অসমীয়া সাহিত্যৰ নীৰৱ সাধক অনন্ত ৰাম দাসৰ স্মৃতিত গঠিত অনন্ত ৰাম দাস স্মৃতি প্ৰকাশনে প্ৰতিবছৰে অসমীয়া শিশু সাহিত্যৰ প্ৰকাশিত গ্ৰন্থৰ ওপৰত অনন্তবন বঁটা আগবঢ়াই আহিছে ৷ এইবাৰো ২০১৯ বৰ্ষৰ শিশু সাহিত্যৰ অনন্তবন বঁটা বিশিষ্ট লেখিকা মনোৰমা ভুঞালৈ আগবঢ়োৱা হৈছে ৷ আজি এক প্ৰেছ বিজ্ঞপ্তিযোগে অনন্ত ৰাম দাস স্মৃতি প্ৰকাশনৰ প্ৰধান সম্পাদক কবিন দাসে জানিবলৈ দিয়ে যে নীৰৱ সাধনাৰে উনপঞ্চাশখন নাটক .দুখন কবিতা পুথি . সাতখন উপন্যাস . ৰচনা কৰি অসমীয়া সাহিত্যৰ ভঁৰাল চহকী কৰি থৈ যোৱা সুন্দৰৰ সাধক অনন্ত ৰাম দাসৰ জন্ম বৰপেটা সত্ৰৰ সমীপত নহাটীত ৷শৈশৱতে টাইফয়ড জ্বৰত আক্ৰান্ত হৈ বাক্ আৰু শ্ৰৱণ শক্তি হেৰুৱাই যদিও একান্ত সাধনা .কঠোৰ জীৱন সংগ্ৰাম আৰু সৃষ্টিৰ দুৰন্ত হেঁপাহৰ বাবে সাহিত্য জগতলৈ বিশেষ অবদান দি গৈছে ৷তেখেতৰ স্মৃতি ৰক্ষাৰ্থে গঠিত অনন্ত ৰাম দাস স্মৃতি প্ৰকাশনে প্ৰতিবছৰে অসমীয়া ভাষা সহিত্যলৈ অৱদান আগবঢ়াই যোৱা সুন্দৰৰ সাধক অনন্ত ৰাম দাসৰ ১৯ জুলাইৰ মৃত্যুৰ দিনটো স্মৃতি দিৱস হিচাপে বৰ্ণাঢ্য কাৰ্যসূচীৰে পালন কৰি আহিছে ৷ এই বছৰো স্মৃতি দিৱস উপলক্ষে অনন্ত ৰাম দাস স্মৃতি প্ৰকাশনৰ সৰ্বস্ব সন্মান ২০১৯ বৰ্ষৰ সুন্দৰৰ সাধক অনন্ত ৰাম দাস বঁটা নৃপেন ৰয়লৈ আৰু শিশু সাহিত্যৰ অনন্তবন বঁটা মনোৰমা ভূঞালৈ তেখেতৰ “ন-টি মনোৰম কাহিনী ” শীৰ্ষক শিশু গ্ৰন্থখনৰ বাবে আগবঢ়োৱা হৈছে । উল্লেখযোগ্য যে বিশিষ্ট লেখিকা মনোৰমা ভুঞা ৰহা নগাঁৱৰ অৱসৰ প্ৰাপ্ত শিক্ষয়িত্ৰী৷ তেখেতে নিৰবিচ্ছিন্নভাবে সাহিত্য চৰ্চাত ব্ৰতী হৈ দহখনৰো অধিক শিশুগ্ৰন্থ ৰচনা কৰি প্ৰকাশ কৰিছে ৷আনহাতে স্মৃতি প্ৰকাশনৰ দ্বাৰা আয়োজিত নিভাৰাণী দাস স্মাৰক সাহিত্য প্ৰতিয়োগিতাৰ ফলাফল সমূহ ঘোষণা কৰা হৈছে৷শ্ৰেষ্ঠ গল্পকাৰ গুৱাহাটীৰ ৰীতু গগৈ .শ্ৰেষ্ঠ নাট্যকাৰ শোণিতপুৰ জিলাৰ স্তুতি বন্দনা বৰকাকতি আৰু শ্ৰেষ্ঠ কবি পাঠশালাৰ প্ৰদীপ কুমাৰ দাস ৷ উক্ত এই তিনিও গৰাকী শ্ৰেষ্ঠ বিজয়ি প্ৰতিযোগীকে অহা ১৯ জুলাইত অনন্ত ৰাম দাসৰ সপ্তদশ বাৰ্ষিক স্মৃতি দিৱসৰ শ্ৰদ্ধাঞ্জলি সভাত নিভাৰাণী দাস স্মাৰক সাহিত্য বঁটা প্ৰদান কৰা হ’ব বুলি প্ৰকাশনৰ প্ৰধান সম্পাদক কবিন দাসে জনাইছে ৷
জ্যেষ্ঠ সাংবাদিক নৱ ঠাকুৰীয়ালৈ বিশেষ সন্মান
জ্যেষ্ঠ সাংবাদিক নৱ ঠাকুৰীয়াক প্ৰেছ এমব্লেম কেম্পেইন নামৰ আন্তৰ্জাতিক সংস্থাৰ ভাৰতৰ প্ৰতিনিধি হিচাপে বাছনি কৰা হৈছে। উল্লেখযোগ্য যে চুইজাৰলেণ্ডৰ জেনেভাস্থিত সংস্থাটোৱে সমগ্ৰ পৃথিৱীতে ঘটি থকা সাংবাদিক হত্যা, সংবাদকৰ্মীৰ ওপৰত হোৱা নিগ্ৰহ আৰু শেহতীয়াকৈ ক’ভিডত মৃত্যু হোৱা সাংবাদিকৰ তালিকা প্ৰস্তুত কৰি আহিছে।
কেইবাখনো দেশৰ জ্যেষ্ঠ সাংবাদিকৰ উদ্যোগত ২০০৪ চনত জন্ম লাভ কৰা সংস্থাটোৰ সম্পাদক-প্ৰধান ব্লেইজ লেম্পেনে ঠাকুৰীয়াক এই দায়িত্ব অৰ্পনৰ বিষয়ে অৱগত কৰায়।লগতে সংস্থাটোৱে জাৰ্নেলিষ্ট ফ’ৰাম অসম সভাপতি ৰূপম বৰুৱাক ইয়াৰ সহযোগী সংগঠন হিচাপে মান্যতা প্ৰদান কৰিছে।
২০১০ চনৰ পৰা ৰাষ্ট্ৰসংঘত নিজৰ বক্তব্য উপস্থাপন কৰি অহা সংস্থাটোৱে ভাৰতবৰ্ষৰ বিভিন্ন প্ৰান্তৰ কৰ্মৰত সাংবাদিক আৰ্থিক অৱস্থা সম্পৰ্কটো অধ্যয়ন কৰিব।আজিৰ পৰা তিনিদশক পূৰ্বে অসম অভিযান্ত্ৰিক মহাবিদ্যালয়ৰ পৰা স্নাতক ডিগ্ৰী লাভ কৰা ঠাকুৰীয়াই অসমীয়া কাকতৰ জৰিয়তে সাংবাদিকতা জীৱন আৰম্ভ কৰে।
সম্প্ৰতি তেওঁ বহুকেইখন ৰাষ্ট্ৰীয় আৰু আন্ত:ৰাষ্ট্ৰীয় পৰ্যায়ৰ কাকতত সাংবাদিকতা আৰু সাংবাদিকৰ বিভিন্ন সমস্যা ওপৰত প্ৰবন্ধ লিখি আহিছে।
ভিউৱাছৰ মতামত