ভাৰত ৰত্ন লোকপ্ৰিয় গোপীনাথ বৰদলৈ আন্তৰ্জাতিক বিমানবন্দৰটো আদানী গ্রুপক গতাই চমজাই বিমান বন্দৰ ব্যক্তিগতকৰণ কৰাৰ সিদ্ধান্তৰ বিৰুদ্ধে আজি অসম জাতীয় পৰিষদৰ কামৰূপ মহানগৰ জিলা সমিতিয়ে ভি আই পিত বিমান বন্দৰ সংযোগী পথত গণ স্বাক্ষৰ অভিযান কাৰ্যসূচী আৰম্ভ কৰিছে । অহা ১৬ আগষ্টলৈকে সপ্তাহজোৰা কাৰ্যসূচীৰে শুভাৰম্ভ হোৱা গণ স্বাক্ষৰ অভিযানত পৰিষদৰ কেন্দ্ৰীয় সমিতিৰ যুটীয়া সম্পাদকদ্বয় ৰাজীৱ ভট্টাচাৰ্য আৰু প্ৰিন্স ফাইজুল হক , প্ৰচাৰ সম্পাদক দেৱজিৎ অধিকাৰী , কামৰূপ মহানগৰ জিলা কমিটিৰ সভাপতি সঞ্জীৱ বৰা , জাতীয় নাৰী শক্তিৰ কামৰূপ মহানগৰ জিলা কমিটিৰ সভানেত্ৰী দুলুমণি গগৈকে ধৰি কেবাজনো কৰ্মকর্তা উপস্থিত থাকে । অৱশ্যে কাৰ্যসূচী চলি থকাৰ মাজতেই মহানগৰ আৰক্ষী বা কামৰূপ মহানগৰ জিলা প্ৰশাসনৰ আগতীয়া অনুমতি নোলোৱাকৈ গণ স্বাক্ষৰ অভিযান আৰম্ভ কৰা বাবে স্থানীয় আজাৰা আৰক্ষীয়ে বাধা প্ৰদান কৰে । আজাৰা সংমণ্ডলৰ সহকাৰী আৰক্ষী আয়ুক্ত নন্দিনী কাকতিৰ নেতৃত্বত , আজাৰা থানাৰ ভাৰপ্ৰাপ্ত বিষয়া তপন চন্দ্ৰ কলিতা , বৰঝাৰ আৰক্ষী চকীৰ ভাৰপ্ৰাপ্ত বিষয়া অশোক কলিতাসহ এটা আৰক্ষী – চি আৰ পি এফৰ দল কাৰ্যসূচী চলি থাকে সময়তে উপস্থিত হয় আৰু যাবতীয় অনুমতি অবিহনে কাৰ্যসূচী অনুষ্ঠান কৰাৰ অভিযোগ তুলি কাৰ্যসূচীত বাধা প্ৰদান কৰে । ইয়াৰ পূৰ্বে গণ স্বাক্ষৰ কাৰ্যসূচীত ভাগ লোৱা নেতা সকলে দেশৰ অন্যতম লাভজনক বিমান বন্দৰ হিচাপে পৰিগণিত হৈ অহা ভাৰতৰত্ন লোকপ্ৰিয় গোপীনাথ বৰদলৈ আন্তৰ্জাতিক বিমানবন্দৰটো ব্যক্তিগতকৰণৰ লক্ষ্যৰে আদানী গ্রুপক গতাই দিয়াৰ বাবে বিজেপি চৰকাৰক কঠোৰ ভাষাৰে সমালোচনা কৰি অসমৰ আৱেগ জড়িত থকা বিমান বন্দৰটো ব্যক্তিগত কৰণৰ সিদ্ধান্ত বাতিল কৰিবলৈ দাবী জনায় । বিশেষকৈ ব্যক্তিগতকৰণ হলে বিমান বন্দৰৰ কাষৰীয়া অঞ্চলৰ ক্ষুদ্ৰ ক্ষুদ্ৰ ব্যৱসায়ী সকলৰ জীৱন জীৱিকালৈ ভাবুকি আহিব বুলি নেতা সকলে তথ্য সহকাৰে দাঙি ধৰে । ইফালে বিমান বন্দৰ আদানী গ্রুপক গতাই দিয়াৰ বিৰুদ্ধে গণ স্বাক্ষৰ অভিযান চলি থকাৰ মাজতে সোমবাৰে আদানী গ্রুপৰ ফালৰ পৰা এটা দলে দুমাহৰ বাবে পৰীক্ষামুলক ভিত্তিত বৰঝাৰ বিমান বন্দৰত আহি বাঁহৰ পাতে । পূৰ্ৱ নিৰ্ধাৰিত সূচী অনুসৰি আদানী গ্ৰুপে দুমাহ অৰ্থাৎ অহা ৯ অক্টোবৰলৈ বৰঝাৰ বিমান বন্দৰত পৰীক্ষা মূলকভাৱে বাঁহৰ পাতিব । তাৰ পাছতে ৯ বা ১০ অক্টোবৰত বৰঝাৰ বিমান বন্দৰটোৰ পৰিচালনাৰ দায়িত্বভাৰ আদানী গ্ৰুপে চমজি ল`ব ।
Trending
- প্ৰকৃতিপ্ৰেমী মঞ্চ অসমৰ জহামাল উদ্ধাৰ
- প্ৰতিকূল বতৰকো নেওচি সৰ্বানন্দ সোণোৱালৰ সমৰ্থনত ওলাই আহিল হাজাৰ হাজাৰ লোক-ডিব্ৰুগড় লোকসভা সমষ্টিৰ বিজেপি নেতৃত্বাধীন এনডিএ-ৰ প্ৰাৰ্থী হিচাপে মনোনয়ন পত্ৰ দাখিল কৰে কেন্দ্ৰীয় মন্ত্ৰী সৰ্বানন্দ সোণোৱালে
- পল্টন বজাৰত বহুভাষিক কাব্য সন্ধ্যা অনুষ্ঠিত
- Dr. Buljit Buragohain at the Annual Lecture Program of the Department of Education B Borooah College
- কাহিলীপাৰাত প্ৰসিদ্ধ সাহিত্যিক, সমালোচক ড০ গোবিন্দ প্ৰসাদ শৰ্মাক পৰাগজ্যোতি প্ৰকাশনৰ সম্বৰ্দ্ধনা
- এইচ ডি এফ চি বেংকে সমগ্ৰ ভাৰতত ৬০ টা বেংকিং আউটলেট উদ্বোধন
- কামৰূপ মহানগৰ জিলা নেহেৰু যুৱ কেন্দ্ৰৰ উন্নয়ন খণ্ড ভিত্তিত ক্ৰীড়া উৎসৱ
- বিশ্ব কবিতা দিৱসত কবিতাৰ বৰষুণ
- গুৱহাটীত দুখন আই পি এল মেচ খেলিব ৰাজস্থান ৰয়েলছে- নিশ্চিত কৰিলে দলৰ অধ্যক্ষ অসমৰ ৰঞ্জিত বৰঠাকুৰে
- জিএন আৰ চি হাস্পাতালত বিশ্ব মগজুৰ আঘাত সংক্ৰান্তীয় সজাগতা দিৱস পালন