্ৰেই অনুমোদন জনোৱা হ’ব।

অনুষ্ঠানত বিশ্ববিদ্যালয়ৰ কৰ্তৃপক্ষই মুখ্যমন্ত্ৰীক বিশ্ববিদ্যালয়ৰ বিভিন্ন পাঠ্যক্ৰম আৰু অনান্য শিক্ষামূলক বিষয়ৰ বিষয়ে এটি প্ৰেজেন্টেশ্যান দিয়ে।সভাত ভাষণ প্ৰদান কৰি উপাচাৰ্য ড° ডম্বৰুধৰ নাথে মুখ্যমন্ত্ৰীক জনায় যে ২০২১ বৰ্ষৰ পৰা বিশ্ববিদ্যালয়খনে ৫ টা পাঠ্যক্ৰমত পাঠদান আৰম্ভ কৰিব।সম্প্ৰতি এই পাঠদান পূব মাজুলী মহাবিদ্যালয় শ্ৰেণী কোঠাত অস্থায়ীভাবে আৰম্ভ হ’ব বুলিও জনায়।বিশ্ববিদ্যালয়খনৰ পঞ্জীয়ক গৰাকীয়ে জনায় যে ইতিমধ্যে বিশ্ববিদ্যালয়ৰ অনুমোদন আয়োগে বিশ্ববিদ্যালয়ৰ খনৰ ডিগ্ৰী প্ৰদানৰ স্বীকৃতি প্ৰদান কৰিছে। এই মহাবিদ্যালয় খনৰ বাবে গড়মূৰৰ সমীপৰ লুইত নদী পাৰত ১০০ বিঘা মাটি আবন্টন দিয়া হৈছে।

 

আজি এই ৱেবচাইটৰ মুকলি অনুষ্ঠানত উত্তৰ কমলাবাৰী সত্ৰৰ সত্ৰাধিকাৰ জনাদৰ্ন দেৱগোস্বামী,শ্ৰীমন্ত শংকৰদেৱ কলাক্ষেত্ৰ সচিব সুদৰ্শন ঠাকুৰ,মাজুলী জিলা উপায়ুক্ত বিক্ৰম কৈৰী,মাজুলীৰ জিলা পৰিষদ সভানেত্রী পাপু হাজৰিকা দত্ত,বিশ্ববিদ্যালয়ৰ ভাৰপ্ৰাপ্ত পঞ্জিয়ক নৰনাৰায়ণ নাথ,বিশ্ববিদ্যালয়ৰ শৈক্ষিক পৰিষদৰ সদস্য ড° হেমচন্দ্ৰ গোস্বামী, আৰু হৰিচৰন ভূঞা বৰবায়ন প্ৰমুখ্য গণ্য মান্য ব্যক্তি সকল উপস্থিত থাকে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

চুক্তিত স্বাক্ষৰিত হ’ল গুৱাহাটীৰ আই আই টি আৰু উত্তৰ পূব কৰ্কট চিকিৎসালয় আৰু গৱেষণা প্ৰতিষ্ঠান

গুৱাহাটী আই আই টি আৰু যোৰহাটস্থিত উত্তৰ পূব কৰ্কট চিকিৎসালয় আৰু গৱেষণা প্ৰতিষ্ঠানৰ মাজত যোৱা ১৩ জানুৱাৰীত এক চুক্তি স্বাক্ষৰ কৰা হয়।উল্লেখ্য যে ২০১৪ চনৰ পৰাই এই চুক্তিৰ প্ৰাৰম্ভিক কাম-কাজ আৰম্ভ হৈছিল।

উত্তৰ-পূৰ্বৰ কৰ্কট ৰোগৰ সম্ভাৱনা থকা জনসংখ্যা চিনাক্ত কৰাৰ বাবে গৱেষণা পদ্ধতি উন্নত কৰাৰ প্ৰচেষ্টাত ইণ্ডিয়ান ইনষ্টিটিউট অফ টেকন’লজী,গুৱাহাটী (আই আই টি জি )আৰু উত্তৰ পূব কৰ্কট চিকিৎসালয় আৰু গৱেষণা প্ৰতিষ্ঠানৰ মাজত এই চুক্তি সম্পন্ন হৈছে।

লক্ষণীয়ভাৱে দুয়োটা প্ৰতিষ্ঠানে কৰ্কট ৰোগ নিৰ্ণয়,চিকিৎসা আৰু পুনৰাবৃত্তিৰ বাবে উপন্যাস বায়োমাৰ্কাৰ চিনাক্ত কৰাৰ প্ৰচেষ্টাত নিয়োজিত হৈ আছে।ইয়াৰ উপৰিও তেওঁলোকে সমগ্র পূৰ্বৰ কৰ্কট ৰোগীসকলক সহায় কৰাৰ বাবে চিকিৎসা পদ্ধতি বিকশিত কৰাত ব্যস্ত আছে।

এন আৰ এলক সৰ্বোত্তম পৰিচালিত কোম্পানী২০২০ বঁটাৰে পুৰস্কৃত

নুমলীগড় ৰিফাইনেৰী লিমিটেডক অগ্ৰণী ৰাষ্ট্ৰীয় পেছাদাৰী সংস্থা দ্য ইনষ্টিটিউট অব কোম্পানী চেক্ৰেটাৰীজ অব ইণ্ডিয়াৰ দ্বাৰা কৰ্পোৰেট পৰিচালনাত উৎকৃষ্টতাৰ বাবে সৰ্বোত্তম পৰিচালিত কোম্পানী আনলিষ্টেড লাৰ্জ হিচাপে ৰাষ্ট্ৰীয় বঁটাৰে বিভূষিত কৰিছে।প্ৰতিষ্ঠানটিয়ে এনআৰএলৰ কোম্পানী সচিব শ্ৰী এইচ কে শৰ্মাক বৰ্ষটোৰ গৱৰ্ণেন্স প্ৰফেছনেল হিচাপেও পুৰষ্কৃত কৰিছে।
এখন প্ৰশস্তি পত্ৰ আৰু ট্ৰফী সন্নিবিষ্ট এই বঁটাটো এনআৰএলৰ পৰিচালন সঞ্চালক এছ কে বৰুৱাক অধ্যক্ষ আশিষ গাৰ্গে দ্বাৰা যোৱা ১৩ জানুৱাৰীত নতুন দিল্লীত প্ৰদান কৰা হয়।পুৰস্কাৰ সমাৰোহত ভাৰ্চুৱেল মাধ্যমেৰে যোগদান কৰে ভাৰত চৰকাৰৰ মাননীয় কেন্দ্ৰীয় ৰেল,বাণিজ্য আৰু উদ্যোগ,উপভোক্তা পৰিক্ৰমা,খাদ্য আৰু ৰাজহুৱা বিতৰণ মন্ত্ৰী শ্ৰী পীয়ূশ গোৱেল ,আদিত্য বিৰলা গ্রুপৰ অধ্যক্ষ কুমাৰ মঙ্গলম বিৰলা আৰু আইচিএছআইৰ সদস্য সকলে।কৰ্পোৰেট গৱৰ্ণেন্সত এই আইচিএছআই ৰাষ্ট্ৰীয় বঁটাটিয়ে কৰ্পোৰেট গৱৰ্ণেন্সত প্ৰচলিত সৰ্বোত্তম প্ৰথাক স্বীকৃতি প্ৰদান কৰে আৰু কৰ্পোৰেট খণ্ডত ভাল গৱৰ্ণেন্স আৰু সামাজিক দায়বদ্ধতাৰ সংস্কৃতিৰ উৎকৰ্ষ সাধন কৰে।

১৭জানুৱাৰীৰ পৰা কলাক্ষেত্ৰত অনুষ্ঠিত হ’ব ৰূপকোঁৱৰ নাট্য উৎসৱ

অসমীয়া সংস্কৃতিৰ প্ৰাণকেন্দ্ৰ শ্ৰীমন্ত শংকৰদেৱ কলাক্ষেত্ৰই এই বছৰৰ পৰা আয়োজন কৰিবলৈ প্ৰয়াস কৰিছে নাট্য চৰ্চাৰ এক বিশেষ অনুষ্ঠান ৰূপকোঁৱৰ নাট্য উৎসৱ।অসমৰ সাহিত্য আৰু সংস্কৃতিৰ ৰূপকাৰ জ্যোতিপ্ৰসাদ আগৰৱালা দেৱৰ পবিত্ৰ স্মৃতিত নিবেদন কৰা হ’ব চৌখিন নাট্য সম্ভাৰ।

প্ৰথমবাৰৰ বাবে অহা ১৭ জানুৱাৰী পৰা ১৯ জানুৱাৰীলৈ শ্ৰীমন্ত শংকৰদেৱ কলাক্ষেত্ৰৰ শ্ৰীশ্ৰী মাধৱদেৱ আন্তৰ্জাতিক প্ৰেক্ষাগৃহত তিনিদিনীয়া কাৰ্যসূচীৰে ৰূপকোঁৱৰ নাট্য উৎসৱ আৰম্ভ হব।১৭ জানুৱাৰী শিল্পী দিৱসৰ দিনা শুভাৰম্ভ হ’বলগীয়া নাট্য উৎসৱৰ প্ৰথম নাট্য নিবেদন জ্যোতিপ্ৰসাদ আগৰৱালাৰ কালজয়ী নাটক কাৰেঙৰ লিগিৰী। বিশিষ্ট অভিনেতা পৰিচালক প্ৰাঞ্জল শইকীয়াৰ পৰিচালনাত নাটখনি প্ৰয়োজনা কৰিছে যোৰহাটৰ কৃষ্টিৰ পথাৰ নাট্য গোষ্ঠীয়ে।

১৮ জানুৱাৰী দিনা নাটক কবিগুৰু ৰবীন্দ্ৰনাথ ঠাকুৰৰ মূল কাহিনী শ্ৰীপত্ৰৰ আধাৰত ইতি মৃণালিনী।ৰাষ্ট্ৰীয় নাট্য বিদ্যালয়ৰ স্নাতক অসমৰ গৌৰৱ ৰবিজিতা গগৈৰ অভিযোজনা, পৰিকল্পনা আৰু পৰিচালনাৰে জিৰচং থিৰেটাৰে এই মননশীল নাটখন উপস্থাপন কৰিব। তৃতীয় দিনা ১৯ জানুৱাৰী সন্ধ্যাৰ নাট্য প্ৰযোজনা ৰাষ্ট্ৰীয় খ্যাতি সম্পন্ন নাট্যগোষ্ঠী পূৰ্বৰংগ’ৰ ঘটোৎকচ পুত্ৰ মোৰ। নাট্যকাৰ মৃণ্ময় ভূঞাৰ অভিনৱ নাট্য ৰচনাৰে পৰিকল্পনা পৰিচালনা আৰু সংগীত বিশিষ্ট অভিনেতা নাট পৰিচালক গুণাকৰ দেৱ গোস্বামীৰ।

শ্ৰীমন্ত শংকৰদেৱ কলাক্ষেত্ৰ শ্ৰীশ্ৰী মাধৱদেৱ আন্তৰ্জাতিক প্ৰেক্ষাগৃহত প্ৰতিদিনে সন্ধিয়া ৬-৩০ বজাত আৰম্ভ হ’ব লগীয়া এই নাট্যনুষ্ঠান পূৰ্বে প্ৰেক্ষাগৃহ প্ৰাংগনত সন্ধিয়া ৫-৩০ বজাত অনুষ্ঠিত হ’ব পূৰ্বৰংগ অনুষ্ঠান।এই অনুষ্ঠানত প্ৰথমদিনা কামৰূপী ঢুলীয়া চাৰকাছ,দ্বিতীয় দিনা পুতলা নাট্য আৰু তৃতীয় মুকাভিনয়ৰ এক বিশেষ কাৰ্যসূচী ব্যৱস্থা কৰা হৈছে।নাট্য উৎসৱৰ আটাইকেইদিনৰ নাট্য সন্ধিয়াত সমূহ নাট্যপ্ৰেমী ৰাইজৰ উপস্থিতি কলাক্ষেত্ৰ সমাজে কামনা কৰিছে।

কৃষি বিজ্ঞান কেন্দ্ৰত দুদিনীয়া ভোগালী মেলাৰ সামৰণি

বি জে পিৰ গুৱাহাটী মহানগৰ জিলা মহিলা মৰ্চাৰ উদ্যোগত ৰাণীমণ্ডল মহিলা মৰ্চা আৰু আজাৰা কাহিকুছিস্থিত কৃষি বিজ্ঞান কেন্দ্র কামৰূপৰ সহযোগত কেন্দ্ৰ চৌহদত ১১ আৰু ১২জানুৱাৰীত দুদিনীয়াকৈ ভোগালী মেলা অনুষ্ঠিত হয় । মেলাত বিভিন্ন প্ৰান্তৰ ১২ টা মহিলা আত্মসহায়ক গোটে ভাগ লৈ তেওঁলোকে প্রস্তুত কৰা সা-সামগ্ৰী সমূহ প্ৰদৰ্শন আৰু বিক্ৰীৰ ব্যৱস্থা কৰে।১১ জানুৱাৰীত ভোগালী মেলাৰ শুভ উদ্ধোধন কৰে গুৱাহাটীৰ সাংসদ কুইন ওজাই। এই উপলক্ষে বি জে পি ৰ ৰাণী মণ্ডলৰ সভাপতি হৰকান্ত নাথে আঁত ধৰা অনুষ্ঠানত সাংসদ কুইন ওজাই এনে ধৰণৰ মেলা অনুষ্ঠিত কৰি মহিলা আত্মসহায়ক গোট সমূহক লাড়ু,পিঠা, সান্দহ ,চিৰাকে ধৰি ভোগালী বিহু উপলক্ষে তেওঁলোকৰ উৎপাদিত সামগ্ৰী সমূহ বিক্ৰী আৰু প্ৰদৰ্শনৰ সুবিধা কৰি দিয়া বাবে উদ্যোক্তাত সকলৰ শলাগ লয় । অনুষ্ঠানত কৃষি বিজ্ঞান কেন্দ্র,কামৰূপৰ মুৰব্বী ডঃ ধীৰেন্দ্ৰনাথ কলিতা, বি জে পিৰ ৰাজ্যিক কাৰ্য্যনিৰ্বাহক সদস্যদ্বয় ক প্রশান্ত মহন্ত আৰু অশোক কুমাৰ ভঁৰালী , গুৱাহাটী জিলা কমিটিৰ সম্পাদক বলেশ্বৰ ৰংপী,ৰামচাৰাণী জিলা পৰিষদৰ সদস্যা আৰু ৰাণী মণ্ডল মহিলা মৰ্চাৰ সভানেত্রী শিখা নাথ চৌধুৰী , প্ৰাক্তন সভানেত্ৰী গিৰিজা মেধীকে ধৰি কেবাজনো কৰ্মকর্তা , কৃষি বিজ্ঞান কেন্দ্ৰৰ বিজ্ঞানী মধুস্মিতা ডেকাকে ধৰি কেবাজনো বিষয় ববীয়া আৰু আত্মসহায়ক গোট সমূহৰ কৰ্মকর্তা সকল উপস্থিত থাকে ।

ভাৰতীয় সেনা দিৱসৰ প্ৰসংগৰে

আজি ভাৰতীয় সেনাৰ বাবে বিশেষ দিন।কিয়নো প্ৰতিবছৰে ১৫ জানুৱাৰী দিনটো ভাৰতীয় সেনা দিৱস হিচাপে উদযাপন হৈ আহিছে।এই বিশেষ দিনটোত ভাৰতীয় সেনা,ত্যাগ আৰু সাহসক স্মৰণ কৰা হয়। ভাৰতীয় সেনা দিৱস উপলক্ষে দেশৰ প্ৰধানমন্ত্ৰী নৰেন্দ্ৰ মোদীয়ে সেনাৰ বীৰত্বক স্মৰণ কৰিছে । চি ডি এচৰ বিপিন ৰাৱতেও সেনাৰ বীৰত্ব,ত্যাগক প্ৰশংসা কৰিছে।

ভাৰতীয় সেনা দিৱস উদযাপনৰ অন্ততৰালত দুটা মুখ্য কাৰণ আছে। ইয়াৰে অন্যতম কাৰণ হ’ল দেশৰ স্বাধীনতাৰ পিছত অৰ্থাৎ ১৯৪৭ চনৰ ১৫ আগষ্ট পিছত ১৯৪৯ চনৰ আজি দিনটোতে ভাৰতীয় সেনা ব্ৰিটিছ সেনাৰ পৰা মুক্ত হৈছিল।আজি দিল্লীৰ ইণ্ডিয়া গেটত থকা অমৰ জোৱান জ্যোতিত শ্বহীদক শ্ৰদ্ধাঞ্জলি জ্ঞাপন কৰা হয়।লগতে শ্বহীদৰ পৰিয়ালক সন্মানিত কৰা হয়।

১৬জানুৱাৰীৰ পৰা অসমত আৰম্ভ হ’ব ক’ভিড১৯ প্ৰতিষেধক প্ৰদান প্ৰক্ৰিয়া

১৬ জানুৱাৰীৰ পৰা অসমত আৰম্ভ হ’ব ক’ভিড-১৯ ৰ প্ৰতিষেধক প্ৰদানৰ প্ৰক্ৰিয়া। মুখ্যমন্ত্ৰী সৰ্বানন্দ সোনোৱালে উক্ত দিনা আনুষ্ঠানিক ভাৱে ভেকচিন প্ৰদান প্ৰক্ৰিয়াৰ শুভাৰম্ভ কৰিব।

গুৱাহাটীৰ হেঙেৰাবাৰীস্থিত স্বাস্থ্যসেৱা সঞ্চালকালয়ৰ কাৰ্যালয়ত মজুত কৰি ৰখা হৈছে দুই লক্ষাধিক ক’ভিড ভেকচিন।ইয়াৰে একাংশ প্ৰতিষেধক আজি বৰাক উপত্যকাৰলৈ যোৱা হ’ব।