পশ্চিম গুৱাহাটী বিধানসভা সমষ্টিৰ বিধায়ক ৰমেন্দ্ৰ নাৰায়ণ কলিতাই লকডাউনৰ সময়ৰে পৰা কোনো দৰিদ্ৰ লোক যাতে খাদ্যৰ অভাৱত ভুগিব নালাগে তাৰ বাবে বিভিন্ন স্বেচ্ছাসেৱী সংগঠন আৰু এন জি অ সমূহক সহায়ৰ হাত আগবঢ়াবলৈ আৰু খাদ্য সামগ্ৰী বিতৰণ কৰিবলৈ আহ্বান জনাই আহিছে। সেই আহ্বানৰ প্ৰতি সঁহাৰি দি লকডাউন ঘোষণা কৰাৰ পাছৰে পৰা বিভিন্ন স্বেচ্ছাসেৱী সংগঠনে সমষ্টিটোৰ বিভিন্ন প্ৰান্তত দৰিদ্ৰ লোক সকলক খাদ্য সামগ্ৰীকে ধৰি আন নৃত্য ব্যৱহার্য সামগ্ৰী বিতৰণৰে সহায়ৰ হাত আগবঢ়াই আহিছে। আনহাতে বিধায়ক কলিতাৰ আহ্বান মৰ্মে ১২ ফেব্ৰুৱাৰীত অক্ষয়পাত্ৰ ফাউণ্ডেশ্যনে ৰাণী গাঁও পঞ্চায়তৰ অন্তৰ্গত তথা বৰঝাৰ বিমান বন্দৰৰ কাষৰীয়া জনজাতি বসতিপ্ৰধান ছাটাৰগাঁওত ৬০ টা আৰু ৰাণী চাহ বাগিচাৰ ৬০ টা শ্ৰমিককে ধৰি মুঠ ১২০ টা দৰিদ্ৰ পৰিয়ালক চাউল , দাইল, মিঠাতেল, চেনীকে ধৰি খাদ্য আৰু নিত্য ব্যৱহার্য সামগ্ৰী বিতৰণ কৰে। বিতৰণ অনুষ্ঠানত অক্ষয়পাত্ৰ ফাউণ্ডেশ্যনৰ প্ৰশাসক অনিল ডেকা, ৰাণী আঞ্চলিক পঞ্চায়তৰ সভাপতি পৰমেশ্বৰ বৰ্মন, অগপৰ কেন্দ্ৰীয় কমিটিৰ সম্পাদক সুভাষ শৰ্মা, পশ্চিম গুৱাহাটী বিধান পৰিষদৰ সাধাৰণ সম্পাদক ৰবীন দৈমাৰী, কাঁহিকুছি গাঁও পঞ্চায়তৰ সভাপতি জগন্নাথ ঠাকুৰীয়া, ৰাণী গাঁও পঞ্চায়তৰ সভাপতি পূৰবী বড়োকে ধৰি কেবাজনো বিশিষ্ট লোক উপস্থিত থাকে।