অসম চৰকাৰৰ গৃহ নিৰ্মাণ আৰু নগৰ পৰিক্ৰমা বিভাগৰ মন্ত্ৰী অশোক সিংহলে আজি গুৱাহাটী মহানগৰ উন্নয়ন কৰ্তৃপক্ষৰ অধীনত আৰু গৃহ নিৰ্মাণ তথা নগৰ পৰিক্ৰমা বিভাগৰ তত্ত্বাৱধানত বোন্দা শ্লুইচ গে’টৰ সমীপত নতুনকৈ নিৰ্মিত বোন্দাজান পাম্পিং ষ্টেচনটোৰ শুভ উদ্বোধন কৰে। ১১২০ লাখ টকা প্ৰকল্প ব্যয়ৰে নিৰ্মিত এই ষ্টেচনে গুৱাহাটীৰ কৃত্ৰিম বানৰ ধাৰাবাহিক সমস্যা সমাধানৰ ক্ষেত্ৰত গুৰুত্বপূৰ্ণ ভূমিকা গ্ৰহণ কৰিব।
প্ৰকল্পটো উদ্বোধন কৰি প্ৰদান কৰা ভাষণত মন্ত্ৰী সিংহলে নৱনিৰ্মিত পাম্পিং ষ্টেচনটোৰ বিষয়ে বিশদভাৱে উল্লেখ কৰে। তেওঁ কয় যে ইয়াৰ দ্বাৰা বোন্দা শ্লুইচ গেটৰ পাম্পিং ক্ষমতা যথেষ্ট বৃদ্ধি পাব আৰু অতিৰিক্ত পানী ব্ৰহ্মপুত্ৰ নদীলৈ ঘূৰাই অনাৰ মাধ্যমেৰে মহানগৰীৰ পানী জমা হোৱা সমস্যা ফলপ্ৰসূভাৱে লাঘৱ হ’ব। তেওঁ আশা প্ৰকাশ কৰে যে এই পদক্ষেপে গুৱাহাটীৰ জনসাধাৰণে সন্মুখীন হৈ অহা কৃত্ৰিম বানৰ দীৰ্ঘদিনীয়া সমস্যা সমাধানৰ দিশত যথেষ্ট সকাহ প্ৰদান কৰিব।
চৰকাৰী আঁচনিসমূহত নাগৰিকৰ সক্ৰিয় অংশগ্ৰহণৰ গুৰুত্বৰ ওপৰত আলোকপাত কৰি মন্ত্ৰী সিংহলে সকলো বাসিন্দাক মহানগৰীৰ পৰিষ্কাৰ-পৰিচ্ছন্নতাৰ ক্ষেত্ৰত অৰিহণা যোগাবলৈ আহ্বান জনায়। তেওঁ “স্বচ্ছতাই সেৱা” অভিযানৰ কথা উল্লেখ কৰি অহা ১ অক্টোবৰৰ পুৱা ১০ বজাত স্বচ্ছতা অভিযানৰ বাবে এঘণ্টা সময় উচৰ্গা কৰিবলৈ নাগৰিকসকলৰ প্ৰতি আহ্বান জনায়।
উল্লেখযোগ্য যে বোন্দা শ্লুইচ গেটৰ পাম্পিং ক্ষমতা বৃদ্ধিৰ বাবে নতুন বোন্দাজান পাম্পিং ষ্টেচন নিৰ্মাণৰ কাম হাতত লোৱা হৈছিল। প্ৰতি ছেকেণ্ডত ২x ১৭০০ লিটাৰ পাম্পেৰে সজ্জিত বৰ্তমানৰ পাম্প ষ্টেচনটোৱে বিভিন্ন প্ৰত্যাহ্বানৰ সন্মুখীন হৈছিল, যেনে ছাম্প পিটৰ অনুপস্থিতি, ইয়াৰ কাৰ্য্যকৰী সময়সীমা সীমিত হোৱা আৰু নিৰ্ধাৰিত সময়ত প্ৰয়োজনীয় পানী পাম্প কৰি উলিয়াবলৈ অসমৰ্থ হোৱা। নতুন পাম্প হাউছে এই সমস্যাসমূহৰ সমাধান কৰিব, যাৰ ফলত ইয়াৰ উজনি অংশত কৃত্ৰিম বান সমস্যাৰ দীৰ্ঘদিনীয়া আৰু ফলপ্ৰসূ নিয়ন্ত্ৰণ কৰিব পৰা যাব।
নৱনিৰ্মিত পাম্প হাউছটোৰ মূল বৈশিষ্ট্যসমূহৰ ভিতৰত আছে নিৰ্দিষ্ট লাইনৰ সৈতে দুটা ৫০০ কেভিএ ট্ৰেন্সফৰ্মাৰৰ ব্যৱস্থা, যিয়ে সুস্থিৰ শক্তি যোগান নিশ্চিত কৰে। ইয়াৰ উপৰিও এই প্ৰকল্পত ১৫০০ মিটাৰ দীঘল বোন্দাজান চেনেলৰ সম্প্ৰসাৰণ আৰু খনন, চেনেলৰ কাষৰ বেদখল আঁতৰোৱা আৰু উজনি অংশত ২০০০ বৰ্গমিটাৰ এলেকাৰ পানীৰ জলাশয় খনন আদিকো অন্তৰ্ভুক্ত কৰা হৈছে। নগৰাঞ্চলৰ আন্তঃগাঁথনি আৰু ইয়াৰ বাসিন্দাসকলৰ সামগ্ৰিক জীৱনৰ মান উন্নত কৰাৰ বাবে চৰকাৰৰ দায়বদ্ধতা প্ৰদৰ্শন কৰি বোন্দাজান পাম্পিং ষ্টেচন গুৱাহাটীৰ কৃত্ৰিম বানৰ সমস্যাৰ বিৰুদ্ধে যুঁজত এক উল্লেখযোগ্য পদক্ষেপ হিচাপে চিহ্নিত হ’ব বুলি আশা কৰিব পাৰি।
আজিৰ এই অনুষ্ঠানত জি এম ডি এ-ৰ অধ্যক্ষ নাৰায়ণ ডেকা, গুৱাহাটী পৌৰ নিগমৰ মেয়ৰ মৃগেন শৰণীয়া, গৃহ নিৰ্মাণ আৰু নগৰ পৰিক্ৰমা বিভাগৰ আয়ুক্ত-সচিব কবিতা পদ্মনাভন, জি এম ডি এ-ৰ মুখ্য কাৰ্যবাহী বিষয়া অনবামুথন এম.পি, উপাধ্যক্ষ মুকুতা ডেকা, অসম মীন উন্নয়ন নিগম লিমিটেডৰ উপাধ্যক্ষ নৱাৰুণ মেধিৰ লগতে বিভাগীয় বিষয়াসকল উপস্থিত থাকে।
