তামুলপুৰত জিলা স্বাস্থ্য সমিতিৰ সভা

তামুলপুৰৰ জিলা গ্ৰামোন্নয়ন অভিকৰণৰ প্ৰকল্প সঞ্চালকৰ সভাকক্ষত আজি জিলা স্বাস্থ্য সমিতিৰ এখন গুৰুত্বপূৰ্ণ সভা অনুষ্ঠিত হয়। সভাখনত বড়োলেণ্ড টেৰিটৰিয়েল কাউন্সিল, কোকৰাঝাৰৰ মাননীয় সচিব অনছুলা বসুমতাৰীয়ে সভাপতিত্ব কৰে। সভাত স্বাস্থ্য সেৱা প্ৰশাসনৰ কেবাগৰাকীও বিষয়া উপস্থিত থাকে। ইয়াৰ ভিতৰত যুটীয়া স্বাস্থ্য সেৱা সঞ্চালক, জিলা গ্ৰামোন্নয়ন অভিকৰণৰ প্ৰকল্প সঞ্চালক, মহকুমা চিকিৎসা আৰু স্বাস্থ্য বিষয়া, উপ-অধীক্ষকসকল, জিলা মেলেৰিয়া বিষয়া, জিলা যক্ষ্মা বিষয়া, জিলা টিকাকৰণ বিষয়াৰ লগতে জিলা আৰু খণ্ড পৰ্যায়ৰ কাৰ্যসূচী ব্যৱস্থাপনা গোট (DPMU আৰু BPMU)-ৰ প্ৰতিনিধিসকল উপস্থিত থাকে। সভাত ভাষণ প্ৰদান কৰি বিটিচিৰ সচিবগৰাকীয়ে অঞ্চলটোত স্বাস্থ্যসেৱা অধিক ফলপ্ৰসূভাৱে প্ৰদান কৰাৰ ক্ষেত্ৰত দেখা দিয়া বিভিন্ন সমস্যাসমূহ চিনাক্ত কৰি সেইসমূহৰ সমাধানৰ ওপৰত গুৰুত্ব আৰোপ কৰে। তেওঁ স্বাস্থ্য সেৱাৰ মান উন্নত কৰাৰ লগতে জনসাধাৰণৰ বাবে স্বাস্থ্যসেৱা অধিক সুলভ আৰু ফলপ্ৰসূ কৰি তোলাৰ বাবে সংশ্লিষ্ট বিভাগসমূহক সমন্বিতভাৱে কাম কৰিবলৈ আহ্বান জনায়। শেষত শলাগৰ শৰাই আগবঢ়াই সভাৰ সামৰণি ঘোষণা কৰা হয়।