অসম পেট্রোকেমিকেলছ্ লিমিটেড(এপিএল)ৰ সম্প্ৰতি চলি থকা সম্প্ৰসাৰণ প্ৰকল্পৰ অগ্রগতি সন্দৰ্ভত ৰাজ্যৰ উদ্যোগ, বাণিজ্য আৰু ৰাজহুৱা প্ৰতিষ্ঠান দপ্তৰৰ মন্ত্রী বিমল বড়াৰ অধ্যক্ষতাত এখন গুৰুত্বপূর্ণ বৈঠক আজি জনতা ভৱনৰ কাৰ্যালয় কক্ষত অনুষ্ঠিত হয়। এপিএলৰ অধ্যক্ষ বিকুল ডেকা , উদ্যোগ বিভাগৰ সচিব লক্ষ্মণন এছ, আয়ুক্ত ঐনাম শৰণ কুমাৰ সিং, এপি এলৰ পৰিচালন সঞ্চালক ৰাজনীশ গগৈৰ লগতে অন্যান্য বিষয়া সকলৰ উপস্থিতিত অনুষ্ঠিত সভাখনত উদ্যোগটোৰ সমপ্রতি চলি থকা প্ৰকল্পৰ অগ্রগতি সন্দৰ্ভত বুজ লৈ উদ্যোগ মন্ত্রী বড়াই এই কাম খৰতকীয়াকৈ কৰাৰওপৰত গুৰুত্ব আৰোপ কৰে। সভাত এপিএল ৰ পৰিচালন সঞ্চালক গৰাকীয়ে উদ্যোগটোৰ চলিথকা প্ৰকল্পৰ বিষয়ে অৱগত কৰে৷ ইয়াৰ পিছত উদ্যোগ মন্ত্রী বড়াই এসপ্তাহৰ ভিতৰতে এই সন্দৰ্ভত পুনৰ এখন পর্যালোচনা বৈঠক অনুষ্ঠিত কৰাৰ বাবে বিষয়া সকলক নিৰ্দেশ প্ৰদান কৰে।