মুখ্যমন্ত্ৰীক দুখন নতুন অভয়াৰণ্য গঠনৰ প্ৰস্তাৱ দিলে নেচাৰ্ছ বেকনে

গোৱালপাৰা জিলা প্ৰাচীন কামৰূপ তথা অসমৰ এটা প্ৰাচীনতম অঞ্চল। হাজাৰ হাজাৰ বছৰ ধৰি এই অঞ্চল ভাৰতীয় সভ্যতাৰ লগত সংপৃক্ত হৈ আছে। গোৱালপাৰা অঞ্চলত পোৱা প্ৰাচীন মন্দিৰ, বৌদ্ধ মঠ, শিলালিপি,স্বৰ্ণমুদ্ৰা আৰু প্ৰাচীন প্ৰত্ন-সম্পদে তাৰ সাক্ষ্য বহন কৰি আহিছে। ভাৰতৰ প্ৰাচীনতম শিলৰ গণেশ মন্দিৰ, ভাৰতৰ অন্যতম প্ৰাচীন বৌদ্ধ স্তুপ আৰু মূৰ্তিখচিত শিলা মন্দিৰ শ্ৰীসূৰ্য পাহাৰ তাৰে উৎকৃষ্ট নিৰ্দশন। অৰণ্য আৰু বন্যপ্ৰাণীৰ বাসভূমি হিচাপে গোৱালপাৰা অঞ্চল অত্যন্ত সমৃদ্ধ। গোৱালপাৰাৰ অৰণ্য অসমৰ বনৰীয়া হাতীবোৰৰ প্ৰধান বাসস্থান তথা আশ্ৰয়স্থল। গোৱালপাৰাৰ অৰণ্য অসংখ্য স্তন্যপায়ী বন্যপ্ৰাণী আৰু বনৰীয়া চৰাইৰ বাসস্থান। ইমান সমৃদ্ধশালী বন্যপ্ৰাণীৰ বাসস্থান হোৱাৰ পিছতো গোৱালপাৰাৰ অৰণ্য আৰু বন্যপ্ৰাণীবোৰৰ সংৰক্ষণৰ বাবে আজিলৈকে কোনো স্থায়ী সংৰক্ষণ পদক্ষেপ লোৱা হোৱা নাই। গোৱালপাৰাৰ অৰণ্য আৰু বন্যপ্ৰাণীবোৰ চৰম ৰূপত অৱহেলিত হৈ আহিছে। ভাৰত স্বাধীন হোৱাৰ পিছতো অসমৰ কোনো এজন মুখ্যমন্ত্ৰীয়ে এই গোৱালপাৰাৰ অৰণ্য আৰু বন্যপ্ৰাণীক গুৰুত্ব প্ৰদান কৰা নাই। এই অৱহেলাৰ ফলত গোৱালপাৰা অঞ্চলৰ অৰণ্য আৰু বন্যপ্ৰাণীৰ যথেষ্ট ক্ষতিসাধন হৈছে। অৰণ্য বেদখল, কাঠৰ চোৰাং কাৰবাৰ, বন্যপ্ৰাণীৰ অবৈধ চিকাৰ আৰু বন্যপ্ৰাণীৰ অংগ-প্ৰত্যংগৰ অবৈধ ব্যৱসায়ৰ লগতে খেতিৰ বাবে অৰণ্য অপসাৰণ কৰি খেতি মাটি মোকলোৱাৰ ফলত গোৱালপাৰা জিলাৰ অধিকাংশ অৰণ্য আজি প্ৰায় ধ্বংস হোৱাৰ পথত। এটা সময়ত পূৰ্ব-পাকিস্তানৰ পৰা অহা জনস্ৰোতেও গোৱালপাৰা জিলাৰ বহুত বনাঞ্চল বেদখল কৰি ধ্বংস কৰিছে। এটা সময়ত গোৱালপাৰাৰ অৰণ্যত বহুত বনৰীয়া গৰু পোৱা গৈছিল কিন্তু মাংসৰ বাবে এই গৰুবোৰক হত্যা কৰি গোৱালপাৰাৰ অৰণ্যৰ পৰা বনৰীয়া গৰুবোৰক নিঃশেষ কৰি দিয়া হৈছে। গোৱালপাৰাৰ অৰণ্যত আগতে প্ৰচুৰ হলৌ বান্দৰ পোৱা গৈছিল। আমি সকলোৱে জানো যে হলৌ ভাৰতত পোৱা একমাত্ৰ বন মানুহ। গোৱালপাৰাত পূৰ্বতে ইমানে হলৌ আছিল যে বৰ্তমান গোৱালপাৰা চহৰৰ মাজমজিয়াত থকা এখন পাহাৰৰ নাম হলৌ কান্দা পাহাৰ। কিন্তু আমাৰ দুৰ্ভাগ্য যে বৰ্তমান গোৱালপাৰাৰ অৰণ্যত হলৌ বিচাৰি পোৱা নাযায়। গোৱালপাৰাৰ অৰণ্য ধ্বংসই গোৱালপাৰাৰ পৰা হলৌ বান্দৰক নিশ্চিহ্ন কৰি দিছে। বৰ্তমান গোৱালপাৰা জিলাৰ যি নামমাত্ৰ বনভূমি আৰু অমূল্য বন্যপ্ৰাণীয়ে বৰ্তমান অস্তিত্ব ৰক্ষা কৰি জীয়াই আছে তাক অতি শীঘ্ৰে স্থায়ী ৰূপত সংৰক্ষণ কৰাটো অতি প্ৰয়োজন।
*গোৱালপাৰা জিলাৰ দুখন অত্যন্ত সমৃদ্ধশালী অৰণ্যৰ নাম পঞ্চৰত্ন অৰণ্য আৰু অজগৰ অৰণ্য।* উত্তৰ-পূব ভাৰতৰ পৰিৱেশ সংৰক্ষণকাৰী গোষ্ঠী নেচাৰ্চ বেকনে যোৱা দহ বছৰৰ অধিক কাল ধৰি এই দুই অৰণ্যৰ বন্যপ্ৰাণী অধ্যয়নৰ কামত ব্ৰতী হৈ আছে। এই দুখন অৰণ্য বনৰীয়া হাতীবোৰৰ প্ৰধান আশ্ৰয়স্থল। বনৰীয়া হাতীৰ বাহিৰেও—নাহৰফুটুকী বাঘ (Leopard), লাজুকী বান্দৰ (Slow Loris), খুটীয়া পহু (Hog Deer), সুগৰী পহু (Barking Deer), শৰ পহু (Sambar), মাটি ভালুক (Sloth Bear), বিণ্টুৰং (Binturong), কেটেলা পহু (Indian Porcupine), বনৰৌ (Indian Pangolin), কেঁকোৰা খোৱা নেউল (Crabeating Mongoose) আদি অসংখ্য স্তন্যপায়ী বন্যপ্ৰাণী এই দুই অৰণ্যত বসবাস কৰে। বনৰীয়া চৰাইৰ ক্ষেত্ৰতো এই দুই অৰণ্য অত্যন্ত সমৃদ্ধ। নেচাৰ্চ বেকনৰ অনুসন্ধানকাৰী দলে *পঞ্চৰত্নৰ অৰণ্যত ১৬৮ প্ৰজাতিৰ বনৰীয়া চৰাই আৰু অজগৰ অৰণ্যত ১৯৬ প্ৰজাতিৰ বনৰীয়া চৰাই নথিভুক্ত কৰিছে* আৰু এই কামটো বৰ্তমানেও চলি আছে। পঞ্চৰত্ন অৰণ্য আৰু অজগৰ অৰণ্যত নেচাৰ্চ বেকনৰ অনুসন্ধানকাৰী দলে মুঠ ৩৬ প্ৰজাতিৰ স্তন্যপায়ী বন্যপ্ৰাণীৰ সন্ধান পাইছে। গোৱালপাৰা জিলাৰ এই দুখন অৰণ্যই বৰ্তমানেও স্ব-মহিমাত বহুত আপুৰুগীয়া বন্যপ্ৰাণীক ধাৰণ কৰি আছে। অতি সোনকালে এই দুখন অৰণ্যক অভয়াৰণ্যৰূপে সংৰক্ষিত কৰাটো অত্যন্ত প্ৰয়োজন। পঞ্চৰত্নৰ অৰণ্যক ‘পঞ্চৰত্ন অভয়াৰণ্য’’ আৰু অজগৰ অৰণ্যক ‘‘অজগৰ অভয়াৰণ্য’’ৰূপে সংৰক্ষিত কৰিব লাগিব। উল্লেখযোগ্য যে *প্ৰস্তাৱিত পঞ্চৰত্ন অভয়াৰণ্যৰ মাটিকালি প্ৰায় ৯৭৬.০৮ হেক্টৰ বনভূমিক আগুৰি আছে আৰু প্ৰস্তাৱিত অজগৰ অভয়াৰণ্য ৪২৪০.০৮ হেক্টৰ বনভূমি আছে।* প্ৰস্তাৱিত অজগৰ অভয়াৰণ্যৰ দক্ষিণ সীমা গাৰো পাহাৰৰ লগত সংলগ্ন সেয়েহে অসম আৰু মেঘালয়ৰ হাতীবোৰে এই বনভূমিৰ মাজেৰেই অহাযোৱা কৰে। প্ৰস্তাৱিত অজগৰ অভয়াৰণ্যত স্থায়ী ৰূপে বহুত বনৰীয়া হাতীয়ে বসবাস কৰে।
প্ৰস্তাৱিত পঞ্চৰত্ন অভয়াৰণ্য হাতী সম্বন্ধীয় এটা বিশেষ কাৰণৰ বাবে অত্যন্ত গুৰুত্বপূৰ্ণ। নেচাৰ্চ বেকনৰ প্ৰকৃতিবিদ কৃপালোচন দাসে আজি দহ বছৰতকৈও অধিক সময় ধৰি গোৱালপাৰা অঞ্চলৰ বনৰীয়া হাতীৰ স্বভাৱ পৰ্যৱেক্ষণ তথা হাতীৰ চলাচল অনুসন্ধান কৰি আছে। এই অধ্যয়নৰ ফলত এই কথা পোহৰলৈ আহিছে যে প্ৰস্তাৱিত পঞ্চৰত্ন অভয়াৰণ্য বনৰীয়া হাতীৰ সন্তান প্ৰসৱ কৰাৰ স্থান। হাতীবোৰে পৰম্পৰাগতভাৱে এটা নিৰ্দিষ্ট অৰণ্যত সন্তান প্ৰসৱ কৰে। বৰ্তমান অৰণ্য ধ্বংস হোৱাৰ ফলত হাতীবোৰৰ সন্তান প্ৰসৱ কৰাৰ স্থানবোৰ ধ্বংসপ্ৰাপ্ত হৈছে ফলত বনৰীয়া হাতীবোৰে অভূতপূৰ্ব সমস্যাৰ সন্মুখীন হৈছে। পঞ্চৰত্নৰ অৰণ্য, হাতীবোৰৰ সন্তান প্ৰসৱ কৰা ঠাই। সেয়েহে হাতীবোৰে নিয়মিত ৰূপত তাত বৰ্তমানেও সন্তান প্ৰসৱ কৰে। হাতী সংৰক্ষণৰ দৃষ্টিভংগীত হাতীৰ প্ৰসূতি ঘৰ পঞ্চৰত্নৰ অৰণ্যক স্থায়ী ৰূপত অভয়াৰণ্য ৰূপে সংৰক্ষিত কৰিব লাগিব। সেই বাবেই হয়তো প্ৰাচীন কামৰূপ তথা ভাৰতৰ জ্ঞানী লোকসকলে এই অৰণ্যক ‘‘পঞ্চৰত্নৰ পবিত্ৰ অৰণ্য’’ৰূপে পৰম্পৰাগতভাৱে সংৰক্ষিত কৰিছিল। গোৱালপাৰা জিলাৰ পঞ্চৰত্ন অৰণ্য আৰু অজগৰ অৰণ্যক পৃথকে পৃথকে দুখন অভয়াৰণ্য গঠন কৰাৰ বাবে নেচাৰ্চ বেকনে অসম চৰকাৰৰ ওচৰত দাবী উত্থাপন কৰিছে।
এই সংক্ৰান্তত নেচাৰ্চ বেকনৰ সঞ্চালক সৌম্যদ্বীপ দত্তই সংগঠনৰ হৈ অসমৰ মুখ্যমন্ত্ৰী ড০ হিমন্ত বিশ্ব শৰ্মাক আনুষ্ঠানিক প্ৰস্তাৱ প্ৰদান কৰিছে। প্ৰস্তাৱত পঞ্চৰত্ন আৰু অজগৰ অৰণ্যক পৃথকে পৃথকে দুখন অভয়াৰণ্য গঠন কৰাৰ বাবে অনুৰোধ কৰা হৈছে। ৩০ জুনত অসমৰ বনমন্ত্ৰী পৰিমল শুক্লবৈদ্য ডাঙৰীয়াৰ হাততো প্ৰস্তাৱিত পঞ্চৰত্ন অভয়াৰণ্য আৰু প্ৰস্তাৱিত অজগৰ অভয়াৰণ্যৰ আনুষ্ঠানিক প্ৰস্তাৱ পত্ৰ প্ৰদান কৰা হয়। বনমন্ত্ৰী পৰিমল শুক্লবৈদ্যৰ লগত নেচাৰ্চ বেকনৰ সঞ্চালক সৌম্যদ্বীপ দত্তই ৩০ জুন ২০২১ তাৰিখে দীৰ্ঘ আলোচনাত মিলিত হয়। হাতী সংৰক্ষণৰ বিষয়ৰ লগতে অসমৰ অৰণ্য আৰু বন্যপ্ৰাণীৰ বিষয়ে বিভিন্ন কথা আলোচনা হয়। বনমন্ত্ৰী পৰিমল শুক্লবৈদ্যই অসমৰ বন্যপ্ৰাণী সংৰক্ষণৰ ক্ষেত্ৰত অত্যন্ত ধনাত্মক আচৰণ প্ৰদৰ্শন কৰে। বৰ্তমান মুখ্যমন্ত্ৰীৰ নেতৃত্বত অসমৰ অৰণ্য সংৰক্ষণৰ কাম সুস্থভাৱে সম্পন্ন হ’ব বুলি তেওঁ মন্তব্য কৰে। মুখ্যমন্ত্ৰীৰ সচিব জয়ন্তমল্ল বৰুৱাৰ লগতো অসমৰ অৰণ্য আৰু বন্যপ্ৰাণী সম্পৰ্কে সৌম্যদ্বীপ দত্তই বিস্তাৰিত আলোচনা কৰে। মুখ্যমন্ত্ৰী ড০ হিমন্ত বিশ্ব শৰ্মাৰ নেতৃত্বৰ প্ৰতি নেচাৰ্চ বেকনৰ পূৰ্ণ আস্থা আছে আৰু অৰণ্য তথা বন্যপ্ৰাণী সংৰক্ষণৰ ক্ষেত্ৰত মুখ্যমন্ত্ৰী ড০ হিমন্ত বিশ্ব শৰ্মাৰ নেতৃত্বত বহুত ভাল কাম হ’ব বুলি নেচাৰ্চ বেকনে আস্থাৱান বুলি জানিবলৈ দিছে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

গুৱাহাটী বিশ্ববিদ্যালয় এন এছ এছ কোষৰ ৰাষ্ট্ৰীয় কন্যা শিশু দিবস উদযাপন

আজাদী কা অমৃত মহোৎসবৰ অংশ হিচাপে গুৱাহাটী বিশ্ববিদ্যালয়ৰ ৰাষ্ট্ৰীয় সেৱা আঁচনি কোষে ২৪ জানুৱাৰীত এক বেবিনাৰৰ মাধ্যমত ৰাষ্ট্ৰীয় কন্যা শিশু দিবস উদযাপন কৰে। মুখ্য অতিথি হিচাপে উপস্থিত থাকি বিশ্ববিদ্যালয়খনৰ উপাচাৰ্য প্ৰফেছৰ প্রতাপ জ্যোতি সন্দিকৈয়ে ৰাষ্ট্ৰীয় কন্যা শিশু দিবস উদযাপনৰ গুৰুত্ব সম্পৰ্কে বিস্তৃত আলোচনা কৰি কয় যে কন্যা শিশুৰ প্রতি শ্রদ্ধা প্রথমে ঘৰৰ পৰাই আৰম্ভ কৰা উচিত আৰু এনএছ এছ স্বেচ্ছাসেবকে মানুহৰ মাজলৈ এই বাৰ্তা প্ৰেৰণ কৰিবলৈ আহ্বান জনায় । উত্তৰ পূব এন এছ এছৰ আঞ্চলিক সঞ্চালক দীপক কুমাৰে কাৰ্য্যসূচী বিষয়া আৰু স্বেচ্ছাসেবক সকলক কন্যা শিশুৰ উন্নতি আৰু নিৰাপত্তাৰ বাবে উদ্যোগ লবলৈ আহ্বান জনায় । তেওঁ চৰকাৰী বিভিন্ন আঁচনি , গার্ল চাইল্ড আঁচনিসমূহ এন এছ এছ কাৰ্য্যসূচী বিষয়া আৰু স্বেচ্ছাসেবকসকলে আগুৱাই নিয়াত অৰিহণা যোগাব লাগিব বুলি উল্লেখ কৰে। অতিথি অৰু অংশগ্রহণকাৰীক আদৰণি জনায় বিশ্ববিদ্যালয়ৰ ছাত্ৰকল্যাণ সঞ্চালক তথা এন এছ এছৰ কাৰ্য্যসূচী সমন্বয়ক ডঃ ৰঞ্জন কুমাৰ কাকতিয়ে । তেওঁ কয় যে : কন্যা শিশুৰ অধিকাৰ ,শিক্ষাৰ গুৰুত্ব, স্বাস্থ্য আৰু লিংগ বৈষম্য আৰু শাৰীৰিক নিৰ্যাতনৰ দৰে সমস্যা সম্পৰ্কে সচেতনতাৰ বাবে ৰাষ্ট্ৰীয় কন্যা শিশু দিবস পালন কৰা হয় । স্বাধীনতাৰ ৭৫ বছৰ উদযাপনৰ বাবে ২০ বছৰৰ কম বয়সী ৭৫ জনী কন্যা শিশুক গুৱাহাটী বিশ্ববিদ্যালয় এন এছ এছ কোষৰ অধীনৰ বিভিন্ন কলেজ এন এছ এছ গোটৰ দ্বাৰা সমাজত অসামান্য অৱদানৰ বাবে স্মাৰক,গামোচা আৰু মানপত্ৰৰে সম্বৰ্ধনা জনায় । কলেজৰ অধ্যক্ষ, এনএছএছ প্রোগ্রাম অফিছাৰ আৰুস্বেচ্ছাসেবক সমন্বিতে প্রায় ৩০০ জন অংশগ্রহণকাৰী এই বেবিনাৰত অংশগ্ৰহণ কৰে।

কাহিলীপাৰাত কবি-লেখক ডা: শৰৎ চন্দ্র ৰাভাক সম্বৰ্দ্ধনা

ৰাভা লেখক মঞ্চ, অসমৰ সভাপতি, বিশিষ্ট কবি-লেখক, সংগঠক গুৱাহাটীৰ কাহিলীপাৰাৰ বাসিন্দা ডা: শৰৎ চন্দ্র ৰাভাক গণৰাজ্য দিৱসৰ প্ৰাকক্ষণত ৰাজ্যৰ অন্যতম প্ৰকাশন “পৰাগজ্যোতি প্ৰকাশন”ৰ পৰা সম্বৰ্দ্ধনা জ্ঞাপন কৰে। প্ৰকাশনৰ সচিব, সাংবাদিক, কবি দীপক শৰ্মাই আঁত ধৰা সভাত সংবাদকৰ্মী প্ৰাঞ্জল মহন্ত, প্ৰাণজিত বেজবৰুৱা, স্বপ্না শৰ্মাই অনুষ্ঠানত অংশ লয়। সম্বৰ্দ্ধনা গ্রহণ কৰি ৰাভা জনগোষ্ঠীটোৰ অন্যতম লেখক ডা: ৰাভাই কয়- আজি আৰু মই সাহস পালোঁ। কিবা এটা লেখাৰ, কিবা এটা কৰাৰ। স্বীকৃতিয়ে মানুহক মনোবল দিয়ে।

ৰাষ্ট্ৰীয় বাল পুৰস্কাৰে সন্মানিত হৈছে অসমৰ এইগৰাকী শিশু শিল্পী

ৰাষ্ট্ৰীয় বাল পুৰস্কাৰে সন্মানিত হৈছে নাজিৰাৰ এগৰাকী কণমানি শিল্পী।ধিতিস্মান চক্ৰৱৰ্তী নামৰ নাজিৰাৰ শিশুশিল্পীগৰাকীয়ে ব্লকচেইন পদ্ধতিৰে আজি ভাৰত চৰকাৰৰ পৰা মানপত্ৰ আৰু নগদ ধন লাভ কৰিছে।ধিতিস্মানে বৰ্তমানলৈকে ৮টা ভাষাত ৭০টাকৈ অধিক গীত বাণীবদ্ধ কৰিছে।মাত্ৰ ডেৰবছৰ বয়সৰ পৰা সংগীতৰ জগতত খোজ পেলোৱা ধিতিস্মানে অসমীয়া,হিন্দী,ইংৰাজীৰ উপৰিও বাংলা ভাষাতো গীত পৰিবেশন কৰিব পাৰে।কিছুদিন পূৰ্বে ধিতিস্মানে মাকৰ সৈতে পৰিবেশন কৰা ´তোমাৰ মৰমে মোৰ,দেহত তুলিলে ঢৌ `শীৰ্ষক গীতটোৱে চ`চিয়েল মেডিয়াত বেচ জনপ্ৰিয়তা লাভ কৰিছিল।ধিতিস্মান শিৱসাগৰৰ অ এন জি চিৰ আৱাসিক এলেকাৰ বাসিন্দা দেৱজিত চক্ৰৱৰ্তী আৰু সোনম চক্ৰৱৰ্তী পুত্ৰ।

ঢকুৱাখনা মহাবিদ্যালয়ৰ এন এছ এছ গোটৰ ১০ টা  দৰিদ্ৰ পৰিয়ালক স্নানাগাৰ নিৰ্মাণ

ঢকুৱাখনাৰ উপাৰ্জনহীন গ্ৰাম্য  দৰিদ্ৰ  পৰিয়ালৰ  নিত্য ব্যবহার্য সা সুবিধা  উপলব্ধ  নোহোৱা ১০তাৰো অধিক পৰিয়ালৰ প্ৰতি দুখৰ সমভাগী হৈ দেওবাৰে  থিয় দিলে ঢকুৱাখনা মহাবিদ্যালয় এন এছ এছ গোট।   ঢকুৱাখনা মহাবিদ্যালয়ৰ “ৰাষ্ট্ৰীয় সেৱা আঁচনি”(এন এছ এছ) গোটৰ  উদ্যোগত আঁচনি বিষয়া প্ৰবক্তা তবেন্দ্ৰ নাথ দাসৰ নেতৃত্বত অহা ২৮ জানুৱাৰী পৰ্যন্ত সপ্তাহজোৰা এলানি বিশেষ জনহিতকৰ কৰ্মসূচী গ্ৰহণ কৰিছে।  তাৰেই অংশ হিচাপে মহাবিদ্যালয়ৰ ৰাষ্ট্ৰীয় সেৱা আঁচনিৰ  আঁচনি বিষয়া দাসৰ নেতৃত্বত দেওবাৰে ঢকুৱাখনা মহকুমাৰ ১নং পিঠিয়াল গাঁওৰ  দৰিদ্ৰ পৰিয়াল সমূহৰ মাজত  উপস্থিত হৈ  গোটৰ ভলণ্টিয়াৰ সকলৰ জৰিয়তে জৰীপ চলাই  স্নানাগাৰ , শৌচাগাৰ আদিৰ অস্থায়ী ভাবে নিৰ্মান কৰি দুৰ্ভগীয়া পৰিয়াল সমূহক উপকৃত কৰে । দেওবাৰে   আঁচনি বিষয়া গৰাকীৰ নেতৃত্বত মুঠ ৫০ গৰাকী ভলণ্টিয়াৰে গাঁওখনৰ অতি দৰিদ্ৰ মুঠ ১০ টা পৰিয়ালৰ  মাজত তামোলৰ ঢকুৱা, বাঁহ , বস্তা, কল মাৰলীৰে অস্থায়ী  স্নানাগাৰৰ বেৰা , শৌচাগাৰৰ বেৰা আদি নিৰ্মান কৰি গঞাৰ চৌহদ নিকাকৰণ কৰি এক সুস্থ আৰু স্বাস্থ্য সন্মত পৰিবেশ সৃষ্টি কৰি দিয়ে ।  ইয়াৰোপৰি গাঁওৰ  শিক্ষাৰ্থী  সকলৰ মাজত  সাহিত্য ,সংস্কৃতি প্ৰতিযোগিতাৰ লগতে  স্বাস্থ্য বিভাগৰ নিৰ্দেশনা অনুসৰি স্বাস্থ্য পৰীক্ষা, ভেকচিন প্ৰদান আদি কাৰ্যসূচী হাতত লোৱা বুলি আঁচনি বিষয়া দাসে জানিবলৈ দিছে । শনিবাৰৰ  পৰা অহা ২৮ জানুৱাৰীলৈ চলিব লগা এই সপ্তাহ জোৰা বিশেষ কাৰ্যসূচীৰ জৰিয়তে  গাঁওখনৰ গৰিষ্ঠ সংখ্যক দৰিদ্ৰ পৰিয়ালক উপকৃত কৰণৰ জনমুখী কৰ্মসূচী হাতত লব বুলি জানিবলৈ দিছে এন এছ এছ গোটৰ আঁচনি বিষয়া দাসে।
বাতৰি যুগুতালে অমৃত পৱন বৰাই।

পলাশবাৰীত ৰাষ্ট্ৰীয় স্বয়ং সংঘৰ পথ সঞ্চালন

ৰাষ্ট্ৰীয় স্বয়ংসেৱক সংঘৰ ‘পথ সঞ্চালন’ দক্ষিণ কামৰূপ জিলাৰ উদ্যোগত আজি পলাশবাৰী সমষ্টিৰ মিৰ্জাস্থিত নিজেশ্বৰী মন্দিৰ প্ৰাঙ্গণত এক গাম্ভীৰ্যপূৰ্ণ পৰিবেশত অনুষ্ঠিত হয়। উক্ত পথ সঞ্চালনত ৰাষ্ট্ৰীয় স্বয়ংসেৱক সংঘৰ প্ৰায় ডেৰ শতাধিক কৰ্মীয়ে অংশ গ্ৰহণ কৰে। এই পথ সঞ্চালন মিৰ্জাস্থিত নিজেশ্বৰী মন্দিৰ প্ৰাঙ্গনৰ পৰা উপৰহালী উচ্চতৰ মাধ্যমিক বিদ্যালয়লৈ প্ৰায় ৫ কি:মি: পথ যাত্ৰা কৰে। অনুষ্ঠানত পলাশবাৰী সমষ্টিৰ বিধায়ক হেমাংগ ঠাকুৰীয়া, ৰাজ্যিক বিজেপি যুৱ মৰ্চাৰ সাধাৰণ সম্পাদক হিমাংশু শেখৰ বৈশ্য অংশগ্ৰহণ কৰাৰ উপৰিও ৰাষ্ট্ৰীয় স্বয়ংসেৱক সংঘ দক্ষিণ কামৰূপ জিলাৰ কাৰ্যবাহ বিৰাজ মেধি, মুখ্য বক্তা হিচাপে সংঘ চালক বিশ্বনাথ গয়াৰী, কিষান সংঘৰ ৰাজ্যিক সাংগঠনিক সম্পাদক কৃষ্ণ কান্ত বৰা আৰু দক্ষিণ কামৰূপ জিলা বিজেপি সভাপতি ধনেশ্বৰ তালুকদাৰ উপস্থিত থাকে।

খানাজানৰ ওপৰত ফুকনৰপাৰ আৰু কেহেৰুবাৰীৰ মাজত বিধায়ক ৰমেন্দ্ৰ নাৰায়ণ কলিতাৰ দলং নিৰ্মাণৰ সিদ্ধান্তক ৰাইজৰ আদৰণি

গুৱাহাটীৰ পশ্চিম প্ৰান্তৰ দীপৰ বিল আৰু ব্ৰহ্মপুত্ৰ নদী সংযোগী খানাজানৰ ওপৰত পশ্চিম জালুকবাৰীৰ খানামুখৰ ফুকনৰপাৰ আৰু ধাৰাপুৰ গাঁও পঞ্চায়তৰ খানামুখৰ কেহেৰুবাৰীৰ মাজত স্থানীয় বিধায়ক ৰমেন্দ্ৰ নাৰায়ণ কলিতাই শেহতীয়াকৈ এখন লঘু বাহন চলাচল কৰিব পৰা কংক্ৰিটৰ দলং নিৰ্মাণৰ বাবে গ্ৰহণ কৰা সিদ্ধান্তক আদৰণি জনাইছে বৃহত্তৰ খানামুখ অঞ্চলৰ ৰাইজে। আনকি যোৱা ২১ জানুৱাৰীত অসম চৰকাৰৰ লোক নিৰ্মাণ পথ বিভাগৰ গুৱাহাটী চক্ৰৰ অধীক্ষক অভিযন্তা ৰাতুল কুমাৰ বেজ আৰু পশ্চিম গুৱাহাটী ক্ষেত্ৰীয় পথ উপ সংমণ্ডলৰ সহকাৰী কাৰ্যবাহী অভিযন্তা কুশল কলিতাই খানামুখ অঞ্চল ভ্ৰমণ কৰি কেহেৰুবাৰী আৰু ফুকনৰ মাজত দলং নিৰ্মাণ লবলগীয়া প্ৰস্তাৱিত স্থান পৰিদৰ্শন কৰি কোনফালে দলং নিৰ্মাণ কৰিলে ৰাইজৰ সুবিধা হ’ব তাৰ এক ক্ষেত্ৰ অধ্যয়ন কৰে। আনকি দুয়োজন অভিযন্তাই পৰিদৰ্শনৰ সময়ত অঞ্চলটোৰ উপস্থিত একাংশ ৰাইজৰ সৈতেও এই সন্দৰ্ভত মত বিনিময় কৰে। আনহাতে অঞ্চলটোৰ অগ্ৰণী সামাজিক – সাংস্কৃতিক আৰু ক্ৰীড়া সংগঠন খানামুখ মিলন সংঘৰ কৰ্মকর্তা সকলে স্থানীয় বিধায়ক ৰমেন্দ্ৰ নাৰায়ণ কলিতাক যিফালে দলং নিৰ্মাণ কৰিলে অঞ্চলটোৰ একমাত্ৰ শিক্ষানুষ্ঠান খানামুখ প্ৰাথমিক বিদ্যালয়ত অধ্যয়নৰত কণ কণ ছাত্ৰ – ছাত্ৰী সকল অহা যোৱাৰ পথ চমু হয় তেনে সুবিধাজনক স্থানত দলং নিৰ্মাণৰ পদক্ষেপ গ্ৰহণ কৰিবলৈ আহ্বান জনাইছে। সংঘৰ কৰ্মকর্তা সকলে সদৰি কৰা খানাজানৰ পূব দিশত থকা ফুকনৰ পাৰত অৱস্থিত খানামুখ প্ৰাথমিক বিদ্যালয়ত কেহেৰুবাৰীকে ধৰি গাতে লগা নোৱাপাৰাসহ অঞ্চলটোৰ বেছিভাগ শিশুৱে অধ্যয়ন কৰে। তেনেদৰে বিদ্যালয়ৰ খেলপথাৰ খনেই হৈছে বৃহত্তৰ অঞ্চলটোৰ একমাত্ৰ খেলপথাৰ। তেনেদৰে খেলপথাৰৰ লগতে আছে শ্ৰী শ্ৰীলক্ষ্মী মন্দিৰ আৰু সভা-সমিতি অনুষ্ঠিত হোৱা এটা সামূহিক গৃহ । কিন্ত দলঙৰ অভাৱত কেহেৰুবাৰী, নোৱাপাৰা অঞ্চলৰ কণ কণ ছাত্ৰ ছাত্ৰী সকলে একৰ পৰা ডেৰ কিঃমিঃ ঘূৰি ৩৭ নং ৰাষ্ট্ৰীয় ঘাইপথৰে অতি বিপদ সংকুলভাবে অহা যোৱা কৰিব লগা হয়। আনকি বিগত সময়চোৱাত তেনেকৈ অহা যোৱা কৰা কেবাজনো ছাত্ৰ ছাত্ৰী দুৰ্ঘটনাত পতিত হৈ মৃত্যুক আঁকোৱালি লব লগীয়া হৈছে। তেনেদৰে একমাত্ৰ খেলপথাৰখন ফুকনৰপাৰত থকা বাবে কেহেৰুবাৰী, নোৱাপাৰা চুবুৰীৰ কণ কণ শিশুকে ধৰি চেমনীয়া সকলৰো খেলা ধূলাত ব্যাঘাট জন্মাৰ লগতে তেওঁলোকৰ অনুশীলনো ব্যাহত হৈছে। কিয়নো অভিভাৱক সকলে ৰাষ্ট্ৰীয় ঘাইপথৰে স্বাভাৱিক কাৰণতেই নিজৰ সন্তানক পঠিয়াবলৈ ভয় কৰে। যাৰ বাবে অঞ্চলটোৰ ৰাইজেও কেহেৰুবাৰী আৰু ফুকনৰপাৰৰ মধ্যবৰ্তী স্থান হিচাপে পৰিচিত কেহেৰুবাৰীৰ ২ বা ৩ নং উপপথৰ সন্মুখত বা সমীপত সৰু দলং নিৰ্মাণ কৰিবলৈ স্থানীয় বিধায়ক ৰমেন্দ্ৰ নাৰায়ণ কলিতাক আহ্বান জনাইছিল। বিধায়ক কলিতাই বিগত ২০২১ চনৰ বিধানসভা নিৰ্বাচনৰ সময়ত ৰাইজক পুনৰ বিধায়ক নিৰ্বাচিত হলে ফুকনৰপাৰ আৰু কেহেৰুবাৰীৰ মাজত দলং নিৰ্মাণৰ ব্যৱস্থা গ্ৰহণ কৰা হব বুলি প্ৰতিশ্ৰুতি দিছিল। অৱশেষত প্ৰায় ৮ মাহ পূৰ্বে নিৰ্বাচনৰ সময়ত দিয়া প্ৰতিশ্ৰুতি অনুসৰি বিধায়ক কলিতাই দলং নিৰ্মাণৰ পদক্ষেপ গ্ৰহণ কৰি এইক্ষেত্ৰত চৰজমিন ক্ষেত্ৰ অধ্যয়ন কৰিবলৈ লোকনির্মাণ পথ বিভাগৰ দায়িত্ববাহী অভিযন্তাক কিছুদিন পূৰ্বে নিৰ্দেশ দিছিল। অৱশ্যে বৃহত্তৰ অঞ্চলটোৰ সকলো শ্ৰেণীৰ ৰাইজে কেহেৰুবাৰীৰ দিশৰ পৰা আহিলে যিফালে খানামুখ প্ৰাথমিক বিদ্যালয় , খেলপথাৰ আৰু শ্ৰী শ্ৰীলক্ষ্মী মন্দিৰসহ সামূহিক গৃহ সহজতে অহা যোৱা কৰিব পাৰিব তেনে প্ৰস্তাৱিত স্থানত দলংখন নিৰ্মাণ কৰিবলৈ অনুৰোধ জনাইছে। এইক্ষেত্ৰত কেহেৰুবাৰীৰ ২ নং বা ৩ নং উপপথৰ সমীপত তথা সন্মুখৰ স্থানখিনী সকলো ফালৰ পৰা সুবিধাজনক হব বুলি খানামুখ মিলন সংঘৰ একাংশ কৰ্মকর্তাই সদৰি কৰিছে। উল্লেখযোগ্য যে দলংখন নিৰ্মাণ হলে অঞ্চলটোৰ ৰাইজৰ যাতায়তৰ এটা বহুদিনীয়া সমস্যাৰ সমাধান হোৱাটো নিশ্চিত। আনহাতে আগন্তক বাৰিষাৰ আগতেই যাতে দলং নিৰ্মাণৰ কাম আৰম্ভ কৰিবলৈ লোকনির্মাণ পথ বিভাগ আৰু স্থানীয় বিধায়কক আহ্বান জনাইছে অঞ্চলটোৰ সকলো শ্ৰেণীৰ ৰাইজে।