শিৱসাগৰত দেশৰ ৭৫ সংখ্যক স্বাধীনতা দিৱস উদযাপন

সমগ্ৰ দেশৰ লগতে শিৱসাগৰ জিলাতো যোৱা ১৫ আগষ্টত দেশৰ ৭৫ সংখ্যক স্বাধীনতা দিৱস উদযাপন কৰা হয়। শিৱসাগৰ জিলা প্ৰশাসনৰ উদ্যোগত ঐতিহাসিক বৰ্ডিং খেলপথাৰত আয়োজিত স্বাধীনতা দিৱসৰ কেন্দ্ৰীয় কাৰ্যসূচীত মুখ্য অতিথি ৰূপে অংশগ্ৰহণ কৰি উপায়ু্ক্ত বিষ্ণু কমল বৰাই আনুষ্ঠানিকভাৱে ৰাষ্ট্ৰীয় পতাকা উত্তোলন কৰে।

পতাকা উত্তোলনৰ পূৰ্বে উপায়ুক্ত গৰাকীয়ে দেশৰ স্বাধীনতাৰ হকে হেলাৰঙে প্ৰাণ আহুতি দিয়া বীৰ শ্বহীদ সকলক স্মৰণ কৰি স্থানীয় আনন্দৰাম বৰুৱা উদ্যান আৰু পিয়লি ফুকন উদ্যানত অনুষ্ঠিত শ্বহীদ তৰ্পণ কাৰ্যসূচীত অংশগ্ৰহণ কৰে। এই কাৰ্যসূচীত জিলা পৰিষদৰ সভাপতি ধ্ৰুৱজ্যোতি মাউত, আৰক্ষী অধীক্ষক ৰাকেশ ৰৌশন আৰু অতিৰিক্ত উপায়ুক্ত বিতোপন নেওগ উপস্থিত থাকে।

ৰাষ্ট্ৰীয় পতাকা উত্তোলনৰ পিছত উপায়ুক্ত গৰাকীয়ে বৰ্ডিং খেলপথাৰত কুচ-কাৱাজত অংশগ্ৰহণ কৰা আৰক্ষী আৰু অৰ্ধ সামৰিক বাহিনীৰ অভিবাদন গ্ৰহণ কৰে।আৰক্ষী অধীক্ষক ৰাকেশ ৰৌশনৰ  উপস্থিতিত মুখ্য অতিথি ৰূপে প্ৰদান কৰা ভাষণত উপায়ুক্ত গৰাকীয়ে দেশৰ বীৰ শ্বহীদ, মুক্তি-যুঁজাৰু সকলৰ চৰম ত্যাগ আৰু আত্মবলিদানৰ বিষয়ে শ্ৰদ্ধাৰে সোঁৱৰাৰ লগতে দেশৰ সীমান্ত আৰু আভ্যন্তৰীণ সুৰক্ষাত নিয়োজিত নিৰাপত্তা বাহিনী সমূহৰ সাহস আৰু পৰাক্ৰমৰ কথা কৃতজ্ঞতাৰে স্মৰণ কৰে।

অতিমাৰী ক’ভিড-১৯ ৰোগৰ প্ৰতিৰোধ, চিকিৎসা, প্ৰতিষেধক প্ৰদান আৰু পৰীক্ষণ আদি বিষয়ত জিলা প্ৰশাসনে গ্ৰহণ কৰা ব্যৱস্থাৱলী সম্পৰ্কে উপায়ুক্ত গৰাকীয়ে নিজ ভাষণত উল্লেখ কৰে। শিৱসাগৰ জিলা প্ৰশাসনে ক’ভিড-১৯ ৰোগৰ গণ-সংক্ৰমণ ৰোধৰ ক্ষেত্ৰত যথোপযুক্ত ব্যৱস্থাপনা গ্ৰহণ কৰিছে বুলি উল্লেখ কৰি তেওঁ জিলা স্বাস্থ্য বিভাগ, চিকিৎসক তথা স্বাস্থ্য কৰ্মী আৰু এই প্ৰক্ৰিয়াৰে সৈতে জড়িত সকলোকে আন্তৰিক ধন্যবাদ জনায়। নিজ ভাষণত তেওঁ কেন্দ্ৰীয় তথা ৰাজ্য চৰকাৰে জিলাখনৰ সৰ্বোত্তম উন্নতিৰ লক্ষ্যৰে গ্ৰহণ কৰা জনকল্যানকামী আঁচনি সমূহৰ বিষয়ে উল্লেখ কৰি এই সমূহৰ সফল ৰূপায়ণৰ বাবে জনসাধাৰণৰ পূৰ্ণ সহযোগিতা কামনা কৰে।  তেওঁ জিলাখনৰ শিক্ষা, স্বাস্থ্য, গ্ৰামোন্নয়ণ, কৃষি তথা ইয়াৰ সহযোগী খণ্ড, উদ্যোগ- বাণিজ্য,  শক্তি, পথ- যোগাযোগ, জনস্বাস্থ্য কাৰিকৰী, পৰিবহন আদি বিভাগৰ অধীনস্থ আঁচনি সমূহৰ দ্ৰুত আৰু ফলপ্ৰসূ ৰূপায়ণৰ ক্ষেত্ৰত জিলা প্ৰশাসনে অগ্ৰাধিকাৰ প্ৰদান কৰি আহিছে বুলি উল্লেখ কৰে ।

ৰাজ্য চৰকাৰে শিৱসাগৰত প্ৰাচীন টাই আহোম সাংস্কৃতিক ঐতিহ্যৰ সংৰক্ষণৰ ক্ষেত্ৰত বিশেষ অগ্ৰাধিকাৰ প্ৰদান কৰিছে বুলি উপায়ুক্ত গৰাকীয়ে ভাষণ প্ৰসঙ্গত উল্লেখ কৰে।  বাজেট ভাষণত উল্লেখিত প্ৰস্তাৱিত পদক্ষেপ সমূহৰ ভিতৰত শিৱসাগৰৰ অসম টাই সংগ্ৰহালয়ৰ নৱীকৰণ আৰু আধুনিকীকৰণ অন্যতম বুলিও তেওঁ অৱগত কৰে ।  ভাৰত চৰকাৰে শিৱসাগৰক এখন আইক’নিক স্থান হিচাপে ঘোষণা কৰিছে বুলি উল্লেখ কৰি তেওঁ কয় যে, ইয়াৰ বাবে ৰূপহী পথাৰত এটা আইক’নিক চাইট সংগ্ৰহালয় নিৰ্মাণৰ বাবে ৰাজ্য চৰকাৰে ৫ একৰ ভূমিৰ আৱণ্টন দিছে ।

স্বাধীনতা দিৱস উপলক্ষে যোৱা ১৫ আগষ্টত পুৱা ৫ বজাৰ পৰা ৬ বজালৈ প্ৰভাত ফেৰী, পুৱা ৬ বজাৰ পৰা ৭ বজালৈ দেশ প্ৰেমমূলক গীত-মাত প্ৰচাৰ, পুৱা ৭ বজাত নিজ নিজ বাসগৃহত ৰাষ্ট্ৰীয় পতাকা উত্তোলন, পুৱা ৭-৩০ বজাত শিক্ষানুষ্ঠান, চৰকাৰী, বে-চৰকাৰী, অৰ্ধ-চৰকাৰী কাৰ্য্যালয়ত ৰাষ্ট্ৰীয় পতাকা উত্তোলন কৰা হয় । বিয়লি ৫-৪০ বজাত ৰাষ্টীয় পতাকা অৱনমন কৰা হয়।স্বাধীনতা দিৱস উপলক্ষে আয়োজিত পেৰেডত লিগিৰীপুখুৰী স্থিত ১ম এ. পি. বি. এন. প্ৰথম, শিৱসাগৰ জিলা কাৰ্যবাহী বল দ্বিতীয় আৰু চি. আই. এছ. এফ. -এ তৃতীয় পুৰস্কাৰ লাভ কৰে ।

উল্লেখযোগ্য যে, কেন্দ্ৰীয় অনুষ্ঠানত স্বাধীনতা দিৱসৰ লগত সংগতি ৰাখি অনুষ্ঠিত হোৱা বিভিন্ন প্ৰতিযোগিতাত বিজয়ী প্ৰতিযোগী সকলকো পুৰস্কৃত কৰা হয়।আন্তঃবিদ্যালয় কুইজ প্ৰতিযোগিতাত ফুলেশ্বৰী উচ্চতৰ মাধ্যমিক বালিকা বিদ্যালয়ৰ দীপশিখা চাংমাই আৰু নিহাৰিকা ভূঞাৰ দলে প্ৰথম, ভাধৰা হাইস্কুলৰ দিশামণি গগৈ আৰু ভাস্বতী গগৈৰ দলে দ্বিতীয় আৰু শাস্ত্ৰীজী হাইস্কুলৰ অঞ্জু দাস আৰু মঞ্জু দাসৰ দলে তৃতীয় পুৰস্কাৰ লাভ কৰে।

তেনেদৰে, আন্তঃবিদ্যালয় ৰচনা প্ৰতিযোগিতাত শলগুৰি উচ্চতৰ মাধ্যমিক বিদ্যালয়ৰ প্ৰাৰ্থনা দত্তই প্ৰথম, খনামুখ উচ্চতৰ মাধ্যমিক বিদ্যালয়ৰ কস্তুৰী গগৈয়ে দ্বিতীয় তথা ফুলেশ্বৰী উচ্চতৰ মাধ্যমিক বালিকা বিদ্যালয়ৰ প্ৰিন্সি দত্তই তৃতীয় পুৰস্কাৰ লাভ কৰে।

তদুপৰি, আন্তঃবিদ্যালয় স্বৰচিত কবিতা প্ৰতিযোগিতাত বগীদ’ল উচ্চ মাধ্যমিক বিদ্যালয়ৰ কাব্যশ্ৰী বেজবৰুৱাই প্ৰথম, বৰপাত্ৰদ’ল উচ্চ মাধ্যমিক বিদ্যালয়ৰ বাৰ্বী ভৰালীয়ে দ্বিতীয় আৰু মেজেঙা উচ্চতৰ মাধ্যমিক বিদ্যালয়ৰ লখিমী বুঢ়াগোহাঁয়ে তৃতীয় পুৰস্কাৰ লাভ কৰে।আন্তঃবিদ্যালয় দেশপ্ৰেমমূলক গীত পৰিবেশন প্ৰতিযোগিতাত যুটীয়াভাৱে প্ৰথম পুৰস্কাৰ লাভ কৰে আউনিআটি হেমচন্দ্ৰ দেৱ উচ্চতৰ মাধ্যমিক বিদ্যালয়ৰ অজয় দৰিগ আৰু ঠানুৰাম গগৈ উচ্চতৰ মাধ্যমিক বিদ্যালয়ৰ জোনালী দাসে, দ্বিতীয় পুৰস্কাৰ লাভ কৰে ভীমপোৱা উচ্চ মাধ্যমিক বিদ্যালয়ৰ লুকুমণি হাজৰিকাই আৰু তৃতীয় পুৰস্কাৰ লাভ কৰে নাজিৰা ছোৱালী উচ্চতৰ মাধ্যমিক বিদ্যালয়ৰ অনুৰিতা বৰচেতিয়াই ।

স্বাধীনতা দিৱসৰ জিলা পৰ্য্যায়ৰ অনুষ্ঠানত বিভিন্ন বিভাগৰ অধীনত উৎকৃষ্ট পাৰদৰ্শিতা প্ৰদৰ্শন কৰা তথা উল্লেখনীয় সেৱা প্ৰদান কৰা ব্যক্তি সকলকো সম্বৰ্ধনা জনোৱা হয়। এই ব্যক্তি সকল হ’ল ক্ৰমে: জিলা কৃষি বিভাগৰ তৰফৰ পৰা প্ৰগতিশীল কৃষক নিৰঞ্জন কুম্ভকাৰ; হস্ততাঁত আৰু বস্ত্রশিল্প বিভাগৰ তৰফৰ পৰা শিপিনী মুনমী বেজবৰুৱা; ৰেচম বিভাগৰ তৰফৰ পৰা মুগা পালক কিৰণ ফুকন; পশুপালন আৰু পশুচিকিৎসা বিভাগৰ তৰফৰ পৰা বেচৰকাৰী সংস্থা শ্ৰীকৃষ্ণ উৎপাদনমুখী কৃষক সমিতি; অসামৰিক প্ৰতিৰক্ষা বাহিনীৰ প্ৰতিপালক আৰু স্বেচ্ছাসেৱক সকল ক্ৰমে- জিতেন কোঁচ, মিনা চুতীয়া, প্ৰাঞ্জল প্ৰতীম দাস, দীপশিখা চাংমাই আৰু নিহাৰিকা বড়া; ক্রীড়া বিভাগৰ তৰফৰ পৰা জীমনাষ্ট দ্বয় ক্ৰমে কৃষ্ণ সাহা আৰু কৃষ্ণাপ্ৰিয়া গগৈ, ভাৰোত্তলক দ্বয় ক্ৰমে লক্ষীন্দ্ৰ বৰুৱা আৰু মেহেক আখতাৰ বড়া; সাংস্কৃতিক বিভাগৰ তৰফৰ পৰা শিল্পীসকল ক্ৰমে ৰমেশ দত্ত, বাবুল আলী আৰু সুশীল বৰুৱা; সৰ্বশিক্ষা অভিযানৰ তৰফৰ পৰা এথলিট অনিস্মিতা কোঁৱৰ; স্বাস্থ্য বিভাগৰ অধীনস্থ আশাকর্মী সকল ক্ৰমে নিভা গগৈ মেচ, চিনু শইকীয়া আৰু কমলী দাস; বিদ্যালয় সমূহৰ পৰিদৰ্শকৰ তৰফৰ পৰা দোপদৰ উচ্চ মাধ্যমিক বিদ্যালয়ৰ প্ৰধান শিক্ষয়িত্ৰী গুনমণি বৰুৱা আৰু দিখৌমুখ উচ্চতৰ মাধ্যমিক বিদ্যালয়ৰ শিক্ষক প্ৰতাপ কুমাৰ বৰুৱা।

উল্লেখ্য যে, ক’ভিড-১৯ ৰোগৰ সাম্ভাব্য গণ-সংক্ৰমণৰ প্ৰতি লক্ষ্য ৰাখি স্বাধীনতা দিৱসৰ কাৰ্য্যসূচীত জিলা প্ৰশাসনৰ আহ্বানক্ৰমে উপস্থিত সকলোৱে মাস্ক পৰিধান কৰি আৰু সামাজিক দূৰত্ব বজাই ৰাখি অনুষ্ঠানটি উপভোগ কৰে। অনুষ্ঠানটিৰ শেষত উপস্থিত ৰাইজৰ মাজত গছপুলিও বিতৰণ কৰা হয় ।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

ডঃ ৰঞ্জন কুমাৰ কাকতিক অসম চৰকাৰৰ সম্বৰ্ধনা

ৰাষ্ট্ৰীয় এনএছএছ বঁটা বিজয়ী গুৱাহাটী বিশ্ববিদ্যালয়ৰ ছাত্ৰ কল্যান সঞ্চালক তথা ৰাষ্ট্ৰীয় সেৱা আঁচনিৰ কাৰ্য্যসূচী সমন্বয়ক ডঃ ৰঞ্জন কুমাৰ কাকতিক অসম চৰকাৰৰ ফালৰ পৰা সম্বৰ্ধনা জনোৱা হয় । ক্রীড়া আৰু যুব কল্যাণ আৰু শক্তি তথা পৰ্যটন বিভাগৰ মন্ত্ৰী বিমল বৰাই ৰুদ্ৰ সিংহ স্পোর্ট কমপ্লেক্স, নেহেৰু ষ্টেডিয়ামত ১২ জানুৱাৰীত এক গাম্ভীৰ্যপূৰ্ণ অনুষ্ঠানত তেওঁক সম্বৰ্ধনা জনায়। উল্লেখযোগ্য যে ডঃ কাকতিয়ে ভাৰতৰ মাননীয় ৰাষ্ট্রপতি ৰাম নাথ কোবিন্দৰ পৰা ২৪ ছেপ্টেম্বৰ ২০২১ত এন এছ এছ ৰাষ্ট্ৰীয় বঁটা গ্ৰহণ কৰে যিয়ে সমগ্র উত্তৰ-পূৱ আৰু অসমৰ এই মর্যাদাপূর্ণ পুৰষ্কাৰ প্রাপ্ত প্রথম ব্যক্তি। সম্বৰ্ধনা অনুষ্ঠানত অসম চৰকাৰৰ অতিৰিক্ত মুখ্য সচিব মনিন্দৰ সিং আই এ এছ ,সদস্য সচিব, ৰাজ্য স্তৰৰ যুৱ কল্যাণ কমিটিৰ উপদেষ্টা পবিত্ৰ মাৰ্ঘেৰিটা, অসম ক্ৰীড়া কৰ্তৃপক্ষৰ উপ সভাপতি লক্ষ্য কোঁৱৰ , ক্ৰীড়া আৰু যুৱ কল্যাণ বিভাগৰ সঞ্চালক নিবেদন দাস পাটোৱাৰী আৰু অলিম্পিক ব্রঞ্জ পদক বিজয়ী খেলৰত্ন পুৰস্কাৰপ্রাপ্ত লাভলীনা বৰগোঁহাই ,সাহিত্য একাডেমি যুৱ পুৰস্কাৰ প্ৰাপ্ত দ্বিজেন চন্দ্ৰ দাস আৰু বহুতো গণ্য মান্য ব্যক্তি এই অনুষ্ঠানত উপস্থিত আছিল।

ৰাণীত বিশেষ গাঁওসভাত ৰমেন্দ্ৰ নাৰায়ণ কলিতা-কৃষিৰেহে অৰ্থনৈতিক উন্নতি সম্ভৱ

অসমৰ দৰে ৰাজ্যৰ অৰ্থনৈতিক উন্নয়নৰ বাবে কৃষি ক্ষেত্ৰৰ যথাযথ উন্নয়ন হ’ব লাগিব। কৃষি আৰু কৃষকৰ উন্নয়ন হোৱাৰ লগে লগে ৰাজ্যখনৰ অৰ্থনৈতিক উন্নয়নত যথেষ্ট অৰিহণা যোগাব বুলি মন্তব্য কৰি বিধায়ক কলিতাই সংশ্লিষ্ট সকলো পক্ষকে দায়িত্ব পালন কৰিবলৈ আহ্বান জনায়।
আজি ৰাণী উন্নয়ন খণ্ড এলেকাৰ ৰাণী গাঁও পঞ্চায়তৰ সভাগৃহত অনুস্থিত শস্য ক্ৰয় আৰু কৃষক পঞ্জীয়ন প্ৰক্ৰিয়া সচেতনতাৰ সন্দৰ্ভত আয়োজিত বিশেষ গাঁও সভাত অংশগ্ৰহণ কৰি বিধায়ক কলিতাই ৭০ শতাংশই কৃষিজীৱী লোক থকা অসমৰ দৰে ৰাজ্যত কৃষকে প্ৰকৃত মূল্যৰ পৰা বঞ্চিত হৈ থকাৰ কথা উল্লেখ কৰি এতিয়াৰ পৰা মধ্যভোগীৰ হাতোৰাৰ পৰা মুক্ত হৈ কৃষকে ফচলৰ উচিত মূল্য পোৱাৰ বাট সুচল হ’ব বুলি কয়। তেওঁ ভাষণ প্ৰসংগত কৃষি প্ৰধান ৰাণী অঞ্চলত অচিৰেই এটি শস্য মজুত ভঁৰাল স্থাপনৰ ক্ষেত্ৰত মুখ্য মন্ত্ৰীৰ লগত ভাৰ্চুৱেল আলোচনা কৰাৰ কথাও উল্লেখ কৰে। সভাত ৰাণী উন্নয়ন খণ্ড বিষয়া লালৰেমছিয়ামী গামলাই, ৰাণী আঞ্চলিক পঞ্চায়ত সভাপতি পৰমেশ্বৰ বৰ্মণ, ৰাণীৰ কৃষি বিষয়া বৰ্ণালী মেধী, পঞ্চায়ত আৰু গ্ৰামোন্নয়নৰ নিৰীক্ষণ আৰু তদাৰকী সমিতিৰ সদস্য সুভাষ শৰ্মায়ো অংশগ্ৰহণ কৰে। বিধায়ক গৰাকীয়ে কাঁহিকুছি গাঁও পঞ্চায়ততো এনে এক বিশেষ গাঁও সভাত অংশগ্ৰহণ কৰে। উক্ত সভাত আজাৰা ৰাজহ চক্ৰ বিষয়া প্ৰিয়াংসু ভৰদ্বাজ, কাঁহিকুছি গাঁও পঞ্চায়তৰ সভাপতি জগন্নাথ ঠাকুৰীয়াকে আদিকৰি কেবাগৰাকী বিশিষ্ট লোক উপস্থিত থাকে।
বাতৰি যুগুতালে জিতুমণি দাসে

দিকৰাই চাহ বাগিচাত টুচু উৎসৱ উদযাপন

ভোগালী বিহুৰ উৎসাহ উদ্দীপনাৰ মাজতে চাহ জনগোষ্ঠীৰ অন্যতম কৃষি ভিত্তি উৎসৱ টুচু দুদিনীয়া কাৰ্যসূচীৰে পালন হয়। প্ৰতি বছৰৰ দৰে এইবাৰো ভোগালী বিহুৰ লগতে চাহ জনগোষ্ঠীৰ টুচু উৎসৱ দিকৰাই বাগিছাত অনুষ্ঠিত হৈ যায় । এই পবিত্ৰ উৎসৱৰ বহু পৰম্পৰাৰ আছে!কৃষিজীৱি চাহ শ্ৰমিক ৰাইজে বছৰটোৰ বাবে আৰ্জিত ধান-মাহ আঘোন মাহত চপাই , পুহ মাহটো মহিলা সকলে নিজৰ আৰাধ্য দেৱতাক উপাসনা কৰি মাঘ মাহত পুনৰ উদ্যমেৰে নিজৰ কৰ্মজীৱন আৰম্ভ কৰাৰ লগতে চাহ জনগোষ্ঠীৰ নাৰী কেন্দ্ৰিক এক পৰম্পৰাগত উৎসৱ হিচাপেও টুচু উৎসৱ পালন কৰা হয় । গাঁওখনৰ যুৱক-যুৱতীয়ে ৰাইজৰ সহযোগত আটক ধূনীয়াকৈ সজাই তোলা মণ্ডপত ‘টুচু’ দেবীক গধুলি বেলাতে প্ৰতিষ্ঠা কৰে আৰু ওৰে নিশা টুচুক কেন্দ্ৰ কৰি ৰচিত বিভিন্ন গীত-মাতেৰে মুখৰিত কৰে। পিচদিনা অৰ্থাৎ টুচু পুজাৰ অন্তিম দিনা গাৱৰ ৰাইজ একেলগে নাচ গান কৰি বিয়লি টুচু দেৱীক নৈত বিসৰ্জন দিয়া হয় । বাগিচাখত আয়োজিত ‘টুচু পুজাৰ লগত সংগতি ৰাখি আদৰণি সমিতিয়ে অঞ্চলৰ বিশিষ্ট লোকক সম্বৰ্দ্ধনা জনোৱা হয়। উক্ত সম্বৰ্দ্ধনা অনুষ্ঠানত নদুৱাৰ শাখা আটছাৰ ভাৰ প্ৰাপ্ত সভাপতি ৰাধেশ্যাম তাঁ‌তি,বিশ্বনাথ জিলা আটছাৰ শিক্ষাও সাহিত্য সম্পাদক অবিনাশ ৰাজৱাৰ আৰু চতিয়া আঞ্চলিক পঞ্চায়ত সভাপতি লক্ষীকান্ত বৰা, উত্তৰ নদুৱাৰ উড়িয়া যুৱ পৰিষদৰ সম্পাদক আনন্দ তচা, উত্তৰ নাগশংকৰ গাঁও পঞ্চায়ত সভানেত্ৰী দীপা তাঁ‌তী,দক্ষিণ মূঢ়াদল গাওঁ পঞ্চায়ত সভানেত্ৰী পাৰ্ৱতী শৰ্মা,বিশিষ্ট সাংবাদিক দূৰ্গা পৌড়েলসহ বহু কেইগৰাকী বিশিষ্ট ব্যক্তি উপস্থিত থাকে।
বাতৰি যুগুতালে জামুগুৰিহাটৰ পৰা ৰাতুল হাজৰিকাই

হৰিনামৰ ধ্বনিৰে মুখৰিত বিধৌত শ্ৰী শ্ৰী বাসুদেৱ থান নৰোৱা সত্ৰ

উত্তৰ অসমৰ অন্যতম প্ৰধান বৈষ্ণৱ পীঠ ঢকুৱাখনা মহকুমাৰ  মৰনৈ অঞ্চলৰ শ্ৰী শ্ৰী বাসুদেৱ থান নৰোৱা সত্ৰৰ বাৰ্ষিক মহা পালনাম দেওবাৰৰ  পৰা কোভিড নীতি নিৰ্দেশনা মানি দুদিনীয়া কাৰ্যসূচীৰে আৰম্ভ হৈছে। ৰাজ্যখনৰ ভিন্ন প্ৰান্তৰৰ ভক্ত বৈষ্ণৱৰ উপস্থিতিত শ্ৰী শ্ৰী বাসুদেৱ থান নৰোৱা সত্ৰ প্ৰাংগণত বিগত  ৬৫ বছৰীয়া পৰম্পৰা অব্যাহত ৰাখি উদযাপন কৰি অহা  এই পালনাম , দেওবাৰে পুৱা শুভাৰম্ভনি অনুষ্ঠান আৰম্ভ হয়  বৈষ্ণৱ বীৰেন্দ্ৰ দেৱ গোস্বামী আৰু অতুল দেৱ গোস্বামীৰ প্ৰাতঃ প্ৰসংগৰে । সত্ৰ পৰিয়ালৰ উপস্থিতিত ইয়াৰ পাছতে  ধৰ্মপ্ৰাণ আই মাতৃ ৰেণু গোস্বামী আৰু মনোৰমা গোস্বামীৰ নেতৃত্বত আই মাতৃ সকলৰ আই নাম প্ৰসংগৰে সত্ৰৰ বৰ নামঘৰৰ মজিয়া বিধৌত হৈ পৰে। দুপৰীয়া সত্ৰাধিকাৰ ভূপেন্দ্ৰ দেৱ গোস্বামীয়ে শুভাৰম্ভ কৰা সমূহীয়া নাম প্ৰসংগ আৰু পালনামৰ নামাচাৰ্য হিচাবে নগাঁও বালি সত্ৰৰ সত্ৰীয়া ৰাজু দেৱ গোস্বামী , দোহাচাৰ্য হিচাবে কলিয়াবৰ চামগুৰি সত্ৰৰ  ডেকা সত্ৰীয়া কমল গোস্বামী  আৰু পাঠাচাৰ্য হিচাপে নগাঁও আইভেটিৰ বুবুল মহন্ত  , মাজুলীৰ প্ৰাচীন চামগুৰি সত্ৰৰ ভৰত মহন্তই অংশগ্ৰহণ কৰে।  ঐতিহাসিক সত্ৰখনৰ এই মহা পালনাম উপলক্ষে সমাগম হোৱা সমীপৱৰ্তী  গৰিষ্ঠ সংখ্যক ভক্ত বৈষ্ণৱৰ হৰি নামৰ ধ্বনিত মুখৰিত সত্ৰ প্ৰাঙ্গনত সন্ধিয়ালৈ বন্তি প্ৰজ্বলন কৰি অৱধাৰিত ভাবে অখণ্ড পালনাম অব্যাহত ৰখা হয়। সোমবাৰে বিয়লি এই মহা পালনামৰ পৰিসমাপ্তি ঘটিব।
বাতৰি যুগুতালে অমৃত পৱন বৰাই।

বায়ু সেনাৰ ফ্লায়িং অফিচাৰ পদত যোগদান কৰিলে এন চি চি ইউনিটৰ এইজন কেডেটে

ৰাষ্ট্রীয় শিক্ষাৰ্থী বাহিনীৰ বায়ু শাখাৰ গুৱাহাটী বিশ্ববিদ্যালয়স্থিত ৫০ আসাম এয়াৰ স্কোৱাদ্ৰোণ এন চি চি ইউনিটৰ কেডেট আৰু কটন বিশ্ববিদ্যালয়ৰ পৰা বিগত বৰ্ষত ভূগোল বিজ্ঞান বিষয়ত মেজৰসহ সুখ্যাতিৰে স্নাতক ডিগ্ৰী উত্তীৰ্ণ হোৱা ছাত্ৰ নেপো মৈৰাংথেম ছাৰ্ভিছ ছিলেকচন বৰ্ডৰ দ্বাৰা আয়োজিত পৰীক্ষাত উত্তীৰ্ণ হৈ যোৱা ছেপ্টেম্বৰ মাহতে ভাৰতীয় বায়ু সেনাৰ সন্মানীয় ফ্লায়িং অফিচাৰ পদৰ বাবে নিৰ্বাচিত হৈছিল। তাৰ প্ৰায় চাৰিমাহ পাছত আজি তেওঁ ভাৰতীয় বায়ু সেনাৰ চেকেন্দ্ৰাবাদৰ দুন্দীগালত থকা ইণ্ডিয়ান এয়াৰ ফৰ্চ একাডেমীত ফ্লায়িং অফিচাৰ পদত যোগদান কৰে। আনহাতে তেওঁ ফ্লায়িং অফিচাৰ পদত যোগদান কৰি ইউনিটলৈ গৌৰৱ কঢ়িয়াই অনা বাবে কমাণ্ডিং অফিচাৰ গ্রুপ কেপ্তেইন ৰবীন বিষ্ণয়কে ধৰি ইউনিটৰ সকলোৱে নেপোক শুভেচ্ছা জ্ঞাপন কৰিছে। উল্লেখযোগ্য যে বৰ্তমান গুৱাহাটীৰ উজানবজাৰ নিবাসী নেপোৰ প্ৰকৃত ঘৰ হল মণিপুৰৰ পূব ইম্ফল জিলাৰ এখন ভিতৰুৱা অঞ্চলত। মণিপুৰ সৈনিক স্কুলৰ পৰা দ্বাদশ শ্ৰেণী উত্তীৰ্ণ হোৱাৰ পাছত তেওঁ ২০১৮ চনত কটন বিশ্ববিদ্যালয়ত স্নাতক পাঠ্যক্ৰমত নাম ভৰ্ত্তি কৰাৰ সমান্তৰালভাৱে ৫০ আসাম এয়াৰ স্কোৱাদ্ৰোণ এন চি চি ইউনিটত কেডেট হিচাপে নাম ভৰ্ত্তি কৰিছিল। ইয়াৰ মাজতে তেওঁ সৰ্বভাৰতীয় বায়ু সৈনিক শিবিৰত উত্তৰ পূব মণ্ডলক প্ৰতিনিধিত্ব কৰি শ্ৰেষ্ঠ এৰোমডেলাৰৰ সন্মান আৰু বায়ু সেনাৰ শ্বিলংস্থিত ইষ্টাৰ্ণ কমাণ্ডৰ উদ্যোগত এ এল জিত আয়োজিত এয়াৰ ফেষ্টিফেলত এৰো মডেলিঙত ভাগ লৈ ইউনিটলৈ গৌৰৱ কঢ়িয়াই আনিছিল। মণিপুৰৰ এখন চৰকাৰী চিকিৎসালয়ৰ চতুৰ্থ শ্ৰেণীৰ কৰ্মচাৰী এম নৰিন্দৰ সিং আৰু এম ইন্দুবালা সিঙৰ পুত্ৰ নেপোৱে সন্মানীয় ফ্লায়িং অফিচাৰ পদৰ বাবে নিৰ্বাচিত হৈ বাহিনীটোলৈ গৌৰৱ কঢ়িয়াই অনা বাবে এন চি চিৰ উত্তৰ পূব মণ্ডলৰ অতিৰিক্ত সঞ্চালক প্ৰধান মেজৰ জেনেৰেল ভাস্কৰ কলিতা আৰু গুৱাহাটী গ্রুপৰ গ্রুপ কমাণ্ডাৰ ব্ৰিগেদিয়াৰ যোগেশ চন্দ্ৰ তালুকদাৰে তেওঁক শুভেচ্ছা জ্ঞাপন কৰি তেওঁৰ উজ্জ্বল ভৱিষ্যত কামনা কৰিছে।

তুলসীবাৰী শংকৰদেৱ শিশু নিকেতনৰ ৰূপালী জয়ন্তী মহোৎসৱৰ শুভাৰম্ভনী অনুষ্ঠান সম্পন্ন

ভোগালী বিহুৰ আনন্দ উলাহৰ মাজতে  তুলসীবাৰীত আজি জাক জমকতাৰে অনুষ্ঠিত কৰা হয় ৰূপালী জয়ন্তী মহোৎসৱৰ শুভাৰম্ভণী অনুষ্ঠান।  দিনযোৰাকৈ আয়োজন কৰা শুভাৰম্ভ অনুষ্ঠানৰ কাৰ্যসূচীৰ অংশ হিচাপে পুৱা বন্তি প্ৰজ্বলন,পতাকা উত্তোলন, ৰাজহুৱা শ্ৰদ্ধাঞ্জলিৰ লগতে গছপুলি ৰোপণ কৰা হয় ।ইয়াৰ পাছতে উদযাপন সমিতিৰ সভাপতি অচ্যুত কেওটৰ সঞ্চালনাত অনুষ্ঠিত কৰা মুকলি সভাত বিজেপি দলৰ ৰাজ্যিক সভাপতি তথা স্থানীয় বিধায়ক ভবেশ কলিতা উপস্থিত থাকি শুভেচ্ছামূলক ভাষণ ৰাখে ।ভাষণ প্ৰসংগত কলিতাই কয় যে যি সকল শিক্ষানুৰাগী লোকৰ প্ৰচেষ্টাত এই মহান অনুষ্ঠানটি গঢ় লৈ উঠিছিল আজি তেখেত সকলৰ প্ৰয়াস পূৰ্ণতা পালে।ভূমি ,আৰ্থিক অনুদান তথা নিকেতনত ছাত্র-ছাত্ৰী সকলক জ্ঞান অৰ্জনৰ বাবে প্ৰেৰণ কৰা।অভিভাৱক সকলকো শ্ৰদ্ধা নিবেদন কৰে কলিতাই।আনহাতে উক্ত সভাতে ৰাষ্ট্ৰীয় স্বয়ং সেৱক সংঘৰ সহক্ষেত্ৰ কাৰ্যবাহক বশিষ্ঠ বুজৰবৰুৱাই অংশগ্ৰহণ কৰি ছাত্র-ছাত্ৰী সকলক উদ্দেশ্যি বক্তব্য ৰাখে । ভাষণ প্ৰসংগত বুজবৰুৱাই দেশমাতৃৰ প্ৰতি শ্ৰদ্ধাশীল হবলৈ আহ্বান জনায় ।আনহাতে স্বদেশ -স্বজাতিৰ ভাষা-সংস্কৃতিৰ প্ৰতি দায়বদ্ধ থাকিবলৈও ছাত্র-ছাত্ৰী সকলক ভাষণ প্ৰসংগত আহ্বান জনায় ।নিকেতনৰ প্ৰধান আচাৰ্য সোমদত্ত কলিতাই আঁত ধৰা সভাখনত অঞ্চলটোৰ কেবাগৰাকী শিক্ষানুৰাগী তথা সমাজ-সাহিত্য-সংবাদ সেৱাৰ লগত জড়িত ব্যাক্তিক সম্বৰ্দ্ধনা  জ্ঞাপন কৰা হয় ।পৰৱৰ্তী কাৰ্যসূচী হিচাবে বিয়লি প্ৰাক্তন ছাত্ৰ-ছাত্ৰীৰ প্ৰীতি সন্মিলন তথা সন্ধিয়া বন্তি প্ৰজ্বলন কাৰ্যসূচী ৰূপায়ণ কৰা হয় । ভোগালী বিহুৰ শুভক্ষণত গৰিমা বিজড়িত নিকেতনখনৰ ৰূপালী জয়ন্তী প্ৰস্তুতি বৰ্ষৰ প্ৰাৰম্ভিক কাৰ্যসূচীয়ে স্বাভাৱিকতে বিদ্যালয়খনৰ ছাত্ৰ-ছাত্ৰীৰ লগতে শিক্ষানুৰাগী ৰাইজক উৎফুল্লিত কৰি তোলা পৰিলক্ষিত হয়।

বাতৰি যুগুতালে ৰঙিয়াৰ পৰা দীনেশ আগৰৱালাই