চলিত ২০২০- ২১ বিত্তীয় বর্ষ শেষ হ`বলৈ মাজতে মাত্ৰ এটা সপ্তাহ বাকী থকা অৱস্থাত ৰাজ্য চৰকাৰৰ পৰিবহন বিভাগৰ আমিনগাঁওস্থিত কামৰূপ জিলাৰ জিলা পৰিবহন বিষয়াৰ কাৰ্যালয়ে জিলাখনত পঞ্জীয়নভুক্ত ব্যক্তিগত আৰু ব্যৱসায়ীকসহ সকলো যান বাহনৰ গৰাকীক অহা ৩১ মাৰ্চৰ ভিতৰত যাবতীয় কৰ, বকেয়া কৰ আদায় দিবলৈ অনুৰোধ জনায় জাননী জাৰি কৰিছে। জিলা পৰিবহন বিষয়া ৰূপজ্যোতি কলিতাই জানিবলৈ দিয়া মতে যান বাহনৰ যিসকল গৰাকীয়ে বিভাগক দিবলগীয়া বকেয়াসহ যাবতীয় কৰ আদায় দিয়া নাই , তেওঁলোকৰ লগতে পঞ্জীয়ন পত্ৰ নবীকৰণ , সক্ষমতাৰ প্ৰমাণ পত্ৰ নবীকৰণ আৰু গাড়ীচালনাৰ অনুজ্ঞাপত্ৰ নবীকৰণ নকৰা গৰাকী সকলকো নবীকৰণ কৰি যাবতীয় কৰ আদায় দিবলৈ আহ্বান জনোৱা হৈছে । আনকি এই সন্দৰ্ভত গোহাঁৰি যোগে জাননী জাৰি কৰা হৈছে । গৰাকী সকলে পুৱা ১০ বজাৰ পৰা বিয়লি ৫ বজাৰ ভিতৰত কাৰ্যালয়ত আহি নিৰ্দিষ্ট কাউন্টাৰত এ টি এম বা ডেভিড কাৰ্ড যোগে কৰ আদায় দিব পাৰিব । আনকি পৰিবহন আয়ুক্তৰ নিৰ্দেশ মৰ্মে কৰ আদায়ৰ সুবিধাৰ বাবে অহা ৩১ মাৰ্চলৈ বিৰতিবিহীন ভাবে দৈনিক কাৰ্যালয় খোলা থাকিব । কলিতাই সদৰি কৰা অনুসৰি বিভাগৰ ফালৰ পৰা কামৰূপ জিলাৰ বাবে ৪০.৭১ কৌটি টকাৰ ৰাজহ সংগ্ৰহৰ লক্ষ্য নিৰ্ধাৰণ কৰা হৈছিল । কিন্তু চলিত বিত্তীয় বর্ষৰ প্ৰথম ছয়টা মাহ কভিড মহামাৰীৰ বাবে পৰিবহন খণ্ডত পৰা নেতিবাচক প্ৰভাৱৰ বাবে আশা কৰা ধৰণে ৰাজহ সংগ্ৰহ কৰিব পৰা হোৱা নাই । কিন্ত প্ৰৱৰ্তক পৰিদর্শক , যান বাহন পৰিদর্শকে ধৰি কাৰ্যালয়ৰ সমূহ কৰ্মচাৰীৰ সমূহীয়া প্ৰষ্টেটাত ২২ মাৰ্চ পৰ্যন্ত প্ৰায় ২৭.৪২ কৌটি টকাৰ ৰাজহ সংগ্ৰহ কৰা হৈছে । ইয়াৰ সক্ষমতাৰ হাৰ হল ৬৭.৩৪ শতাংশ । অৱশ্যে অহা ৩১ মাৰ্চৰ ভিতৰত যাবতীয় কৰ আদায় নিদিলে এক এপ্ৰিলৰ পাছত কৰ আদায় নিদিয়া যান বাহনৰ বিৰুদ্ধে ৰাজপথত পৰিবহন বিভাগে পুনৰ বিশেষ অভিযান আৰম্ভ কৰিব। অভিযানত কৰ আদায় নিদিয়া বাহনৰ পৰা মটৰ পৰিবহন আইনৰ অধীনত জৰিমনা সংগ্ৰহ কৰা হব। ইতিমধ্যে জিলা পৰিবহন বিষয়াৰ কাৰ্যালয়ে মাৰ্চ মাহৰ প্ৰথম সপ্তাহৰ পৰা যান বাহনৰ গৰাকী সকলৰ মাজত সজাগতা সৃষ্টিৰ বাবে জিলাখনৰ ৰঙিয়া , বাইহাটা চাৰিআলি , চাংসাৰি , হাজো , আমিনগাঁও , মিৰ্জা , ছয়গাঁও , বকোকে ধৰি গুৰুত্বপূৰ্ণ স্থান সমূহত “যান বাহনৰ কৰ পৰিশোধ কৰক পৰিবহন ব্যৱস্থা সুচল কৰক” বাণীৰে সজাগতা অভিযান চলায় আছে । অভিযানৰ সময়ত যান বাহন পৰিদর্শক আৰু প্ৰৱৰ্তক পৰিদর্শকৰ দলে চালকৰ জৰিয়তে যান বাহনৰ গৰাকী সকলক যাবতীয় তথা বকেয়া কৰ আদায় দিবলৈ আহ্বান জনাইছে।
ক’ৰণা কেন্দ্ৰিক পৰিস্থিতিক লৈ মুখ্যমন্ত্রীৰ সর্বদলীয় বৈঠক অনুষ্ঠিত
সাম্প্রতিক ক’ভিড পৰিস্থিতিয়ে জটিল ৰূপ ধাৰণ কৰিছে৷ দেশৰ বিভিন্ন ৰাজ্যৰ লগতে অসমতো দ্রুতহাৰত বৃদ্ধি পাব ধৰিছে মাৰাত্মক ভাইৰাছত আক্রান্ত লোকৰ সংখ্যা৷ ইয়াৰ মাজতে জটিল ক’ভিড পৰিস্থিতিক লৈ কালি মুখ্যমন্ত্রী সর্বানন্দ সোণোৱালৰ অধ্যক্ষতাত মহানগৰীৰ খানাপাৰাস্থিত অসম প্রশাসনীয় পদাধিকাৰী মহাবিদ্যালয়ত এখন গুৰুত্বপূর্ণ সর্বদলীয় বৈঠক অনুষ্ঠিত হয়৷
এই সর্বদলীয় বৈঠকত বিজেপি, ভাৰতীয় জাতীয় কংগ্রেছ, অসম গণ পৰিষদ, অসম জাতীয় পৰিষদ, ইউ পি পি এল, আৰ জে ডি, চি পি আই (এম), চি পি আই (এম এল), ৰাইজৰ দল, নেচনেল ৰিপাব্লিকান কংগ্রেছ আৰু নেচনেল পিপল্ছ পার্টীৰ প্রতিনিধিয়ে অংশগ্রহণ কৰে৷ স্বাস্থ্যমন্ত্রী ড° হিমন্ত বিশ্ব শর্মাৰ লগতে ৰাজ্য চৰকাৰৰ কেইবাজনো শীর্ষ বিষয়াও বৈঠকত উপস্থিত আছিল৷
বৈঠকত অধ্যক্ষতা কৰি দিয়া ভাষণত মুখ্যমন্ত্রী সোণোৱালে ক’ৰোনা ভাইৰাছসৃষ্ট সাম্প্রতিক জটিল পৰিস্থিতিত সকলো ৰাজনৈতিক দলৰ প্রতিনিধিসকলক ঐক্যবদ্ধভাৱে যুঁজ দিয়াৰ আহ্বান জনায়৷ তৃণমূল পর্যায়ত ক’ভিড–১৯ আৰু চৰকাৰে জাৰি কৰা নির্দেশাৱলীসমূহ আখৰে আখৰে পালন কৰা সন্দর্ভত জনসচেতনতা সৃষ্টি কৰাৰ ক্ষেত্রত প্রতিটো ৰাজনৈতিক দলৰ কর্মকর্তাসকলক নিয়োজিত কৰাৰ প্রয়োজনীয়তাৰ কথা উল্লেখ কৰি মুখ্যমন্ত্রী সোণোৱালে কয় যে ৰাজ্য চৰকাৰে ক’ভিড–১৯ৰ বিৰুদ্ধে টেষ্টিং, ট্রেচিং, চিকিৎসা, ক’ভিড বিধিৰ যথোচিত পালন আৰু টিকাকৰণৰ দৰে পঞ্চসূত্র নীতিৰে আগবঢ়াৰ পদক্ষেপ গ্রহণ কৰিছে৷
এই মুহূর্তত জনসাধাৰণৰ জীৱন ৰক্ষা কৰাটোৱে ৰাজ্য চৰকাৰৰ প্রধান উদ্দেশ্য৷ সেই লক্ষ্যৰে যথোচিত নির্দেশনা ইতিমধ্যে প্রস্তুত কৰা হৈছে৷ জনসাধাৰণে ক’ভিড বিধি মানি চলাৰ ওপৰতে মহামাৰীৰ বিৰুদ্ধে সফলতাৰে যুদ্ধ কৰাটো বহু পৰিমাণে নির্ভৰ কৰিছে৷ এইক্ষেত্রত জনসাধাৰণক উপযুক্তভাৱে সজাগ আৰু সচেতন কৰি তোলাৰ পদক্ষেপ লোৱাৰ বাবে তেওঁ ৰাজনৈতিক দলৰ প্রতিনিধিসকলক আহ্বান জনায়৷মুখ্যমন্ত্রী সোণোৱালে পুনৰ কয় যে ৰাজ্য চৰকাৰে জনসাধাৰণক উৎকৃষ্ট সেৱা আগবঢ়োৱাৰ ক্ষেত্রত বদ্ধপৰিকৰ৷ নিজৰ লগতে পৰিয়াল তথা আত্মীয়–স্বজনক সুৰক্ষিত কৰি ৰখাৰ দিশত জনসাধাৰণ অধিক সচেষ্ট হ’ব লাগিব৷ এইক্ষেত্রত ৰাইজৰ মাজত নীতি–নিয়ম মানি চলাৰ প্রৱণতা বৃদ্ধি হ’ব লাগিব৷ ক’ভিডৰ প্রথম জোৱাৰৰ সময়ত ৰাজ্যখনৰ স্বাস্থ্য আন্তঃগাঁথনি কিছু পৰিমাণে দুর্বল আছিল যদিও বিগত সময়ছোৱাত চৰকাৰে এইক্ষেত্রত এক শক্তিশালী ব্যৱস্থা গঢ়ি তুলিছে৷
বিগত বর্ষৰ অভিজ্ঞতাই এইক্ষেত্রত যথেষ্ট পৰিমাণে সহায় কৰিছে বুলি উল্লেখ কৰি সেই সময়ত জনসাধাৰণৰ লগতে ৰাজনৈতিক দলসমূহে আগবঢ়োৱা স্বতঃস্ফূর্ত সেৱাৰো তেওঁ শলাগ লয়৷ আজিৰ সর্বদলীয় বৈঠকৰ জৰিয়তে জনসাধাৰণৰ মাজলৈ এক ইতিবাচক বার্তা যাব বুলি উল্লেখ কৰি মুখ্যমন্ত্রী সোণোৱালে কয় যে জটিল সময়ত সকলোৱে ঐক্যবদ্ধভাৱে কাম কৰিছে৷ পূর্বৰ দৰে এইবাৰো সকলোৱে ঐক্যবদ্ধভাৱে পদক্ষেপ লৈ এই জটিল পৰিস্থিতি অতিক্রম কৰিব পাৰিব বুলিও তেওঁ আশা প্রকাশ কৰে৷বৈঠকৰ অন্তত সংবাদ মাধ্যমৰে হোৱা বার্তালাপতো মুখ্যমন্ত্রী সোণোৱালে স্বাস্থ্য বিভাগৰ দ্বাৰা জাৰি কৰা নীতি–নির্দেশনাসমূহ নিখুঁতভাৱে পালন কৰিবলৈ ৰাজ্যৰ প্রতিজন নাগৰিকক আহ্বান জনাই কয় যে আমাৰ স্বাস্থ্য বিভাগৰ তৰফৰ পৰা তৎপৰতাৰে জনসাধাৰণক উন্নতমানৰ চিকিৎসা সেৱা আগবঢ়োৱাৰ পদক্ষেপ গ্রহণ কৰা হৈছে৷ যাৰ বাবে আজি আমি পৰিস্থিতিৰ সৈতে মোকাবিলা কৰিবলৈ সক্ষম হৈছোঁ৷ কিন্তু সকলোৰে ক্ষেত্রত সীমাবদ্ধতা আছে৷
এই কথা জনসাধাৰণে উপলব্ধি কৰিব লাগিব৷ স্বাস্থ্যমন্ত্রী ড° হিমন্ত বিশ্ব শর্মাৰ লগতে স্বাস্থ্য বিভাগৰ সৈতে জড়িত প্রতিজন বিষয়া–কর্মচাৰী আৰু ডাক্তৰ–নার্ছে যি ধৰণে কাম কৰিছে, তাৰ বাবেও পৰিস্থিতিৰ মোকাবিলা কৰিবলৈ সক্ষম হৈছোঁ৷ কিন্তু আজি দেশজুৰি যি পৰিস্থিতিৰ সৃষ্টি হৈছে, তাৰ প্রতি লক্ষ্য ৰাখি আমি সজাগতা অৱলম্বন কৰিব লাগিব৷ এছ অ’ পি যদি সকলোৱে মানি চলে, তেতিয়া নিশ্চিতভাৱে আমি পৰিত্রাণ পাম৷ চৰকাৰে গ্রহণ কৰা প্রতিটো পদক্ষেপৰ লক্ষ্য হৈছে নাগৰিকক সংক্রমণৰ পৰা ৰক্ষা কৰা৷
ৰাজ্য চৰকাৰে ক’ভিড–১৯ৰ সংক্রমণ প্রতিৰোধকল্পে অসমত লকডাউন দিয়াৰ সিদ্ধান্ত গ্রহণ কৰিব নেকি বুলি সাংবাদিকে সোধা প্রশ্ণৰ উত্তৰত মুখ্যমন্ত্রী সোণোৱালে কয়- এতিয়ালৈকে তেনে ধৰণৰ পৰিস্থিতিৰ উদ্ভৱ হোৱা নাই৷ কিন্তু মই অসমৰ ৰাইজক আহ্বান জনাওঁ– লকডাউন ঘোষণা কৰা পৰিস্থিতিলৈ যাতে যাবলগীয়া নহয়৷ সর্বদলীয় বৈঠকত বক্তব্য ৰাখি স্বাস্থ্যমন্ত্রী ড° হিমন্ত বিশ্ব শর্মাই ক’ভিডৰ নীতি–নিয়ম যথোচিতভাৱে পালনৰ লগতে এই দিশত সজাগতা আৰু ঐক্যবদ্ধ প্রয়াস চলোৱাৰ ওপৰতো গুৰুত্ব আৰোপ কৰে৷
ক’ৰোনাৰ দ্বিতীয় জোৱাৰ যথেষ্ট জটিল বুলি উল্লেখ কৰি তেওঁ কয় যে বর্তমান ক’ভিড–১৯ৰ চিকিৎসাৰ প্রয়োজনীয় আন্তঃগাঁথনি–ব্যৱস্থ্ পর্যাপ্ত পৰিমাণে আছে৷ কিন্তু সংক্রমিত লোকৰ সংখ্যা বৃদ্ধি হ’লে ই এক কঠিন প্রত্যাহ্বান হিচাপে থিয় দিব৷ ইয়াৰ বাবে স্বাস্থ্য আন্তঃগাঁথনি বৃদ্ধি, আই চি ইউ বিছনা তথা অক্সিজেনৰ যোগান বৃদ্ধিৰ ওপৰতো গুৰুত্ব দিয়া হৈছে৷ ৪৫ বছৰ বয়সৰ ঊর্ধ্বৰ ব্যক্তিসকলৰ টিকাকৰণ প্রক্রিয়া বর্তমানে চলাই থকা হৈছে বুলি উল্লেখ কৰি তেওঁ পুনৰ কয় যে মে’ মাহৰ প্রথম সপ্তাহৰ পৰা ১৮–৪৫ বছৰ বয়সৰ ব্যক্তিসকলৰ টিকাকৰণ প্রক্রিয়া আৰম্ভ কৰা হ’ব৷সর্বদলীয় বৈঠকত বিজেপিৰ ৰাজ্যিক সভাপতি ৰঞ্জিত কুমাৰ দাস, অসম প্রদেশ কংগ্রেছ কমিটীৰ সভাপতি ৰিপুণ বৰা, অসম গণ পৰিষদৰ সভাপতি অতুল বৰা, অসম জাতীয় পৰিষদৰ সাধাৰণ সম্পাদক জগদীশ ভূঞাৰ উপৰি চি পি আই (এম এল), চি পি আই (এম), ৰাইজৰ দল, এন পি পি, নেচনেল ৰিপাব্লিকান কংগ্রেছ আৰু আৰ জে ডিৰ প্রতিনিধিবর্গই নিজ নিজ মত ব্যক্ত কৰে৷
মুখ্যমন্ত্রী সোণোৱালে সর্বদলীয় বৈঠক আহ্বান কৰাৰ বাবে শলাগ লয় সকলো ৰাজনৈতিক দলৰ নেতৃবৃন্দই৷ লগতে ক’ভিড–১৯ৰ বিৰুদ্ধে চলাই থকা যুদ্ধখনত ৰাজনৈতিক স্বার্থৰ ঊর্ধ্বত থাকি চৰকাৰলৈ সকলো ক্ষেত্রতে সহায়–সহযোগিতা আগবঢ়োৱাৰ আশ্বাস দিয়ে৷ সর্বদলীয় প্রতিনিধিবর্গই এইক্ষেত্রত ল’বলগীয়া কিছু ব্যৱস্থাৱলী সম্পর্কতো চৰকাৰক পৰামর্শ আগবঢ়ায়৷
ক`ৰণাৰ দ্বিতীয় সংক্ৰমণ দ্ৰুতগতিত বৃদ্ধি পোৱাত আমাৰ সকলোৰে সুৰক্ষা কবচত পৰিণত হৈছে মাস্কখন। মাস্ক পৰিধান কৰিবলৈ চৰকাৰেও জাৰি কৰিছে কঠোৰ নিৰ্দেশনা। মাস্কৰ ব্যৱহাৰ তথা সজাগতা সৃষ্টিৰ বাবে হাজোৰ এগৰাকী কিশোৰীয় হাতত লৈছে ৰং-তুলিকা। হাজো ধোপৰগুৰিৰ জ্যোতিস্মিতা ওজা নামৰ কিশোৰী গৰাকীয়ে কাঠৰ ক্ষুদ্ৰ ক্ষুদ্ৰ টুকুৰাত অংকন কৰিছে বহুতো ছবি। বিশেষকৈ জ্যোতিস্মিতাই কৰোণা ভাইৰাছৰ ভয়াৱহতা আৰু সজাগতাৰ বাবে অকা মাস্কৰ ছবিয়ে দৃষ্টি আকৰ্ষণ কৰিছে সকলোৰে। আনহাতে ক্ষুদ্ৰ ক্ষুদ্ৰ কাঠৰ টুকুৰাত প্ৰাণ ঠাই উঠিছে ৰংঘৰ, তাজমহল লক্ষ্মীনাথ বেজবৰুৱা, ভাৰতৰত্ন ড০ ভূপেন হাজৰিকা, ড০ হিমন্ত বিশ্ব শৰ্মা, জুবিন গাৰ্গ, অংগৰাগ পাপন মহন্ত আদিৰ ছবি। চতুৰ্থ শ্ৰেণীৰ পৰা ছবি আঁকি ভাল পোৱা জ্যোতিস্মিতাক এই ক্ষেত্ৰত পিতৃ-মাতৃয়েও যথেষ্ট উৎসাহ যোগাই আহিছে। বিশেষকৈ শেহতীয়া পৰিস্থিতিৰ লগত খাপ খুৱাই ক্ষুদ্ৰ কাঠৰ টুকুৰাত মাস্ক অংকন কৰি সজাগতা সৃষ্টি কৰাত আনন্দ প্ৰকাশ কৰিছে ফাৰ্মাচিষ্ট পিতৃ নাৰায়ণ ওজা আৰু মাতৃ মঞ্জু পাঠক ওজাই। ছবি আকি জগত জিনিব বিচৰা জ্যোতিস্মিতাই মহামাৰী ক`ৰণা ভাইৰাছৰ পৰা ৰক্ষা পাবলৈ সকলোকে মাস্ক পৰিধান কৰিবলৈ অনুৰোধ জনোৱাৰ লগতে সজাগতা সৃষ্টিৰ বাবে ক্ষুদ্ৰ কাঠৰ টুকুৰাত অংকন কৰা মাস্কৰ ছবিয়ে সকলোকে আকৰ্ষিত কৰিছে। হাজো ধোপৰগুৰিৰ নিবাসী জ্যোতিস্মিতা ওজা হাজো উচ্চতৰ মাধ্যমিক বিদ্যালয়ৰ উচ্চতৰ মাধ্যমিকৰ দ্বিতীয় বাৰ্ষিকৰ ছাত্ৰী।
ভিউৱাছৰ মতামত