অসম সাহিত্য সভাৰ প্ৰাক্তন সভাপতি, প্ৰথিতযশা লোকসংস্কৃতিবিদ, কন্ঠশিল্পী, শিক্ষাবিদ, সাহিত্যিক ড০ বীৰেন্দ্ৰ নাথ দত্তক ২ জুনত গুৱাহাটীস্থিত নিজ বাসভৱনত পৰাগজ্যোতি প্ৰকাশনৰ পৰা উষ্ম সম্ভাষণ জনায়। প্ৰকাশনৰ সচিব, সাংবাদিক দীপক শৰ্মাই আঁত ধৰা অনুষ্ঠানত অসম সাহিত্য সভাৰ প্ৰাক্তন সহ: সম্পাদক সাহিত্য কোঁৱৰ কমল কলিতা, বৃহত্তৰ বামুণীমৈদাম লেখিকা সংস্থাৰ সহ: সম্পাদিকা তথা কবি পুতুলী ঠাকুৰীয়া মেধি, বিশিষ্ট গীতিকাৰ-কবি শচীন দাস, প্ৰাঞ্জল মহন্ত আদিয়ে অংশগ্রহণ কৰে। সম্বৰ্দ্ধনা গ্রহণ কৰি পণ্ডিত, গৱেষক ড০ বীৰেন্দ্ৰ নাথ দত্তই কয়- আজি মই বৰ সন্তোষ পালো। নতুন প্রজন্মৰ প্ৰতিভাবান লোকসকলে মোক যি মৰম দিলে সেয়াই সাহস যোগালে। পৰাগজ্যোতি প্ৰকাশনৰ উত্তৰোত্তৰ উন্নতি কামনা কৰিলো। কমল কলিতাই কয়- ড০ দত্ত চাৰৰ অসমৰ সাহিত্য-সংস্কৃতি জগতলৈ যোগোৱা অৱদান অনন্য। বহুমুখী প্রতিভাধৰ ড০ দত্ত চাৰৰ দীৰ্ঘায়ু কামনা কৰিলোঁ। কবি পুতুলী ঠাকুৰীয়া মেধিয়ে আন্তর্জাতিক খ্যাতিসম্পন্ন লোকসংস্কৃতিবিদ ড০ বীৰেন্দ্ৰ নাথ দত্তৰ শিক্ষা-সাহিত্যজগতলৈ যোগোৱা অৱদান অনন্য বুলি মতপোষণ কৰে। প্ৰকাশনৰ সচিব দীপক শৰ্মাই কয়- খ্যাতিমান লোক-সংস্কৃতিবিদ ড০ প্ৰফুল্ল দত্ত গোস্বামীৰ পিচতে ড০ বীৰেন্দ্ৰ নাথ দত্তই লোকসংস্কৃতি জগতলৈ যোগোৱা অৱদান অপৰিসীম মন্তব্য কৰে।
বাতৰি যুগুতালে জিতুমণি দাসে।
অসম সাহিত্য সভাৰ প্ৰাক্তন সভাপতি ড০ বীৰেন্দ্ৰ নাথ দত্তক সম্বৰ্দ্ধনা
