ফাইনাৰে ৫০লাখ টকা আৰোগ্য নিধিলৈ আগবঢ়াইছে

ভেকচিন প্ৰদানৰ ক্ষেত্ৰত জনসচেতনতা সৃষ্টিৰ ওপৰত মুখ্যমন্ত্ৰীৰ গুৰুত্ব আৰোপ

মুখ্যমন্ত্ৰী সৰ্বানন্দ সোণোৱালে আজি লখিমপুৰ জিলাৰ নাৰায়ণপুৰস্থিত দেউৰী স্বায়ত্ত শাসিত পৰিষদৰ অতিথিশালাত অনুষ্ঠিত এক বৈঠকত লখিমপুৰ আৰু ধেমাজি সাম্প্ৰতিক ক’ভিড পৰিস্থিতি বিষয়ে সবিশেষ পৰ্যালোচনা কৰে।পৰ্যালোচনা কালত মুখ্যমন্ত্ৰীয়ে জিলা উপযুক্ত তথা স্বাস্থ্য বিভাগৰ যুটীয়া সঞ্চালকৰ সৈতে মত-বিনিময় কৰি সাম্প্ৰতিক ক’ভিড সংক্ৰমণৰ সবিশেষ বুজ লয়।বৈঠকত দুয়োখন জিলাৰ উপযুক্ত সৈতে মত-বিনিময় কৰি সাম্প্ৰতিক ক’ভিড সংক্ৰমণ প্ৰতিৰোধ কৰাৰ দিশত গ্ৰহণ কৰা ব্যৱস্থা ৰাজিৰ লগতে ভেকচিন প্ৰদান, সংক্ৰমণৰ হাৰ,হাস্পতাল থকা সা-সুবিধা সমূহ বিষয়ে মুখ্যমন্ত্ৰীক সবিশেষ অৱগত কৰে।আনহাতে, দুয়োগৰাকী স্বাস্থ্য বিভাগৰ যুটীয়া সঞ্চালকে চিকিৎসা বিভাগে গ্ৰহণ কৰা পদক্ষেপ সমূহ বিষয়ে মুখ্যমন্ত্ৰীক অৱগত কৰে।

বৈঠকত মুখ্যমন্ত্ৰীয়ে জিলা দুখনত ভেকচিন প্ৰদানৰ ক্ষেত্ৰত জন সচেতন সৃষ্টিৰ বাবে প্ৰশাসনক নিৰ্দেশ দিয়ে।ৰাজহুৱা স্থানত জনসাধাৰণ যাতে মাস্ক পৰিধান কৰা লগতে সামাজিক দূৰত্ব বৰ্তাই ৰাখে সেই দিশটো নজৰ ৰাখিবলৈ মুখ্যমন্ত্ৰীয়ে কয়।মুখ্যমন্ত্ৰীয়ে লগতে ক’ভিড পজিটিভ ৰোগীৰ ক্ষেত্ৰত মাইক্ৰ কণ্টেইমেণ্ট এলেকাৰ ব্যৱস্থা কৰিবলৈ নিৰ্দেশ দিয়ে।লগতে প্ৰয়োজনীয় অক্সিজেন চিলিণ্ডাৰ আৰু আই চি ইউ বেডৰ ব্যৱস্থা মজুত ৰখাৰ বাবেও নিৰ্দেশ দিয়ে।ক’ভিড ৰোগীৰ বাবে হাস্পতাল সমূহত যাতে বিচনাৰ অভাৱ নহয় সেই সম্পৰ্কে যথোচিত পদক্ষেপ লোৱাৰ বাবেও মুখ্যমন্ত্ৰীয়ে নিৰ্দেশ দিয়ে।আনহাতে ক’ভিড পৰীক্ষা ব্যাপক হাৰত কৰাৰ ওপৰতো মুখ্যমন্ত্ৰী য়ে গুৰুত্ব আৰোপ কৰে।বিহু অনুষ্ঠান সমূহত যাতে ক’ভিড প্ৰট’কল মানি চলা হয় তাৰ বাবেও বিশেষ লক্ষ্য ৰাখিবলৈ কয়।

আজিৰ এই পৰ্যালোচনা বৈঠকত লখিমপুৰ জিলাৰ উপায়ুক্ত খৰ্গেশ্বৰ পেগু আৰু ধেমাজি জিলাৰ উপায়ুক্ত ডাঃ জীৱন বি,দুয়ো খন জিলাৰ স্বাস্থ্য বিভাগৰ যুটীয়া সঞ্চালককে ধৰি স্বাস্থ্য বিভাগ তথা প্ৰশাসনৰ উচ্চপদস্ত বিষয়া সকল উপস্থিত থাকে।

প্ৰেছক্লাব অসমৰ পঞ্চম বাৰ্ষিক প্ৰতিষ্ঠা দিৱস উদযাপন

ৰাজ্যৰ সাংবাদিক তথা সংবাদ কৰ্মী সকলক একত্ৰিত কৰা উদ্দেশ্যে প্ৰতিষ্ঠা লাভ কৰা প্ৰেছ ক্লাব অব অসমৰ পঞ্চম বাৰ্ষিক প্ৰতিষ্ঠা দিৱস আজি গুৱাহাটী মহানগৰীৰ উগ্রতাৰা দেৱালয় প্ৰাংগণত গছ পুলি ৰোপণ কাৰ্যসূচীৰে আৰম্ভ কৰা হয়।
গছ পুলি ৰোপণ কাৰ্যসূচীৰ শুভাৰম্ভ কৰে বিশিষ্ট শিক্ষাবিদ, সাহিত্যিক তথা অমৃত নিউজ ৰ মুখ্য সম্পাদক ডঃ দয়ানন্দ পাঠক, বিশিষ্ট সাহিত্যিক পদ্মশ্ৰী ডঃ সূৰ্য্যকান্ত হাজৰিকা আৰু বিশিষ্ট চিকিৎসক, সাহিত্যিক ডঃ অঞ্জন জ্যোতি চৌধুৰীয়ে। ইপিনে অনুষ্ঠানত উপস্থিত থাকি প্ৰেছ ক্লাব অসমৰ সভাপতি কৈলাশ শৰ্মা , সাধাৰণ সম্পাদক হীৰেন চন্দ্ৰ কলিতা,জ্যেষ্ঠ ফটো সাংবাদিক কিৰণ মুখাৰ্জী ,শেৱালি কলিতাকে আদি কৰি কেইবাজনো ব্যক্তিয়ে একোটিকৈ গছ পুলি ৰোপন কৰে।গছপুলি ৰোপন কৰি শিক্ষাবিদ ডঃ পাঠকে কয় যে এক পুত্ৰ দশ পুত্ৰ সমান। সাম্প্ৰতিক সময়ত প্ৰকৃতিৰ সংৰক্ষণ কৰা বহুত প্ৰয়োজন হৈ পৰিছে। একেটা অনুষ্ঠানতে ডঃ হাজৰিকাই কয় সম্প্ৰতি সময়ত গছ পুলি ৰোপণৰ লগতে ইয়াৰ সংৰক্ষণৰ বাবে আমি যথোচিৎ ব্যৱস্থা গ্ৰহণ কৰিব লাগে ।আনহাতে অনুষ্ঠানতে উপস্থিত থাকি ডা: অঞ্জনজ্যোতি চৌধুৰীয়ে এনে দৰে কয় যে যিহেতু গছেই আমাক অক্সিজেন প্ৰদান কৰি কাৰ্বনডাই অক্সাইড গ্ৰহণ কৰি আহিছে লগতে আমাক ছাঁ দি আহিছে সেয়ে আমি যিকোনো সময়তে সুবিধা পালেই গছ পুলি ৰোপন কৰিব লাগে। গছপুলি ৰোপন কৰি প্ৰেছ ক্লাব অসমৰ সভাপতি কৈলাশ শৰ্মাই এনেদৰে কয় যে আজিৰ দিনটোৰ পৰাই আমি সংকল্পবদ্ধ হব লাগে আমি গছপুলি ৰোপনৰ ক্ষেত্ৰত গুৰুত্ব আৰোপ কৰি যাম। প্ৰেছ ক্লাব অসমৰ সাধাৰণ সম্পাদক হীৰেন চন্দ্ৰ কলিতাই অনুষ্ঠানৰ আঁতধৰি কয় যে বিগত বছৰৰ দৰে এইবাৰো প্ৰেছ ক্লাব অসমে প্ৰতিষ্ঠা দিনটোত ১০০জোপাতকৈ অধিক মূল্যবান গছ পুলি আমি ৰোপন কৰিম আৰু আগলৈও কৰি যাম
উল্লেখযোগ্য যে আজিৰ দিনটোতে প্ৰেছ ক্লাব অসমৰ নতুনকৈ সমিটিও গঠন কৰা হয় উল্লেখযোগ্য যে প্ৰেছ ক্লাব অসমৰ পৰৱৰ্তী পাঁচ বছৰৰ বাবে কৈলাশ শৰ্ম্মাক সভাপতি আৰু হীৰেন চন্দ্ৰ কলিতাক সাধাৰণ সম্পাদক হিচাপে লৈ এখন পূৰ্ণাংগ সমিতি গঠন কৰা হয় আৰু একেটা অনুষ্ঠানতে ডঃ সূৰ্য কান্ত হাজৰিকাই সকলোৰে আগত পাঠ কৰা নতুন সমিতিখন হাত চাপৰিৰে উপস্থিত সভ্য সকলে সমৰ্থন জনায়।

সংযোজন ঘটিল নিভাজ বেণ্ডত

সোণালী জয়ন্তী বৰ্ষত খোজ পেলোৱা ইষ্টাৰ্ণ এগ্ৰো প্ৰচেছিং এণ্ড টি ওৱেৰহাউছিং কো- অপাৰেটিভ চোছাইটি লিমিটেডৰ দ্বাৰা উৎপাদিত নিভাজ মিঠাতেল, নিভাজ ৰিফাইণ্ড চয়াবিন তেল আৰু নিভাজ চাহপাত ইতিমধ্যে বজাৰত গ্ৰাহকে বিপুল ভাৱে আদৰি লৈছে।বজাৰত বৰ্তমান ৰিফাইণ্ড পামলিন তেলৰ চাহিদাৰ প্ৰতি লক্ষ্য ৰাখি আৰু গ্ৰাহক সকলৰ দাবীত এইবেলি সমবায় খনে নিভাজ ৰিফাইণ্ড পামলিন তেল মুকলি কৰি দিয়াৰ বাবে সিদ্ধান্ত লৈছে।

সেই উদ্দেশ্যে আজি দিনৰ ১১ বজাত ইষ্টাৰ্ণ এগ্ৰো প্ৰচেছিং এণ্ড টি ওৱেৰহাউছিং কো- অপাৰেটিভ চোছাইটি লিমিটেড নৱনিৰ্মিত পামলিন পেকেজিং গোটত নিভাজ ৰিফাইণ্ড পামলিন তেল পেকেজিঙৰ শুভাৰম্ভ কৰে সমবায় খনৰ সভাপতি ড° বীৰেন্দ্ৰ কুমাৰ দাস দেৱে।সমিতি সম্পাদক শ্ৰী দীনেশ চন্দ্ৰ বৈশ্যই আঁত ধৰা অনুষ্ঠানটোত সমিতিৰ সঞ্চালক মণ্ডলী,কৰ্মচাৰী আৰু প্ৰকল্প চৌহদত থকা ব্যৱসায়ী সকলৰ উপস্থিতিত সভাপতি ড° দাসে আজিৰে পৰা তেলবিধ বজাৰত উপলব্ধ হ’ব বুলি ঘোষণা কৰে।

হুদুমপুৰৰ লাহেশ্বৰীত শ্ৰীশ্ৰী মা কালী মন্দিৰ নিৰ্মাণৰ শুভাৰম্ভ

দক্ষিণ কামৰূপৰ পলাশবাৰী নগৰৰ সমীপৱৰ্তী হুদুমপুৰ গাঁৱৰ লাহেশ্বৰীত ১৯৮৯ চনতে স্থাপিত শ্ৰীশ্ৰী মা কালী মন্দিৰটোৰ মণিকূটটো জৰাজীৰ্ণ ৰূপ লোৱাত মন্দিৰ সমিতিয়ে মন্দিৰটো পুন:নিৰ্মাণ কৰাৰ উদ্দেশ্য দূৰ্গেশ্বৰ কলিতাক সভাপতি আৰু অনিৰ্বান কলিতা, নয়ন মেধিক সম্পাদকৰ দায়িত্ব দি ১৫ জনীয়া নিৰ্মাণ সমিতি এখন গঠন কৰা হয়। এই সমিতিয়ে যোৱা ১৫ এপ্ৰিলৰ দিনা অঞ্চলটোৰ বয়োজ্যেষ্ঠ নাগৰিক তথা অৱসৰপ্ৰাপ্ত কৃষি বিভাগৰ কৰ্মচাৰী কমলা কান্ত কলিতাৰ দ্বাৰা মন্দিৰ নিৰ্মাণ কাৰ্যৰ শুভাৰম্ভ কৰা হয়। উক্ত অনুষ্ঠানত নিৰ্মাণ কাৰ্যৰ লগত জড়িত ৰাজমিস্ত্ৰী তিনি গৰাকীকো ফুলাম গামোচাৰে সম্বৰ্দ্ধনা জনোৱা হয়। বৃহত্তৰ হুদুমপুৰ, পলাশবাৰী, কুকুৰীয়া অঞ্চলৰ ৰাইজৰ ব্যাপক সহাৰিয়ে মন্দিৰ নিৰ্মাণ সমিতিক উৎসাহিত কৰাৰ লগতে অঞ্চলবাসী ৰাইজৰ কিছুসংখ্যক ভক্তপ্ৰাণ দাতাই দান-বৰঙণি আগবঢ়ায়। মন্দিৰ নিৰ্মাণ সমিতিয়ে আগলৈ ৰাইজৰ দিহা-পৰামৰ্শ, দান -বৰঙণি তথা সহায়-সহযোগিতা কামনা কৰিছে। উক্ত অনুষ্ঠানত বৃহত্তৰ অঞ্চলটোৰ ৰাইজ গয়ৰহৰ সভাপতি, সম্পাদক, সমূহ জ্যেষ্ঠ নাগৰিক তথা পুৰুষ-মহিলাসহ ভালেমান ভক্তপ্ৰাণ ৰাইজ উপস্থিত থাকে। অনুষ্ঠানটিৰ আঁতধৰে শিক্ষক ভদ্ৰেশ্বৰ কলিতাই।

ব্যতিক্ৰম ধৰণৰে হিন্দু-মুছলমানৰ সমন্বয়ৰে টীয়কৰ কাকাজানত উদযাপন কৰিছে ৰঙালী বিহু

দেশৰ ক`ভিড পৰিস্থিতিৰ প্ৰতি লক্ষ্য ৰাখি অসমীয়াই চৰকাৰী নিৰ্দেশনা অৱলম্বন কৰি উদযাপন কৰিবলগীয়া হৈছে আপোন ৰঙালী বিহুটি।টীয়কৰ কাকজান কেন্দ্ৰীয় ৰঙালী বিহু উদযাপন সমিতিয়েও প্ৰশাসনৰ নীতি নিয়ম মানি কাকজান খেলপথাৰত দিনযোৰকৈ আয়োজন কৰিছে ৰঙালী বিহু।এই বিহুৰ বাকৰিতে অঞ্চলটোৰ যুৱচামে দেখুৱাইছে এক আদৰ্শ। কাৰ্যসূচীৰ সমান্তৰালকৈ আয়োজন কৰিছে বৰদেউতাৰ আশীৰ্বাদ শীৰ্ষক এক ব্যতিক্ৰমী অনুষ্ঠান।অঞ্চলটোৰ প্ৰায় দুই শতাধিক সত্তৰ উদ্ধৰ পুৰুষ-মহিলাক নিমন্ত্ৰণ কৰি পৰম্পৰা ৰক্ষা কৰি সম্পূৰ্ণ নীতি নিয়মৰ মাজেৰে জেষ্ঠজনক একোখনকৈ বিহুৱান প্ৰদান কৰি আশীৰ্বাদ লোৱাৰ লগতে সম্প্ৰীতিৰে জলপানৰ দিহা কৰিছে।উক্ত কাৰ্যসূচীৰ সমান্তৰালকৈ সেই সময়ৰ বিহু আৰু বৰ্তমান বিহুৰ মাজৰ সাদৃশ্য ও পাৰ্থক্যৰ ওপৰত বিভিন্নজনে মন্তব্য আগবঢ়াৱাৰ লগতে অতীতক স্মৰণ কৰি কেইবাগৰাকীও জেষ্ঠই বিহু গাই এক সুকীয়া পৰিবেশ গঢ়ি তোলিছে।জেষ্ঠজনক সন্মান প্ৰদৰ্শন কৰি বিহুত আশীৰ্বাদ লোৱা অসমীয়া সমাজৰ যি আদৰ্শ তাক উত্তৰ পুৰুষক চিনাকী কৰাৰ উদ্দেশ্যেৰে কাকজান বিহু সন্মিলনৰ এই পদক্ষেপক সকলোৱে আদৰণী জনাইছে।উল্লেখযোগ্য যে এই অনুষ্ঠানত শতায়ু গৰকা লগতে পবিত্ৰ ৰমজানৰ মাজতে কেইবাগৰাকীও মুছলমান সম্প্ৰদায়ৰ জেষ্ঠ উপস্থিত থাকি বৰ অসমৰ সমন্বয়ৰ এখন সুন্দৰ ছবি দাঙি ধৰিছে।

বাটৰ বিহু প্ৰদৰ্শন হ`ল পুৰণিগুডামত

ৰঙালী বিহু তথা অসমীয়া নৱবৰ্ষৰ পহিলা বহাগৰ দিনটোতে পুৰণিগুদাম প্ৰেছ ক্লাৱৰ উদ্যোগত হালোৱাগাঁও আঞ্চলিক যুৱ মঞ্চ আৰু লেচেৰী সাংস্কৃতিক গোষ্ঠীৰ সহযোগত এটি বিহুৱা দলে নগাঁও জিলাৰ বিভিন্ন প্ৰান্তত খ্যাতনামা ঢোলবাদক ৰাজু শইকীয়াৰ পৰিচালনাৰে বিহু নৃত্য প্ৰৰ্দশন কৰি ৰাইজৰ সমাদৰ লাভ কৰিবলৈ সক্ষম হয়। উল্লেখ্য যে, “পুতলা পিষ্টলৰ সলনি এখন গ্ৰন্থ উপহাৰ দিয়ক” বাণীৰে পুৰণিগুদাম প্ৰেছ ক্লাৱে পূজাৰ বতৰত প্ৰতি বছৰে পুৰণিগুদামত আয়োজন কৰি অহা শাৰদীয় শিশু গ্ৰন্থ মেলাৰ এইবেলি ৰূপালী জয়ন্তী বৰ্ষৰ বছৰযোৰা কাৰ্য্যসূচীৰ অংশ হিচাপে এই বাটৰ বিহু প্ৰদৰ্শন কৰা হয়।

অসমীয়া নৱ বৰ্ষৰ প্ৰথম দিনটোতেই পুৰণিগুদাম বাপুজী ভৱন আৰু পুথিভড়াল খেল পথাৰত অনুষ্ঠিত হোৱা বাটৰ বিহু অনুষ্ঠানটোত পুৰণিগুদাম প্ৰেছ ক্লাৱৰ বিষয় ববীয়া সকলে জ্যেষ্ঠ সাংবাদিক কুলপ্ৰদীপ দাসে আঁত ধৰা অনুষ্ঠানত শাৰদীয় শিশু গ্ৰন্থ মেলা ৰূপালী জয়ন্তী বৰ্ষ উদযাপন সমিতিৰ সভাপতি মনিমাধৱ মহন্তৰ উপস্থিতিত শিক্ষাবিদ ধৰণী খাউন্দ, সাহিত্যিক পেঞ্চনাৰ ফণীন্দ্ৰ নাথ গায়ন, সমাজকৰ্মী পুলিন হাজৰিকা, ডাক্তৰ ধীৰেন বৰকাকতি, শিক্ষাবিদ হেম ডেকা, কৃষ্ণ গোস্বামী, মিছলেউদ্দিন আহমেদ, মুকুট ভূঞা, প্ৰফুল্ল শইকীয়া, দুলেন গায়নকে প্ৰমুখ্যে পুৰণিগুদামৰ বহু কেইগৰাকী জ্যেষ্ঠ নাগৰিকক চেলেং আৰু গামোছাৰে আদৰণী জনাই অসমীয়াৰ পৰম্পৰা অনুসৰি চৰণ চুই আৰ্শীবাদ গ্ৰহণ কৰে৷

বাটৰ বিহু কাৰ্যসূচীতেই পুৰণিগুদাম প্ৰেছ ক্লাৱৰ তৰফৰ পৰা খ্যাতনামা ঢোলবাদক ৰাজু শইকীয়া, শিল্পী বনশ্ৰী শৰ্মা কলিতা, ৰাষ্ট্ৰীয় সংস্কৃত গীতি কবি প্ৰাপক ৰঞ্জন বেজবৰুৱা আৰু শিল্পী নয়ন জ্যোতি শইকীয়া, কালিবাদক কলিৰাম বৰাক বিশেষভাবে পুৰণিগুদাম প্ৰেছ ক্লাৱে সম্বৰ্ধনা জনায়। পুৰণিগুদাম বাপুজী ভৱন আৰু পুথিভঁৰালত চামগুৰি, বঢ়মপুৰ আৰু নগাঁৱৰ কেইবাগৰাকীও জ্যেষ্ঠ সাংবাদিকৰ উপস্থিতিত ঢুলীয়া ৰাজু শইকীয়া আৰু বনশ্ৰী শৰ্মা কলিতাৰ পৰিচালনাৰে অনুষ্ঠিত হোৱা বাটৰ বিহু অনুষ্ঠানত অংগাভিনয় অসম ছাত্ৰ-ছাত্ৰী সকলেও এক বিশেষ অনুষ্ঠান পৰিৱেশন কৰে। উল্লেখ্য যে, এই অনুষ্ঠানৰ পূৰ্বে পুৱা ৮ বজাত পুৰণিগুদাম হালোৱাগাঁৱত আনুষ্ঠানিক ভাৱে বাটৰ বিহুৰ শুভাৰম্ভ কৰা হয়।

পুৰণিগুদাম প্ৰেছ ক্লাৱৰ উপদেষ্টা নীলৰঞ্জন শৰ্মাই আঁত ধৰা শুভ উদ্বোধনী অনুষ্ঠানটোত বিশিষ্ট নাট্যকাৰ, পৰিচালক দীপক বৰা উপস্থিত থাকি বাটৰ বিহুৰ শুভাৰম্ভ কৰে৷ ইয়াৰ লগতে উদ্ধোধনী অনুষ্ঠানত জেষ্ঠ সাংবাদিক সুনীল বৰা, সমাজকৰ্মী প্ৰভাত দাস, হালোৱাগাওঁ আঞ্চলিক যুৱ মঞ্চৰ সভাপতি-সম্পাদক ক্ৰমে মনমোহন বৰকটকী, জীতেন্দ্ৰ শইকীয়া, লেছেৰী সাংস্কৃতিক গোষ্ঠীৰ সম্পাদক ৰাজীৱ শইকীয়াসহ বহু বিশিষ্ট ব্যক্তি উপস্থিত থাকে।পৰৱৰ্তী সময়ত ক্ৰমে চলচলি বিৰহীগাঁও, চলচলি মুছলমানগাঁও তিনিআলি, চলচলি বামুনগাঁও চাৰিআলি, বৰাচুক, হাতীগাওঁ, উৰিয়াগাওঁ, ভোটাইগাওঁ, বঢ়মপুৰ, জলাহগাৱঁত দলটোৱে বাটৰ বিহু প্ৰদৰ্শন কৰাৰ লগতে দিনজোৰা কাৰ্যসূচী সমূহত দৰ্শক তথা স্থানীয় ৰাইজৰ বিপুল সঁহাৰি পৰিলক্ষিত হয়।