গুৱাহাটী বিশ্ববিদ্যালয়ৰ উদ্যোগত প্ৰাচীন সাঁচিপতিয়া পুথি পঠন আৰু সংৰক্ষণ বিষয়ক কৰ্মশালা সম্পন্ন

গুৱাহাটী বিশ্ববিদ্যালয়ৰ উদ্যোগত আৰু দক্ষিণ কামৰূপৰ বৰিহাটস্থিত ঈশ্বৰ শ্ৰীশ্ৰী চতুর্ভূজ বৰফুলগুৰি সত্ৰৰ সহযোগত ১৭ আগষ্টত ‘প্ৰাচীন সাঁচিপতীয়া পুথি পঠন আৰু সংৰক্ষণ’ বিষয়ক এখন এদিনীয়া কর্মশালা অনুষ্ঠিত হয়। কৰ্মশালাৰ উদ্বোধনী অনুষ্ঠানত ভাগ লৈ গুৱাহাটী বিশ্ববিদ্যালয়ৰ উপাচাৰ্য অধ্যাপক ননী গোপাল মহন্তই ভাষণ প্ৰসংগত অসমৰ বিভিন্ন সত্ৰত থকা আপুৰুগীয়া সাঁচিপতীয়া পুথিসমূহ অধ্যয়নৰ প্রয়োজনীতা তথা গুৰুদুয়োজনাৰ দ্বাৰা ৰচিত বিভিন্ন গ্ৰন্থৰ সুন্দৰ বিশ্লেষণাত্মক আলোকপাত কৰে। কৰ্মশালাত গুৱাহাটী বিশ্ববিদ্যালয়ৰ কৃষ্ণকান্ত সন্দিকৈ গ্ৰন্থাগাৰৰ ধনজিৎ তালুকদাৰ সমল ব্যক্তিৰূপে ভাগ লৈ উপস্থিত থকা শতাধিক স্থানীয় ভকত বৈষ্ণৱৰ লগতে দক্ষিণ কামৰূপ মহাবিদ্যালয়, দক্ষিণ কামৰূপ ছোৱালী মহাবিদ্যালয় আৰু গুৱাহাটী বিশ্ববিদ্যালয়ৰ শিক্ষার্থী সকলক কৰ্মশালাৰ বিষয়বস্তুৰ গুৰুত্বৰ ওপৰত আলোকপাত কৰাৰ লগতে সহজ বৈজ্ঞানিক পদ্ধতিৰে কিদৰে সাঁচিপতিয়া পুথিসমুহক সংৰক্ষণ কৰিব পাৰি তাৰ কৌশল সমুহ প্ৰদৰ্শন কৰে।