গুৱাহাটীত থলুৱা ঠিকাদাৰে নিৰ্মাণ কৰা প্ৰথমখন উৰণীয়া সেঁতুত ব্যৱহাৰ হৈছে অত্যাধুনিক প্ৰযুক্তি

উত্তৰ পূৱৰ দুৱাৰমুখ স্বৰূপ গুৱাহাটী মহানগৰীত যান জটৰ সমস্যা লাঘৱ কৰাৰ লক্ষ্যৰে কেবাখনো উৰণীয়া সেতুৰ নিৰ্মাণৰ কাম চলি আছে। আনকি ১১ অক্টোবৰত দীনেশ গোস্বামী পথৰ মলিগাঁৱৰ পৰা কামাখ্যাগেটলৈ প্ৰায় ৩ কিঃমিঃ দৈৰ্ঘ্যৰ উৰণীয়া সেতু নিৰ্মাণৰ আধাৰশিলা স্থাপন কৰা হৈছে।

 

 

 

প্ৰস্তাৱিত উৰণীয়া সেতুখন নিৰ্মাণ হ’লে উত্তৰ পূৰ্বাঞ্চলৰ ভিতৰত সৰ্ববৃহৎ উৰণীয়া সেতু হিচাপে পৰিগণিত হ’ব । আনহাতে ৰাজ্যৰ অতি ব্যস্ত অঞ্চল ৰাজধানী দিছপুৰ অঞ্চলক যান জটৰ সমস্যাৰ পৰা মুক্ত কৰি ৰখাৰ বাবে দুখনকৈ উৰণীয়া সেতু নিৰ্মান কৰা হৈছে । এই সন্দৰ্ভত ৰাজ্য চৰকাৰৰ লোকনিৰ্মান বিভাগৰ দিছপুৰ ক্ষেত্ৰীয় পথ সংমণ্ডলৰ (পথ) কাৰ্যবাহী অভিযন্তা প্ৰণৱ ৰাভাই জানিবলৈ দিয়া মতে ইয়াৰ ভিতৰত চানমাৰিৰ পৰা গণেশগুৰি সংযোগী ৰাধাগোবিন্দ পথত নিৰ্মাণ কৰা উৰণীয়া সেতুখন অহা দুৰ্গা পূজাৰ সময়ত মুকলি কৰাৰ লক্ষ্য নিৰ্ধাৰণ কৰা হৈছে । গৌতম কনষ্টাচন প্ৰাইভেট লিমিটেড নামৰ প্ৰতিষ্ঠানটোৱে নিৰ্দিষ্ট কৰি থকা সেতুখনৰ আধাৰশিলা ২০১৯ চনৰ ৬ মাৰ্চত মুখ্যমন্ত্ৰী সৰ্বানন্দ সোনোৱালে লোকনিৰ্মান বিভাগৰ মন্ত্ৰী ডঃ হিমন্ত বিশ্ব শৰ্মাৰ উপস্থিতিত স্থাপন কৰিছিল। দুই বছৰৰ ভিতৰত নিৰ্মাণ সম্পূৰ্ণ কৰাৰ লক্ষ্য নিৰ্ধাৰণ কৰা সেতুখন নিৰ্ধাৰিত সময়তকৈ পাঁচ-ছয় আগতে সম্পন হ’ব বুলি কাৰ্যবাহী অভিযন্তা প্ৰণৱ ৰাভাই সদৰি কৰিছে ।

 

 

ইফালে ৰাজ্যৰ মুখ্যমন্ত্ৰী সৰ্বানন্দ সোনোৱাল আৰু লোকনিৰ্মান বিভাগৰ মন্ত্ৰী ডঃ হিমন্ত বিশ্ব শৰ্মাই অসমৰ থলুৱা ঠিকাদাৰেও যাতে উৰণীয়া সেঁতুকে ধৰি ৰাজ্য চৰকাৰৰ বৃহৎ প্ৰকল্প সমূহ নিৰ্মাণ কৰিব পাৰে তাৰ ওপৰত গুৰুত্ব আৰোপ কৰিছিল। তাৰ অংশহিচাপে দিছপুৰ ছুপাৰ মাৰ্কেটত যুদ্ধ কালীন তৎপৰতাৰে নিৰ্মিত কৰি থকা উৰণীয়া সেতুখন গুৱাহাটীৰ পাৰ্শ্ববৰ্তী মিৰ্জাৰ অনিল দাস নামৰ এজন থলুৱা ঠিকাদাৰক নিৰ্মাণৰ দায়িত্ব দিয়া হৈছে । ২০১৯ চনৰ ৮ ডিচেম্বৰত আধাৰশিলা স্থাপন কৰা আৰু ১২৭.২০ কৌটি টকা ব্যয়ৰে আন্তৰ্জাতিক মানদণ্ডৰে নিৰ্মাণ কৰি থকা সেঁতুখন নিৰ্মাণ সম্পূৰ্ণ কৰাৰ তিনি বছৰ লক্ষ্য নিৰ্ধাৰণ কৰা হৈছিল। কিন্তু প্ৰথম বাৰৰ বাবে গুৱাহাটীৰ উৰণীয়া সেতু নিৰ্মাণৰ দায়িত্ব লাভ কৰা থলুৱা ঠিকাদাৰ অনিল দাসে বিভাগীয় মন্ত্ৰীৰ নিৰ্দেশনা অনুসৰি অহা বহাগ বিহুৰ সময়ত যাতে নিৰ্মাণকাৰ্য সম্পূৰ্ণ হয় তাৰ বাবে দিনে নিশাই কাম কৰি আছে। কার্যবাহী অভিযন্তা গৰাকীয়ে সদৰি কৰা অনুসৰি দুইলেন যুক্ত সেতুখনৰ মুঠ দৈৰ্ঘ্য হ’ব ৮২৫ মিটাৰ ।

 

ইয়াৰে ছুপাৰ মাৰ্কেটৰ পৰা লাষ্টগেটলৈ অংশটোৰ দৈৰ্ঘ্য হ’ব ৩৯৪ মিটাৰ । চাৰে সাত মিটাৰ বহল সেতুখনত মুঠ স্পান থাকিব ২৫ টা । অত্যাধুনিক প্ৰযুক্তিৰে নিৰ্মাণ কৰি থকা সেতুখনৰ দিছপুৰ ছুপাৰ মাৰ্কেটৰ টি আকৃতিৰ জংচনত বক্স গাৰ্ড থাকিব । দিছপুৰ সচিবালয়ৰ পৰা ডাউন টাউনলৈকে উৰণীয়া সেতুখন একমুখী হ’ব । অৰ্থাৎ গণেশগুৰীৰ দিশৰ পৰা খানাপাৰালৈ যোৱা বাহন সমূহ সেতুৰ ওপৰৰে যাব যদিও খানাপাৰাৰ দিশৰ পৰা অহা বাহন সমূহ তলৰ ছাৰ্ভিছ লেনেৰে আহিব লাগিব । লাষ্টগেটলৈ পথচোৱা দুইমুখী হ’ব । এইখিনিতে উল্লেখযোগ্য যে ২০১৮ চনত তেতিয়াৰ গড়কাপ্তানি আৰু বৰ্ত্তমানৰ লোকনিৰ্মান বিভাগৰ মন্ত্ৰী হিচাপে দায়িত্বভাৰ গ্ৰহণ কৰাৰ পাছত ডঃ হিমন্ত বিশ্ব শৰ্মাই বিভাগীয় বিষয়া-অভিযন্তা সকলক যোগ্যতা থকা ৰাজ্যৰ থলুৱা ঠিকাদাৰ বা নির্মাণকাৰী প্ৰতিষ্ঠান সমূহে যাতে দলং , বাট-পথ প্ৰকল্পৰ নিৰ্মাণৰ বাবে নিৰ্দেশনা দিছিল । দিছপুৰ ছুপাৰ মাৰ্কেটৰ উৰণীয়া সেতুখনৰ নিৰ্মাণ কার্য সম্পন্ন হ’লে দিছপুৰ কেন্দ্ৰীক যান জটৰ সমস্যা বহুখিনি সমাধান হোৱাতো নিশ্চিত। ইফালে মালিগাওঁৰ উৰণীয়া সেতুখনৰো নিৰ্মাণৰ দায়িত্ব লাভ কৰিছে অনুপম শৰ্মা নামৰ থলুৱা ঠিকাদাৰ এজনে। উল্লেখযোগ্য যে মন্ত্ৰী ডঃ হিমন্ত বিশ্ব শৰ্মাৰ নিৰ্দেশত দিছপুৰ উৰণীয়া সেঁতুত নিৰ্মাণ কার্যত আন্তৰ্জাতিক মানদণ্ডৰ অত্যাধুনিক প্ৰযুক্তি ব্যৱহাৰ কৰা হৈছে ।

খবৰ যুগুতালে মিৰ্জাৰ পৰা জিতুমণি দাসে..

Share on whatsapp
WhatsApp
Share on facebook
Facebook
Share on twitter
Twitter
Share on email
Email

জ্যেষ্ঠ সাংবাদিক নৱ ঠাকুৰীয়ালৈ বিশেষ সন্মান

জ্যেষ্ঠ সাংবাদিক নৱ ঠাকুৰীয়াক প্ৰেছ এমব্লেম কেম্পেইন নামৰ আন্তৰ্জাতিক সংস্থাৰ ভাৰতৰ প্ৰতিনিধি হিচাপে বাছনি কৰা হৈছে। উল্লেখযোগ্য যে চুইজাৰলেণ্ডৰ জেনেভাস্থিত সংস্থাটোৱে সমগ্ৰ পৃথিৱীতে ঘটি থকা সাংবাদিক হত্যা, সংবাদকৰ্মীৰ ওপৰত হোৱা নিগ্ৰহ আৰু শেহতীয়াকৈ ক’ভিডত মৃত্যু হোৱা সাংবাদিকৰ তালিকা প্ৰস্তুত কৰি আহিছে।

 

 

কেইবাখনো দেশৰ জ্যেষ্ঠ সাংবাদিকৰ উদ্যোগত ২০০৪ চনত জন্ম লাভ কৰা সংস্থাটোৰ সম্পাদক-প্ৰধান ব্লেইজ লেম্পেনে ঠাকুৰীয়াক এই দায়িত্ব অৰ্পনৰ বিষয়ে অৱগত কৰায়।লগতে সংস্থাটোৱে জাৰ্নেলিষ্ট ফ’ৰাম অসম সভাপতি ৰূপম বৰুৱাক ইয়াৰ সহযোগী সংগঠন হিচাপে মান্যতা প্ৰদান কৰিছে।

 

 

২০১০ চনৰ পৰা ৰাষ্ট্ৰসংঘত নিজৰ বক্তব্য উপস্থাপন কৰি অহা সংস্থাটোৱে ভাৰতবৰ্ষৰ বিভিন্ন প্ৰান্তৰ কৰ্মৰত সাংবাদিক আৰ্থিক অৱস্থা সম্পৰ্কটো অধ্যয়ন কৰিব।আজিৰ পৰা তিনিদশক পূৰ্বে অসম অভিযান্ত্ৰিক মহাবিদ্যালয়ৰ পৰা স্নাতক ডিগ্ৰী লাভ কৰা ঠাকুৰীয়াই অসমীয়া কাকতৰ জৰিয়তে সাংবাদিকতা জীৱন আৰম্ভ কৰে।

 

সম্প্ৰতি তেওঁ বহুকেইখন ৰাষ্ট্ৰীয় আৰু আন্ত:ৰাষ্ট্ৰীয় পৰ্যায়ৰ কাকতত সাংবাদিকতা আৰু সাংবাদিকৰ বিভিন্ন সমস্যা ওপৰত প্ৰবন্ধ লিখি আহিছে।

আন্ত:ৰাষ্ট্ৰীয় চলচিত্ৰ মহোৎসৱত প্ৰদৰ্শিত হ’ব মিছিং ছবি

Li:len The Ray of Hope আশাৰ ৰেঙনি এই চিনেমাখন আন্ত:ৰাষ্ট্ৰীয় ঢাকা চিনে মেকিং ইন্টাৰনেশ্যনেল ফ্লিম এৰ্ৱাডত প্ৰদৰ্শিত হ’ব।মিছিং জনজাতিৰ বাস্তৱ কাহিনীৰ ওপৰত নিৰ্মিত এই ছবিখনত এটা বংশগত ৰোগৰ অন্ধবিশ্বাস আৰু বাস্তৱ কাহিনীৰ প্ৰতিচ্ছবি প্ৰতিফলিত হৈছে।

 

 

এই চিনেমাখন পৰিচালনা কৰিছে নাৰায়ণ শীলে।চিনেমাখনৰ দৃশ্যায়ন হৈছে ধেমাজি চিলাপথাৰত। বহু গৰাকী নৱাগত শিল্পীৰ লগতে আন্ত:ৰাষ্ট্ৰীয় পৰ্য্যায়ৰ অভিনেতাই চিনেমাখনত অংশগ্ৰহণ কৰিছে।

কাঠ পেঞ্চিলৰ ক’লা অংশত বিশিষ্ট লোকৰ ছবি অংকন কৰিছে আজাৰাৰ এজন যুৱকে

মহানগৰীৰ পশ্চিম প্ৰান্তৰ আজাৰা কাঁহিকুছিৰ এজন যুৱকে আদৰণীয় পদক্ষেপ গ্ৰহণ কৰিছে। শাৰদীয় দূৰ্গাপূজা উপলক্ষে এক ব্যতিক্ৰমী পদক্ষেপৰে অন্যন্য প্ৰতিভাৰ দাঙি ধৰিবলৈ সক্ষম হৈছে।

 

 

যুৱকজনৰ নাম হৈছে বিশাল চৌধুৰী। চণ্ডীগড় ইউনিভাৰচিটিৰ বি ফাৰ্মাচিৰ তৃতীয় বৰ্ষৰ ছাত্ৰ বিশাল চৌধুৰীয়ে কাঠ পেঞ্চিলৰ ক’লা অংশৰে নিৰ্মাণ কৰিছে ভগৱান তথা বিশিষ্ট লোকৰ মূৰ্তি।

 

 

প্ৰায় ১৫-২০ ঘণ্টাৰ দৃঢ় মনোযোগৰে কাঠ পেঞ্চিলৰ ক’লা অংশত শাৰদীয় দূৰ্গা পূজাৰ সময়ত মা দূৰ্গা (মহিষাসুৰ মৰ্দিনীক) নিৰ্মাণ কৰি উলিয়াছে। ইতিপূৰ্বেও বিশাল চৌধুৰীয়ে বন্ধুবৰ্গৰ নাম পেঞ্চিলৰ ক’লা অংশত খোদিত কৰি ভাৰতৰ বিভিন্ন স্থানত পঠাইছিল। ভৱিষ্যতেও পেঞ্চিলত মূৰ্তি নিৰ্মাণ কৰি যাব বুলি বিশালে জানিবলৈ দিছে।

 

 

 

ব্লেড আৰু সৰু সুৰা সা সামগ্ৰী ব্যৱহাৰ কৰি কাঠ পেঞ্চিলৰ ক’লা অংশত বিভিন্নজন লোকৰ নাম খোদিত কৰি বিভিন্নজনক উপহাৰ হিচাপে প্ৰদান কৰিছে। শাৰদীয় দুৰ্গোসৎৱৰ সময়তো দেৱী দূৰ্গাৰ ছবি অংকন কৰি বিশাল চৌধুৰীয়ে বেচ চৰ্চা লাভ কৰিবলৈ সক্ষম হৈছে।বিশাল ভাৰতীয় বিমান বন্দৰ গুৱাহাটীস্থিত ক্ষেত্ৰীয় মুখ্য কাৰ্যালয়ৰ বিষয়া সুশীল লাল চৌধুৰী আৰু ভাৰতী চৌধুৰীৰ পুত্ৰ।

গুৱাহাটী সংসদীয় সমষ্টিক পোহৰাই তুলিবলৈ সাংসদ কুইন ওজাৰ উদ্যোগত এক হাজাৰ সৌৰশক্তি চালিত ষ্ট্ৰীট লাইট স্থাপনৰ তৎপৰতা

গুৱাহাটী লোকসভা সমষ্টিৰ সাংসদ কুইন ওজাই সংসদীয় সমষ্টিৰ অন্তৰ্গত দহটা বিধানসভা সমষ্টিৰ বিদ্যুৎ যোগান কম থকা বা সঘনাই লোড শ্বেদিং হোৱা অঞ্চল সমূহক পোহৰাই তুলিবলৈ এক হাজাৰ সৌৰশক্তি চালিত ষ্ট্ৰীটলাইট স্থাপন কৰিবলৈ তৎপৰতা আৰম্ভ কৰিছে।এই আঁচনি ৰূপায়ণৰ লগত জড়িত কামৰূপ জিলাৰ ডি আই এছ এইছ এ ৰ সদস্য প্ৰশান্ত মহন্তই জানিবলৈ দিয়া মতে সাংসদ কুইন ওজাই তেওঁৰ সাংসদৰ স্থানীয় এলেকা উন্নয়ন পুঁজিৰ ধনেৰে ‘অটল জ্যোতি যোজনা ২০১৯-২০’ আঁচনিৰ অধীনত বিগত আগষ্ট মাহৰ পৰা সৌৰশক্তি চালিত এল.ই.ডি ষ্ট্ৰীটলাইট স্থাপনৰ কাম আৰম্ভ কৰা হৈছে।

 

 

এই লাইট সমূহত উচ্চ প্ৰযুক্তিৰ সমাহাৰ ঘটাৱা হৈছে। ই সন্ধিয়া অন্ধকাৰ হ’লেই স্বয়ংক্ৰিয় ভাবে নিজে নিজে নিজে জ্বলি উঠে। তেনেদৰে পুৱা পোহৰ হ’লেই নিজে নিজে নুমাই যাব।গুৱাহাটী সংসদীয় সমষ্টিৰ অধীনৰ দুধনৈ, বকো, ছয়গাওঁ, পলাশবাৰী, পশ্চিম গুৱাহাটী, পূব গুৱাহাটী, দিশপুৰ, জালুকবাৰী, হাজো, আৰু বৰক্ষেত্ৰীত প্ৰতিটোতে ১০০ টাকৈ ষ্ট্ৰীটলাইট গুৰুত্বপূৰ্ণ স্থান সমূহত স্থাপন কৰি থকা হৈছে। এইক্ষেত্ৰত ধর্মানুষ্ঠান, শিক্ষানুষ্ঠান, ক্লাব, সামূহিক গৃহকে ধৰি ৰাজহুৱা স্থানক প্ৰথম অগ্ৰাধিকাৰ দিয়া হৈছে। ষ্ট্ৰীটলাইট সমূহ চলিত বৰ্ষৰ ভিতৰতে স্থাপনৰ লক্ষ্য নিৰ্ধাৰণ কৰা হৈছে। আঁচনিখন ৰূপায়িত হ’লে নিশ্চিত ভাবে গুৱাহাটী সংসদীয় সমষ্টিৰ দহটা বিধানসভা সমষ্টিৰ গুৰুত্বপূৰ্ণ স্থান সমূহ নিশাৰ ভাগত পোহৰেৰে আলোকিত হৈ থাকিব বুলি আঁচনিৰ লগত জড়িত প্ৰশান্ত মহন্তই আশা ব্যক্ত কৰিছে।

এগৰাকী যুৱতীৰ ব্যতিক্ৰমী পদক্ষেপ

মাজুলীৰ এগৰাকী যুৱতীয়ে আদৰ্শ দেখুৱাইছে।উচ্চ শিক্ষিত যুৱতীগৰাকীয়ে মাজুলীৰ সংস্কৃতিক নৱপ্ৰজন্মৰ মাজত বিলোৱাৰ বাবে প্ৰয়াস কৰিছে। ঘৰতে নৃত্য বিদ্যালয় স্থাপন কৰি এদল কণমানিক প্ৰশিক্ষণ প্ৰদান কৰিছে।

 

 

যুৱতীগৰাকী নাম প্ৰিয়ংকা টাকু। ঘৰ মাজুলীৰ ২নং বৰগঞাত।জানিব দিয়া মতে যুৱতীগৰাকীয়ে ৭২ গৰাকী ছাত্ৰ ছাত্ৰীক নূপুৰ নিতম বিদ্যালয়খনত প্ৰশিক্ষণ প্ৰদান কৰি আহিছে।উল্লেখযোগ্য যে ডিব্ৰুগড় বিশ্ববিদ্যালয়ৰ পৰা পৰিৱেশ্য কলা অধ্যয়ন কৰি প্ৰিয়ংকাই এই নৃত্য বিদ্যালয়খন স্থাপন কৰিছে।যিসময়ত একাংশই চাকৰিৰ বাবে হাবাথুৰি খাইছে,সেই সময়ত এই যুৱতীগৰাকীয়ে গাঁও অঞ্চলত ছাত্ৰ ছাত্ৰীক নৃত্যৰ প্ৰশিক্ষণ দি সচেতন লোকৰ সমাদৰ বুটলিছে।

পূৰ্ণ গতিত আগবাঢ়িছে জাতীয় আদৰ্শ শিক্ষা সংসদৰ কাম কাজ

পূৰ্ণ গতিত আগবাঢ়িছে অসম সাহিত্য সভাৰ পৃষ্ঠ পোষকতাত গঠিত স্বতন্ত্ৰ ন্যাস জাতীয় আদৰ্শ শিক্ষা সংসদৰ শৈক্ষিক কামকাজ। ন্যাসৰ অধীনত ইতিমধ্যে ৫খন বিদ্যালয় স্থাপন হৈছে আৰু পৰৱৰ্তী শিক্ষাবৰ্ষত নতুনকৈ কমেও এশখন বিদ্যালয় স্থাপনৰ লক্ষ্য স্থিৰ কৰা হৈছে৷

 

 

 

জাতীয় শিক্ষা সংসদৰ শিক্ষক প্ৰশিক্ষণৰ হাতপুথি প্ৰস্তুতৰ শিক্ষক প্ৰশিক্ষণৰ প্ৰক্ৰিয়া আৰু অন্যান্য বিষয়সমূহ খৰচি মাৰি আলোচনা কৰাৰ বাবে সংসদৰ এক গুৰুত্বপূৰ্ণ বৈঠক সম্পন্ন হয় অসম সাহিত্য সভাৰ ৰাধাগোবিন্দ বৰুৱা প্ৰেক্ষাগৃহত। বুনিয়াদী স্তৰত গুৰুত্ব দি ৰাষ্ট্ৰীয় শিক্ষানীতিৰ আধাৰত জাতীয় শিক্ষা সংসদে পাঠ্যপুথি প্ৰকাশত এই গুৰুত্বপূৰ্ণ বৈঠকে অনুমোদন দিয়ে। জাতীয় আদৰ্শ শিক্ষা সংসদৰ উপাধ্যক্ষ ডাঃ জয়ন্তবিশ্ব শৰ্মা, সচিব ৰাণা বশিষ্ঠ, বিশিষ্ট ভাষাবিদ, সাহিত্যাচাৰ্য ড০ ৰমেশ পাঠক, অসম সাহিত্য সভাৰ প্ৰাক্তন সভাপতি ড০ পৰমানন্দ ৰাজবংশী, সভাৰ প্ৰাক্তন প্ৰধান সম্পাদক পদুম ৰাজখোৱা, কৃতি শিক্ষক তথা সংসদৰ পাঠ্যক্ৰম সমন্বয়ক সমিতিৰ সভাপতি গৌৰীকান্ত ভূঞা, বিশিষ্ট পণ্ডিত সাহিত্যাচাৰ্য ড০ পৰাগ কুমাৰ ভট্টাচাৰ্য, ৰিপুঞ্জয় বৰদলৈ, সুৰেন গোস্বামী, জগন্নাথ ৰাজবংশী, কমল চৌধুৰী, ড০ সঞ্জীৱ কুমাৰ শৰ্মা, যতীন্দ্ৰনাথ সূত, পংকজ কুমাৰ দত্ত, ৰমানন্দন বৰা আদিয়ে অংশ লয়।

 

 

 

সভাৰ আৰম্ভণিতে পাঠ্যক্ৰম প্ৰস্তুতি বিষয়ত সংসদৰ লক্ষ্য, উদ্দেশ্যে আৰু দৃষ্টিভংগীৰ বিষয়ে আভাস দিয়ে ডাঃ জয়ন্ত বিশ্ব শৰ্মাই। সংসদে সেৱাৰ মনোভাৱেৰে কাম কৰি থকা সুপৰিকল্পনাৰে আগবাঢ়ি গৈ কণকণ ছাত্ৰ ছাত্ৰীসকলক বুনিয়াদী স্তৰৰ পৰা প্ৰকৃতাৰ্থত মানৱ সম্পদ ৰূপে গঢ়াত গুৰুত্ব দিব বুলি কয়। জাতীয় আদৰ্শ শিক্ষা সংসদৰ এই কল্যাণমুখী প্ৰকল্পই অসমৰ জাতীয় জীৱনত বহুমূলীয়া বৰঙণি আগবঢ়াব বুলি মন্তব্য দিয়ে ড০ পৰাগ কুমাৰ ভট্টাচাৰ্যই। উন্নত মানৰ পাঠ্যক্ৰমৰে অসমৰ প্ৰাথমিক পৰ্যায়ৰ শিক্ষাত এইদৰে নতুনত্ব প্ৰয়াসেৰে অসম জাতীয় আদৰ্শ শিক্ষা সংসদে কৰা কাম কাজক বিভিন্নজনে শলাগিছে।