গুৱাহাটী বিশ্ববিদ্যালয় চৌহদত ৩ এপ্ৰিলত অনুষ্ঠিত জালুকবাৰী লেখিকা সমাৰোহ সমিতিৰ দ্বিবাৰ্ষিক অধিৱেশনত সু-লেখিকা মণিৰূপা মিশ্ৰৰ কাব্যগ্ৰন্থ “অনুভৱৰ কেইটিমান পৃষ্ঠা” উন্মোচন কৰা হয় l গ্ৰন্থখন উন্মোচন কৰে কামৰূপ লেখিকা সমাৰোহ সমিতিৰ প্ৰাক্তন সভানেত্ৰী নন্দিতা চলিহাই । চমু ভাষণত নন্দিতা চলিহাই কয় যে এগৰাকী পৰিশ্ৰমী লেখিকা হিচাপে মণিৰূপা মিশ্ৰই ইতিমধ্যে প্ৰণয়ন কৰা পুথিয়ে পুৰস্কাৰ বুটলি পাঠকৰ সমাদৰ পোৱাৰ দৰে সদ্য উন্মোচিত পুথিখনেও পাঠকৰ সঁহাৰি লাভ কৰিবলৈ সক্ষম হ’ব। । সমিতিৰ সদস্যাসকলৰ আৰম্ভনী সংগীতেৰে শুভাৰম্ভ হোৱা সভাখনত সভাপতিত্ব কৰে জালুকবাৰী লেখিকা সমাৰোহ সমিতিৰ সভানেত্ৰী প্ৰজ্ঞা গোস্বামীয়ে আৰু উদ্দেশ্য ব্যাখ্যা কৰে সম্পাদিকা গীতিকা দাসে। সভাত কামৰূপ মহানগৰ লেখিকা সমাৰোহ সমিতিৰ সভানেত্ৰী দৰ্পনা বৰা নেওগ,কুমাৰ ভাস্কৰ বৰ্মা সংস্কৃত আৰু পুৰাতন অধ্যয়ন বিশ্ববিদ্যালয়ৰ প্ৰাক্তন উপাচাৰ্য তথা সাহিত্য অকাডেমি বঁটা প্ৰাপক অধ্যাপক ডঃ দীপক শৰ্মা , বিশিষ্ট সাহিত্যিক আৰু অসম আৰক্ষীৰ উপ মহা পৰিদৰ্শক ডঃ নন্দ সিং বৰকলা , সদৌ অসম লেখিকা সমাৰোহ সমিতিৰ কাৰ্য্যকাৰী সভানেত্ৰী নীলিমা বৰা, গুৱাহাটী বিশ্ববিদ্যালয়ৰ অধ্যাপক ডঃ সোণেশ্বৰ শৰ্মা , অৱসৰপ্ৰাপ্ত অধ্যাপিকা ডঃ লীলাৱতী শইকীয়া বৰাকে ধৰি কেবাজনেও চমু ভাষণত লেখিকা মনিৰূপা মিশ্ৰৰ সাহিত্য প্ৰতিভাৰ উচ্চ প্ৰশংসা কৰে। সভাত মনিৰূপা মিশ্ৰই কবিতা পুথিখন সন্দৰ্ভত নিজৰ অনুভব ব্যক্ত কৰে। শেষত শলাগৰ শৰাই আগবঢ়াই ডঃ মীনা দেৱীয়ে ।