আজাৰা কাঁহিকুছিৰ কৃষি বিজ্ঞান কেন্দ্ৰ, কামৰূপলৈ দেশৰ শ্ৰেষ্ঠ কৃষি বিজ্ঞান কেন্দ্ৰৰ বঁটা

অসম কৃষি বিশ্ববিদ্যালয়ৰ অন্তৰ্গত তথা পশ্চিম গুৱাহাটীৰ আজাৰা কাহিকুছিস্থিত কৃষি বিজ্ঞান কেন্দ্ৰ , কামৰূপলৈ দেশৰ ভিতৰতে শ্ৰেষ্ঠ কৃষি বিজ্ঞান কেন্দ্ৰৰ স্বীকৃতিৰে “এন এ এ এছ ধানুকা” বঁটা,২০২৫” লাভ কৰিবলৈ সক্ষম হৈছে । ৬ জুনত নতুন দিল্লীত নেশ্যনেল একাডেমী অফ এগ্ৰিকালচাৰ চায়েন্সৰ প্ৰতিষ্ঠা দিৱসৰ লগত সঙ্গতি ৰাখি অনুষ্ঠিত এক অনুষ্ঠানত কেন্দ্ৰটোৰ হৈ বঁটা গ্ৰহন কৰে জ্যেষ্ঠ বিজ্ঞানী তথা কেন্দ্ৰৰ মূৰব্বী ডঃ সোণমইনা ভূঞাই । দেশৰ বিশিষ্ট কৃষি বিজ্ঞানী আৰু উচ্চপদস্থ কৃষি প্ৰশাসক সকলৰ উপস্থিতিত প্ৰদান কৰা এই বঁটাত আছে এখনি প্ৰশস্তি পত্ৰ,এটা স্মাৰক আৰু ২৫ হাজাৰ টকাৰ ধনাদেশ । উল্লেখ্য যে কেন্দ্ৰটোৰ মূৰব্বী ডঃ সোণমইনা ভূঞা এজন মীন বিজ্ঞানী আৰু ৰহাস্থিত মীন মহাবিদ্যালয়ৰ প্ৰাক্তন ছাত্ৰ । তেওঁ অসমত উপলব্ধ ২১৭ বিধ মৎস্য প্ৰজাতিৰ দৈহিক বৈশিষ্ট সন্নিৱিষ্ট কৰি মাছ চিনাক্ত কৰিব পৰাকৈ “অসমৰ মাছবোৰ” শীৰ্ষক এখন সচিত্ৰ ৰঙীন পুথি কেইবাবছৰৰো শ্ৰম আৰু ক্ষেত্ৰভিত্তিক অধ্যয়নৰ অন্তত প্ৰণয়ন কৰি মীন বিজ্ঞানৰ গ্ৰন্থৰ ভঁৰাল চহকী কৰিছে। ডঃ ভূঞাক ২০২১ চনত দেশৰ মৎস্য আৰু জীৱ বিজ্ঞান সমাজে প্ৰদান কৰা শ্ৰেষ্ঠ যুৱ সম্প্ৰসাৰণ বিজ্ঞানী বঁটা, ২০২৪ চনত ভাৰতীয় কৃষি গৱেষণা পৰিষদৰ শ্ৰেষ্ঠ মাণ্ডলিক সম্প্ৰসাৰণ বঁটা লাভ কৰিছে। বৰ্তমানলৈ তেওঁ ৮টা গৱেষণা প্ৰকল্পৰ লগত জড়িত হোৱাৰ উপৰিওঁ ২১খন গৱেষণা পত্ৰ, ৪খন মীন বিষয়ক পুথি, ১৫খন কাৰিকৰী পত্ৰিকা লিখনি প্ৰকাশ পাইছে।