অৰণ্য মানৱৰ আহ্বান মৰ্মে কাৰ্তিক চাপৰিত আউটপোষ্ট স্থাপনৰ নিৰ্দেশ মুখ্যমন্ত্ৰীৰ

যোৱাকালি নিশা যোৰহাট আবৰ্ত ভৱনত অনুষ্ঠিত এখন বৈঠকত মুখ্যমন্ত্ৰী সৰ্বানন্দ সোণোৱালে জিলাখনত ৰূপায়িত হৈ থকা বিভিন্ন আঁচনি পৰ্যালোচনা কৰে। জিলা উপযুক্তকে ধৰি জিলা পৰ্য্যায়ৰ বিভিন্ন শীৰ্ষ বিষয়ৰ উপস্থিতিত মুখ্যমন্ত্ৰীয়ে জিলাখনত ৰূপায়িত হৈ থকা আঁচনিৰ অগ্ৰগতিৰ বুজ লয়।

 

বৈঠকত প্ৰধানমন্ত্ৰী আৱাস যোজনা ,এম জি এনৰেগা আঁচনিৰ বুজ লৈ এই আঁচনিসমূহৰ কাম সময় নিৰ্ধাৰিত ভাৱে সম্পূৰ্ণ কৰাৰ বাবে সংশ্লিষ্ট বিষয়সকলক মুখ্যমন্ত্ৰীয়ে নিৰ্দেশ দিয়ে। আত্মনির্ভৰ ভাৰত অভিযানৰ আদৰ্শৰে ৰাজ্য চৰকাৰে আৰম্ভ কৰা আত্মনির্ভৰ অসম অভিযানক গতিশীলতা প্ৰদান কৰাৰ বাবে ৰাজ্য চৰকাৰে গ্ৰহণ কৰা আঁচনিসমূহৰ অগ্ৰগতিৰো বুজ লয় মুখ্যমন্ত্ৰীয়ে। মুখ্যমন্ত্ৰীয়ে কয় যে লকডাউনৰ সময়ত আৰু পৰৱৰ্তী পৰ্যায়ত অসমে আত্মনির্ভশীলতাৰ নিদৰ্শন দেখুৱাবলৈ সক্ষম হৈছে।

 

অসমৰ সামগ্ৰীয়ে দেশ তথা আন্তৰাষ্ট্ৰীয় বজাৰ দখল কৰিবলৈও সমৰ্থ হৈছে।ৰাজ্যৰ নতুন প্ৰজন্মই যাতে স্বাৱলম্বীতা আদৰ্শৰে আগুৱাই যাব পাৰে তাৰ বাবে চৰকাৰী আঁচনিসমূহ তৃণমূল পৰ্যায়লৈ লৈ যোৱাৰ বাবেও মুখ্যমন্ত্ৰীয়ে নিৰ্দেশ দিয়ে।মুখ্যমন্ত্ৰীয়ে কৃষি ,পশুপালন, মীন বিভাগে ৰূপায়ন কৰি থকা আঁচনিসমূহৰ বিষয়ে সবিশেষ জানিবলৈ বিচাৰে। সংশ্লিষ্ট বিভাগৰ বিষয়া সকলে আত্মনির্ভৰ অসমৰ অধীনত জিলাখন ৰূপায়িত হৈ থকা আঁচনি সমূহৰ বিষয়ে মুখ্যমন্ত্ৰীক অৱগত কৰে। মুখ্যমন্ত্ৰীয়ে তৃণমূল পৰ্য্যায়ত আন্তঃগাঁঠনি শক্তিশালী কৰাৰ বাবেও নিৰ্দেশ দিয়ে।

বৈঠকত মুখ্যমন্ত্ৰীয়ে পঞ্চায়ত আৰু গ্ৰামোন্নয়ন বিভাগে ৰূপায়ন কৰি থকা আঁচনিসমূহৰ বিষয়ে বুজ লয় । প্ৰতিখন আঁচনি ৰূপায়নৰ ক্ষেত্ৰত পঞ্চায়ত প্ৰতিনিধিক লগত লৈ কাম কৰিবলৈ তেওঁ নিৰ্দেশ দিয়ে। এই ক্ষেত্ৰত জনসাধাৰণক সম্পূৰ্ণ আস্থাত লবলৈও তেওঁ কয়। গ্ৰাম্য অৰ্থনীতি শক্তিশালী কৰাৰ বাবে পঞ্চায়তৰ আঁচনিসমূহৰ সফল ৰূপায়নৰ ওপৰত গুৰুত্ব আৰোপ কৰি মুখ্যমন্ত্ৰীয়ে পঞ্চদশ বিত্ত আয়োগৰ পুঁজি যাতে পঞ্চায়ত পৰ্য্যায়ত সুচাৰুৰুপে ৰূপায়িত হয়, তাৰ বাবে পঞ্চায়তৰ প্ৰতিনিধি সকলৰ সৈতে সহযোগিতাৰে কাম কৰিবলৈ বিষয়া সকলক নিৰ্দেশ দিয়ে।

অৰণ্য মানৱ যাদৱ পায়েং আৰু স্থানীয় অঞ্চলবাসীৰ অনুৰোধ মৰ্মে কাৰ্তিক চাপৰিত এটা আউটপোষ্ট স্থাপন কৰিবলৈও মুখ্যমন্ত্ৰীয়ে নিৰ্দেশ দিয়ে। মুখ্যমন্ত্ৰীয়ে কয় যে কাৰ্তিক চাপৰিলৈ যাতায়তৰ ব্যৱস্থা সুচল কৰা বাবে ৰাজ্য চৰকাৰে ফেৰী সেৱা আৰম্ভ কৰিছে।

Share on whatsapp
WhatsApp
Share on facebook
Facebook
Share on twitter
Twitter
Share on email
Email

ব্ৰহ্মপুত্ৰ ব’ৰ্ডৰ উদ্যোগত অনুষ্ঠিত প্ৰতিযোগিতাত পশ্চিম গুৱাহাটী মহাবিদ্যালয়ৰ সাফল্য

ভাৰত চৰকাৰৰ জলশক্তি মন্ত্ৰালয়ৰ অধীনৰ “ব্ৰহ্মপুত্ৰ আমন্ত্ৰণ অভিযান” কাৰ্যসূচীৰ লগত সংগতি ৰাখি ব্ৰহ্মপুত্ৰ ব’ৰ্ডৰ উদ্যোগত আৰু পশ্চিম গুৱাহাটী মহাবিদ্যালয়ৰ সম্প্ৰসাৰণ শৈক্ষিক কোষৰ সহযোগত বিগত ৯ জানুৱাৰীৰ দিনা পশ্চিম গুৱাহাটী মহাবিদ্যালয় প্ৰাঙ্গনত অনুষ্ঠিত হয় সদৌ আন্তঃমহাবিদ্যালয় ভিত্তিত এখনি ৰচনা আৰু তৰ্ক প্ৰতিযোগিতা। পশ্চিম গুৱাহাটী মহাবিদ্যালয়ৰ সম্প্ৰসাৰণ শৈক্ষিক কোষৰ সমন্বয়ক ডঃ মধুলিমা চলিহা তথা ব্ৰহ্মপুত্ৰ ব’ৰ্ডৰ কাৰ্যকৰ্তা ক্ৰমে গুণেশ্বৰ দাস আৰু পার্থপ্ৰতীম দাসৰ বিশেষ উদ্যোগত অনুষ্ঠিত প্ৰতিযোগিতাৰ আৰম্ভণিতে বন্তি প্ৰজ্বলন কৰে পশ্চিম গুৱাহাটী মহাবিদ্যালয়ৰ অধ্যক্ষ ডঃ ৰাণা শৰ্মাই।

আন্তঃমহাবিদ্যালয় ৰচনা প্ৰতিযোগিতাত পশ্চিম গুৱাহাটী মহাবিদ্যালয়ৰ পঞ্চম ষাণ্মাসিকৰ ছাত্ৰী নিবেদিতা বৰাই প্ৰথম স্থান অধিকাৰ কৰাৰ লগতে মহাবিদ্যালয়খনৰ উচ্চতৰ মাধ্যমিক কলা শাখাৰ প্ৰথম বাৰ্ষিকৰ ছাত্ৰী জিলমিল ৰূপালী জোনাকে দ্বিতীয় স্থান আৰু একেখন মহাবিদ্যালয়ৰে উচ্চতৰ মাধ্যমিক প্ৰথম বাৰ্ষিকৰ ছাত্ৰী নিতাম্বিনী দাসে তৃতীয় স্থান দখল কৰিবলৈ সক্ষম হয় । আনহাতে আন্তঃমহাবিদ্যালয় তৰ্ক প্ৰতিযোগিতাত মিৰ্জাৰ দক্ষিণ কামৰূপ মহাবিদ্যালয়ৰ ছাত্র চিৰঞ্জীৱ দাসে প্ৰথম , পশ্চিম গুৱাহাটী মহাবিদ্যালয়ৰ ছাত্র মানসজ্যোতি ৰাভাই দ্বিতীয় আৰু শিলচৰৰ “নীট “ৰ ছাত্ৰ ভৃগুৰাজ বড়োই তৃতীয় স্থান অধিকাৰ কৰে । উল্লেখযোগ্য যে ১৪ জানুৱাৰীৰ বিয়লি গুৱাহাটীৰ মাছখোৱাস্থিত প্ৰাগজ্যোতি সাংস্কৃতিক প্ৰকল্পত অনুষ্ঠিত এক গাম্ভীৰ্যপূৰ্ণ অনুষ্ঠানত কেন্দ্ৰীয় জলশক্তি দপ্তৰৰ মন্ত্ৰী গজেন্দ্ৰ সিং শেখাৱত , ৰাজ্য চৰকাৰৰ পৰিবহন , উদ্যোগ আৰু বাণিজ্য বিভাগৰ মন্ত্ৰী চন্দ্ৰমোহন পাটোৱাৰী , এনডিআৰএফৰ সঞ্চালক প্ৰধান এছ এন প্ৰধান , উপ মহাপৰিদৰ্শক মনোজ কুমাৰ যাদৱ আৰু ৰাফটিং বিশেষজ্ঞ সুহাসিণী শেখাৱাতে প্ৰতিযোগিতাৰ বিজয়ী প্ৰতিযোগী সকলক বঁটা সমূহ আনুষ্ঠানিক ভাৱে প্ৰদান কৰে । অনুষ্ঠানটোত ব্ৰহ্মপুত্ৰ ব’ৰ্ডৰ অধ্যক্ষ ৰাজীৱ যাদৱ , এনডিআৰএফৰ কমাণ্ডেণ্ট ৰনবীৰ সিং গীল , আইআইটি গুৱাহাটীৰ অধ্যাপক ডঃ চন্দন মহন্তকে ধৰি কেবাগৰাকী বিশিষ্ট ব্যক্তি উপস্থিত থাকে ।

নগাঁৱৰ বটদ্ৰৱাত ৰামমন্দিৰ নিধি সমৰ্পন কাৰ্য্যসূচী শুভাৰম্ভ

ভাৰতীয় মহাজীৱনৰ আদৰ্শ পুৰুষ সনাতনী দৰ্শন সংস্কৃতিৰ পথদ্ৰষ্ট্ৰা তথা মৰ্য্যদা পুৰুষোত্তম শ্ৰীৰামৰ জন্মভূমিত নিৰ্মাণ হ’বলগীয়া ৰাম মন্দিৰৰ নিৰ্মাণৰ বাবে নিধি সমৰ্পণ অভিযানৰ অংশ হিচাপে গুৰুজনাৰ জন্মস্থান নগাঁৱৰ বটদ্ৰৱা থানত তপোবনৰ সুষমাৰে সুশোভিত হৈ থকা আকাশীগঙ্গাৰ তীৰৰ পৰা পূঁজি সংগ্ৰহ কাৰ্যসূচী কালিৰে পৰা আৰম্ভ কৰা হৈছে । অযোধ্যাত স্থাপন হোৱা নিৰ্মীয়মান শ্ৰীৰাম মন্দিৰৰ বাবে ৰাইজৰ সহযোগিতা বিচাৰি শ্ৰীৰাম মন্দিৰ নিৰ্মাণ সমৰ্পণ সমিতিৰ অন্যতম কৰ্মকৰ্তা ৰাজু বৰুৱাই এই উদ্দেশ্যে ৰাইজক সম্বোধন কৰি অভিযান সন্দৰ্ভত বিস্তৃত বাখ্যা আগবঢ়াই “ ঐতিহ্যমণ্ডিত বটদ্ৰৱা ধামত গুৰু শঙ্কৰৰ আশীৰ্বাদ শিৰত লৈ বটদ্ৰৱা- ৰামমন্দিৰলৈ এই কাৰ্যসূচী লোৱা হৈছে বুলি উল্লেখ কৰে।

শ্ৰীৰাম মন্দিৰ নিৰ্মাণ কাৰ্যত গাঁৱৰ দুখীয়া লোকজনেও যাতে অনুদান আগবঢ়াই কৃতিত্বৰ অধিকাৰী হ’ব পাৰে সেই উদ্দেশ্যে গাঁৱৰ প্ৰতিঘৰ মানুহৰ ওচৰলৈ যাব এই অভিযানকাৰী দলটোৱে । নিম্নতম দহ টকা অনুদান আগবঢ়াব পাৰিব বুলিও উল্লেখ কৰে । এই কাৰ্যসূচীৰ জৰিয়তে জনসম্পৰ্কও ৰক্ষা হ’ব বুলি জানিবলৈ দিয়ে মন্দিৰ নিৰ্মাণ নিধি সমৰ্পণ সমিতিৰ কাৰ্য্যকৰ্তা দিলীপ কুমাৰ নাথে। শ্ৰীশ্ৰী বটদ্ৰৱা থান পৰিচালনা সমিতিৰ সভাপতি দেৱানন্দ দেৱ গোস্বামী আৰু সাধাৰণ সম্পাদক ইন্দ্ৰমোহন বৰুৱাই আনুষ্ঠানিকভাৱে অনুদান আগবঢ়ায় ।
শ্ৰীৰাম মন্দিৰ নিৰ্মাণৰ বাবে অনলাইন যোগেও অনুদান আগবঢ়াব পাৰিব বুলিও জানিবলৈ দিয়ে । এইক্ষেত্ৰত ৰাইজৰ সহায় আৰু সহযোগিতা কামনা কৰে তেওঁলোকে। এই অভিযানত উপস্থিত থাকে শ্ৰীৰাম মন্দিৰ নিৰ্মাণ নিধি সমৰ্পণ সমিতিৰ উত্তৰ অসম প্ৰান্তৰ সহ কাৰ্যবাহী কবীন বৰা, ৰাম জন্মভূমি নিধি সমৰ্পণ সমিতিৰ নগাঁও জিলাৰ প্ৰমূখ মানস শইকীয়া, খণ্ড নিৰিক্ষক মানিক নাথ, সমাজকৰ্মী জোনাৰাম বৰুৱা, তপন গোস্বামী, গৌতম গিৰি গোস্বামী, বটদ্ৰৱা শংকৰদেৱ বিদ্যা নিকেতনৰ প্ৰধান আচাৰ্য সোনামনি কলিতা, বটদ্ৰৱা সত্ৰ গাওঁ পঞ্চায়তৰ সভানেত্ৰী নমিতা হাজৰিকা বৰা, গোপাল কলিতা , দিব্যজ্যোতি বৰুৱা, কন্দৰ্প কুমাৰ কলিতা ,অমৰজ্যোতি কলিতা , অমৃত বৰুৱা, চন্দ্ৰামিকা কলিতা, সুস্মিতা বৰুৱা প্ৰমুখ্যে শতাধিক ৰাইজে ।
খবৰ যুগুতালে নগাঁৱৰ পৰা ৰাহুল দেৱ বৰদলৈয়ে..

আজি ক’ভিডৰ ভেকচিন প্ৰদান কৰিব

সমগ্ৰ দেশৰ লগতে অসমতো আজি ক’ভিড ভেকচিন প্ৰদানৰ প্ৰক্ৰিয়া আৰম্ভ হ’ব। আজি ৰাজ্যৰ ১২ গৰাকী জ্যেষ্ঠ চিকিৎসকে ক’ভিডৰ ভেকচিন গ্ৰহণ কৰিব।স্বাস্থ্য মন্ত্ৰী গৰাকীয়ে প্ৰকাশ কৰা অনুসৰি প্ৰথম ভেকচিন গ্ৰহণ কৰিবলগীয়া জ্যেষ্ঠ চিকিৎসক সকলৰ ভিতৰত আছে শ্ৰীমন্ত শংকৰদেৱ বিশ্ববিদ্যালয়ৰ প্ৰাক্তন উপাচাৰ্য ডাঃ উমেশ চন্দ্ৰ শৰ্মা, বৰপেটা চিকিৎসা মহাবিদ্যালয়ৰ প্ৰাক্তন অধ্যক্ষ ডাঃ ধ্ৰুৱজ্যোতি বৰা।

অসমত আজি ৰাজ্য খনৰ জনসংখ্যাৰ মুঠ ৩ শতাংশ লোকক ক’ভিড ভেকচিন প্রদান কৰা হ’ব বুলি স্বাস্থ্য মন্ত্ৰী গৰাকীয়ে সদৰি কৰে।ক’ৰণা যোদ্ধা আৰু ৰুগীয় লোকক ভেকচিন প্ৰদানৰ ক্ষেত্ৰত অগ্ৰাধিকাৰ দিয়া হ’ব বুলি তেওঁ কয়।প্ৰথম পৰ্যায়ৰ ভেকচিন প্ৰদান কাৰ্যসূচীত প্ৰায় ১ লাখ আৰক্ষী আৰু অৰ্ধ-সামৰিক বাহিনীৰ লোকক সামৰি লোৱা হ’ব।ইয়াৰোপৰি এম্বুলেন্সৰ চালক,প্ৰায় ১ লাখ ৯০ হাজাৰ চিকিৎসক,নাৰ্চ আদিকো প্ৰথম পৰ্যায়ত ভেকচিন প্ৰদান কৰা হ’ব।ইতিমধ্যে ভেকচিন প্ৰদান কৰিবলৈ ৮৬৫১ গৰাকী লোকক প্ৰশিক্ষিত কৰি তোলা হৈছে।ৰাজ্যৰ ৬৫ টা কেন্দ্ৰত আজি ভেকচিন প্ৰদান কৰা হ’ব।অসমতে এতিয়ালৈকে কোভিশ্বিল্ডৰ ২০১,৫০০ টা আৰু কোভিস্কিনৰ ২০,০০০ টা ডোজ লাভ লাভ কৰিবলৈ সক্ষম হৈছে।

চুক্তিত স্বাক্ষৰিত হ’ল গুৱাহাটীৰ আই আই টি আৰু উত্তৰ পূব কৰ্কট চিকিৎসালয় আৰু গৱেষণা প্ৰতিষ্ঠান

গুৱাহাটী আই আই টি আৰু যোৰহাটস্থিত উত্তৰ পূব কৰ্কট চিকিৎসালয় আৰু গৱেষণা প্ৰতিষ্ঠানৰ মাজত যোৱা ১৩ জানুৱাৰীত এক চুক্তি স্বাক্ষৰ কৰা হয়।উল্লেখ্য যে ২০১৪ চনৰ পৰাই এই চুক্তিৰ প্ৰাৰম্ভিক কাম-কাজ আৰম্ভ হৈছিল।

উত্তৰ-পূৰ্বৰ কৰ্কট ৰোগৰ সম্ভাৱনা থকা জনসংখ্যা চিনাক্ত কৰাৰ বাবে গৱেষণা পদ্ধতি উন্নত কৰাৰ প্ৰচেষ্টাত ইণ্ডিয়ান ইনষ্টিটিউট অফ টেকন’লজী,গুৱাহাটী (আই আই টি জি )আৰু উত্তৰ পূব কৰ্কট চিকিৎসালয় আৰু গৱেষণা প্ৰতিষ্ঠানৰ মাজত এই চুক্তি সম্পন্ন হৈছে।

লক্ষণীয়ভাৱে দুয়োটা প্ৰতিষ্ঠানে কৰ্কট ৰোগ নিৰ্ণয়,চিকিৎসা আৰু পুনৰাবৃত্তিৰ বাবে উপন্যাস বায়োমাৰ্কাৰ চিনাক্ত কৰাৰ প্ৰচেষ্টাত নিয়োজিত হৈ আছে।ইয়াৰ উপৰিও তেওঁলোকে সমগ্র পূৰ্বৰ কৰ্কট ৰোগীসকলক সহায় কৰাৰ বাবে চিকিৎসা পদ্ধতি বিকশিত কৰাত ব্যস্ত আছে।

এন আৰ এলক সৰ্বোত্তম পৰিচালিত কোম্পানী২০২০ বঁটাৰে পুৰস্কৃত

নুমলীগড় ৰিফাইনেৰী লিমিটেডক অগ্ৰণী ৰাষ্ট্ৰীয় পেছাদাৰী সংস্থা দ্য ইনষ্টিটিউট অব কোম্পানী চেক্ৰেটাৰীজ অব ইণ্ডিয়াৰ দ্বাৰা কৰ্পোৰেট পৰিচালনাত উৎকৃষ্টতাৰ বাবে সৰ্বোত্তম পৰিচালিত কোম্পানী আনলিষ্টেড লাৰ্জ হিচাপে ৰাষ্ট্ৰীয় বঁটাৰে বিভূষিত কৰিছে।প্ৰতিষ্ঠানটিয়ে এনআৰএলৰ কোম্পানী সচিব শ্ৰী এইচ কে শৰ্মাক বৰ্ষটোৰ গৱৰ্ণেন্স প্ৰফেছনেল হিচাপেও পুৰষ্কৃত কৰিছে।
এখন প্ৰশস্তি পত্ৰ আৰু ট্ৰফী সন্নিবিষ্ট এই বঁটাটো এনআৰএলৰ পৰিচালন সঞ্চালক এছ কে বৰুৱাক অধ্যক্ষ আশিষ গাৰ্গে দ্বাৰা যোৱা ১৩ জানুৱাৰীত নতুন দিল্লীত প্ৰদান কৰা হয়।পুৰস্কাৰ সমাৰোহত ভাৰ্চুৱেল মাধ্যমেৰে যোগদান কৰে ভাৰত চৰকাৰৰ মাননীয় কেন্দ্ৰীয় ৰেল,বাণিজ্য আৰু উদ্যোগ,উপভোক্তা পৰিক্ৰমা,খাদ্য আৰু ৰাজহুৱা বিতৰণ মন্ত্ৰী শ্ৰী পীয়ূশ গোৱেল ,আদিত্য বিৰলা গ্রুপৰ অধ্যক্ষ কুমাৰ মঙ্গলম বিৰলা আৰু আইচিএছআইৰ সদস্য সকলে।কৰ্পোৰেট গৱৰ্ণেন্সত এই আইচিএছআই ৰাষ্ট্ৰীয় বঁটাটিয়ে কৰ্পোৰেট গৱৰ্ণেন্সত প্ৰচলিত সৰ্বোত্তম প্ৰথাক স্বীকৃতি প্ৰদান কৰে আৰু কৰ্পোৰেট খণ্ডত ভাল গৱৰ্ণেন্স আৰু সামাজিক দায়বদ্ধতাৰ সংস্কৃতিৰ উৎকৰ্ষ সাধন কৰে।

১৭জানুৱাৰীৰ পৰা কলাক্ষেত্ৰত অনুষ্ঠিত হ’ব ৰূপকোঁৱৰ নাট্য উৎসৱ

অসমীয়া সংস্কৃতিৰ প্ৰাণকেন্দ্ৰ শ্ৰীমন্ত শংকৰদেৱ কলাক্ষেত্ৰই এই বছৰৰ পৰা আয়োজন কৰিবলৈ প্ৰয়াস কৰিছে নাট্য চৰ্চাৰ এক বিশেষ অনুষ্ঠান ৰূপকোঁৱৰ নাট্য উৎসৱ।অসমৰ সাহিত্য আৰু সংস্কৃতিৰ ৰূপকাৰ জ্যোতিপ্ৰসাদ আগৰৱালা দেৱৰ পবিত্ৰ স্মৃতিত নিবেদন কৰা হ’ব চৌখিন নাট্য সম্ভাৰ।

প্ৰথমবাৰৰ বাবে অহা ১৭ জানুৱাৰী পৰা ১৯ জানুৱাৰীলৈ শ্ৰীমন্ত শংকৰদেৱ কলাক্ষেত্ৰৰ শ্ৰীশ্ৰী মাধৱদেৱ আন্তৰ্জাতিক প্ৰেক্ষাগৃহত তিনিদিনীয়া কাৰ্যসূচীৰে ৰূপকোঁৱৰ নাট্য উৎসৱ আৰম্ভ হব।১৭ জানুৱাৰী শিল্পী দিৱসৰ দিনা শুভাৰম্ভ হ’বলগীয়া নাট্য উৎসৱৰ প্ৰথম নাট্য নিবেদন জ্যোতিপ্ৰসাদ আগৰৱালাৰ কালজয়ী নাটক কাৰেঙৰ লিগিৰী। বিশিষ্ট অভিনেতা পৰিচালক প্ৰাঞ্জল শইকীয়াৰ পৰিচালনাত নাটখনি প্ৰয়োজনা কৰিছে যোৰহাটৰ কৃষ্টিৰ পথাৰ নাট্য গোষ্ঠীয়ে।

১৮ জানুৱাৰী দিনা নাটক কবিগুৰু ৰবীন্দ্ৰনাথ ঠাকুৰৰ মূল কাহিনী শ্ৰীপত্ৰৰ আধাৰত ইতি মৃণালিনী।ৰাষ্ট্ৰীয় নাট্য বিদ্যালয়ৰ স্নাতক অসমৰ গৌৰৱ ৰবিজিতা গগৈৰ অভিযোজনা, পৰিকল্পনা আৰু পৰিচালনাৰে জিৰচং থিৰেটাৰে এই মননশীল নাটখন উপস্থাপন কৰিব। তৃতীয় দিনা ১৯ জানুৱাৰী সন্ধ্যাৰ নাট্য প্ৰযোজনা ৰাষ্ট্ৰীয় খ্যাতি সম্পন্ন নাট্যগোষ্ঠী পূৰ্বৰংগ’ৰ ঘটোৎকচ পুত্ৰ মোৰ। নাট্যকাৰ মৃণ্ময় ভূঞাৰ অভিনৱ নাট্য ৰচনাৰে পৰিকল্পনা পৰিচালনা আৰু সংগীত বিশিষ্ট অভিনেতা নাট পৰিচালক গুণাকৰ দেৱ গোস্বামীৰ।

শ্ৰীমন্ত শংকৰদেৱ কলাক্ষেত্ৰ শ্ৰীশ্ৰী মাধৱদেৱ আন্তৰ্জাতিক প্ৰেক্ষাগৃহত প্ৰতিদিনে সন্ধিয়া ৬-৩০ বজাত আৰম্ভ হ’ব লগীয়া এই নাট্যনুষ্ঠান পূৰ্বে প্ৰেক্ষাগৃহ প্ৰাংগনত সন্ধিয়া ৫-৩০ বজাত অনুষ্ঠিত হ’ব পূৰ্বৰংগ অনুষ্ঠান।এই অনুষ্ঠানত প্ৰথমদিনা কামৰূপী ঢুলীয়া চাৰকাছ,দ্বিতীয় দিনা পুতলা নাট্য আৰু তৃতীয় মুকাভিনয়ৰ এক বিশেষ কাৰ্যসূচী ব্যৱস্থা কৰা হৈছে।নাট্য উৎসৱৰ আটাইকেইদিনৰ নাট্য সন্ধিয়াত সমূহ নাট্যপ্ৰেমী ৰাইজৰ উপস্থিতি কলাক্ষেত্ৰ সমাজে কামনা কৰিছে।