চলচ্চিত্ৰ সমালোচক সকলৰ আন্তঃৰাষ্ট্ৰীয় সংস্থা FIPRESCI ৰ ভাৰতৰ শাখাই প্ৰকাশ কৰা তালিকাত ২০২০ চনৰ নিৰ্বাচিত শ্ৰেষ্ঠ ১০খন ভৰতীয় চিনেমা ৰ মাজত অন্তৰ্ভুক্তি লাভ কৰিছে অসমীয়া ভাষাৰ চিনেমা ব্ৰীজে। FIPRESCI এটা অতি সন্মানীয় সংস্হা ,এই সংস্হাক বিশ্বৰ চলচ্চিত্ৰ জগত খনে বিশেষ মান্যতা দিয়ে।প্ৰতি বছৰে নিৰ্মাণ হোৱা চিনেমা সমুহৰ পৰা ১০ খন শ্ৰেষ্ঠ ছবিৰ তালিকা প্ৰকাশ কৰে ।সেই ১০ খনৰ মাজৰ পৰাই আকৌ পৰ্যায় ক্ৰমে সৰ্বশ্ৰেষ্ঠ ৩ খন চিনেমা নিৰ্বাচন কৰে। এই তালিকাত ব্ৰীজৰ অন্তৰ্ভূক্তিয়ে অসমৰ চলচ্চিত্ৰ অনুৰাগী সকলৰ মাজত আনন্দৰ লহৰ তুলিছে।
কৃপাল কলিতাৰ চিত্ৰনাট্য আৰু পৰিচালনাৰে নিৰ্মিত ব্ৰীজে শেহতীয়াকৈ ১৯ সংখ্যাক ইণ্ডিয়ান ফিল্ম ফেষ্টিভেল অৱ লছ এঞ্জেলছ (IFFLA) লৈ আমন্ত্ৰণ লাভ কৰিছে।২০-২৭ মে` ২০২১ অনুষ্ঠিত হ’ব লগীয়া মহোৎসৱটোত ব্ৰীজৰ লছ এঞ্জেলছ প্ৰিমিয়াৰ হ’ব।
ৰমা কুমাৰ দাস আৰু সবিতা দেৱী প্ৰযোজিত ব্ৰীজে ইতিমধ্যে ২৫ টাতকৈ অধিক আন্তঃৰাষ্ট্ৰীয় চলচ্চিত্ৰ মহোৎসৱত অন্তৰ্ভুক্তি লাভ কৰিছে। গোল্ডেন জুৰি আন্তঃৰাষ্ট্ৰীয় চলচ্চিত্ৰ মহোৎসৱত শ্ৰেষ্ঠ ছবি, ১৬ সংখ্যক ত্ৰিশূৰ আন্তঃৰাষ্ট্ৰীয় চলচ্চিত্ৰ মহোৎসৱত শ্ৰেষ্ঠ ছবিৰ সন্মান আৰু ৫১ সংখ্যাক ভাৰতীয় চলচ্চিত্ৰ মহোৎসৱত ভাৰতৰ হৈ সন্মান লাভ কৰি কৃতিত্ব অৰ্জন কৰিবলৈ সক্ষম হৈছে ব্ৰীজ। ৰমেন ৰাভাই চিত্ৰগ্ৰহণ কৰা ব্ৰীজ ৰ সম্পাদনা কিশোৰ ডেকা ।চিংক চাউণ্ড মাধব দাস আৰু গুনজিৎ শৰ্মা। ছাউণ্ড ডিজাইন আৰু মিক্সীং অমৃত প্ৰীতম।ডি আই ৰাজেশ য়াদব।কলা নিৰ্দেশনা দ্বিপেন চুতীয়া।ব্ৰীজৰ মূল চৰিত্ৰ টোত অভিনয় কৰিছে শিৱাৰানী কলিতাই ,আনহাতে অনিন্দিতা দাস গোপমনী গগৈ অনিন্দিতা দাস পাৰ্থ প্ৰতিম বৰা স্বপ্নীল নাথ ভূপেন শৰ্মা ৰোহিনী কুমাৰ ডেকা ধনজিৎ শৰ্মা শচিন্দ্ৰ ভূঞা আদি শিল্পীয়ে কেইটামান গুৰুত্বপূৰ্ণ ভূমিকাত ব্ৰীজত অভিনয় কৰিছে।
