টীয়কত ব্যৱসায়ীৰ প্ৰশংসনীয় পদক্ষেপ

টীয়কৰ কলিয়াপানীত জ্ঞানমাৰ্গ জাতীয় বিদ্যালয় নামেৰে অসম জাতীয় বিদ্যালয়ৰ আৰ্হিত অসমৰ ভিতৰতে প্ৰথমখন সম্পূৰ্ণ বিনামূলীয়া বিদ্যালয় আজি শুভাৰম্ভ কৰা হয়। টীয়ক অঞ্চলৰ বিশিষ্ট ব্যৱসায়ী প্ৰতাপ শইকীয়াৰ পৃষ্ঠপোষকতাত অসমত প্ৰথমখন সম্পূৰ্ণ বিনামূলীয়া জাতীয় বিদ্যালয়ৰ দ্বাৰ আনুষ্ঠানিকভাৱে মুকলি কৰে অৱসৰপ্ৰাপ্ত অধ্যাপক ড: ভাৰত ভূষণ বৰাই ।অংকুৰ, প্ৰাক প্ৰাথমিক, প্ৰথম আৰু দ্বিতীয় শ্ৰেণীত মুঠ ৯৩ জন ছাত্ৰ-ছাত্রীৰে প্ৰথম বৰ্ষৰ সকলো শ্রেণীৰে পাঠদান শুভাৰম্ভ কৰে।উল্লেখযোগ্য যে বিদ্যালয়খনত নামভৰ্তি হোৱা ছাত্ৰ-ছাত্ৰী সকলক বেগ,ইউনিফৰ্ম,কিতাপ আদি বিনামূলীয়াকৈ যোগান ধৰাৰ লগতে কম্পিউটাৰগাৰ,গ্ৰন্থাগাৰৰ সু ব্যৱস্থা কৰি নতুন প্ৰযুক্তিৰে পাঠদান গ্ৰহণৰ ব্যৱস্থা কৰা হৈছে।লগতে পৰ্য্যায়ক্ৰমে দ্বাদশ শ্ৰেণীলৈকে এই ব্যৱস্থা থাকিব বুলি জানিবলৈ দিছে প্ৰতাপ শইকীয়াই। গ্রাম্যাঞ্চলৰ দুখীয়া পৰিয়ালৰ সন্তানক শিক্ষাৰ পোহৰ বিলাবলৈ বিশিষ্ট ব্যৱসায়ীগৰাকীৰ এই প্রচেষ্টাক সকলোৱে প্ৰশংসা কৰিছে।