নৱ প্ৰজন্মৰ সন্মুখত আদৰ্শ দাঙি ধৰিছে চৰাইদেউ জিলাৰ এগৰাকী মহিলাই। সাপেখাতি ৰহনৰ এইগৰাকী মহিলাই প্ৰকৃতাৰ্থত দেখুৱাইছে কৰ্ম সংস্কৃতিৰ উৎকৃষ্ট নিদৰ্শন। মহিলাগৰাকীৰ নাম জোন বড়া।
চাৰিজনীয়া এটি সৰু পৰিয়ালৰ মহিলা গৰাকীয়ে মাছৰ পোনা বিক্ৰেতা হিচাপে নিজকে নিয়োজিত কৰিছে । নৱম শ্ৰেণীত অধ্যয়নৰত পুত্ৰ আৰু ষষ্ঠ শ্ৰেণীত অধ্যয়নৰত এগৰাকী কন্যাৰ মাতৃ এইগৰাকী জোন বড়া হ’ব পাৰে সমাজৰ আদৰ্শ। প্ৰসংগক্ৰমে উল্লেখযোগ্য যে অৰ্থনৈতিক সংগ্ৰাম আৰম্ভ কৰা এইগৰাকী মাতৃৰ দুয়োটি সন্তানেই ৰাজ্যিক পৰ্যায়ৰ দৌৰ তথা সন্তৰবিদ হিচাপে চৰাইদেউ জিলালৈ গৌৰৱ কঢ়িয়াই আনিছে। মহিলা গৰাকীৰ স্বামী সম্প্ৰতি কেৰেলাৰ এটা প্ৰতিষ্ঠানত কৰ্মৰত বুলি জানিব পৰা গৈছে।
আনহাতে মহামাৰী ক’ৰণা ভাইৰাছৰ সংক্ৰমণ ভয়াৱহৰূপে বৃদ্ধি পোৱাত কেন্দ্ৰীয় চৰকাৰে ঘোষণা কৰা লক ডাউনে দেশৰ অৰ্থনীতিৰ ওপৰত বিশেষ প্ৰভাৱ পেলোৱা পৰিলক্ষিত হৈছে। যাৰ ফলত দুবেলা দুসাঁজৰ বাবে সংগ্ৰাম কৰা প্ৰতিগৰাকী লোকেই যথেষ্ট অসুবিধাৰো সন্মুখীন হৈছে। তেনে সময়তে এখন দুচকীয়া বাহনৰ পাছফালে এটা পাত্ৰ বান্ধি মাছৰ পোনা বিক্ৰী কৰিবলৈ ওলাই অহা এইগৰাকী মহিলাৰ অৰ্থনৈতিক সংগ্ৰামে বাট দেখুৱাইছে বহুজনক। সহজতে টকা ঘটাৰ চিন্তাত নিমগ্ন এচাম লোকৰ বিপৰীতে সহজ সৰল মনৰ এইগৰাকী কৰ্মোদ্যমী মহিলাৰ অৰ্থনৈতিক সংগ্ৰামক এতিয়া প্ৰশংসা কৰিছে সচেতন মহলে।
খবৰ যুগুতালে চৰাইদেউৰ পৰা অভিজিৎ ভূঞাই..