আজি সৰুসজাই ষ্টেডিয়ামত অনুষ্ঠিত হয় খেলো ইণ্ডিয়া য়ুথ গেমছৰ অন্তিমখন পৰ্য্যালোচনা।এই অনুষ্ঠানত মুখ্যমন্ত্রী সৰ্বানন্দ সোনোৱাল আয়োজক সমিতিৰ সৈতে বৈঠকত মিলিত হয়।বৈঠকত উদ্বোধনী অনুষ্ঠানত অসমৰ বাৰেৰহণীয়া সাংস্কৃতিক দিশৰ উজ্জ্বল প্ৰতিচ্ছবি দাঙি ধৰাৰ দিশত যথোপযুক্ত ব্যৱস্থা ল’বলৈ নিৰ্দেশ দিয়ে মুখ্যমন্ত্রী গৰাকীয়ে।উল্লেখযোগ্য যে এই ক্ৰীড়াত অংশগ্রহণ কৰিবলগীয়া দেশৰ বিভিন্ন প্ৰান্তৰ ৬৫০০ গৰাকী প্ৰতিযোগী,১০০০ গৰাকী কাৰিকৰী কৰ্মী,২৫০০ গৰাকী সহযোগী কৰ্মীৰ থকা খোৱাৰ বাবে মহানগৰীৰ ১৭০ খন হোটেলৰ ব্যৱস্থা কৰা হৈছে।লগতে খেলুৱৈসকলৰ অভিভাৱক সকলৰ বাবেও সম্পূর্ণ ব্যৱস্থা ল’বলৈ নিৰ্দেশ দিয়া হৈছে।প্ৰদূষণৰ সমস্যা নিৰাময়ৰ বাবে বিভিন্ন প্ৰতিযোগীক বিভিন্ন ক্ৰীড়াঙ্গনলৈ নিয়াৰ দিশত বিদ্যুৎচালিত বাছ সেৱাৰ ব্যৱস্থা কৰাৰো নিৰ্দেশ দিয়ে মুখ্যমন্ত্রী গৰাকীয়ে।ইয়াৰোপৰি তেওঁ বাতৰি সংগ্রহৰ বাবে বিভিন্ন ঠাইৰ পৰা আহিবলগীয়া ক্ৰীড়া সাংবাদিক সকলৰ থকা খোৱাৰ ব্যৱস্থা সম্পর্কেও বুজ লয়।লগতে তেওঁ আয়োজক সমিতিক খেলো ইণ্ডিয়া য়ুথ গেমছৰ দেশৰ সৰ্বত্ৰে প্ৰচাৰ চলাবলৈ নিৰ্দেশ দিয়ে।বৈঠকত মুখ্যমন্ত্রী গৰাকীয়ে কয় যে অসমত প্ৰথমবাৰৰ বাবে অনুষ্ঠিত হ’বলগীয়া খেলো ইণ্ডিয়া য়ুথ গেমছ সফল কৰাৰ বাবে সকলোৱে মিলি প্ৰচেষ্টা চলাব লাগিব।ৰাজ্যৰ জনসাধাৰণক এইক্ষেত্ৰত সহায় সহযোগিতা আগবঢ়াবলৈ আহ্বান জনাই মুখ্যমন্ত্রী গৰাকীয়ে।লগতে তেওঁ কয় এই ক্ৰীড়াই গুৱাহাটীক দেশৰ ক্ৰীড়া ৰাজধানী হিচাপে গঢ়ি তোলাৰ দিশত বৃহৎ বৰঙণি যোগাব।
জ্যেষ্ঠ সাংবাদিক নৱ ঠাকুৰীয়ালৈ বিশেষ সন্মান
জ্যেষ্ঠ সাংবাদিক নৱ ঠাকুৰীয়াক প্ৰেছ এমব্লেম কেম্পেইন নামৰ আন্তৰ্জাতিক সংস্থাৰ ভাৰতৰ প্ৰতিনিধি হিচাপে বাছনি কৰা হৈছে। উল্লেখযোগ্য যে চুইজাৰলেণ্ডৰ জেনেভাস্থিত সংস্থাটোৱে সমগ্ৰ পৃথিৱীতে ঘটি থকা সাংবাদিক হত্যা, সংবাদকৰ্মীৰ ওপৰত হোৱা নিগ্ৰহ আৰু শেহতীয়াকৈ ক’ভিডত মৃত্যু হোৱা সাংবাদিকৰ তালিকা প্ৰস্তুত কৰি আহিছে।
কেইবাখনো দেশৰ জ্যেষ্ঠ সাংবাদিকৰ উদ্যোগত ২০০৪ চনত জন্ম লাভ কৰা সংস্থাটোৰ সম্পাদক-প্ৰধান ব্লেইজ লেম্পেনে ঠাকুৰীয়াক এই দায়িত্ব অৰ্পনৰ বিষয়ে অৱগত কৰায়।লগতে সংস্থাটোৱে জাৰ্নেলিষ্ট ফ’ৰাম অসম সভাপতি ৰূপম বৰুৱাক ইয়াৰ সহযোগী সংগঠন হিচাপে মান্যতা প্ৰদান কৰিছে।
২০১০ চনৰ পৰা ৰাষ্ট্ৰসংঘত নিজৰ বক্তব্য উপস্থাপন কৰি অহা সংস্থাটোৱে ভাৰতবৰ্ষৰ বিভিন্ন প্ৰান্তৰ কৰ্মৰত সাংবাদিক আৰ্থিক অৱস্থা সম্পৰ্কটো অধ্যয়ন কৰিব।আজিৰ পৰা তিনিদশক পূৰ্বে অসম অভিযান্ত্ৰিক মহাবিদ্যালয়ৰ পৰা স্নাতক ডিগ্ৰী লাভ কৰা ঠাকুৰীয়াই অসমীয়া কাকতৰ জৰিয়তে সাংবাদিকতা জীৱন আৰম্ভ কৰে।
সম্প্ৰতি তেওঁ বহুকেইখন ৰাষ্ট্ৰীয় আৰু আন্ত:ৰাষ্ট্ৰীয় পৰ্যায়ৰ কাকতত সাংবাদিকতা আৰু সাংবাদিকৰ বিভিন্ন সমস্যা ওপৰত প্ৰবন্ধ লিখি আহিছে।
ভিউৱাছৰ মতামত