সতৰ্কতা সজাগতা অভিযানত পথিকৰ উদ্যোগত চি আৰ পি এফৰ গুৱাহাটী গ্ৰুপ চেণ্টাৰত বাটৰ নাট প্ৰদৰ্শন

সাধাৰণ লোকৰ জমা ধন, বেংকৰ পৰা বিভিন্ন কাৰণত নোহোৱা হোৱা খবৰে বিগত কিছু দিন ধৰি শিৰোনামা দখল কৰি থকা দেখা গৈছে। ইয়াৰ পৰা পৰিত্ৰাণ পাবলৈ বিভিন্ন চৰকাৰী অনুষ্ঠান আৰু বেংক সমূহে সজাগতা কৰাৰ চেষ্টা কৰিছে। কোনো অজান ব্যক্তিৰ পৰা অহা ফোনত বিভিন্ন লোভনীয় পুৰস্কাৰৰ খবৰ দি বেংক একাউণ্টৰ অ টি পিলৈ টকা লুটি লৈ যোৱাৰ লগতে সৰ্বস্বান্ত হোৱা খবৰ বোৰৰ পৰা হাত সাৰিব পৰাকৈ সজাগতাৰ বাবে অসমৰ অন্যতম স্বেচ্ছাসেৱী অনুষ্ঠান পথিকে সতৰ্কতা সজাগতা সপ্তাহ অভিযানৰ লগত সংগতি ৰাখি আৰম্ভ কৰিছে বাটৰ নাট প্ৰদৰ্শনৰ ব্যৱস্থা । ভাৰতীয় ষ্টেট বেংক চমুকৈ এছ বি আইৰ সহযোগত অসমৰ বিভিন্ন জিলাত এলানি বাটৰ নাট কাৰ্য্যসূচী হাতত লৈছে। ইয়াৰে প্ৰথমটো কাৰ্য্যসূচী গুৱাহাটীৰ কাষৰীয়া নমমাইলৰ আমেৰিগোগস্থিত চি আৰ পি এফৰ গ্ৰুপ চেণ্টাৰ চৌহদত ২৩ অক্টোবৰত সন্ধিয়া বাটৰ নাট প্ৰদৰ্শন কৰা হয়। এছ বি আইৰ পৰিচালন সঞ্চালক তথা মূখ্য সতৰ্কতা বিষয়া অজিত কুমাৰ ৰথ, গুৱাহাটী ক্ষেত্ৰৰ নেটৱৰ্ক মহা প্ৰবন্ধক আব্ৰাহাম ছিলভা, মহা প্ৰবন্ধক তথা অতিৰিক্ত সতৰ্কতা বিষয়া বিক্ৰম ত্ৰিপাঠী, বাণিজ্য আৰু কাৰ্যবাহী উপ মহা প্ৰবন্ধক সংগীতা ভাস্কৰ এম, চি টি পি এফৰ গ্ৰুপ চেণ্টাৰৰ উপ মহা পৰিদৰ্শক অনিল কুমাৰ ধীয়ানি , গুৱাহাটী ক্ষেত্ৰৰ উপ মহা পৰিদৰ্শক মহম্মদ জামাল খান আৰু দুই শতাধিক বিষয়া – জোৱান আৰু ৰাইজৰ উপস্থিতিত পথিকৰ সদস্য সকলে অসমীয়া আৰু হিন্দী দুয়োটা ভাষাত প্ৰস্তুত কৰা বাটৰ নাটখন প্ৰদৰ্শন কৰে। পথিকৰ এই বাটৰ নাটখনৰ পাছত এছ বি আই আৰু চি আৰ পি এফৰ বিষয়াসকলে বিশেষভাৱে পথিকৰ দলটোৰ কলাকুশলী সকলক ৰাজহুৱাভাবে প্ৰশংসা কৰি অভিনন্দন জনায়।