বিশ্ব পৰিৱেশ দিৱস উপলক্ষে বেলিকিডছ এডুকেয়াৰৰ উদ্যোগত গছপুলি বিতৰণ

পৰিৱেশৰ প্ৰতি সৰ্বসাধাৰণ ৰাইজ তথা কণ-কণ শিশুসকলৰ মাজত সচেতনতা বৃদ্ধিৰ বাবে শিশু শিক্ষা আৰু গৱেষণা প্ৰতিষ্ঠান বেলিকিডছ এডুকেয়াৰ বৰিহাটে কালি শিক্ষা প্ৰতিষ্ঠানখনৰ প্ৰাঙ্গনত ৰূপায়ণ কৰে এক বিশেষ কাৰ্যসূচী ।আমাৰ পৰিৱেশ আমাৰ ভৱিষ্যত-শীৰ্ষক অনুষ্ঠানটিত বিভিন্ন অনুষ্ঠান প্ৰতিষ্ঠানৰ প্ৰতিনিধিৰ লগতে উপস্থিত থাকে প্ৰতিষ্ঠানখনৰ অভিভাৱকৰ আৰু কেইবাগৰাকীও নেতৃত্বস্থানীয় ব্যক্তি ।সম্পূৰ্ণ ক’ভিড প্ৰট’কল মানি আয়োজন কৰা এই অনুষ্ঠানত ঝাৰোবড়ী আঞ্চলিক হাইস্কুলৰ শিক্ষয়িত্ৰী ৰেখামণি কলিতাই বৃক্ষৰোপন কৰাৰ লগতে ভাষণ প্ৰদান কৰে অভিভাৱকৰ লগতে কিশলয় বিদ্যাপীথ ,দিশপুৰৰ শিক্ষক দীপ কুমাৰ চৌধুৰী আৰু কামৰূপ জাতীয় বিদ্যালয়,মিৰ্জাৰ শিক্ষক স্বাধীন দাসে ।অনুষ্ঠানত সঞ্চালক ৰত্ন দাসে এটা গছপুলিৰ ৰোপণ আৰু প্ৰতিপালনৰ কচৰতে কেনেকৈ শিশুৰ মানসিক- সামাজিক বিকাশৰ লগতে চৰিত্ৰ গঠনতো গুৰুত্বপূৰ্ণ ভূমিকা পালন কৰিব পাৰে সেই বিষয়ে অৱগত কৰে ।এই কাৰ্যসূচীৰ অধীনত অঞ্চলটোৰ দুই শতাধিক লোকৰ মাজত গছপুলি বিতৰণ কৰা হয় । বেলিকিডছৰ পৰিচালন সঞ্চালক মীনাক্ষী চৌধুৰীয়ে অনুষ্ঠানটি আঁত ধৰে । অনুষ্ঠানটিত সহযোগিতা আগবঢ়াই স্পৰ্শ-অসম নামৰ এটি বেচৰকাৰী প্ৰতিষ্ঠানে ।উল্লেখযোগ্য যে প্ৰতিবছৰে বেলিত অধ্যয়নৰত শিশুসকলৰ ওপজা দিনত প্ৰতিষ্ঠানখনে একোটিকৈ গছপুলি প্ৰদান কৰি আহিছে ।