বোকাখাত আৰক্ষী থানালৈ উচ্চ প্ৰযুক্তিৰ চি চি টি ভিৰ কেমেৰা প্ৰদান কৰিলে অৰণ্যকে

অৰণ্যক ! এটা বেচৰকাৰী স্বেচ্ছাসেৱী প্ৰকৃতিপ্ৰেমী সংগঠন ৷ ১৯৮৭ চনতে জন্ম গ্ৰহণ কৰা প্ৰকৃতিপ্ৰেমী সংগঠনটোৱে বিভিন্ন সময়ত বিভিন্ন জনহিতকৰ কাম কৰি আহিছে ৷ বানপানীৰ সময়ত কাজিৰঙাৰ এনিমেল কৰিডৰত হোৱা পথ দূৰ্ঘটনা বা যানবাহনৰ গতি নিয়ন্ত্ৰনৰ উপৰিও বন্যপ্ৰাণী অপৰাধ নিয়ন্ত্ৰন কৰাত সহায়ক হোৱাকৈ দেশৰ আগশাৰীৰ প্ৰকৃতি সংগঠন অৰণ্যকে বোকাখাত আৰক্ষী থানাত দুটা উচ্চ শক্তি সম্পন্ন চিচি টিভি কেমেৰা প্ৰদান কৰিছে ৷

 

 

ইয়াৰ পূৰ্বে অলপতে গোলাঘাট আৰক্ষীক দুখন পালচাৰ মটৰ চাইকেলো প্ৰদান কৰিছে সংগঠনটোৱে ৷ আজি পুৱা বোকাখাত আৰক্ষী থানাত গোলাঘাট জিলাৰ উপ আৰক্ষী অধীক্ষক পাৰ্থ প্ৰতীম শইকীয়াৰ হাতত আৰণ্যকৰ আইন কোষৰ প্ৰৱন্ধক মানস কুমাৰ ভট্টাচাৰ্যই আনুষ্ঠানিক ভাৱে কেমেৰা দুটা প্ৰদান কৰে ৷

 

 

বোকাখাতৰ ৰূপজ্যোতি কম্পিউটাৰে সংস্থাপিত কেমেৰা দুটাই বন্যপ্ৰাণী অপৰাধ নিয়ন্ত্ৰন আৰু পথ দুৰ্ঘটনা বা যানবাহনৰ গতি নিয়ন্ত্ৰনৰ উপৰিও অনান্য অপৰাধ নিয়ন্ত্ৰনতো সহায় কৰিব বুলি মন্তব্য কৰে আৰক্ষী বিষয়া পাৰ্থ প্ৰতীম শইকীয়াই ৷

 

 

বোকাখাত প্ৰেছ ক্লাবৰ সম্পাদক উত্তম শইকীয়াই আঁত ধৰা অনুষ্ঠানত আৰণ্যকৰ কৰ্মকৰ্তাৰ উপৰিও অসম ৰাজ্যিক সাংবাদিক সন্থাৰ সভাপতি জিতু শৰ্মা ৰাজখোৱা, বোকাখাত প্ৰেছ ক্লাবৰ সভাপতি ভৱানন্দ কলিতা, বোকাখাত মহকুমা সাংবাদিক সন্থাৰ সম্পাদক নীলু আচাৰ্য আৰু ইমজাৰ হৈ দিব্যজ্যোতি হাজৰিকা, মহকুমা আৰক্ষী বিষয়া পৃথ্বীৰাজ ৰাজখোৱা, ভাৰপ্ৰাপ্ত আৰক্ষী বিষয়া দিব্যজ্যোতি দত্ত আৰু যানবাহন শাখাৰ বিষয়া গোবিন কাকতিয়ে বোকাখাত আৰক্ষীক সহায় কৰাৰ বাবে আৰণ্যকৰ শলাগ লয় ৷

 

 

অনুষ্ঠানৰ শেষত কেমেৰাৰ বুটাম টিপি চিচি টিভি কেমেৰাৰ কাৰ্যৰ শুভাৰম্ভ কৰে গোলাঘাট জিলাৰ উপ আৰক্ষী অধীক্ষক পাৰ্থ প্ৰতীম শইকীয়াই ৷ অনুষ্ঠানত বোকাখাতৰ বৈদ্যুতিন আৰু ছপা মাধ্যমৰ সাংবাদিক, বোকাখাত আৰক্ষী থানাৰ সমূহ আৰক্ষীৰ লগতে আৰণ্যকৰ মঃ আৰিফ হুছেইন উপস্থিত থাকে ৷

খবৰ যুগুতালে বোকাখাতৰ পৰা দিব্যজ্যোতি হাজৰিকাই ৷

Share on whatsapp
WhatsApp
Share on facebook
Facebook
Share on twitter
Twitter
Share on email
Email

চলা সংৰক্ষিত বনাঞ্চল সংৰক্ষণৰ বাবে বিশেষ পদক্ষেপ সচেতন ৰাইজৰ

চৰাইদেউ জিলাৰ বনাঞ্চল সমূহৰ ভিতৰত অন্যতম এখন হ’ল চলা সংৰক্ষিত বনাঞ্চল। এই বনাঞ্চল খনৰ বন ধ্বংস কাৰ্য ৰোধ কৰিবলৈ কাষৰীয়া অঞ্চলৰ ৰাইজে কিছু বছৰৰ পৰা ব্যতিক্ৰমী পদক্ষেপ গ্ৰহণ কৰি আহিছে।

 

সংৰক্ষিত বনাঞ্চল খনক চলা গ্ৰাম্য অভয়াৰণ্য হিচাপে ঘোষণা কৰি গাওঁবাসীয়ে ইয়াত গছপুলি ৰোপণ আৰু প্ৰতিপালন কৰাৰ লগতে বিভিন্ন সজাগতামূলক কাৰ্যসূচী ৰূপায়ন কৰি অহাৰ খবৰ বিভিন্ন সংবাদ মাধ্যমত প্ৰচাৰ হৈছিল।

 

চলা ভিলেজ চেনছুৱেৰী কনজাৰভেছন চ’ছাইটি নামেৰে এখন সমিতি গঠন কৰি বনাঞ্চলখনক সুৰক্ষাৰ বাবে স্থানীয় লোকসকল ওলাই অহা কাৰ্য ইতিমধ্যে প্ৰশংসিত হৈছে। কেৱল সেয়াই নহয় শেহতীয়াকৈ সোণাৰিৰ নাফুকস্থিত বনাঞ্চলিক বিষয়াৰ অনুমোদন সাপেক্ষে চলা সংৰক্ষিত বনাঞ্চলখনত নিশা পহৰা দিয়াৰো স্থানীয় লোকে ব্যৱস্থা কৰিছে। স্থানীয় যুৱকসকলক লৈ একোটা দল গঠন কৰি চলা ভিলেজ চেনছুৱেৰী কনজাৰভেছন চ’ছাইটিৰ সহযোগত ইতিমধ্যে পহৰা দিয়া আৰম্ভ কৰা হৈছে যাতে বনাঞ্চল খনৰ পৰা নিশা কোনো দুষ্কৃতিকাৰীয়ে কাঠৰ সৰবৰাহ কৰিব নোৱাৰে। চলা সংৰক্ষিত বনাঞ্চল সংৰক্ষণৰ বাবে চলা ভিলেজ চেনছুৱেৰী কনজাৰভেছন চ’ছাইটিয়ে গ্ৰহণ কৰা এই পদক্ষেপ এতিয়া জিলাখনত প্ৰশংসা লাভ কৰিছে।

 

ইফালে চলা ভিলেজ চেনছুৱেৰী কনজাৰভেছন চ’ছাইটিয়ে আজি দ্বিতীয় প্ৰতিষ্ঠা দিৱস উপলক্ষে সজাগতামূলক চাইক্লিং, জাংগল ট্ৰেকিং অনুষ্ঠিত কৰা লগতে এখন সজাগতা সভা অনুষ্ঠিত হয়। প্ৰতিষ্ঠা দিৱসৰ কাৰ্যসূচীত বহুকেইজন প্ৰকৃতিপ্ৰেমীৰ লগতে প্ৰাকৃতিক পৰ্যটনৰ লগত জড়িত কাজিৰঙাৰ বিতুপন কলঙো উপস্থিত থাকে।

খবৰ যুগুতালে সোণাৰিৰপৰা অভিজিৎ ভূঞাই..

আজিৰে পৰা পৰ্যটকৰ বাবে মুকলি হ’ব কাজিৰঙা ৰাষ্ট্ৰীয় উদ্যান

আজিৰে পৰা পৰ্যটকৰ বাবে মুকলি কৰা হ’ব বিশ্ব ঐতিহ্যক্ষেত্ৰ কাজিৰঙা ৰাষ্ট্ৰীয় উদ্যান।এই উপলক্ষে অনুষ্ঠিত হ’বলগীয়া কাৰ্যসূচীত মুখ্য অতিথি হিচাপে উপস্থিত থাকিব অসমৰ মুখ্যমন্ত্ৰী সৰ্বানন্দ সোণোৱাল।

 

কাজিৰঙা ৰাষ্ট্ৰীয় উদ্যানৰ কৰ্তৃপক্ষই সদৰি কৰা  জানিবলৈ অনুসৰি প্ৰতিকূল বতৰ আৰু ৰাষ্ট্ৰীয় উদ্যান খনৰ ভিতৰভাগ বাট-পথৰ অৱস্থা প্ৰতি লক্ষ্য ৰাখি কাজিৰঙা বনাঞ্চল কঁহুৱা আৰু পশ্চিম বনাঞ্চল বাগৰিত কেৱল জীপ ছাফাৰি পৰ্যটকৰ বাবে মুকলি কৰা হ’ব।

পূজাৰ প্ৰাকক্ষণত দুৰ্গাদেৱীক দেখা গৈছে চিকিৎসকৰ ৰূপত,কিন্তু ক’ত

সমাগত দুৰ্গা পূজা। এইবাৰ দূৰ্গাপূজা উলহে মালহে উদযাপন কৰিবলৈ নোৱাৰিলেও বিভিন্ন জনে বিভিন্ন ধৰণৰ থিমলৈ প্ৰতিমূৰ্তি নিৰ্মাণ কৰিছে। এই খবৰ এন ই ফ’কাচ ডট কমৰ জৰিয়তে ইতিমধ্যে প্ৰকাশ পাইছে।

 

 

পূজাৰ প্ৰাকক্ষণত চ’চিয়েল মেডিয়াত ভাইৰেল হৈ পৰিছে দুৰ্গা দেৱী অন্য এক ৰূপত । চ’চিয়েল মেডিয়াত ভাইৰেল হোৱা ফটোত দুৰ্গা দেৱীক দেখা গৈছে চিকিৎসকৰ ৰূপত, মহিসাসুৰক দেখা গৈছে ক’ৰণা ভাইৰাছৰ ৰূপত । গণেশক দেখা গৈছে পুলিচৰ ৰূপত।সমসাময়িক প্ৰতিছবি প্ৰতিফলিত কৰা এই মূৰ্তিৰ ছবিসমূহ প্ৰকৃততে ক’ত নিৰ্মাণ কৰা হৈছে তাক সঠিককৈ এতিয়ালৈ জানিব পৰা হোৱা নাই।

নাৰ্ছাৰী প্ৰতিষ্ঠা কৰিছে এজন অৱসৰপ্ৰাপ্ত শিক্ষকে

এজন অৱসৰপ্ৰাপ্ত শিক্ষকে নিজা প্রচেষ্টাৰে সাজি উলিয়াইছে এখন নাৰ্ছাৰী।নাৰ্ছাৰীখনৰ নাম বন্দনা। আজি এই বন্দনা নামৰ নাৰ্ছাৰীখন আনুষ্ঠানিকভাৱে মুকলি হয়।

 

 

নাৰ্ছাৰীখন আনুষ্ঠানিকভাৱে মুকলি কৰে অৱসৰপ্ৰাপ্ত শিক্ষক হেমেন শইকীয়াই।নাৰ্ছাৰীখন উদ্বোধন কৰি শিক্ষক হেমেন শইকীয়াই হিৰোজ শইকীয়াৰ প্ৰচেষ্টাক শলাগ লয়।উল্লেখযোগ্য যে নাৰ্ছাৰীখনৰ ১৫০ ৰো অধিক বিভিন্ন প্ৰজাতি ফুল আছে।আজি অনুষ্ঠিত অনুষ্ঠানত হিৰোজ শইকীয়াৰ পৰিয়ালবৰ্গ, বিভিন্ন আমন্ত্ৰিত ব্যক্তিৰ লগতে বালিপাৰাৰ বিভিন্ন ৰাইজ ,শুভাকাংক্ষী উপস্থিত থাকে।

খবৰ যুগুতালে বালিপাৰাৰ পৰা প্ৰাঞ্জল বৰাই..