অসমৰ বৰ্ষাৰণ্য অঞ্চলক দিহিং পাটকাই ৰাষ্ট্ৰীয় উদ্যানৰ মৰ্যাদা দি মুখ্যমন্ত্ৰী সৰ্বানন্দ সোনোৱালে অভূতপূৰ্ব কাম কৰিলে

দিহিং-পাটকাই অভয়াৰণ্যৰ মাটিকালি পৰিবৰ্ধিত কৰি অসমৰ বর্ষাৰণ্য অঞ্চলক ৰাষ্ট্ৰীয় উদ্যান ৰূপে সংৰক্ষিত কৰাৰ বাবে অসমৰ মুখ্যমন্ত্ৰী সৰ্বানন্দ সোনোৱালক উত্তৰ পূৰ্ব ভাৰতৰ পৰিৱেশ সংৰক্ষণ কাৰী গোষ্ঠী নেচাৰ্চ বেকনে উষ্ম আদৰণি জনাইছে।অসমৰ ২৩১.৬৫ বৰ্গ কিলোমিটাৰ বৰ্ষাৰণ্যক ৰাষ্ট্ৰীয় উদ্যান ৰূপে ঘোষণা কৰাটো অসম তথা সমগ্ৰ ভাৰতৰ প্ৰকৃতি সংৰক্ষণৰ ইতিহাসত এটা যুগান্তকাৰী ঘটনা।

উল্লেখযোগ্য যে নেচাৰ্চ বেকনে সৰ্বপ্ৰথম এই আপুৰুগীয়া বৰ্ষাৰণ্যক ভাৰত আৰু বিশ্বৰ সন্মুখত তুলি ধৰে আৰু ১৯৯৪ চনৰ পৰা বৰ্ষাৰণ্য সংৰক্ষণৰ বাবে দাবী উত্থাপন কৰি জনমত গঠন কৰিবলৈ আৰম্ভ কৰে।অসমৰ পৰিৱেশ সংৰক্ষণৰ ইতিহাসত এই আন্দোলন অসম বৰ্ষাৰণ্য সংৰক্ষণ আন্দোলন নামে বিখ্যাত।

উল্লেখযোগ্য যে ২০০৪ চনত বৰ্ষাৰণ্যৰ সামান্য অঞ্চলক সামৰি অভয়াৰণ্য গঠন কৰা হয় যদিও বৰ্ষাৰণ্যৰ সৰ্বাধিক উৎকৃষ্ট অঞ্চল জয়পুৰ বনাঞ্চলক সংৰক্ষণ অঞ্চলৰ বাহিৰত থোৱা হয় আৰু জুয়পুৰ বর্ষাৰণ্যক ধ্বংস কৰি কয়লা আৰু খাৰুৱা তেল উত্তোলনৰ প্রচেষ্টা অব্যাহত ৰাখে।জয়পুৰ বৰ্ষাৰণ্যক ধ্বংস কৰি মুনাফা লাভ কৰা চেষ্টা কৰা ৰাজনৈতিক নেতা আৰু চৰকাৰী বিষয়া ধ্বংসাত্মক কাম কাজৰ কথা নেচাৰ্চ বেকনে দুই চাৰিদিনৰ ভিতৰতে ৰাইজৰ সন্মুখত উন্মোচিত কৰিব। কয়লা মাফিয়া আৰু কাঠৰ চোৰাং কাৰবাৰ লগতে কয়লা আৰু তেলৰ বাবে অসমৰ বৰ্ষাৰণ্যক বিনষ্ট কৰি দিব খোজা কু-চক্ৰটোক প্ৰতিহত কৰি মুখ্যমন্ত্ৰীয়ে জাতিৰ বাবে তথা প্ৰকৃতিৰ সংৰক্ষণৰ স্বাৰ্থত যি দৃষ্টান্ত স্থাপন কৰিলে তাৰ বাবে সমগ্ৰ অসমবাসী তেওঁ প্ৰতি কৃতজ্ঞ থাকিব।

মুখ্যমন্ত্ৰী আৰু ভাৰতীয় জনতা পাৰ্টীৰ সহযোগিতা অবিহনে পৃথিৱীৰ ভিতৰতে অন্যতম উৎকৃষ্ট বর্ষাৰণ্য জয়পুৰ বচোৱাটো প্ৰায় অসম্ভৱ আছিল। এই সামগ্ৰিক সংৰক্ষণৰ প্ৰক্ৰিয়া লগত যুক্ত বিজেপি সাংগঠনিক সাধাৰণ সম্পাদক ফণীন্দ্ৰ নাথ শৰ্মা ডাঙৰীয়া,অসম প্ৰকাশন পৰিষদৰ সচিব প্ৰমোদ কলিতা,বিজেপি মুখপাত্ৰ পবিত্ৰ মাৰ্ঘেৰিটা,আৰু অসমৰ পৰ্যটন উন্নয়ন নিগমৰ অধ্যক্ষ জয়ন্তমল্ল বৰুৱা নাম বিশেষ ভাৱে উল্লেখযোগ্য।অসমৰ বনমন্ত্ৰী পৰিমল শুক্লবৈদ্যৰ প্ৰতিও নেচাৰ্চ বেকনে আন্তৰিক জ্ঞাপন কৰিছে।অসম বন বিভাগৰ শীৰ্ষ বিষয়া প্ৰধান মুখ্য বন সংৰক্ষক অৰবিন্দ মাধৱ সিংৰ প্ৰতি নেচাৰ্চ বেকনে আন্তৰিক কৃতজ্ঞতা জ্ঞাপন কৰিছে।এইজন শীৰ্ষ বন বিষয়াই অসমৰ বৰ্ষাৰণ্যক বচাবলৈ প্ৰচেষ্টা অব্যাহত ৰাখিছে।

ডিব্ৰুগড় বন সংমণ্ডৰ প্ৰাধিকাৰী আৰু পূৰ্বৰ ডিগবৈ বন সংমণ্ডলৰ প্ৰাধিকাৰী ক্ৰমে প্ৰদীপ্ত বৰুৱা আৰু আশীকুৰ ৰহমান ডাঙৰীয়াক আন্তৰিক সহযোগিতা কথা নেচাৰ্চ বেকনে শ্ৰদ্ধাৰে সোৱৰিছে।বৰ্তমান ডিগবৈ বন সংমণ্ডৰ প্ৰাধিকাৰী টি এছ ৰঞ্জিত ৰাম সহযোগিতাও তেখেতে শ্ৰদ্ধাৰে সোৱৰিছে ।বৰ্ষাৰণ্য সংৰক্ষণ আন্দোলনৰ যুক্ত প্ৰত্যেক জন ব্যক্তিক নেচাৰ্চ বেকনে কৃতজ্ঞতা জ্ঞাপন কৰিছে।

উল্লেখযোগ্য যে বৰ্ষাৰণ্যৰ জয়পুৰ অঞ্চলক অভয়াৰণ্য বা ৰাষ্ট্ৰীয় উদ্যান ৰূপে সংৰক্ষিত কৰাটোৱে আছিল সকলোতকৈ ডাঙৰ প্ৰত্যাহ্বান।বৰ্ষাৰণ্যৰ সংৰক্ষণৰ বাবে মুখ্যমন্ত্ৰী অন্যতম উপদেষ্টা হৃষীকেশ গোস্বামীৰ আন্তৰিক সহযোগিতা আৰু অসমৰ অৰণ্যৰ প্ৰতি গভীৰ ভালপোৱা যি দৃষ্টান্ত তেওঁ দাঙি ধৰিলে তাৰ প্ৰতি নেচাৰ্চ বেকনে আন্তৰিক কৃতজ্ঞতা জ্ঞাপন কৰিছে।জয়পুৰ বৰ্ষাৰণ্যক সংৰক্ষণ অঞ্চলৰ তথা ৰাষ্ট্ৰীয় উদ্যানৰ অন্তৰ্ভুক্ত কৰিব বাবে কোল ইণ্ডিয়া লিমিটেড আৰু অয়েল ইণ্ডিয়া লিমিটেড ধনাত্মক প্ৰকৃতি সংৰক্ষণ নিষ্ঠা প্ৰদৰ্শন কৰিলে তাৰবাবে নেচাৰ্চ বেকনে অভিনন্দন জ্ঞাপন কৰিছে।

উল্লেখযোগ্য যে কেৱল জয়পুৰ অঞ্চলতে বৰ্তমান ২০৬ টা বনৰীয়া হাতীৰে বসবাস কৰি আছে।এই অঞ্চলৰ হলৌ বান্দৰ উৎকৃষ্ট বাসস্থান। এই অঞ্চলত বনৰীয়া মেকুৰী,বনৰীয়া চৰাই সমৃদ্ধ।সুখৰ কথা হ’ল বৰ্তমান এই অঞ্চল দিহিং পাটকাই ৰাষ্ট্ৰীয় উদ্যান ৰূপে সংৰক্ষিত।ইয়াত পোৱা কেইটামান উল্লেখযোগ্য বন্যপ্ৰাণী হ’ল হলৌ লাজুকী বান্দৰ,হাতী,গৌৰ, ঢেঁকীয়াপতিয়া বাঘ,নাহৰ ফুটুকী, গোধাৰফুটুকী,সোণালী মেকুৰী,মাছুৱা মেকুৰী,সৰু গোধা,শৰপহু,খুটিয়া পহু,মাটিৰ ভালুক,,মুকুট পিন্ধা চৰাই,মইনা চৰাই,পৰ্বতীয়া হেন,ঈগল,ধনেশ,দেওহাঁহ সোণগুই,অজগৰ ইত্যাদি।

নেচাৰ্চ বেকনে অনুসন্ধান কৰা তথ্য অনুসৰি দিহিং-পাটকাই ৰাষ্ট্ৰীয় উদ্যানত ৪৫ প্ৰজাতিৰ স্তন্যপায়ী বন্যপ্ৰাণী, ৩০০ বনৰীয়া চৰাই,২৫ প্ৰজাতিৰ উভচৰ আৰু সৰীসৃপ,২০৫ প্ৰজাতিৰ পোক-পতংগ,৩৫ প্ৰজাতিৰ বনৰীয়া মাছ,১৬০ প্ৰজাতিৰ গছ গছনিৰ নথিভুক্ত কৰা হৈছে। ভৱিষ্যতে যে ইয়াৰ সংখ্যা বৃদ্ধি পাব তাৰ কোনো সন্দেহ নাই। দিহিং-পাটকাই ৰাষ্ট্ৰীয় উদ্যান ঘোষণা সমগ্ৰ উজনি অসমত প্ৰকৃতিভিত্তিত পৰ্যটনৰ বিশাল সম্ভাৱনা দুৱাৰ মুকলি কৰিলে ।এতিয়া অতি সোনকালে ৰাষ্ট্ৰীয় উদ্যান খন আন্তঃগাঁথনি শক্তিশালীৰূপে গঢ়ি তুলিবলৈ চৰকাৰক অনুৰোধ জনাইছে।

অসমৰ বৰ্ষাৰণ্য সংৰক্ষণ আন্দোলনত প্ৰত্যক্ষভাৱে মুখ্যমন্ত্ৰীক অনুৰোধ জনোৱা ব্যক্তি সকলক কৃতজ্ঞতা জ্ঞাপন কৰিছে। সেই ব্যক্তি সকলৰ ভিতৰত উল্লেখযোগ্য ব্যক্তি সকল হ’ল বিশিষ্ট লেখক হোমেন বৰগোহাঞি,ঔপন্যাসিক অনুৰাধা শৰ্মা পূজাৰী,বিজ্ঞান লেখক ডঃ পৰমা মহন্ত,প্ৰাক্তন মুখ্য বনসংৰক্ষক ইন্দ্ৰজিৎ দত্ত, শিক্ষাবিদ ড° জগদিন্দ্ৰ ৰায়চৌধুৰী,ভাৰতী দত্ত, ভাৰতী কলিতা,অভিনেতা তপন দাস,বৰ্ণালী পূজাৰী,কপিল বৰা,অৰুণ নাথ,দেৱজিত মজুমদাৰ,চিত্ৰ পৰিচালক দিগন্ত মজুমদাৰ,দাদুল চলিহাৰ,ৰবিন বৰ, অল ইণ্ডিয়া ৰেডিঅ লোহিত ডেকা, সাহিত্যিক বিপুল দেউৰী, পৰমানন্দ ৰাজবংশী,বিশিষ্ট চিকিৎসক ডাঃ নাৰায়ণ উপাধ্যয়,ডাঃ শান্তনু লহকৰ, ডাঃ প্ৰণয় ফুকন,সাংবাদিক নৱ ঠাকুৰীয়া,সম্পাদক ৰূপম বৰুৱা, অজয় দত্ত, ৰন দুৱৰা,অজিত পাটোৱাৰী,বলেন দাস,প্ৰণৱ কুমাৰ বৰা,পঙ্কজগোবিন্দ মেধি,ভাস্কৰ বৰুৱা ইত্যাদি নাম বিশেষ ভাবে উল্লেখযোগ্য।

অসমৰ বৰ্ষাৰণ্য সংৰক্ষণ আন্দোলনত প্ৰথমৰ পৰা সহযোগিতা কৰি অহা অসমৰ অসংখ্য জনসাধাৰণৰ, সাংবাদিক, চিত্ৰশিল্পী,শিক্ষাবিদ,ইলেকট্ৰনিক মেডিয়া সাংবাদিক আদি সকলোকে নেচাৰ্চ বেকনে আন্তৰিক কৃতজ্ঞতা জ্ঞাপন কৰিছে।আজি প্ৰায় ২৫ বছৰ পিছত বেকনৰ অন্যতম লক্ষ্য পূৰ্ণ হ’ল। তাৰ বাবে মুখ্যমন্ত্ৰী সৰ্বানন্দ সোণোৱাল আৰু চৰকাৰ লগতে প্ৰত্যেকজন শুভাকাংক্ষী আৰু সমৰ্থক সকলৰ প্ৰতি ধন্যবাদ জ্ঞাপন কৰে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

কাঁহিকুছিত শ্ৰীমন্ত শংকৰদেৱ কৃষ্টি বিকাশ সমিতিৰ উদ্যোগত তিনিদিনীয়াকৈ গুৰুজয়ন্তী উৎসৱ উদযাপন

গুৱাহাটী পশ্চিম প্ৰান্তৰ আজাৰা কাঁহিকুছিস্থিত শ্ৰীমন্ত শংকৰদেৱ কৃষ্টি বিকাশ সমিতিৰ উদ্যোগত সমিতিৰ নামঘৰ চৌহদত ১৪ অক্টোবৰৰ পৰা তিনিদিনীয়া কাৰ্যসূচীৰে অনুষ্ঠিত মহাপুৰুষ শ্ৰীমন্ত শংকৰদেৱৰ ৫৭৩ সংখ্যক গুৰুজয়ন্তী উৎসৱৰ আজি সামৰণি পৰে । ১৪ অক্টোবৰত দিনৰ ১০ বজাত সামূহিক চাফাই অভিযানৰে উৎসৱৰ কাৰ্যসূচীৰ শুভাৰম্ভ কৰা হয় । সন্ধিয়া বন্তি প্ৰজ্বলন কৰে শ্ৰীমন্ত শংকৰদেৱ কৃষ্টি বিকাশ সমিতিৰ সভাপতি ধীৰেন্দ্ৰ নাথ চৌধুৰীয়ে । তাৰ পাছত নাম প্ৰসংগ আৰু ভাগৱত পাঠ অনুষ্ঠিত হয় । ১৫ অক্টোবৰ দ্বিতীয় দিনা পুৱা উষা কীৰ্ত্তনৰ পাছত ধৰ্মধ্বজা উত্তোলন কৰে সমিতিৰ মুখ্য উপদেষ্টা সুচেন্দ্ৰ নাথ ডেকাই । তাৰ পাছত ভাগৱত লৈ ভ্ৰমণ নাম প্ৰসংগ , ভাগৱত পাঠ , প্ৰসাদ বিতৰণ , অন্ন গ্ৰহণ , সন্ধিয়া বন্তি প্ৰজ্বলন আৰু নিশা সমিতিৰ আইসকলে নাম পৰিবেশন কৰে । আনহাতে আজি তৃতীয় তথা শেষৰ দিনা উৎসৱৰ লগত সংগতি ৰাখি দিনৰ ১১ বজাৰ পৰা এখন আলোচনা চক্ৰ অনুষ্ঠিত হয় । সমিতিৰ সাংস্কৃতিক বিভাগৰ মুৰব্বী আৰু ভাৰতীয় বিমান বন্দৰ প্ৰাধিকৰণৰ উচ্চপদস্থ বিষয়া জগদীশ বৈশ্যই আঁত ধৰা আলোচনা চক্ৰত সভাপতিত্ব কৰে সমিতিৰ সভাপতি ধীৰেন্দ্ৰ নাথ চৌধুৰীয়ে । আলোচনা চক্ৰত আলোচক হিচাপে লোকপ্ৰিয় গোপীনাথ বৰদলৈ আন্তৰ্জাতিক বিমানবন্দৰৰ আদানী গ্রুপৰ মুখ্য বিমানকোঠ বিষয়া উৎপল বৰুৱা ,অসমৰ মুখ্যমন্ত্ৰী কাৰ্যালয়ৰ জ্যেষ্ঠ জনসম্পৰ্কৰক্ষী বিষয়া পুলিন ডেকা আৰু সমিতিৰ মুখ্য উপদেষ্টা সুচেন্দ্ৰ নাথ ডেকাই ভাগ লয় । আনহাতে তিনিওজন আলোচকে ভাষণত অসমীয়া জাতিৰ জনক স্বৰূপ মহাপুৰুষ শ্ৰীমন্ত শংকৰদেৱক বাদ দি অসমীয়া সমাজ , সাংস্কৃতিক জীৱনৰ কথা কল্পনাই কৰিব নোৱাৰি বুলি ব্যক্ত কৰে আৰু অসমীয়া জাতি গঠন প্ৰক্ৰিয়াত মহাপুৰুষজনাৰ অৱদানৰ কথা ইতিহাসত সদায় জিলিকি থাকিব বুলি কয় । আৰম্ভণিতে এটি বৰগীত পৰিবেশন কৰে শিল্পী ত্ৰিনামী গোস্বামীয়ে।

কাতি বিহু উপলক্ষে অসমবাসীলৈ মুখ্যমন্ত্ৰীৰ শুভেচ্ছা

কাতি বিহু উপলক্ষে মুখ্যমন্ত্ৰী ড° হিমন্ত বিশ্ব শৰ্মাই অসমবাসী বিশেষকৈ ৰাজ্য খনৰ কৃষক সমাজক আন্তৰিক শুভেচ্ছা জ্ঞাপন কৰিছে।আজি এক বিবৃতি যোগে মুখ্যমন্ত্ৰীয়ে কয় যে কাতি বিহুৰ পৱিত্ৰ চাকিৰ পোহৰে অসুয়া,অশান্তি আঁতৰাই সমাজক আলোকৰ পথেৰে অগ্ৰসৰ হ’বলৈ প্ৰেৰণা যোগায়। কৃষি ভিত্তিক এই উৎসৱ পালনৰ জৰিয়তে অসমৰ শস্য শ্যামলা পথাৰ সমূহ সোণ গুটিৰে উপচি পৰি ৰাজ্য খনৰ কৃষক সমাজক কৰ্মৰ পথাৰত আৰু অধিক উদ্যমেৰে আগবাঢ়ি যাবলৈ অনুপ্ৰাণিত কৰিব বুলি মুখ্যমন্ত্ৰীয়ে আশা প্ৰকাশ কৰে।মুখ্যমন্ত্ৰীয়ে লগতে এই বিহু পালনৰ জৰিয়তে আমাৰ মাজত থকা শান্তি -সম্প্ৰীতি আৰু ভাতৃত্বৰ এনাজৰি অধিক সুদৃঢ় হ’ব বুলিও আশা প্ৰকাশ কৰে।বৃহত্তৰ অসমীয়া জাতিৰ সাংস্কৃতিক জীৱনধাৰাক উজ্জ্বীৱিত কৰা এই কাতি বিহু উদযাপনৰ জৰিয়তে ৰাজ্য খনক আৰু অধিক বিকাশৰ তথা উত্তৰণৰ যাত্ৰাৰে অগ্ৰসৰ হোৱাৰ বাবে প্ৰেৰণা যোগাব বুলি আশা প্ৰকাশ কৰে।

ৰামপুৰ উচ্চতৰ মাধ্যমিক বিদ্যালয়ৰ মহাৰজত জয়ন্তী-  প্ৰাক্তন ছাত্র-ছাত্ৰী সতীৰ্থ সন্মিলন, সাংবাদিকৰ সৈতে প্ৰীতি ফুটবল খেল  

ঐতিহ্যপূৰ্ণ বৃহত্তৰ ৰামপুৰ অঞ্চলৰ মাধ্যমিক শিক্ষাৰ স্নায়ুকেন্দ্ৰ স্বৰূপ ৰামপুৰ উচ্চতৰ মাধ্যমিক বিদ্যালয়ৰ ৭৫ বছৰ পূৰ্ণ হোৱা উপলক্ষে মহাৰজত জয়ন্তী’ বৰ্ষ হিচাবে যোৱা ২৪ এপ্ৰিলৰ পৰা আৰম্ভ হৈ আগত ২০২২ চনৰ ২২, ২৩ আৰু ২৪ এপ্ৰিলত তিনিদিনীয়া বৰ্ণাঢ্য কাৰ্যসূচীৰে সামৰণি অনুষ্ঠান অনুষ্ঠিত হ’ব। মহাৰজত জয়ন্তী বৰ্ষৰ শুভাৰম্ভণী কাৰ্যসূচী ৭৫ খন পতাকা উত্তোলন কৰি সুচাৰুৰূপে অনুষ্ঠিত হৈ যোৱাৰ পাছত ইতিমধ্যে বিভিন্ন কাৰ্যসূচী ৰূপায়ণৰ প্ৰস্তুতি ব্যাপক কৰি তুলিছে বুলি জানিবলৈ দিয়ে  উদযাপন সমিতিৰ সভাপতি ড০ অৱনী কুমাৰ দাস আৰু মুখ্য সম্পাদক অঞ্জু ভট্টাচাৰ্যই। মহাৰজত জয়ন্তীৰ লগত সংগতি ৰাখি আজি দিনযোৰা কাৰ্যসূচীৰ বিদ্যালয় প্ৰাক্তন ছাত্ৰ- ছাত্ৰী সকলৰ এখন সতীৰ্থ সন্মিলন অনুষ্ঠিত হয়। সতীৰ্থ সন্মিলনৰ কাৰ্যসূচী অনুসৰি পুৱাৰে পৰা সামূহিক দৌৰ, পতাকা উত্তোলন, স্মৃতি তৰ্পণ, শ্বহীদ তৰ্পণ, বৃক্ষৰোপণ আৰু মূল কাৰ্যসূচী প্ৰাক্তন ছাত্ৰ ছাত্ৰীৰ মহামিলনৰ অনুষ্ঠান সতীৰ্থ সন্মীলন অনুষ্ঠিত হয়। বৰ্ষযোৰা বিভিন্ন কাৰ্যসূচীৰ অংশ হিচাপে মহাৰজত অনুষ্ঠানটো জনপ্ৰিয় তথা গণমুখী কৰাৰ মহৎ উদ্দেশ্যে আগত ৰাখি আবেলি বিদ্যালয়ৰ খেল পথাৰত বিদ্যালয়খনৰ প্ৰাক্তন ছাত্ৰ আৰু দক্ষিণ কামৰূপৰ ছপা আৰু বৈদ্যুতিন মাধ্যমৰ সাংবাদিক আৰু সংবাদকৰ্মীসকলৰ মাজত এখন প্ৰীতি ফুটবল খেল অনুষ্ঠিত হয়। উত্তেজনাপূৰ্ণ খেলখনত দক্ষিণ কামৰূপ সাংবাদিকৰ দলে প্ৰথমাৰ্ধত এক গল দি আগবাঢ়ি থাকে দ্বিতীয়াৰ্ধত বিদ্যালয়ৰ প্ৰাক্তন ছাত্ৰ সন্মীলনীয়ে এক গল দি সমতা স্থাপন কৰে। উক্ত প্ৰীতি ফুটবল খেলখনৰ বিষয় বস্তু আছিল আহক আমি পুনৰ চৰকাৰী বিদ্যালয়লৈ উভতি যাও। খেলখনৰ জড়িয়তে গ্ৰাম্যঞ্চলৰ ছাত্ৰ-ছাত্ৰী, অভিভাৱক-অভিভাৱিকা সকলক চৰকাৰী বিদ্যালয়ৰ প্ৰতি আকৰ্ষণ কৰাৰ মহৎ উদ্দেশ্যেৰে উক্ত প্ৰীতিখেল খন আয়োজন কৰা হৈছে বুলি উদ্যোক্তাসকলে জানিবলৈ দিছে। ইয়াৰে পিছত সন্ধিয়া ৫ বজাত বন্তি প্ৰজ্বলন আৰু সাংস্কৃতিক অনুষ্ঠানৰে দিনযোৰা কাৰ্যসূচীৰ অন্ত পৰিব।

শংকৰ-মাধৱৰ জীৱন দৰ্শন আৰু শংকৰী ক’লা কৃষ্টি”ৰ ভিত্তিত অনুষ্ঠিত হোৱা প্ৰশ্নোত্তৰ প্ৰতিযোগিতাত অসমৰ বিভিন্ন প্ৰান্তৰৰ দলৰ অংশ গ্ৰহণ-দুদিনীয়া কাৰ্যসূচীৰে অনুষ্ঠিত হোৱা গুৰুজয়ন্তীৰ সামৰণি

একশৰণ ভাগৱতী সমাজৰ পলাশবাৰী সমষ্টিৰ অন্তৰ্গত ৩ নং আমতলা গাঁৱত থকা শংকৰ-মাধৱ কীৰ্ত্তন ঘৰ প্ৰাঙ্গণত যোৱা ১৫ আৰু ১৬ অক্টোবৰত দুদিনীয়া বিস্তৃত কাৰ্য্যসূচীৰে মহাপুৰুষ গুৰুজনাৰ ৫৭৩ তম্ আবিৰ্ভাৱ মহোৎসৱটি উদযাপন কৰা হব । এই উপলক্ষে ১৫ অক্টোবৰৰ পুৱা ভাগৱত শোভাযাত্ৰা অনুষ্ঠিত কৰা হয় । তাৰ পিছতে ১৬ অক্টোবৰৰ পুৱা অনুষ্ঠিত হোৱা চিত্ৰাংকণ প্ৰতিযোগিতাত প্ৰথম আৰু দ্বিতীয় স্থান অধিকাৰ কৰে ক্ৰমে ৩ নং আমত’লা গাঁৱৰ চুমী দাস আৰু লোহিত দাসে । আবেলি ৩ বজাত শংকৰ-মাধৱৰ জীৱন দৰ্শন আৰু শংকৰী ক’লা কৃষ্টিৰ ভিত্তিত শিক্ষক প্ৰণৱ দাসৰ পৰিচালনাত অনুষ্ঠিত হোৱা প্ৰশ্নোত্তৰ প্ৰতিযোগিতাত যোৰহাট, নগাঁও, হাজো, ছমৰীয়া, ৰামদিয়া, বকো, ছয়গাঁৱৰ লগতে অসমৰ বিভিন্ন প্ৰান্তৰৰ পৰা কুইজ কৰিবলৈ আহে কেবাটাও আগশাৰীৰ দল । উক্ত কুইজ প্ৰতিযোগিতাত প্ৰথম পুৰস্কাৰ লাভ কৰে ৰামদিয়াৰ নিলোৎপল পাটোৱাৰী আৰু হিমাক্ষী পাটোৱাৰীৰ দলে । দ্বিতীয় পুৰস্কাৰ লাভ কৰে মনোজ কুমাৰ দাস আৰু হলিৰাম দাসৰ দলে । তৃতীয় স্থান লাভ কৰে অক্ষয় দাস আৰু হৰিদেৱ দাসৰ দলে । অতি আকৰ্ষণীয় কুইজ অনুষ্ঠিত কৰা বাবে শিক্ষক প্ৰণৱ দাসক ভাগৱতী সমাজৰ তৰফৰ পৰা সম্বৰ্ধনা জনোৱা হয় । নিশা অনুষ্ঠিত হোৱা বৰগীত প্ৰতিযোগিতাত প্ৰথম আৰু দ্বিতীয় স্থান অধিকাৰ কৰে ক্ৰমে অমূল্য দাস আৰু সনাত কুমাৰ দাসে । তাৰ পিছতে কুলডুঙৰ কণমানি শিল্পী নৱজিৎ কৈৱৰ্ত, সভাপতি হৰেন দাস, সম্পাদক নিৰ্মল দাসক সম্বৰ্ধনা জনোৱা হয় । অনুষ্ঠানৰ শেষত অচ্যুত দাস আৰু পংকজ দাস বাপে গুণমালা কীৰ্ত্তন পৰিচালনা কৰে।

ডিব্ৰুগড়ত গতি শক্তি আঁচনি সম্পৰ্কত সংবাদ মেল

ডিব্ৰুগড়ত বন্দৰ, জাহাজ, জল পৰিবহন আৰু আয়ুস দপ্তৰৰ কেন্দ্ৰীয় মন্ত্ৰী সৰ্বানন্দ সোণোৱালে আজি এক সংবাদ মেল আহ্বান কৰে। কেন্দ্ৰীয় চৰকাৰৰ অভিলাষী আঁচনিৰ “গতি শক্তি” সম্পৰ্কত বক্তব্য ৰাখে মন্ত্ৰী গৰাকীয়ে। যোৱা ১৩ অক্টোবৰ দিনা প্ৰধানমন্ত্ৰী নৰেন্দ্ৰ মোদীয়ে দেশৰ উন্নয়নৰ গতি বৃদ্ধি কৰাৰ বাবে “গতি শক্তি” আঁচনিৰ শুভ আৰম্ভ কৰে । আঁচনি খনৰ সন্দৰ্ভত সাংবাদিকক ৭ মিনিটৰ তথ্য চিত্ৰ জৰিয়তে অৱগত কৰায় মন্ত্ৰী সৰ্বানন্দ সোনোৱালে।তেওঁ জনায় যে প্ৰধানমন্ত্ৰীৰ ‘গতি শক্তি আঁচনিৰ যোগেদি দেশৰ গতি বৃদ্ধি হ’ব। চৰকাৰখনে ১৬ টা মন্ত্ৰালয় এক কৰি কাম কৰিবলৈ সাজু হৈছে। বিশ্বৰ বুকুত ভাৰতে উন্নয়নৰ গতি ত্বৰাম্বিত কৰিব। আন্ত গাঁঠনি, যাতায়ত যোগাযোগ, নিযুক্তিৰ নতুন বাট মুকলি কৰিব বুলি মন্তব্য আগবঢ়ায় মন্ত্ৰী গৰাকীয়ে। ৰাজ্যসমূহো এই আঁচনিত জড়িত হ’ব বুলি তেওঁ জনায়। বিভাগবোৰৰ সন্বয়নহীনতাৰ বাবে প্ৰগতিত বাধা আহিছিল। এতিয়া ১৬ টা বিভাগে সমন্বিত ৰূপত কাম কৰিব। ১৩০ কোটি জনতাৰ বাবে প্ৰধানমন্ত্ৰীয়ে এই আঁচনি লৈছে বুলি উল্লেখ কৰে । প্ৰাক্তন মুখ্যমন্ত্ৰী গৰাকীয়ে কংগ্রেছক সমালোচনা কৰি কয় যে বিগত কংগ্ৰেছৰ দিনত এনেধৰনৰ ঐক্যবদ্ধ আৰু শৃংখলাবদ্ধ কোনো আঁচনি গ্ৰহণ কৰা নাছিল।

দূৰ্গা পূজাৰ মাজতে অসমসহ উত্তৰ পূৰ্বাঞ্চলৰ পৰা বিদায় ললে মৌচুমী বায়ুয়ে-কমি গ`ল বৰষুণৰ পৰিমাণ

সমগ্ৰ দেশত আৰ্থ সামাজিক জীৱনত গুৰুত্বপূৰ্ণ ভূমিকা গ্ৰহণ কৰি অহা দক্ষিণ পশ্চিম মৌচুমী বায়ুয়ে চিৰাচৰিত ধৰণে এইবেলি দুৰ্গা পূজাৰ মাজতে অসম সহ উত্তৰ পূৱৰ ৰাজ্য কেইখনৰ পৰা বিদায় ল`লে । অৱশ্যে এইবেলি মৌচুমী বায়ুৰ পৰা ভবা ধৰণে অসম তথা উত্তৰ পূৱৰ ৰাজ্য কেইখনৰ কৃষক ৰাইজে বিশেষ উপকৃত নহল । বৰঝাৰস্থিত আঞ্চলিক বতৰ বিজ্ঞান কেন্দ্ৰৰ তথ্য অনুসৰি এইবেলি পহিলা জুনত উত্তৰ পূবত প্ৰৱেশ কৰা মৌচুমী বায়ুয়ে প্ৰায় চাৰিমাহ বাৰদিন পাছত অৰ্থাৎ ১২ অক্টোবৰত দুৰ্গা পূজাৰ মহাসপ্তমীৰ দিনা উত্তৰ পূৱৰ পৰা নীৰৱে বিদায় লয় । এই সময়চোৱাত উত্তৰ পূৱৰ আটাইকেইখন ৰাজ্যতে উদ্বেগজনকভাবে কমি গল বৰষুণৰ পৰিমাণ । অৱশ্যে স্বাভাৱিকতকৈ ১৯ শতাংশ বৰষুণ কম বা বেছি হলে বতৰ বিজ্ঞানৰ ভাষাত তাক স্বাভাৱিক বুলিয়ে ধৰা হয় । সেই হিচাপত উত্তৰ পূবত একমাত্ৰ ত্ৰিপুৰাত ১৫ শতাংশ ঘাঁটি হৈছে যদিও বতৰ বিজ্ঞানৰ ভাষাত সেয়া স্বাভাৱিক বুলিয়ে পৰিগণিত হৈছে । কিন্ত তাৰ বিপৰীতে বাকী ৰাজ্য কেইখনৰ ভিতৰত মণিপুৰত সৰ্বাধিক ৬০ শতাংশ , অৰুণাচল প্ৰদেশত ২৮ শতাংশ , নাগালেণ্ডত ২৬ শতাংশ , অসম আৰু মিজোৰামত ২২ শতাংশ , মেঘালয়ত ২১ শতাংশ বৰষুণ ঘাঁটি হৈছে । পৰিসংখ্যা হিচাপত এই সময়ছোৱাত অসমত বৰষুণ হব লাগিছিল ১৪৮৬.২ মিলিমিটাৰ , কিন্ত হৈছে ১১৫১.৯ মিলিমিটাৰ । ত্ৰিপুৰাত হব লাগিছিল ১৪৫৭ মিলিমিটাৰ , কিন্তু হৈছে ১২৪৫ মিলিমিটাৰ । মণিপুৰত হব লাগিছিল ১৪০৪.৯ মিলিমিটাৰ । ইফালে বতৰ বিজ্ঞান কেন্দ্ৰই বঙ্গোপ উপসাগৰত ঘটা কেতবোৰ প্ৰাকৃতিক পৰিঘটনাৰ বাবে সৃষ্টি হোৱা নিম্নচাপ আৰু সেই নিম্নচাপৰ প্ৰভাৱত ১৮ অক্টোবৰৰ পাছত অসমকে ধৰি উত্তৰ পূৱৰ ৰাজ্য কেইখনৰ আকাশ দুদিন – তিনিদিনলৈ ডাৱৰীয়া হৈ থকাৰ লগতে ঠাই বিশেষে পাতলীয়াৰ পৰা মজলীয়া পৰিমাণৰ বৰষুণ হব বুলি সদৰি কৰিছে । সমান্তৰালকৈ বতাহ বলি থাকিব বাবে তাপমাত্ৰা বহুখিনী কমি যাব আৰু ৰাইজে লাহে লাহে গেলা গৰমৰ পৰা ৰক্ষা পাব বুলি সদৰি কৰিছে।