মহাপুৰুষ শ্ৰীমন্ত শংকৰদেৱ বিশ্ববিদ্যালয়ত বজ্ৰপাত ধৰা পেলোৱা যন্ত্ৰ প্ৰতিষ্ঠাপন

আজি মহাপুৰুষ শ্ৰীমন্ত শংকৰদেৱ বিশ্ববিদ্যালয়ৰ নগাও চৌহদত এক অভিনৱ বক্তৃতানুষ্ঠানৰ আয়োজন কৰা হয়।কিছুদিন পূৰ্ৱে বিশ্ববিদ্যালয়খনত এটি লাইটনিং ডিটেক্টৰ (বজ্ৰপাত ধৰা পেলোৱা যন্ত্ৰ)স্থাপনৰ জৰিয়তে অঞ্চলটোৰ বতৰ নিৰীক্ষণ আৰু বায়ুমণ্ডল বিজ্ঞানৰ গৱেষণাৰ ক্ষেত্ৰত এক উল্লেখযোগ্য পদক্ষেপ গ্ৰহণ কৰা হৈছিল ,তাৰ সামগ্ৰিক দিশৰ আলোচনাৰ হেতু এই বক্তৃতানুষ্ঠান আয়োজন কৰা হয় । ভাৰত চৰকাৰৰ মহাকাশ বিভাগৰ অধীনস্থ উত্তৰ-পূৱ মহাকাশ প্ৰয়োগিক কেন্দ্ৰ (এন ই এছ এ চি)ৰ দ্বাৰা প্ৰদান কৰা এই অত্যাধুনিক সঁজুলিয়ে অঞ্চলটোত বজ্ৰপাতৰ কাৰ্যকলাপসমূহক বাস্তৱিক সময়ত নিৰীক্ষণ কৰিবলৈ সক্ষম হ’ব।এই উল্লেখযোগ্য পদক্ষেপ লোৱাৰ ক্ষেত্ৰত নেতৃত্ব দিছে বিশ্ববিদ্যালয়ৰ উপাচাৰ্য অধ্যাপক মৃদুল হাজৰিকা, পঞ্জীয়ক ড° শৰৎ হাজৰিকা, যুটীয়া পঞ্জীয়ক ড° নয়নমণি শইকীয়া আৰু উপ পঞ্জীয়ক (শৈক্ষিক) ড° বিচিত্ৰ বিকাশে । এই উপলক্ষে আজি বিশ্ববিদ্যালয়খনৰ পদাৰ্থ বিজ্ঞান বিভাগৰ উদ্যোগত তথা আভ্যন্তৰীণ গুণমান নিশ্চিতকৰণ কোষৰ সহযোগত বিশ্ববিদ্যালয়খনৰ কনফাৰেন্স হলত “বিজুলী পদাৰ্থ বিজ্ঞান আৰু পৰ্যবেক্ষণ কৌশল” বিষয়ক এক বিশেষ আমন্ত্ৰিত বক্তৃতাৰ আয়োজন কৰা হয় । আমন্ত্ৰিত বক্তৃতা প্ৰদান কৰে উত্তৰ-পূব মহাকাশ প্ৰায়োগিক কেন্দ্ৰৰ প্ৰখ্যাত বিজ্ঞানী ড° অভয় শ্ৰীবাস্তৱে । ড° শ্ৰীবাস্তৱৰ অন্তৰ্দৃষ্টিসম্পন্ন উপস্থাপনে বিজুলীৰ জটিল পৰিঘটনা, ইয়াৰ গঠন আৰু ইয়াৰ অধ্যয়নৰ বাবে ব্যৱহাৰ কৰা উন্নত কৌশলৰ ওপৰত আলোকপাত কৰে । বক্তৃতা অনুষ্ঠানটোত পদাৰ্থ বিজ্ঞান বিভাগৰ স্নাতকোত্তৰ শাখা আৰু পষ্ট গ্ৰেজুৱেট ডিপ্লমা ইন ৰিমট চেনছিং এণ্ড জিআইএছৰ সমূহ ছাত্ৰ-ছাত্ৰীৰ লগতে বিভাগটোৰ অধ্যাপকসকল ক্ৰমে ড° কমল কুমাৰ তাঁতী, প্ৰাঞ্জল শৰ্মা, ৰূপজ্যোতি নাথৰ লগতে অধ্যাপক-অধ্যাপিকাসকলো উপস্থিত থাকে।এই লাইটনিং ডিটেক্টৰ স্থাপনৰ ফলত বতৰ বিজ্ঞান, কৃষি, দুৰ্যোগ ব্যৱস্থাপনাকে ধৰি বিভিন্ন ক্ষেত্ৰত যথেষ্ট অৰিহণা যোগাব বুলি আশা কৰা হৈছে । বিজুলীৰ সংঘটনৰ সঠিক আৰু সময়োপযোগী তথ্য প্ৰদান কৰি এই ডিটেক্টৰটোৱে বিজুলীৰ আঘাতৰ লগত জড়িত বিপদসমূহ কম কৰাত সহায় কৰিব আৰু বতৰৰ পূৰ্বাভাস উন্নত কৰিব । এই পদক্ষেপে উত্তৰ-পূৱ মহাকাশ প্ৰায়োগিক কেন্দ্ৰ আৰু মহাপুৰুষ শ্ৰীমন্ত শংকৰদেৱ বিশ্ববিদ্যালয়ৰ বৈজ্ঞানিক গৱেষণাক আগুৱাই নিয়াৰ লগতে অঞ্চলটোত প্ৰযুক্তিগত উন্নতিৰ প্ৰসাৰত সহযোগিতামূলক প্ৰচেষ্টাক আগবঢ়াই নিব বুলি আশা কৰা হৈছে ।