গুৱাহাটী বিশ্ববিদ্যালয়ৰ শৈক্ষিক পৰিয়ালত সংযোজিত হোৱা নৱাগত স্নাতকোত্তৰ পাঠ্যক্ৰমৰ শিক্ষাৰ্থীসকলক বিশ্ববিদ্যালয়ৰ শৈক্ষিক পৰিৱেশ, মূল্যবোধ আৰু দায়িত্বৰ সৈতে চিনাকি কৰাই দিয়াৰ উদ্দেশ্যেৰে আজি বিৰিঞ্চি কুমাৰ বৰুৱা প্ৰেক্ষাগৃহত বিশেষ কাৰ্যসূচীৰে কেন্দ্ৰীয় দীক্ষাৰম্ভ অনুষ্ঠান সম্পন্ন হয়। বিশ্ববিদ্যালয় সংগীতেৰে আৰম্ভ হোৱা উক্ত অনুষ্ঠানত উপাচাৰ্য অধ্যাপক ননী গোপাল মহন্তই শিক্ষাৰ্থীসকলক সমালোচনামূলক চিন্তা, সমস্যা সমাধানৰ দক্ষতা, ব্যৱহাৰিক জ্ঞান আৰু সৃষ্টিশীলতাক নিজৰ শিক্ষাৰ অবিচ্ছেদ্য অংশ হিচাপে গ্ৰহণ কৰিবলৈ আহ্বান জনায়। অনুষ্ঠানত অৱসৰপ্ৰাপ্ত আই.পি.এছ. বিষয়া হীৰেন চন্দ্ৰ নাথে শিক্ষাৰ্থীসকলক আত্মবিশ্বাস, অধ্যৱসায় আৰু দায়িত্ববোধক জীৱনৰ সফলতাৰ অন্যতম আধাৰ হিচাপে গ্ৰহণ কৰিবলৈ আহ্বান জনায়। অসম গৌৰৱ বঁটা প্ৰাপক, বিশিষ্ট উদ্যোগপতি অনুপম ডেকাই শিক্ষাৰ্থীসকলক দক্ষতা আহৰণ কৰি উদ্ভাৱনী চিন্তা আৰু উদ্যোগী মানসিকতাৰে আত্মনিৰ্ভৰশীলতাৰ দিশে আগুৱাই যাবলৈ আহ্বান জনায়। তেওঁ শিক্ষাৰ্থীসকলক সময়ৰ সৈতে খাপ খুৱাই নতুন দক্ষতা আয়ত্ত কৰাৰ লগতে নিজৰ প্ৰতিভা আৰু সম্ভাৱনাক চিনাক্ত কৰি নতুন সুযোগ সৃষ্টি কৰিবলৈ উৎসাহিত কৰে।