মাদক দ্ৰব্য বিৰোধী অভিযানত তুষাৰে অকলেই পদক্ষেপ গ্ৰহণ কৰিছে

বিষাক্ত সুৰা সেৱন কৰি গোলাঘাট আৰু যোৰহাটৰ ডেৰ শতাধিক লোকৰ মৃত্যু হোৱাৰ পাছত চৰ্চালৈ আহিছে যোৰহাটৰ মৰিয়নিৰ এজন ব্যক্তিৰ নাম। এখন সুৰা মুক্ত, সুন্দৰ, সুস্থ সৱল সমাজ গঢ় দিয়াৰ লক্ষ্যৰে যোৰহাট চেলেংহাটৰ এজন ব্যক্তিয়ে নীৰৱে চলাই আহিছে এই অভিযান, এই ব্যক্তিজন হ’লে ৰাষ্ট্ৰীয় পুৰস্কাৰপ্ৰাপ্ত এজন শৰীৰ চৰ্চাবিদ। নাম তুষাৰ পাল। ২০১২ চনৰ পৰাই সুন্দৰ, সুস্থ -সৱল এখন সমাজ গঢ় দিয়াৰ লক্ষ্যত আত্মনিয়োগ কৰি তুষাৰ পালে অসমৰ ইমূৰৰ পৰা সিমূৰলৈ সুৰাৰ বিৰুদ্ধে  নীৰৱে অভিযান চলাই আহিছে। নৱপ্ৰজন্মক স্বাস্থ্যৰ প্ৰতি সজাগ কৰাৰ বাবে আৰু সুৰামুক্ত অসম গঢ় দিয়াৰ লক্ষ্যৰে ২০১৫ চনত এই ব্যক্তি গৰাকীয়ে শদিয়াৰ পৰা ধুবুৰীলৈ একক ভাৱে সম্পন্ন কৰিছিল চাইকেল ৰেলী। যোৰহাট জিলাৰ চেলেংহাট নামচেচুৰ বাসিন্দা তুষাৰ পাল বৃত্তিত এগৰাকী ক্ষুদ্ৰ চাহ খেতিয়ক। কিন্তুু সমাজৰ দহ জন ব্যক্তিৰ দৰে মাত্ৰ নিজ কৰ্ম আৰু ধন উপাৰ্জনতে ব্ৰতী নাথাকি সমাজৰ হিতৰ বাবে কেইবা দশক ধৰি কাম কৰি আহিছে তুষাৰ পালে। ইতিমধ্যে তুষাৰ পালে আসাম প্ৰেছ ক’ৰেচপ্ৰণ্ডেন্টছ ইউনিয়ন চমুকৈ (আপকু)ৰ সহযোগত সুৰা আৰু ড্ৰাগছৰ বিৰোধে সমগ্ৰ অসমতে সজাগতা অনাৰ প্ৰচেষ্টা গ্ৰহণ কৰি ৰাইজৰ মাজত ২০ হাজাৰ লিফ লেট বিতৰণ কৰা লগতে ধুবুৰীৰ পৰা শদিয়ালৈ ১৫ হাজাৰৰো অধিক গণ স্বাক্ষৰ গ্ৰহণ কৰি ২০১৭ চনত ৰাজ্য চৰকাৰলৈ প্ৰেৰণ কৰিছিল। আনহাতে তুষাৰ পালে বিভিন্ন গাঁও আৰু বাগিছাত মাদক দ্ৰব্যৰ বিৰোধে যুঁজ দি আৰম্ভ কৰিছিল “নিচা মুক্তি” নামৰ এক অভিযান। তুষাৰ পালে নিজা খৰচত বিভিন্ন স্থানত সজাগতা সভা, ৰেলী, বক্তৃতা প্ৰতিযোগিতা, বাটৰ নাট প্ৰদৰ্শন কৰি ৰাইজক ৰাগীয়াল দ্ৰব্যৰ বিৰুদ্ধে সজাগ কৰিবলৈ চেষ্টা কৰি আহিছে। আনহাতে গাঁও আৰু বিভিন্ন অনুষ্ঠান প্ৰতিষ্ঠানত তুষাৰ পালে বিনামূলীয়াকৈ যোগ প্ৰণায়মৰ বিশেষ প্ৰশিক্ষণ শিৱিৰ আয়োজন কৰি বহু লোকক ৰাগিয়াল দ্ৰব্যৰ কৱলৰ পৰা মুক্ত কৰিবলৈ সক্ষম হৈছে। ৰাগীয়াল দ্ৰব্যৰ কুপ্ৰভাৱৰ ওপৰত তুষাৰ পালৰ নিজৰ কাহিনী আৰু পৰিচালনাত “ঘাটক” আৰু “পিকনিক” নামেৰে দুখন ছুটী ছবি নিৰ্মাণ কৰি ৰাইজৰ মাজত সচেতনতা আনিবৰ বাবে বিভিন্ন স্থানত ছবিখন প্ৰদৰ্শন কৰি আহিছে। তুষাৰ পালে ২০১৮ চনৰ ২ ফেব্ৰুৱাৰীত গুজৰাত, বিহাৰকে ধৰি সুৰা নিষিদ্ধ ৰাজ্যসমূহৰ দৰে অসমকো সুৰা নিষিদ্ধ ৰাজ্য ঘোষণা কৰাৰ দাবী জনাই প্ৰধানমন্ত্ৰীলৈ পত্ৰ লিখিছিল। সেই চিঠিৰ প্ৰত্যুত্তৰো আহিল মোডীৰ কাৰ্য্যালয়ৰ পৰা। সুৰাৰ প্ৰচলন হ্ৰাস কৰাৰ প্ৰতিশ্ৰুতি দি অসম চৰকাৰক এই বিষয়ত গুৰুত্ব প্ৰদান কৰিবৰ বাবে আহ্বান জনাব বুলি প্ৰধামন্ত্ৰীৰ পৰা আশ্বাস লাভ কৰিছিল তুষাৰ পালে। কিন্তু কাৰ্যত অসম চৰকাৰে গাঁও তথা চাহ বাগিছাৰ অলিয়ে গলিয়ে চলি থকা অবৈধ সুৰাৰ বিৰুদ্ধে কোনো পদক্ষেপ গ্ৰহণ নকৰা বাবেই বিষাক্ত সুৰা সেৱন কৰি ডেৰ শতাধিক লোকে মৃত্যুক আঁকোৱালি ল’লে বুলি ক্ষোভ প্ৰকাশ কৰে তুষাৰ পালে।আনহাতে নিজৰ আৰ্জিত অধিকাংশ ধন আৰু সময় এখন সুন্দৰ, সুস্থ সৱল সমাজ গঢ় দিয়াৰ লক্ষ্যৰে আৰম্ভ কৰা নিচা মুক্তি অভিযানত ব্যয় কৰি আহিছে তুষাৰ পালে। চৰকাৰ তথা সমাজৰ সকলো স্তৰৰ লোকৰ যথোচিত সহায় সহযোগ লাভ কৰিলে তুষাৰ পালৰ নিচা মুক্তি অভিযানে এদিন নিশ্চয়কৈ সাৰ্থক ৰূপ লাভ কৰিব।   খবৰ যুগুতালে  মৰিয়নিৰপৰা জ্যোতি প্ৰসাদ গগৈয়ে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

আকাশবাণী নগাঁও কেন্দ্ৰৰ সৌজন্যমূলক সাহিত্য অনুষ্ঠানে শ্ৰুোতাৰ মন জয় কৰিছে

আকাশবাণী নগাঁও কেন্দ্ৰই যোৱা চাৰিমাহ ধৰি প্ৰতি সপ্তাহৰ মঙ্গল আৰু শুক্ৰবাৰে পুৱা ৯.১৫ত প্ৰচাৰ কৰি অহা সৌজন্যমূলক সাহিত্য অনুষ্ঠানটিয়ে সচেতন শ্ৰুোতাৰ মনোযোগ আকৰ্ষণ কৰিবলৈ সক্ষম হৈছে।উল্লেখযোগ্য যে এই অনুষ্ঠানটিৰ যোগেদি নপুৰণি লেখক লেখিকা সকলে তেওঁলোকৰ সদ্যপ্ৰকাশিত গল্প, প্ৰৱন্ধ,কবিতা, নাটক,উপন্যস আদি গ্ৰন্থসমূহৰ পৰিচয় শ্ৰুোতা সমাজৰ আগত দাঙি ধৰাৰ উপৰিও লেখক সকলক  পৰিচয় কৰাই দিয়া হয়।

 

 

ইতিমধ্যে অসমৰ কেবাগৰাকী প্ৰতিষ্ঠিত কবি আৰু লেখকে এই অনুষ্ঠানটিত ভাগ লৈছে ।তদুপৰি, সম্প্ৰতি কেন্দ্ৰটোৰ পৰা প্ৰচাৰ হৈ থকা ডাঃ নৰেন কুটুমৰ “ভালপোৱাৰ কথোপকথন” নামৰ কবিতা সংকলনখনৰ সমূহ কবিতা সংগীত সংযোজনাৰে ধাৰাবাহিক ভাবে প্ৰচাৰ কৰি এক ব্যতিক্ৰমী  অনুষ্ঠান কেন্দ্ৰটিয়ে শ্ৰুোতাক উপহাৰ দিবলৈ সক্ষম হৈছে।

খবৰ যুগুতালে ৰাহুল দেৱ বৰদলৈয়ে

কাহিকুছি গাঁও পঞ্চায়তত প্ৰকৃত হিতাধিকাৰীক পি.এ. ওৱাইৰ গৃহ আবণ্টনৰ তৎপৰতা

দৰিদ্ৰ সীমা ৰেখাৰ তলত বাস কৰা যিসকল লোকৰ থাকিবৰ বাবে উপযুক্ত গৃহ নাই তেনে প্ৰকৃত হিতাধিকাৰীক প্ৰধানমন্ত্ৰীৰ আবাস যোজনাৰ (পি.এ. ওৱাই) অধীনত গৃহ আবন্টনৰ বাবে তৎপৰতা আৰম্ভ কৰিছে পশ্চিম গুৱাহাটী সমষ্টিৰ ৰাণী উন্নয়ন খণ্ডৰ অধীনৰ কাহিকুছি গাওঁ পঞ্চায়তে।

 

এই তৎপৰতাৰ অংশ হিচাপে কাহিকুছি গাঁও পঞ্চায়তৰ সভাপতি জগন্নাথ ঠাকুৰীয়া আৰু ৰাণী আঞ্চলিক পঞ্চায়তৰ সদস্য ৰজিদা বেগমৰ নেতৃত্বত ৰাণী উন্নয়ন খণ্ড বিষয়া কাৰ্যালয়ৰ এটা দলে ২০ অক্টোবৰত সংখ্যালঘু বসতি প্ৰধান বঙৰা পাচনিয়াপাৰাৰ ইছলামপুৰ অঞ্চল পৰিদৰ্শন কৰে। উক্ত অঞ্চলটোৰ কোন কোন প্ৰকৃত হিতাধিকাৰীক গৃহ আবণ্টন দিব লাগিব তাৰ এক চৰজমিন জৰীপ চলায়। জৰীপ কাৰ্যৰ সময়ত ৰানী খণ্ড উন্নয়ন বিষয়া কাৰ্যালয়ৰ সহকাৰী অভিযন্তা শংকৰ দাস, গাণনিক অখিল কলিতা, গাঁও পঞ্চায়ত সমন্বয়ক স্বপন কুমাৰ দাস, কাঁহিকুছি গাঁও পঞ্চায়তৰ ৬ নং ৱাৰ্ডৰ সদস্য আজেদা বেগম উপস্থিত থাকে।

 

আনহাতে দলটোৱে পি.এ. ওৱাইৰ গৃহ পাবলগীয়া কেবাটাও হিতাধিকাৰীৰ গৃহ চৌহদ পৰিদৰ্শন কৰি তেওঁলোকৰ আৰ্থিক অৱস্থাৰ বুজ লয়। ইয়াৰ উপৰিও দলটোৱে অঞ্চলটোৰ ৰাইজৰ সৈতে বাট-পথ, খোৱাপানীকে ধৰি বিভিন্ন বিষয়ত মত বিনিময় কৰে। এই ক্ষেত্ৰত পঞ্চায়তৰ সভাপতি জগন্নাথ ঠাকুৰীয়া আৰু আঞ্চলিক পঞ্চায়তৰ সদস্যা ৰজিদা বেগমে সকলো ধৰণৰ সহায়- সহযোগিতাৰ আশ্বাস প্ৰদান কৰে।

উৎকৃষ্ট প্ৰদৰ্শনৰ বাবে নামৰূপ সাৰ কাৰখানাই লাভ কৰিলে দেশৰ ভিতৰতে প্ৰথম স্থান

স্বচ্ছতা পোখৰাত অংশগ্ৰহণ কৰি দেশৰ ভিতৰতে প্ৰথম স্থান লাভ কৰিলে নামৰূপ সাৰ কাৰখানাই। প্ৰতিবছৰৰ দৰে এইবাৰো ভাৰত চৰকাৰৰ সাৰ মন্ত্ৰালয়ৰ অধীনত ১ ছেপ্টেম্বৰ পৰা ১৫ ছেপ্টেম্বৰলৈ অনুষ্ঠিত হয় স্বচ্ছতা পষেক।

 

 

উদ্যোগটোৰ মুখ্য প্ৰশাসনিক বিষয়া প্ৰণৱ কুমাৰ ভট্টাচাৰ্যই জনোৱা মতে নামৰূপ সাৰ কাৰখানা অধ্যক্ষ তথা পৰিচালক অসীম কুমাৰ ঘোষে ২৭ অক্টোবৰত নতুন দিল্লীত আয়োজিত এক অনুষ্ঠানত সাৰ সচিবৰ পৰা এই বঁটা গ্ৰহণ কৰিব।এই প্ৰতিযোগিতাত নামৰূপস্থিত বি ভি এফ চি এলে প্ৰথম স্থান,নেচনেল ফাৰ্টিলাইজাৰ লিমিটেডে দ্বিতীয় স্থান আৰু FCI Aravail Gypsum ands minerals India LTD য়ে তৃতীয় স্থান লাভ কৰিবলৈ সক্ষম হয়।

দৰঙৰ গ্ৰামাঞ্চলৰ প্ৰতিভাধৰে নীটত আজুৰিলে খ্যাতি

ক’ভিড-১৯ ৰ দুৰ্যোগৰ সময়তে অহা শাৰদীয় দুৰ্গোৎসৱৰ প্ৰাক ক্ষণত দৰং জিলাৰ অতি দুৰ্গম অঞ্চলৰ আৰু দুখীয়া পৰিয়ালৰ এটি সন্তানৰ সাফল্যৰ আনন্দৰ বতৰা কঢিয়াই আনিছে৷ জিলাখনৰ ছিপাঝাৰ বিধানসভা সমষ্টিৰ অন্তৰ্গত কুৰুৱা অঞ্চলৰ এক নম্বৰ শুক্তাগুৰি গাঁৱৰ সন্তান অমন প্ৰধানে দাৰিদ্ৰকো প্ৰতিহত কৰি সৰ্বভাৰতীয় পৰ্যায়ৰ অলপতে ঘোষিত ” নীট” পৰীক্ষাত ৪৬২ নম্বৰ সহ উজ্বলি উঠিছে৷

 

গুৱাহাটীৰ এখন ব্যক্তিগত খণ্ডৰ শিক্ষানুষ্ঠানৰ কৰ্মচাৰী জগত প্ৰধানৰ সন্তান অমনে উচ্চতৰ মাধ্যমিকত ৮৫.৫০ শতাংশ নম্বৰেৰে বাইহাটা চাৰিআলিৰ এখন শিক্ষানুষ্ঠানৰ পৰা উত্তীৰ্ণ হৈছিল ৷ ইয়াৰ মাজতে ২০১৮ ত মাতৃহাৰা হৈছিল আমন ৷
প্ৰতিভাধৰ গৰাকীৰ এই সফলতাৰ বতৰা পোৱাৰ লগে লগে দৰঙৰ উপায়ুক্ত দিলীপ কুমাৰ বৰা আৰু আৰক্ষী অধীক্ষক অমৃত ভূঞাই আজি মঙলদৈত আৰ্থিক অনুদান, ফুলাম গামোছাসহ পুত্ৰ-পিতাক উষ্ম অভিনন্দন জ্ঞাপন কৰে৷

 

উপায়ুক্ত আৰু আৰক্ষী অধীক্ষক দুয়োগৰাকীয়ে অমনৰ পৰৱৰ্তী চিকিৎসা বিজ্ঞানৰ শিক্ষা গ্ৰহণত পাৰ্যমানে সহযোগ কৰিব বুলি উৎসাহ প্ৰদান কৰে ৷ এই অভিনন্দন অনুষ্ঠানত যুৱনেতা ভাৰ্গৱ কুমাৰ দাস, হেমন্ত কুমাৰ বৰুৱাইয়ো অমনৰ সহযাত্ৰীৰূপে অংশগ্ৰহণ কৰে ৷