ঢকুৱাখনাত কেন্দ্ৰীয় টাউন ৰঙালী বিহুৰ প্ৰস্তুতি

ঢকুৱাখনা নগৰৰ কুৰি বছৰ গৰকা কেন্দ্ৰীয় টাউন ৰঙালী বিহু সমিতিৰ উদ্যোগত বিগত দুটা বছৰৰ কৰোনা কালীন  বিৰতিৰ পাছত চলিত বৰ্ষত বিংশতিতম ৰঙালী বিহুখন অনুষ্ঠিত কৰাৰ প্ৰস্তুতি সম্পূৰ্ণ হৈছে । ঢকুৱাখনা নগৰৰ ৰাজহুৱা খেল পথাৰৰ বিহু বাকৰিত অহা ৯ আৰু ১০ মে’ সোমবাৰ আৰু মঙ্গলবাৰে  দুদিনীয়া কাৰ্যসূচীৰে এই বিহুখন অনুষ্ঠিত হব। উদযাপন সমিতিৰ সম্পাদক কৈলাশ গগৈয়ে সংবাদ মাধ্যমক জনোৱা মতে অহা ৯ মে’ৰ প্ৰথম দিনা পতাকা উত্তোলন ,শ্বহীদ তৰ্পণৰ পাছতে চেমনীয়া ঢোল বাদন , টকা বিহু ,সৰু বিহুৱতী আৰু বৰ বিহুৱতী প্ৰতিযোগিতা অনুষ্ঠিত হব। ১০ মে’ৰ দ্বিতীয় দিনা দুপৰীয়া চূড়ান্ত স্তৰৰ প্ৰতিযোগিতা সমূহ অনুষ্ঠিত হব । সন্ধিয়া প্ৰয়াত ডাঃ হলিৰাম লাগাচু , ৰাজা খনিকৰ , অচ্যুত দাস , টুকুমনি চুতীয়া , ৰাজাধিৰাজ গগৈ স্মাৰক শ্ৰদ্ধাঞ্জলী অনুষ্ঠান অনুষ্ঠিত হোৱাৰ পাছত নিশা ৮ বজাত জনপ্ৰিয় কণ্ঠশিল্পী কুসুম কৈলাশৰ সংগীতানুষ্ঠান অনুষ্ঠিত হব।  উদযাপন সমিতিয়ে জনোৱা মতে বৰবিহুৱতী প্ৰতিযোগিতাৰ প্ৰথম শ্ৰেষ্ঠ পুৰস্কাৰ হিচাবে নগদ ৩০হাজাৰ ১টকা , দ্বিতীয় পুৰস্কাৰ নগদ ২০হাজাৰ ১টকা ,  সৰু বিহুৱতী প্ৰতিযোগিতাৰ প্ৰথম শ্ৰেষ্ঠ পুৰস্কাৰ হিচাবে নগদ ১৫ হাজাৰ ১টকা , দ্বিতীয় পুৰস্কাৰ হিচাবে ১০হাজাৰ ১টকা , টকা বিহুৰ প্ৰথম শ্ৰেষ্ঠ পুৰস্কাৰ ১০হাজাৰ ১টকা আৰু চেমনীয়া ঢোল বাদন প্ৰতিযোগিতাৰ প্ৰথম শ্ৰেষ্ঠ পুৰস্কাৰ হিচাবে ৫ হাজাৰ ১টকা নিৰ্ধাৰণ কৰি ৰাজ্য খনৰ আগ্ৰহী প্ৰতিযোগী সকলক উদযাপন সমিতিৰ ৯৯৫৭৭৮৫০৬০ , ৯১০১৭ ১৯৭৩৬ নম্বৰত যোগাযোগ কৰি শীঘ্ৰে  নামভৰ্তি কৰিবলৈ সমিতিয়ে আহ্বান জনাইছে ।
বাতৰি যুগুতালে অমৃত পৱন বৰাই