অসমৰ চিনেমা জগতৰ বাবে এটি সুখবৰ। বুছান ফিল্ম ফেষ্টিভেলৰ চলচিত্ৰ বিনিয়োগ আৰু সহ-প্ৰযোজনা বজাৰ Asian Project Market ৰ বাবে নিৰ্বাচিত হৈছে চলচিত্ৰ নিৰ্মাতা ৰীমা দাসৰ ‘Malti My Love’ নামৰ চিনেমা-প্ৰকল্প। এছিয়াৰ সৰ্ববৃহৎ এই প্ৰজেক্ট মাৰ্কেটৰ বাবে এই বছৰ পৃথিৱীৰ ১৩খন দেশৰ ৩০ টা চিনেমা-প্ৰকল্প বাছনি কৰা হৈছে। এছিয়ান প্ৰজেক্ট মাৰ্কেট কৰ্তৃপক্ষই আনুষ্ঠানিকভাৱে এই ঘোষণা কৰিছে আৰু নিৰ্বাচিত চলচিত্ৰ পৰিচালক আৰু প্ৰযোজকসকলৰ তালিকা প্ৰকাশ কৰিছে। অহা ৭ অক্টোবৰৰ পৰা ১০ অক্টোবৰলৈ বুছান এক্সজিবিছন এণ্ড কনভেনছন চেণ্টাৰ’ৰ ১ নং এক্সিবিছন চেণ্টাৰত ‘এছিয়ান মাৰ্কেট প্ৰজেক্ট ২০২৩’ অনুষ্ঠিত হ’ব। উল্লেখ্য যে, পৃথিৱীৰ ৫০খন দেশৰ ৩৯৯টা ফিছাৰ প্ৰকল্পৰ ভিতৰত ৰীমা দাসৰ প্ৰকল্পটো ধৰি কেৱল ৩০ টা প্ৰকল্পহে নিৰ্বাচিত হৈছে। এছিয়ান মাৰ্কেট প্ৰজেক্টলৈ ৰীমা দাসৰ Malti My Love চিনেমা প্ৰকল্প নিৰ্বাচিত হোৱাৰ খবৰে স্বাভাৱিকতে আনন্দ কঢ়িয়াই আনিছে।