চতিয়াৰ এক গৌৰৱোজ্বল ইতিহাসৰ সাক্ষী ঐতিহাসিক চতিয়া আৰক্ষী থানা ৷ ১৯৪২ চনৰ ২০ আগষ্টত দেশৰ ভিতৰতে পোনপ্ৰথমে বৃটিছৰ ইউনিয়ন জেক নমাই ত্ৰিৰংগা উৰুৱাইছিল ৷ এই ঐতিহাসিক মুহূৰ্তৰ সাক্ষী স্বৰূপ চতিয়া ঐতিহাসিক আৰক্ষী থানাৰ দেৱালত শনিবাৰে সন্ধিয়া চতিয়াৰ বিধায়ক পদ্ম হাজৰিকাই নিজেও এগৰাকী চতিয়া সন্তান ৰূপে দেৱাল অংকনত ৰং তুলিকাৰে হাত বুলালে ৷ দেৱাল অংকনত অসমৰ বিশিষ্ট নাট্যকাৰ পংকজজ্যোতি ভূঞাৰ লগতে চতিয়া বহুকেইজন উদীয়মান চিত্ৰ শিল্পীক বিধায়কগৰাকীয়ে একোখনকৈ ফুলাম গামোছাৰে অভিনন্দন জনায় ৷ বিধায়কগৰাকীয়ে সকলোকে ৭৫ তম স্বাধীনতা দিৱসৰ অমৃত মহোৎসৱ উলহ মালহেৰে পালন কৰিবলৈ আহ্বান জনায় ৷ ইতিমধ্যে চতিয়াৰ এই ঐতিহাসিক ক্ষণৰ সাক্ষীস্বৰূপ চতিয়া থানাৰ দেৱালৰ সন্মুখত নিজকে এগৰাকী চতিয়াবাসী ৰূপে পৰিচয় দি ছেল্ফি গ্ৰহণ কাৰ্যসূচীও ৰূপায়ণ কৰে ৷উল্লেখ্য যে চতিয়াৰ ইতিহাসৰ গৌৰৱোজ্বল ২০ আগষ্টৰ দিনটোক ইতিমধ্যে চতিয়া দিৱস ৰূপে উদযাপনৰ এক ব্যাপক প্ৰস্তুতি আৰম্ভ হৈছে।
বাতৰি যুগুতালে জামুগুৰিহাটৰ পৰা ৰাতুল হাজৰিকাই।
