বঙাইগাঁৱত ৭৫ সংখ্যক স্বাধীনতা দিৱসত প্ৰশস্তিপত্ৰ প্ৰদান কৰা হ’ব চিকিৎসক,নাৰ্চ আৰু স্বাস্থ্যকৰ্মীক

আগন্তুক ৭৫ সংখ্যক স্বাধীনতা দিৱসৰ উদযাপনৰ প্ৰস্ততি ইতিমধ্যে আৰম্ভ হৈছে। এই স্বাধীনতা দিৱসৰ অংশস্বৰূপে বঙাইগাঁও জিলা সভাকক্ষত উপায়ুক্ত ডা: এম এচ লক্ষ্মী প্ৰিয়াৰ সভাপতিত্বত আজি এখন সভা অনুষ্ঠিত হয়।জিলা উন্নয়ন আয়ুক্ত, আৰক্ষী অধীক্ষক, অতিৰিক্ত উপায়ুক্তসকল, জিলা প্ৰশাসনৰ আন বিষয়াসকল, বিভাগীয় মুৰব্বী বিষয়াসকলৰ অংশগ্ৰহণেৰে অনুষ্ঠিত সভাৰ আলোচনা মৰ্মে বঙাইগাঁও গান্ধী ময়দানত অহা ১৫ আগষ্টত ৭৫ সংখ্যক স্বাধীনতা দিৱস পালন কৰা হ’ব।
অনুভাষ যন্ত্ৰ যোগে দেশপ্ৰেমমূলক গীত বজোৱা, ঘৰে ঘৰে ৰাষ্ট্ৰীয় পতাকা উত্তোলন, চৰকাৰী,অৰ্ধচৰকাৰী, বেচৰকাৰী অনুষ্ঠান-শিক্ষানুষ্ঠান, ৰাজহুৱা খণ্ডৰ প্ৰতিষ্ঠান, ব্যৱসায়িক প্ৰতিষ্ঠান আদিত ৰাষ্ট্ৰীয় পতাকা উত্তোলন, শ্বহীদ তৰ্পন, গান্ধী ময়দানত বিশিষ্ট অতিথিৰ দ্বাৰা আনুষ্ঠানিকভাৱে ৰাষ্ট্ৰীয় পতাকা উত্তোলন আদি কাৰ্যসূচীৰে স্বাধীনতা দিৱস উদযাপন কৰা হ’ব।সভাত স্বাধীনতা দিৱসৰ কাৰ্যসূচীৰ ভিতৰত ক’ভিড মহামাৰীৰ সময়ত ৰাইজলৈ আগবঢ়োৱা চিকিৎসা সেৱাৰ বাবে কৃতজ্ঞতা জনোৱাৰ অৰ্থে চিকিৎসক, নাৰ্চ আৰু আন স্বাস্থ্যকৰ্মীসকলক জিলা প্ৰশাসনে প্ৰশস্তিপত্ৰ প্ৰদান কৰিবলৈকো এক গুৰুত্বপূৰ্ণ সিদ্ধান্ত গ্ৰহণ কৰে ৷সভাত স্বাধীনতা দিৱস উদযাপনৰ কাৰ্যসূচী নিয়াৰিকৈ চলাই নিয়াৰ বাবে অস্থায়ী চামিয়না নিৰ্মাণ, নিৰাপত্তা, পেৰেড গ্ৰাউণ্ড খান্দি বিস্ফোৰক আদি আছে নেকি পৰীক্ষা কৰি পুনৰ নিৰ্মাণ, পেৰেডৰ আখৰা, অন্যান্য কাম আদিৰ দায়িত্ব বিভিন্ন বিষয়াক দিয়া হয়।