দক্ষিণ কামৰূপ কবি সমাজৰ প্ৰথম বাৰ্ষিক অধিৱেশন সম্পন্ন

কাব্য চৰ্চাৰ ক্ষেত্ৰত দক্ষিণ কামৰূপ অঞ্চলৰ ইতিহাস বহু পুৰণি। অসম কবি সমাজৰ স্বীকৃতিপ্ৰাপ্ত দক্ষিণ কামৰূপ কবি সমাজৰ প্ৰথম বাৰ্ষিক অধিৱেশনখনি আজি উপৰহালীৰ চিলাৰায় ভৱনত দিনজোৰা কাৰ্যসূচীৰে অনুষ্ঠিত হয়। এই উপলক্ষে আজি পুৱা পতাকা উত্তোলন কৰে দক্ষিণ কামৰূপ কবি সমাজৰ সভাপতি ড০ শৈলেন্দ্ৰ নাৰায়ণ ঠাকুৰীয়াই। তাৰ পিছতে সমাজৰ উপ সভাপতি কৈলাশ নাথ শৰ্মাৰ সঞ্চালনাত অনুষ্ঠিত হোৱা স্বৰচিত কবিতা পাঠ অনুষ্ঠানটিত অৰ্ধ শতাধিক নবীন প্ৰৱীন কবিয়ে কবিতা পাঠ কৰে। বিয়লি ড০ শৈলেন্দ্ৰ নাৰায়ণ ঠাকুৰীয়াৰ সভাপতিত্বত মুকলি সভা অনুষ্ঠিত কৰা হয়। সভাত কবি অশ্বিনী কুমাৰ তালুকদাৰ সম্পাদিত স্মৰণিকা ‘কবিতা কানন’ উন্মোচন কৰে অসম কবি সমাজৰ সভাপতি ৰাজেন্দ্ৰ নাথ বৰদলৈয়ে। নিৰ্দিষ্ট বক্তা হিচাপে অসম কবি সমাজৰ সম্পাদক প্ৰধান ৰাজীৱ কুমাৰ ফুকনে অংশগ্ৰহণ কৰি দক্ষিণ কামৰূপ কবি সমাজৰ এই প্ৰচেষ্টাৰ শলাগ লয়। তেওঁ কবিতাৰ মূল্যবোধ, আধুনিক কবিতাৰ বিশ্লেষণ, কবিতাৰ ব্যঞ্জনা, কবিৰ দৃষ্টি, কবিৰ স্বাধীনতা, কবিতাৰ নান্দনিকতা আদি দিশৰ ওপৰত বক্তব্য ৰাখে। লেখক ৰোহিনী কুমাৰৰ ‘এই নদীয়েদি’ কাব্যগ্ৰন্থ উন্মোচন কৰে পলাশবাৰী সাহিত্য সভাৰ সভাপতি যুগল চন্দ্ৰ বৈশ্যই। কৈলাশ নাথ শৰ্মাৰ ‘কি সপোন দেখিলো’ নামৰ কাব্যগ্ৰন্থখন উন্মোচন কৰে প্ৰগতিশীল লিখক নৃপেন শৰ্মাই। লেখিকা নিৰুপমা মজুমদাৰৰ উপন্যাস উশাহ মোৰ জীৱনৰ উন্মোচন কৰি দক্ষিণ কামৰূপ মহাবিদ্যালয় মিৰ্জাৰ অধ্যাপক এডৱাৰ্ড ষ্টেডী এন চাংমাই কিতাপ পঢ়িব লাগে আৰু গঠনমূলক আলোচনাও লাগে বুলি মন্তব্য কৰে। এই অধিৱেশনত বিধায়ক হেমাংগ ঠাকুৰীয়াই অংশগ্ৰহণ কৰি কবি সমাজৰ এই অধিৱেশনৰ শলাগ লয়। অনাগত সময়ত কবি সমাজৰ বাবে ভূমি, গৃহ নিৰ্মাণ আদি ক্ষেত্ৰত সহায় কৰি যাব বুলি উল্লেখ কৰে।