অসমৰ বৰ্ষাৰণ্য অঞ্চলক দিহিং পাটকাই ৰাষ্ট্ৰীয় উদ্যানৰ মৰ্যাদা দি মুখ্যমন্ত্ৰী সৰ্বানন্দ সোনোৱালে অভূতপূৰ্ব কাম কৰিলে

দিহিং-পাটকাই অভয়াৰণ্যৰ মাটিকালি পৰিবৰ্ধিত কৰি অসমৰ বর্ষাৰণ্য অঞ্চলক ৰাষ্ট্ৰীয় উদ্যান ৰূপে সংৰক্ষিত কৰাৰ বাবে অসমৰ মুখ্যমন্ত্ৰী সৰ্বানন্দ সোনোৱালক উত্তৰ পূৰ্ব ভাৰতৰ পৰিৱেশ সংৰক্ষণ কাৰী গোষ্ঠী নেচাৰ্চ বেকনে উষ্ম আদৰণি জনাইছে।অসমৰ ২৩১.৬৫ বৰ্গ কিলোমিটাৰ বৰ্ষাৰণ্যক ৰাষ্ট্ৰীয় উদ্যান ৰূপে ঘোষণা কৰাটো অসম তথা সমগ্ৰ ভাৰতৰ প্ৰকৃতি সংৰক্ষণৰ ইতিহাসত এটা যুগান্তকাৰী ঘটনা।

উল্লেখযোগ্য যে নেচাৰ্চ বেকনে সৰ্বপ্ৰথম এই আপুৰুগীয়া বৰ্ষাৰণ্যক ভাৰত আৰু বিশ্বৰ সন্মুখত তুলি ধৰে আৰু ১৯৯৪ চনৰ পৰা বৰ্ষাৰণ্য সংৰক্ষণৰ বাবে দাবী উত্থাপন কৰি জনমত গঠন কৰিবলৈ আৰম্ভ কৰে।অসমৰ পৰিৱেশ সংৰক্ষণৰ ইতিহাসত এই আন্দোলন অসম বৰ্ষাৰণ্য সংৰক্ষণ আন্দোলন নামে বিখ্যাত।

উল্লেখযোগ্য যে ২০০৪ চনত বৰ্ষাৰণ্যৰ সামান্য অঞ্চলক সামৰি অভয়াৰণ্য গঠন কৰা হয় যদিও বৰ্ষাৰণ্যৰ সৰ্বাধিক উৎকৃষ্ট অঞ্চল জয়পুৰ বনাঞ্চলক সংৰক্ষণ অঞ্চলৰ বাহিৰত থোৱা হয় আৰু জুয়পুৰ বর্ষাৰণ্যক ধ্বংস কৰি কয়লা আৰু খাৰুৱা তেল উত্তোলনৰ প্রচেষ্টা অব্যাহত ৰাখে।জয়পুৰ বৰ্ষাৰণ্যক ধ্বংস কৰি মুনাফা লাভ কৰা চেষ্টা কৰা ৰাজনৈতিক নেতা আৰু চৰকাৰী বিষয়া ধ্বংসাত্মক কাম কাজৰ কথা নেচাৰ্চ বেকনে দুই চাৰিদিনৰ ভিতৰতে ৰাইজৰ সন্মুখত উন্মোচিত কৰিব। কয়লা মাফিয়া আৰু কাঠৰ চোৰাং কাৰবাৰ লগতে কয়লা আৰু তেলৰ বাবে অসমৰ বৰ্ষাৰণ্যক বিনষ্ট কৰি দিব খোজা কু-চক্ৰটোক প্ৰতিহত কৰি মুখ্যমন্ত্ৰীয়ে জাতিৰ বাবে তথা প্ৰকৃতিৰ সংৰক্ষণৰ স্বাৰ্থত যি দৃষ্টান্ত স্থাপন কৰিলে তাৰ বাবে সমগ্ৰ অসমবাসী তেওঁ প্ৰতি কৃতজ্ঞ থাকিব।

মুখ্যমন্ত্ৰী আৰু ভাৰতীয় জনতা পাৰ্টীৰ সহযোগিতা অবিহনে পৃথিৱীৰ ভিতৰতে অন্যতম উৎকৃষ্ট বর্ষাৰণ্য জয়পুৰ বচোৱাটো প্ৰায় অসম্ভৱ আছিল। এই সামগ্ৰিক সংৰক্ষণৰ প্ৰক্ৰিয়া লগত যুক্ত বিজেপি সাংগঠনিক সাধাৰণ সম্পাদক ফণীন্দ্ৰ নাথ শৰ্মা ডাঙৰীয়া,অসম প্ৰকাশন পৰিষদৰ সচিব প্ৰমোদ কলিতা,বিজেপি মুখপাত্ৰ পবিত্ৰ মাৰ্ঘেৰিটা,আৰু অসমৰ পৰ্যটন উন্নয়ন নিগমৰ অধ্যক্ষ জয়ন্তমল্ল বৰুৱা নাম বিশেষ ভাৱে উল্লেখযোগ্য।অসমৰ বনমন্ত্ৰী পৰিমল শুক্লবৈদ্যৰ প্ৰতিও নেচাৰ্চ বেকনে আন্তৰিক জ্ঞাপন কৰিছে।অসম বন বিভাগৰ শীৰ্ষ বিষয়া প্ৰধান মুখ্য বন সংৰক্ষক অৰবিন্দ মাধৱ সিংৰ প্ৰতি নেচাৰ্চ বেকনে আন্তৰিক কৃতজ্ঞতা জ্ঞাপন কৰিছে।এইজন শীৰ্ষ বন বিষয়াই অসমৰ বৰ্ষাৰণ্যক বচাবলৈ প্ৰচেষ্টা অব্যাহত ৰাখিছে।

ডিব্ৰুগড় বন সংমণ্ডৰ প্ৰাধিকাৰী আৰু পূৰ্বৰ ডিগবৈ বন সংমণ্ডলৰ প্ৰাধিকাৰী ক্ৰমে প্ৰদীপ্ত বৰুৱা আৰু আশীকুৰ ৰহমান ডাঙৰীয়াক আন্তৰিক সহযোগিতা কথা নেচাৰ্চ বেকনে শ্ৰদ্ধাৰে সোৱৰিছে।বৰ্তমান ডিগবৈ বন সংমণ্ডৰ প্ৰাধিকাৰী টি এছ ৰঞ্জিত ৰাম সহযোগিতাও তেখেতে শ্ৰদ্ধাৰে সোৱৰিছে ।বৰ্ষাৰণ্য সংৰক্ষণ আন্দোলনৰ যুক্ত প্ৰত্যেক জন ব্যক্তিক নেচাৰ্চ বেকনে কৃতজ্ঞতা জ্ঞাপন কৰিছে।

উল্লেখযোগ্য যে বৰ্ষাৰণ্যৰ জয়পুৰ অঞ্চলক অভয়াৰণ্য বা ৰাষ্ট্ৰীয় উদ্যান ৰূপে সংৰক্ষিত কৰাটোৱে আছিল সকলোতকৈ ডাঙৰ প্ৰত্যাহ্বান।বৰ্ষাৰণ্যৰ সংৰক্ষণৰ বাবে মুখ্যমন্ত্ৰী অন্যতম উপদেষ্টা হৃষীকেশ গোস্বামীৰ আন্তৰিক সহযোগিতা আৰু অসমৰ অৰণ্যৰ প্ৰতি গভীৰ ভালপোৱা যি দৃষ্টান্ত তেওঁ দাঙি ধৰিলে তাৰ প্ৰতি নেচাৰ্চ বেকনে আন্তৰিক কৃতজ্ঞতা জ্ঞাপন কৰিছে।জয়পুৰ বৰ্ষাৰণ্যক সংৰক্ষণ অঞ্চলৰ তথা ৰাষ্ট্ৰীয় উদ্যানৰ অন্তৰ্ভুক্ত কৰিব বাবে কোল ইণ্ডিয়া লিমিটেড আৰু অয়েল ইণ্ডিয়া লিমিটেড ধনাত্মক প্ৰকৃতি সংৰক্ষণ নিষ্ঠা প্ৰদৰ্শন কৰিলে তাৰবাবে নেচাৰ্চ বেকনে অভিনন্দন জ্ঞাপন কৰিছে।

উল্লেখযোগ্য যে কেৱল জয়পুৰ অঞ্চলতে বৰ্তমান ২০৬ টা বনৰীয়া হাতীৰে বসবাস কৰি আছে।এই অঞ্চলৰ হলৌ বান্দৰ উৎকৃষ্ট বাসস্থান। এই অঞ্চলত বনৰীয়া মেকুৰী,বনৰীয়া চৰাই সমৃদ্ধ।সুখৰ কথা হ’ল বৰ্তমান এই অঞ্চল দিহিং পাটকাই ৰাষ্ট্ৰীয় উদ্যান ৰূপে সংৰক্ষিত।ইয়াত পোৱা কেইটামান উল্লেখযোগ্য বন্যপ্ৰাণী হ’ল হলৌ লাজুকী বান্দৰ,হাতী,গৌৰ, ঢেঁকীয়াপতিয়া বাঘ,নাহৰ ফুটুকী, গোধাৰফুটুকী,সোণালী মেকুৰী,মাছুৱা মেকুৰী,সৰু গোধা,শৰপহু,খুটিয়া পহু,মাটিৰ ভালুক,,মুকুট পিন্ধা চৰাই,মইনা চৰাই,পৰ্বতীয়া হেন,ঈগল,ধনেশ,দেওহাঁহ সোণগুই,অজগৰ ইত্যাদি।

নেচাৰ্চ বেকনে অনুসন্ধান কৰা তথ্য অনুসৰি দিহিং-পাটকাই ৰাষ্ট্ৰীয় উদ্যানত ৪৫ প্ৰজাতিৰ স্তন্যপায়ী বন্যপ্ৰাণী, ৩০০ বনৰীয়া চৰাই,২৫ প্ৰজাতিৰ উভচৰ আৰু সৰীসৃপ,২০৫ প্ৰজাতিৰ পোক-পতংগ,৩৫ প্ৰজাতিৰ বনৰীয়া মাছ,১৬০ প্ৰজাতিৰ গছ গছনিৰ নথিভুক্ত কৰা হৈছে। ভৱিষ্যতে যে ইয়াৰ সংখ্যা বৃদ্ধি পাব তাৰ কোনো সন্দেহ নাই। দিহিং-পাটকাই ৰাষ্ট্ৰীয় উদ্যান ঘোষণা সমগ্ৰ উজনি অসমত প্ৰকৃতিভিত্তিত পৰ্যটনৰ বিশাল সম্ভাৱনা দুৱাৰ মুকলি কৰিলে ।এতিয়া অতি সোনকালে ৰাষ্ট্ৰীয় উদ্যান খন আন্তঃগাঁথনি শক্তিশালীৰূপে গঢ়ি তুলিবলৈ চৰকাৰক অনুৰোধ জনাইছে।

অসমৰ বৰ্ষাৰণ্য সংৰক্ষণ আন্দোলনত প্ৰত্যক্ষভাৱে মুখ্যমন্ত্ৰীক অনুৰোধ জনোৱা ব্যক্তি সকলক কৃতজ্ঞতা জ্ঞাপন কৰিছে। সেই ব্যক্তি সকলৰ ভিতৰত উল্লেখযোগ্য ব্যক্তি সকল হ’ল বিশিষ্ট লেখক হোমেন বৰগোহাঞি,ঔপন্যাসিক অনুৰাধা শৰ্মা পূজাৰী,বিজ্ঞান লেখক ডঃ পৰমা মহন্ত,প্ৰাক্তন মুখ্য বনসংৰক্ষক ইন্দ্ৰজিৎ দত্ত, শিক্ষাবিদ ড° জগদিন্দ্ৰ ৰায়চৌধুৰী,ভাৰতী দত্ত, ভাৰতী কলিতা,অভিনেতা তপন দাস,বৰ্ণালী পূজাৰী,কপিল বৰা,অৰুণ নাথ,দেৱজিত মজুমদাৰ,চিত্ৰ পৰিচালক দিগন্ত মজুমদাৰ,দাদুল চলিহাৰ,ৰবিন বৰ, অল ইণ্ডিয়া ৰেডিঅ লোহিত ডেকা, সাহিত্যিক বিপুল দেউৰী, পৰমানন্দ ৰাজবংশী,বিশিষ্ট চিকিৎসক ডাঃ নাৰায়ণ উপাধ্যয়,ডাঃ শান্তনু লহকৰ, ডাঃ প্ৰণয় ফুকন,সাংবাদিক নৱ ঠাকুৰীয়া,সম্পাদক ৰূপম বৰুৱা, অজয় দত্ত, ৰন দুৱৰা,অজিত পাটোৱাৰী,বলেন দাস,প্ৰণৱ কুমাৰ বৰা,পঙ্কজগোবিন্দ মেধি,ভাস্কৰ বৰুৱা ইত্যাদি নাম বিশেষ ভাবে উল্লেখযোগ্য।

অসমৰ বৰ্ষাৰণ্য সংৰক্ষণ আন্দোলনত প্ৰথমৰ পৰা সহযোগিতা কৰি অহা অসমৰ অসংখ্য জনসাধাৰণৰ, সাংবাদিক, চিত্ৰশিল্পী,শিক্ষাবিদ,ইলেকট্ৰনিক মেডিয়া সাংবাদিক আদি সকলোকে নেচাৰ্চ বেকনে আন্তৰিক কৃতজ্ঞতা জ্ঞাপন কৰিছে।আজি প্ৰায় ২৫ বছৰ পিছত বেকনৰ অন্যতম লক্ষ্য পূৰ্ণ হ’ল। তাৰ বাবে মুখ্যমন্ত্ৰী সৰ্বানন্দ সোণোৱাল আৰু চৰকাৰ লগতে প্ৰত্যেকজন শুভাকাংক্ষী আৰু সমৰ্থক সকলৰ প্ৰতি ধন্যবাদ জ্ঞাপন কৰে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

পবিত্ৰ ৰাম নৱমীৰ শুভেচ্ছা জ্ঞাপন কৰিলে ৰাষ্ট্ৰপতিয়ে

আজি ৰাম নৱমী।এই ৰাম নৱমী হিন্দু ধর্মৰ এক পবিত্ৰ উৎসৱ।এই উৎসৱ ভগৱান ৰামৰ জন্মৰ লগত জৰিত।ৰাম নৱমী উপলক্ষে বিভিন্ন ঠাইত পূজা অৰ্চনা কৰা হৈছে।এই ৰাম নৱমী শুক্লপক্ষৰ নৱমী তিথিত পালন কৰা হয়।

ৰাম নৱমী উপলক্ষে দেশৰ প্ৰধানমন্ত্ৰী নৰেন্দ্ৰ মোদীয়ে দেশবাসীক শুভেচ্ছা জনায় কয় যে ভগৱান ৰামৰ আৰ্শীবাদ দেশবাসীৰ প্ৰতি সদায় বৰ্তি থাকক।আনহাতে এই সম্পৰ্কত ৰাষ্ট্ৰপতি ৰামনাথ কবীন্দ্ৰে এনেদৰে কয় ৰামৰ ধৰ্মই আমাক সদায় অনুপ্ৰাণিত কৰি আহিছে।ন্যায় আৰু মানৱীয় গুণৰ বাবে ৰামৰ আদৰ্শই যুগ যুগ ধৰি সকলোকে অনুপ্ৰেৰণা যোগাব।

কেন্দ্ৰীয় বাঁহ গোঁসাই উৎসৱৰ সফল সামৰণি

সদৌ অসম শৰণীয়া কছাৰী ছাত্ৰ সন্থাৰ উদ্যোগত আৰু দৰঙাজুলি আঞ্চলিক শৰণীয়া-কছাৰী ছাত্ৰ সন্থাৰ সহযোগত বাক্সা জিলাৰ তামুলপুৰ মহকুমাৰ কুমাৰীকাটা মিঠাৰাম দাস সমন্বয় ক্ষেত্ৰত সোমবাৰৰ পৰা দুদিনীয়া বৰ্ণাঢ্য কাৰ্যসূচীৰে অনুষ্ঠিত হোৱা শৰণীয়া কছাৰী জনগোষ্ঠীৰ কেন্দ্ৰীয় বাঁহ গোঁসাই উৎসৱৰ মঙলবাৰে সফল সামৰণি পৰে।

মঙলবাৰে পুৱাৰে পৰা নামনি অসমৰ জিলা কেইখনৰ পৰা শৰণীয়া-কছাৰী জনগোষ্ঠীৰ লোকসকলে পৰম্পৰাগত সাজ পৰিধান কৰি একোডাল বাঁহ গোঁসাই লৈ ঢোল ,তাল,শংখ, দবা আদিৰ শব্দৰে মুখৰিত কৰি কেন্দ্ৰীয় বাঁহ গোসাইস্থলীত উপস্থিত হয়।বাক্সা জিলাৰ তামুলপুৰ মহকুমাৰ কুমাৰীকাটাৰ শৰণীয়া কছাৰী জনগোষ্ঠীৰ কেন্দ্ৰীয় বাঁহ গোঁসাই উৎসৱস্থলী মিঠাৰাম দাস সমন্বয় ক্ষেত্ৰ এক তীৰ্থ ক্ষেত্ৰলৈ পৰিণত হয়।

বিভিন্ন প্ৰান্তৰ পৰা শতাধিক বাঁহ গোঁসাই সজাই-পৰাই এক মাঙ্গলিক পৰিৱেশেৰে উৎসৱস্থলীত নিৰ্মাণ কৰা গোঁসাই ঘৰত স্থাপন কৰে। ইয়াৰ আগতে বাঁহ গোঁসাই লৈ উৎসৱস্থলীত উপস্থিত হোৱা দল সমূহে নিজৰ নিজৰ দলৰ বাঁহ গোঁসাই লৈ কুমাৰীকাটা চহৰৰ মাজেৰে পাঁচ কিলোমিটাৰ জোৰা পথ সমদল কৰি পানবাৰী-বাটাবাৰী হৈ পুনৰ উৎসৱস্থলীত উপস্থিত হয়।
সম্পূৰ্ণ কোভিড প্ৰট’কল মানি শৰণীয়া কছাৰী জনগোষ্ঠীৰ কেন্দ্ৰীয় বাঁহ গোঁসাই উৎসৱ পালন কৰা হয় ।

গ্ৰাম্যাঞ্চলত সেৱা আগবঢ়াব বেটাৰ লাইফ মেডিকেল চেণ্টাৰে

পূব আৰু উত্তৰ-পূব ভাৰতৰ কেইখনমান শীৰ্ষ চিকিৎসা প্ৰতিষ্ঠানৰ সৈতে কাম কৰি থকা এগৰাকী চিকিৎসকে চাকৰি এৰি অসমৰ ওদালগুৰি জিলাৰ দুৰৱৰ্তী স্থানত চিকিৎসা সুবিধা আৰম্ভ কৰিছে।সমাজৰ সুবিধা পৰা বঞ্চিত লোক সকলক অন্তিম মাইল স্বাস্থ্য সেৱা প্ৰদান লক্ষ্যৰে গাইনোকোলজিষ্ট ডাঃ সায়ন্তনী ভট্টাচাৰ্যই অসমৰ ওদালগুৰি জিলাৰ পানেৰীত বেটাৰ লাইফ মেডিকেল চেণ্টাৰ স্থাপন কৰিছে। আজি গুৱাহাটীৰ প্ৰেছ ক্লাৱত সংবাদ মাধ্যমৰ লোক সকলক সম্বোধন কৰি ডাঃ ভট্টাচাৰ্যই কয় যে পানেৰীৰ কেন্দ্ৰটো তেওঁৰ ষ্টাৰ্টআপ বেটাৰ হেলথকেয়াৰ এটা দ্যা লাষ্ট মাইলৰ ফ্লেপশ্বিপ ইউনিট।

চলিত বৰ্ষত ১৪ ফেব্ৰুৱাৰীত নামনি অসমৰ অন্যতম বৃহৎ চাহ বাগিচাৰ কৰিডৰ,আৰু চাহ জনজাতি আৰু অন্যান্য সম্প্ৰদায়ৰ এক বৃহৎ জনসংখ্যাই বাস কৰা পানেৰীত বেটাৰ লাইফ মেডিকেল চেণ্টাৰ উদ্বোধন কৰিছোঁ।বেটাৰ লাইফ মেডিকেল চেণ্টাৰত এটা মাল্টি স্পেচিয়েলিটি ফেমিলি ক্লিনিক ডায়গনষ্টিক চেণ্টাৰ আৰু এখন ফাৰ্মাচী আছে।

উল্লেখযোগ্য যে কেন্দ্ৰটোত আলট্ৰাচাউণ্ড,ইচিজি, স্বাস্থ্য পৰীক্ষা,ফাৰ্মাচী,নেবুলাইজেচন বেজী সেৱা অক্সিজেন, চিকিৎসা কোঠা সকলো উপলব্ধ।ইয়াৰ উপৰিও ৰেডিঅ’লজিষ্ট,চকু বিশেজ্ঞ,ফিজিঅ থেৰাপিষ্ঠ,ডায়েটিশিয়ান,শিশু বিশেষজ্ঞৰ সেৱা উপলব্ধ।

ৰাজ্যত বলবৎ হৈছে ক’ভিড সম্পৰ্কীয় নতুন নিৰ্দেশনা

আজি অনুষ্ঠিত হয় ক`ভিডৰ নিদেৰ্শনা সম্পৰ্কীয় মুখ্য সচিব আৰু আৰক্ষী সঞ্চালক প্ৰধানৰ সংবাদমেল।সংবাদমেলৰ সিদ্ধান্ত সমূহ হ`ল এনেধৰণৰ -জিলা প্ৰশাসনৰ অনুমতি লৈহে অনুষ্ঠান অনুষ্ঠিত কৰিব পাৰিব ।বন্ধ কোঠাৰ অনুষ্ঠানত ৫০% লোকহে উপস্থিত থাকিব পাৰিব।বিবাহ আদিত ১০০তকৈ অধিক উপস্থিত থাকিব নোৱাৰিব।মৃতকৰ শেষকৃত্যত ২০ জনতকৈ অধিক উপস্থিত থাকিব নোৱাৰিব।আনহাতে ধৰ্মীৰ অনুষ্ঠানত প্ৰতি ঘণ্টাত ২০ গৰাকীহে উপস্থিত থাকিব পাৰিব।বিখ্যাত ধৰ্মীয় অনুষ্ঠানৰ ক্ষেত্ৰত ৫০ গৰাকী লোকক অনুমতি দিয়া হৈছে।ৱৰ্ক ফ্ৰম হোম আৰু ভাৰ্চুৱেল পদ্ধতিৰ কাম কাজত প্ৰাধান্য।চৰকাৰী-বেচৰকাৰী প্ৰতিষ্ঠানত ৫০% কৰ্মচাৰীয়ে কাম সম্পাদনাৰ নিৰ্দেশ।প্ৰতিষ্ঠানৰ বিষয়াই নিজৰ কাৰ্য্যালয়ত অনুষ্ঠিত কৰিব নোৱাৰিব সভা।গৰ্ভৱতী মহিলাক ঘৰৰ পৰাই কাম কৰা অনুমতি প্ৰদান।৫ বছৰ তলৰ শিশুৰ মাতৃক ঘৰৰ পৰা কাম কৰা অনুমতি।কৰ্মক্ষেত্ৰত সম্পূৰ্ণৰূপে সামাজিক দূৰত্ব মানি চলিব লাগিব ।প্ৰৱেশ-প্ৰস্থানস্থলীত থাৰ্মেল স্কেনিং হেণ্ড ছেনিটাইজাৰ থাকিব লাগিব ।আইন অমান্য কৰিলে কঠোৰ হ`ব প্ৰশাসন।ইয়াৰ উপৰিও পুলিচক মাস্ক যোগান ধৰিবলৈও নিৰ্দেশ জাৰি কৰিছে।আৰক্ষী সাংবাদিক শিক্ষকক প্ৰধান শাৰীৰ যোদ্ধা বিবেচনা কৰিবলৈ কেন্দ্ৰীয় চৰকাৰক অনুৰোধ জনাইছে ৰাজ্য চৰকাৰে।

পুনৰ সজাই তোলা হৈছে অস্থায়ী ক`ভিড চেন্টাৰ সমূহ

ৰাজ্যখনত ক’ৰনা সংক্ৰমণৰ ঘটনা ব্যাপক হাৰত বৃদ্ধি পোৱাৰ বিষয়টোৱে সকলোকে উদ্বিগ্ন কৰি তুলিছে। দৈনিক সংক্ৰমণৰ হাৰ প্ৰতিদিনে বৃদ্ধি পাই আহিছে।ইয়াৰ মাজতে ৰাজ্যৰ স্বাস্থ্য বিভাগে পুনৰ জালুকবাৰী আৰু সৰুসজাইৰ অস্থায়ী ক’ভিড কেয়াৰ চেন্টাৰ সমূহ সাজু কৰি তুলিছে।

জালুকবাৰীৰ চৰকাৰী আয়ুৰ্বেদিক চিকিৎসা মহাবিদ্যালয় ক’ভিড ৰোগীৰ বাবে পুনৰ সাজু কৰি তোলা হৈছে।জালুকবাৰীৰ চৰকাৰী আয়ুৰ্বেদিক চিকিৎসা মহাবিদ্যালয়ৰ অধ্যক্ষ ডাঃ ৰমাকান্ত শৰ্মাই জানিবলৈ দিয়া মতে মহাবিদ্যালয়খনত ১০০ খন বিছনা ক’ভিড ৰোগীৰ বাবে সাজু কৰি তোলা হৈছে।

ইয়াৰ উপৰিও, ইয়াত ১৪ টা আই চি ইউ কক্ষ আৰু ৩৩ খন অক্সিজেনযুক্ত বিছনাৰ ব্যৱস্থা কৰা হৈছে।আনহাতে ৰাজ্যৰ স্বাস্থ্য বিভাগে মহানগৰীৰ সৰুসজাই ষ্টেডিয়ামৰ অস্থায়ী ক’ভিড হাস্পাতালখন পুনৰ সাজু কৰি তুলিছে।সৰুসজাইৰ কৰ্মবীৰ নবীন চন্দ্ৰ বৰদলৈ ষ্টেডিয়ামত ৪০০ খন বিছনাযুক্ত অস্থায়ী ক’ভিড কেয়াৰ চেন্টাৰটো সাজু কৰি তুলিবলৈ ক্ষিপ্ৰতাৰে কাম কৰি থকা হৈছে।

ৰাজ্যৰ বন বিভাগত সালসলনি ঘটিছে

ৰাজ্যৰ বন বিভাগত সালসলনি ঘটিছে।শিলচৰৰ মুখ্য বন সংৰক্ষক সুমন মহাপাত্ৰক অতিৰিক্ত প্ৰধান মুখ্য বন সংৰক্ষক ৰূপে বদলি কৰিছে।সামাজিক বদলিকৰণৰ মুখ্য বন সংৰক্ষক ৰেড্ডিছ মিশ্ৰক অতিৰিক্ত প্ৰধান মুখ্য বন সংৰক্ষক পদলৈ বদলি কৰিছে।মুখ্য বন সংৰক্ষক (কেম্পা) সৈত্যেন্দ্ৰ সিঙক অতিৰিক্ত প্ৰধান বন সংৰক্ষক পদলৈ বদলি কৰাৰ লগতে উজনি অসম চক্ৰৰ বন সংৰক্ষক এন আনন্দক মুখ্য বন সংৰক্ষক ৰূপে বদলি কৰিছে।দেৰাডুনৰ চিএএছএফঅএছৰ ডেপুটেশ্যনত থকা ড০ শ্ৰীৰমেশ্বৰক মুখ্য বন সংৰক্ষক পদলৈ পদোন্নতি কৰিছে।

আনহাতে উত্তৰ অসম চক্ৰৰ বন সংৰক্ষক যতীন্দ্ৰ শৰ্মাক মুখ্য বন সংৰক্ষক পদলৈ পদোন্নতি দিয়া হৈছে।বন সংৰক্ষক ছলমান উদ্দিন চৌধুৰীক মুখ্য বন সংৰক্ষক ৰূপে বদলি কৰিছে।নগাঁও সংমণ্ডলৰ ডিএফঅ’ ৰাজেন চৌধুৰীক বন সংৰক্ষক পদলৈ পদোন্নতি কৰা হৈছে।
কোকৰাঝাৰৰ অতিৰিক্ত প্ৰধান মুখ্য সংৰক্ষক অনিন্দ স্বৰ্গীয়াৰীক প্ৰশাসন আৰু ভিজিলেন্সৰ অতিৰিক্ত প্রধান মুখ্য বন সংৰক্ষক পদলৈ বদলি কৰা হৈছে।এপিচিচিএফ সন্দীপ কুমাৰক নামনি অসম সংমণ্ডলৰ অতিৰিক্ত প্ৰধান মুখ্য বন সংৰক্ষক পদলৈ বদলি কৰাৰ লগতে চিচিএফ অনুৰাগ সিঙক বিটিআৰৰ চিচিএফ হিচাপে বদলি কৰা হৈছে।

এপিচিচিএফ এছ পি বৈশিষ্টক সামাজিক বদলিকৰণৰ অতিৰিক্ত পিচিচিএফ পদলৈ আৰু বন সংৰক্ষক বংকিম শৰ্মাক তেজপুৰৰ বন সংৰক্ষক পদলৈ বদলি কৰা হৈছে।সীমান্ত আৰু সুৰক্ষা বন সংৰক্ষক পদত থকা মজিদুল হুছেইনক বন্যপ্ৰাণী বন সংৰক্ষক ৰূপে বদলি কৰাৰ লগতে ডিচিএফ ভি বসন্থনক নগাঁও সংমণ্ডলৰ ডিএফঅ’ হিচাপে নিয়ুক্তি দিয়া হৈছে।