নীলাচল পাহাৰত অৱস্থিত শ্ৰী শ্ৰীকামাখ্যা মন্দিৰত আজিৰে পৰা আৰম্ভ হৈছে অম্বুবাচী মহাযোগ। আনহাতে বিগত বৰ্ষ সমূহৰ দৰে এইবেলিও বাহিৰৰ পৰা অহা ভক্তৰ থকা – মেলাৰ সুবিধাৰ বাবে কামাখ্যা ৰেল ষ্টেচন চৌহদত স্থাপন কৰা হৈছে এটা বৃহৎ শিবিৰ। আজি বিয়লিৰ ভাগত উত্তৰ-পূব সীমান্ত ৰেলৱেৰ মহাপ্ৰৱন্ধক চেতন কুমাৰ শ্রীবাস্তুৱে অম্বুবাচী মহাযোগৰ বাবে স্থাপন কৰা শিবিৰ পৰিদৰ্শন কৰাৰ। মহা প্ৰবন্ধক গৰাকীয়ে প্রস্তুতি পর্ব আৰু যাত্ৰী ব্যৱস্থাপনাসহ গ্ৰহণ কৰা বিভিন্ন ব্যৱস্থাৱলীৰ পৰ্যালোচনাৰ বাবে কামাখ্যা ৰেলৱে ষ্টেচনৰ এক বিস্তৃত পৰিদৰ্শন কৰে। পৰিদৰ্শনকালত মহা প্ৰৱন্ধকে কামাখ্যালৈ অহা ভক্তৰ সুবিধা, নিৰাপত্তা আৰু সুৰক্ষাৰ বাবে গ্ৰহণ কৰা বিভিন্ন সা-সুবিধা আৰু ব্যৱস্থাৱলী, যেনে ভিৰ নিয়ন্ত্ৰণ ব্যৱস্থা, যাত্রী সা-সুবিধা, পৰিষ্কাৰ-পৰিচ্ছন্নতা, পানীৰ সুবিধা, চিকিৎসা সাহার্য, হেল্প ডেস্ক আৰু সুৰক্ষা সংক্রান্তীয় বিভিন্ন ব্যৱস্থাৱলীৰ মূল্যায়ন কৰে। তেওঁ ষ্টেচনটোত নিযুক্ত ৰেলৱে বিষয়াবৰ্গ আৰু কৰ্মচাৰীসকলৰ সৈতে মত বিনিময় কৰি মেলাৰ সময়চোৱাত প্রত্যাশিত তীর্থযাত্ৰীৰ ভিৰ নিয়ন্ত্ৰণ কৰাৰ অৰ্থে কাৰ্যকৰী প্ৰস্তুতিৰ পৰ্যালোচনা কৰে। তেওঁ দায়িত্ববাহী বিষয়া-কৰ্মচাৰীসকলক সতর্কতা বজায় ৰখা, ভিৰ নিয়ন্ত্ৰণ আৰু ভক্ত তথা যাত্ৰীসকলক তাৎক্ষণিক সাহার্য আগবঢ়োৱাৰ গুৰুত্বৰ ওপৰত চকু ৰাখিবলৈ আহ্বান জনায়। আনহাতে উত্তৰ পূব সীমান্ত ৰেলৱেৰ মুখ্য জনসম্পৰ্কৰক্ষী বিষয়া কপিঞ্জল কিশোৰ শৰ্মাই জানিবলৈ দিয়া মতে ভক্তৰ ভিৰ নিয়ন্ত্ৰণ কৰাৰ বাবে উত্তৰ-পূব সীমান্ত ৰেলৱেই অসম আৰু উত্তৰ বংগৰ গুৰুত্বপূৰ্ণ গন্তব্যস্থানসমূহৰ সৈতে কামাখ্যাৰ সংযোগ স্থাপন কৰি কেইবাখনো বিশেষ অসংৰক্ষিত ৰেলসেৱা পৰিচালন কৰি আহিছে। ইয়াৰ উপৰিও, অম্বুবাচীৰ সময়ত ভক্তৰ সুগম ভ্ৰমণৰ সুবিধা আৰু পৰিবহন ক্ষমতা বৃদ্ধি কৰাৰ বাবে নিয়মীয়াভাবে চলাচল কৰা কেবাখনো যাত্রীবাহী ৰেলত অস্থায়ীভাৱে দবা সংযোজন কৰা হৈছে। যাতে অম্বুবাচী মহাযোগলৈ আহিব বিচৰা ভক্তসকলে কামাখ্যা ৰেল ষ্টেচনলৈ অহা – যোৱা কৰিব পাৰে।