শাৰদীয় শ্ৰীশ্ৰীদুৰ্গাপূজাৰ গইনা লৈ কোনো দুচকীয়া – চাৰিচকীয়া বাহনৰ উদণ্ড চালকে গুৱাহাটী মহানগৰীৰ ৰাজপথত অনিয়ন্ত্ৰিত বা দ্ৰুতগতিত বাহন চলাই সন্ত্ৰাসৰ সৃষ্টি কৰিব নোৱাৰে তাৰবাবে বিশেষ সজাগতা অভিযান আৰম্ভ কৰিছে পৰিবহণ বিভাগৰ বেতকুছিস্থিত কামৰূপ মহানগৰ জিলা পৰিবহণ বিষয়াৰ (পঞ্জীয়ন আৰু অনুজ্ঞাপত্ৰ) কার্যালয়ে। ইতিমধ্যে জিলা পৰিবহণ বিষয়াৰ দায়িত্বত থকা নবনিযুক্ত সহকাৰী পৰিবহণ আয়ুক্ত গৌতম দাসে সদৰি কৰা অনুসৰি প্ৰতি বছৰে দুৰ্গাপূজা, ৰঙালী বিহু, ইংৰাজী নৱবৰ্ষক আদৰাৰ নামত একাংশ চালকে অধিক বা অনিয়ন্ত্ৰিত গতিবেগত ৰাজপথত বাহন চলাই দুৰ্ঘটনা সংঘটিত কৰিব নোৱাৰে তাৰ বাবে এইবেলি আগতীয়াকৈ সতৰ্কতা অৱলম্বন কৰা হৈছে। আনকি দুদিন পূৰ্বে ছয়মাইল উৰণীয়া সেতুৰ তলত এটা দুৰ্গা পূজাক প্ৰতিকী হিচাপে লৈ বাহন চালকৰ মাজত সজাগতা সৃষ্টিৰ বাবে এক অভিযান আৰম্ভ কৰা হৈছে। এই অভিযানৰ লগত সংগতি ৰাখি এখন বাটৰ নাট প্ৰদৰ্শন কৰা হয়। বাটৰ নাটত দূৰ্গাক পৰিবহণ বিভাগৰ ৰূপত আৰু মহিষাসুৰক মদাহী চালকৰ ৰূপত উপস্থাপন কৰা হৈছে। আনহাতে নাটকৰ জৰিয়তে অধিক বা অনিয়ন্ত্ৰিত গতিবেগত বাহন চলালে তাৰ পৰিনাম কিমান ভয়ংকৰ হ’ব পাৰে তাক দেখুওৱা হৈছে। বিশেষকৈ মদাহী চালকৰূপী মহিষাসুৰক দুৰ্গাৰূপী পৰিবহণ বিভাগে বাটত ধৰি কেনে ধৰণৰ শাস্তি বিহিলে তাকো দেখুওৱা হৈছে। সহকাৰী পৰিবহণ আয়ুক্ত গৌতম দাসে সদৰি কৰা অনুসৰি মুখ্যমন্ত্ৰী ড০ হিমন্ত বিশ্ব শৰ্মাই অসমক এখন দুৰ্ঘটনামুক্ত ৰাজ্যলৈ পৰিণত কৰাৰ যি আহ্বান জনাইছে তাক সাৰ্থক ৰূপ দিবলৈ চেষ্টা কৰা হৈছে। তেনেদৰে যদি কোনো চালকে ৰাজপথত অধিক মাত্ৰাত সুৰাপান কৰি বাহন চলায় বা কোনো চালকে দুৰ্গাপূজা বা উৎসৱৰ নামত অনিয়ন্ত্ৰিত গতিবেগত বাহন চলায় দুৰ্ঘটনা সংঘটিত কৰিলে তেওঁলোকৰ বিৰুদ্ধে অপৰাধযুক্ত গোচৰ ৰজু কৰা হব। প্ৰথম পৰ্যায়ত তেনে চালকৰ বাহন চালনাৰ অনুজ্ঞাপত্ৰ নিলম্বন কৰা আৰু অপৰাধ গুৰুতৰ হলে অনুজ্ঞাপত্ৰ বাতিল কৰা হ’ব। পূজাৰ নামত পথ সুৰক্ষাৰ দিশত কোনো ধৰণৰ আপোচ কৰা নহব। পুজালৈ আহিলেও দুচকীয়া বাহনৰ চালকে হেলমেট পৰিধান কৰিব লাগিব। তেনেদৰে চাৰিচকীয়া বাহনৰ চালক আৰু সন্মুখত বহি যোৱা আৰোহীয়ে চিটবেল্ট ব্যৱহাৰ কৰিব লাগিব। যদি কোনোবাই আইন ভংগ কৰে তেন্তে জৰিমনা ভৰাৰ লগতে তেওঁলোকৰ বাহন চালনাৰ অনুজ্ঞাপত্ৰ নিলম্বন কৰা হ’ব। আনহাতে পূজাৰ কেইদিনত পৰিবহণ বিভাগে চৰকাৰে বান্ধি দিয়া ক’ভিড এছ অ পি, বিধিৰ লগতে যান বাহন আইন মানি চলিহে পূজা উপভোগ কৰিবলৈ পৰিবহণ বিভাগে সকলোকে আহ্বান জনাইছে। ইতিমধ্যে মুখ্যমন্ত্ৰী আৰু পৰিবহণ মন্ত্ৰীৰ নিৰ্দেশ অনুসৰি ৰাজ্যৰ আন জিলাৰ লগতে গুৱাহাটী মহানগৰীতো আৰক্ষী-জিলা প্ৰশাসনৰ সহযোগত আইন ভংগকাৰী চালকৰ বিৰুদ্ধে বিশেষ অভিযান চলোৱা হ’ব বুলি সহকাৰী পৰিবহণ আয়ুক্ত গৌতম দাসে জানিবলৈ দিছে। উল্লেখযোগ্য যে মুখ্যমন্ত্ৰী ড০ হিমন্ত বিশ্ব শৰ্মাই পৰিবহণ বিভাগক “পথ সুৰক্ষা, জীৱন ৰক্ষা নীতিৰ যথাযথ ৰূপায়নৰে অসমক দুৰ্ঘটনামুক্ত ৰাজ্যলৈ পৰিণত কৰাৰ বাবে হাতে কামে নামি পৰিবলৈ নিৰ্দেশ দিছে ।
গুৱাহাটী বিশ্ববিদ্যালয় এন এছ এছ কোষৰ ৰাষ্ট্ৰীয় কন্যা শিশু দিবস উদযাপন
আজাদী কা অমৃত মহোৎসবৰ অংশ হিচাপে গুৱাহাটী বিশ্ববিদ্যালয়ৰ ৰাষ্ট্ৰীয় সেৱা আঁচনি কোষে ২৪ জানুৱাৰীত এক বেবিনাৰৰ মাধ্যমত ৰাষ্ট্ৰীয় কন্যা শিশু দিবস উদযাপন কৰে। মুখ্য অতিথি হিচাপে উপস্থিত থাকি বিশ্ববিদ্যালয়খনৰ উপাচাৰ্য প্ৰফেছৰ প্রতাপ জ্যোতি সন্দিকৈয়ে ৰাষ্ট্ৰীয় কন্যা শিশু দিবস উদযাপনৰ গুৰুত্ব সম্পৰ্কে বিস্তৃত আলোচনা কৰি কয় যে কন্যা শিশুৰ প্রতি শ্রদ্ধা প্রথমে ঘৰৰ পৰাই আৰম্ভ কৰা উচিত আৰু এনএছ এছ স্বেচ্ছাসেবকে মানুহৰ মাজলৈ এই বাৰ্তা প্ৰেৰণ কৰিবলৈ আহ্বান জনায় । উত্তৰ পূব এন এছ এছৰ আঞ্চলিক সঞ্চালক দীপক কুমাৰে কাৰ্য্যসূচী বিষয়া আৰু স্বেচ্ছাসেবক সকলক কন্যা শিশুৰ উন্নতি আৰু নিৰাপত্তাৰ বাবে উদ্যোগ লবলৈ আহ্বান জনায় । তেওঁ চৰকাৰী বিভিন্ন আঁচনি , গার্ল চাইল্ড আঁচনিসমূহ এন এছ এছ কাৰ্য্যসূচী বিষয়া আৰু স্বেচ্ছাসেবকসকলে আগুৱাই নিয়াত অৰিহণা যোগাব লাগিব বুলি উল্লেখ কৰে। অতিথি অৰু অংশগ্রহণকাৰীক আদৰণি জনায় বিশ্ববিদ্যালয়ৰ ছাত্ৰকল্যাণ সঞ্চালক তথা এন এছ এছৰ কাৰ্য্যসূচী সমন্বয়ক ডঃ ৰঞ্জন কুমাৰ কাকতিয়ে । তেওঁ কয় যে : কন্যা শিশুৰ অধিকাৰ ,শিক্ষাৰ গুৰুত্ব, স্বাস্থ্য আৰু লিংগ বৈষম্য আৰু শাৰীৰিক নিৰ্যাতনৰ দৰে সমস্যা সম্পৰ্কে সচেতনতাৰ বাবে ৰাষ্ট্ৰীয় কন্যা শিশু দিবস পালন কৰা হয় । স্বাধীনতাৰ ৭৫ বছৰ উদযাপনৰ বাবে ২০ বছৰৰ কম বয়সী ৭৫ জনী কন্যা শিশুক গুৱাহাটী বিশ্ববিদ্যালয় এন এছ এছ কোষৰ অধীনৰ বিভিন্ন কলেজ এন এছ এছ গোটৰ দ্বাৰা সমাজত অসামান্য অৱদানৰ বাবে স্মাৰক,গামোচা আৰু মানপত্ৰৰে সম্বৰ্ধনা জনায় । কলেজৰ অধ্যক্ষ, এনএছএছ প্রোগ্রাম অফিছাৰ আৰুস্বেচ্ছাসেবক সমন্বিতে প্রায় ৩০০ জন অংশগ্রহণকাৰী এই বেবিনাৰত অংশগ্ৰহণ কৰে।
ভিউৱাছৰ মতামত